Read Futuna-Aniwa 1Petrus 5 Bible Online

1Petrus 5 - Futuna-Aniwa bible

1Petrus 5

¹Ura, sun kankan kuramingnyi dib tenen nang kalingsina nang asi uram ton ebdeibkwinsin. Ara, ni Petrus bibabyi dib tenen nang kalingsinanyi kunun ci, niryi darab-darab ebsiniryi, sunda ni ab tonkwa ninyi kalingnamib nang asi uram ton ebdeibkwinsin. Nun Du Kristus mambul dinyi boramwe asi niryi asing eibmase to asi, “Diba,” eboka lak eterenanyi kunun ati, sunci ni uram diboka kekebnindarur. Tonda, nun Du Yesus bira Iya Erebdobnyi kurandiryi imtam aryi kuboka yuryangaci ura, Erci, “Ni dam kunanyi,” tenen nibabyi erebdeibkwanir. Ati, sunci a dinyi ati teneramun ci, ni yan memesin uram kekebnindarur.

²Sunci sun dib tenen nang kalingnamun ci, “Nunda Er Imtamnyi biryi domba wininanyi bito nang tikeibmasou,” teneramun ci, sun dib tenen nang asi diboka kalikmilibdarur. Ati, sunci sulbalyi kanya boboka Er Imtamnyi domba asi kalikmunyei. Erda, sunci, “Busul kanya boboka kalikwayeb,” tenen Er Imtamnyi domba asi kalingna teleb. Ato kuramunyi uca, sunci Er Imtamnyi biryi takubdeibmasou to kunubkwandum. Ati, sunci, “Co bok ilinto dobdobtibyi uca, sun dib tenen nang kalikwantibya,” tenen kum. Erda, sunci busul kuboka kalingna teleb.

³Nun Nai biryi takubdeibsou uca, sun dib tenen nang asi kalikwandum ci, sunci sundamnyi erebdeibdandoka sun dib tenen nang asi arung-arung ena mem. Erda, kiklina nang ato kuboka abmun ci, sunci Er Imtamnyi domba mer asi diboka kalikdarur.

⁴Busul kuboka kalingnamunyi ba, nun Du Yesus Kristus bira domba kalingna deyoknyi imtam aryi kuboka yuryangaci ura, Erci sunsi erebdeiboka dengna weik dinyi karebkwansir ati ebman. A dengna weik dinyi ara wanikminikman kum kubkwansir iya kubkwande dinyi asi karebkwansir.

⁵Ato kuboka sun kankan kuramingnyi kam nang ababyi neiktoto sun wise nang uram asi kekebdarur. Sun nirya ara luknubdob kanya boramun ci, yuk nang ati, “Nun naiyabwe,” tenena teleb. Er Imtamnyi Kerek Sengna umbura aryi ato eteresurur. “Nun Nai Imtamnyi bira sundamnyi ererdeirirdan nang ati, ‘Ni li,’ tenen bisik sengminingdur. Ba, sun luknubdob kanya bon nang ati Erci, ‘Ni mabwe nermabwe,’ tenen dorosurur,” eboka sekdeibmou. (Amsal 3:34)

⁶Ati, nun Nai Imtamnyi mikib aryi mambul dinyi ilinto karebsici uca, sunci yu kanya bobmunyei. Erda, sunci, “Nun Nai,” tenen sundamnyi luknubdongobdandarur. Sundamnyi luknubdongobdamunyi uca, nun Nai biryi sunsi erebdeibkwansir, Ara, nun Nai biryi karebkwansir tum berekci ura, Erci sunsi erebdeibkwansir.

⁷Sun kanya dam aryi mambul kubdeibsici dinyi nirya ara nun Nai Imtamnyi taruk dam deibdarur ati ebman. Ba, nun Nai biryi sunti bico tenesurur deyok aryi, sunsi kalikwansurura.

⁸Ura, sunci sun kanya darabdobmun ci, malyi kun dinyi bai donokmunyi ura, kalikdandarur. Isa sienyi si Iblis bira nun ordananyi biryi, “Sakeibtinyi,” tenen ingkirikde yibasurur. Ninyi on kam si singa ara nguru-nguru eboka, “Oyibtinyi,” tenen yibinkirikoka ingkiringkiringnande to, isa sienyi Iblis bibabyi neiktoto er obmanto nang ati yibinkirikoka ingkiringkiringsurur.

⁹Ati, sunci sun dib tenen dinyi asi katabum eboka tikokmunyi ura, isa sienyi bisi bisik sekdarur. Ura, sunci ato tenebdarur, “Nun kwityabwe im dangna tukwe dangna dantam nirya aryi kuraming dib tenen nang ababyi neiktoto mambul dinyi boraming.” Sunci ato tenen bikmun ci, kanya katabum eboka dib tenebmurubdarur.

¹⁰Ura, nun Nai Imtamnyi bira langdeiboka kisal dangsurutnyi biryi sunsi katabum erdeirisina teleb. Nun Nai biryi nunsi nabdeibmasou ara, “Ni Mi Kristus dam kun nang kibdeibnyi uca, Niryi sunsi erebdeiboka iya kam kun dinyi karebkwan,” tenen nabdeibmasou. Ara, uki mitikanun kuboka mambul dinyi bobmunyi ura, Erci sunsi teleb kibdeibsiryi, lulungna kum uca mikib weik kibdeibkwansir.

¹¹Nun Nai bira tanglona kum uca iya mikibnyi kurmurutnyi kubdur. Amin.

¹²Ura, ni Petrus biryi, “Ato-ato kerek sekeibdum,” ebman uca, nun kwit Silwanus biryi a kerek sengna sekeibmasir. Nun kwit Silwanus bira wa irlona kumnyi kurur ati ebman. Nunci sunsi bumang uram eboka kerek sekeibmasinim. Ara, “Sun kanya katabum ebdeibkwanim,” tenen kerek sekeibmasinim. Tonda, “Nun Nai Imtamnyi bira langdeiboka kisal dangsurur ati diboka bikwaming,” tenen kerek sekeibmasinim. “A uram katabum eboka talebkwaming,” tenen lak eboka kerek sekeibmasinim. Ati, nun Nai biryi sunsi kisal dangsurur ati, sunci katabum eboka dib tenebmurubdarur.

¹³Ura, ni kwityabwe. A kunum sirya kerek sekeibmasinim. Sun weik atei Babilon aryi kuramingnyi dib tenen nang aryi sunsi, “Teleb,” ebmasing. Babilon atei sirik ati kum ebmasin. Erda, kebdeiboka Babilon doraming atei ati ebman. Nun Nai Imtamnyi biryi sun akatei asi kuramingnyi dib tenen nang sun ab tonkwa wibdeibmasou ati ebman. Tonda, nun kwit Markus ni boukwe weik kununyi bibabyi sun nirya asi kibdobmasir.

¹⁴Sunci sun mamum teleb ebdandarur. Ara, nunda dib tenen nang aryi, “Kibdandobkwayeb,” tenen irirdanub to, sunci sun mamun irirdana teleb. Ura, sunda nun Du Yesus Kristus dam kurandum nang nirya asi nun Nai Imtamnyi biryi antanibdeibsici uca, kilkil kanya karesina teleb.