Read Futuna-Aniwa 2Petrus 1 Bible Online

2Petrus 1 - Futuna-Aniwa bible

2Petrus 1

¹Ni Simon Petrus bira nun Du Yesus Kristus biryi bokdonoknou ba, nun Du Yesus wa irmilinanyi kunun ci, sun dib tenen nang ati kerek sekeibkwinsin. Nun Du Yesus Kristus bira nun Nai Imtamnyi bitonyi kuboka Iya Erebdobnyi biryi, “Ni mabwe nermabwe kibdeibkwan,” tenen ninyi Lemsurutnyi kurur. A deyok aryi, nun Du Yesus biryi karebsou uca, sunda minob ura Er Imtamnyi bira walwal nang kurandau ababyi danguboka nun Du Yesus bisi dib tenerandum. Ara, nunda Teleb Uram erbana nang ara diboka dib tenenub to, sunbabyi neiktoto nun Du Yesus bisi diboka dib tenerandum.

²Ni kwityabwe ab ni kwinyabwe ab, nun Nai Imtamnyi biryi, “Ni mabwe nermabwe,” tenen sunsi kisal dangsina teleb. Tonda, nun Nai biryi sunsi antanibdeiboka sun kanya teleb akwe kurdeirisina teleb. Ara, sunci nun Nai Imtamnyi ab nun Du Yesus Kristus ab dam kun nang kuramun ci, diboka biktabakmunyi uca, nun Nai biryi sunsi kisal dangsina ab, teleb kanya kurdeirisina ab langdeiboka karesina teleb.

³Nun Du bira iya mikibnyi biryi karebmasou uca, nunci, “Er Imtamnyi urasintam aryi ato-ato kuboka teleb dinyi kunubkwanub,” tenen nirya bingnub. Ba, nunci nun Nai nabsounyi dam kun nang kiboka Ersi bingnub uca, nunci Er urasintam aryi teleb dinyi kununub. Nun Nai bira iya mililnyi ab iya teleb kurutnyi biryi nunti kiknibminikmasou uca, nunci bikdobibyi ura, Er urasintam aryi teleb dinyi kunubde banub ati ebman.

⁴Nun Nai biryi a dinyi nirya kiknibminiksou uca, Erci nunsi, “Ato-ato lebde binkwansin,” eboka nunti ebdeibsou uram yuk-yuk asi karebmasou. A ebdeibsou uram yuk-yuk ara iya Teleb Uram ton bikdob uram kurur. Ati, sunci a erdeirisin uram yuk-yuk asi dib teneramunyi uca, sunci nun Nai Imtamnyi bito nang kibmun ci, iya kam kubkwandum. Ato kuramunyi uca, sunci, “Nun malyi tenen dinyi ara nun kanya ab nong ab nirya kum dasicei,” tenen sun kanya aryi malyi tenen dinyi asi takloboka iya kam kun dinyi asi dobdobdarur.

⁵A deyok aryi, sunci busul kuboka, “Nun Du bisi dib teneramibiryi, ninyi urasintam aryi teleb dinyi kununa ababyi kubkwayeb,” tenen kubdarur. Tonda, “Ninyi urasintam aryi teleb kuramibiryi, nun Nai Imtamnyi dam kuboka Ersi bingdona ababyi biktabakwayeb,” tenen kubdarur.

⁶Tonda, sunci nun Nai bisi tabakoka bingnamun ci, sunci, “Malyi dinyi kubibyei,” tenen sun kanya nurubdobkwandarur. Tonda, sun kanya nururoramun ci, sunci tanglona kum uca nun Du Yesus bisi milibdarur. Tonda, tanglona kum uca nun Du Yesus bisi miliramun ci, sunci Er Imtamnyi urasintam aryi teleb dinyi kunubdarur.

⁷Tonda, Er Imtamnyi urasintam aryi teleb dinyi kunuramun ci, sunci sun kwityabwe dib tenen nang asi boukwe kibdeibdarur. Tonda, sun dib tenen nang asi boukwe kimdeiriramun cok, sunci ninyi nirya asi boukwe kibdarur.

⁸A dinyi nirya ara sun kanya dam tabakdongoboka kunuramunyi ura, talyi kum kubkwandum. Erda, sunci ato kuboka nun Du Yesus Kristus bisi tabakdongoboka bingdoramunyi ura, du weik moubkwansir.

⁹Bok, a dinyi nirya sun kanya dam kum kuransici nang ara asing kuanci nang aryi utotoa asing diboka eirkatana kum kuraming nang ato kunung. Sun ato kuramingnyi nang ara, “Nun malyi kuramoubwe dinyi ara nun Nai biryi sirya kilibmasou,” tenena ara luba kimnung aryi nun Nai biti du moun kum nang kunung.

¹⁰A deyok aryi, ni kwityabwe, sunci a dinyi nirya teneramun ci, sundamnyi busul kuboka kalikdandarur. Ara, sunci, “Nun Nai biryi nunsi wibdeiboka nabmasou ara tabakoka lak kibsute,” tenen busul kubtabakoka nun Nai dam kun nang kubde bindarur. Ato kuramunyi ura, sunci tanglona kum uca nun Du Yesus bisi milibkwandum.

¹¹Ato kuramunyi uca, aminda aryi nun Du Yesus Kristus Ninyi Lemsurutnyi biryi sunsi aminda aryi, “Ni dam yandarur,” eboka kibdobkwansir. Ara, nun Du Yesus iya weik sienyi kuboka tanglona kum uca kalikwansir ai wengbinkwandum ba, Erci, “Ni kwityabwe, ni kwinyabwe,” tenen sunsi diboka kibdobkwansir.

¹²Ati, niryi, “A uram luba kibingnyei,” tenen sunsi ato ebmasin cok, aminda ababyi tamuboka ebde binkwansin. Sunci a ebmasin dinyi nirya sirya bingdarur ci, dib en uram katabum eboka talerandum bok, niryi, “Busul kuboka nun Du Yesus bisi diboka milibde binkwaming,” tenen sunsi tabakdongoboka ebde binkwansin.

¹³Ni kanya teleb tenenun to, ni kam tuba kunmaryi talak aryi niryi a uram asi tamuboka ebde binkwansin.

¹⁴Ato ebman ara, nun Du Yesus Kristus biryi, “Minola dibkwandim,” eboka nisi lak kibdeibmanou ba, bikdase. Ati, uki mitikanun kubde banmabyi ani, dibkwan ara nidamnyi sirya bikdanman.

¹⁵Ati, niryi, “Ni sirya dibnyi ababyi, a eterena uram nirya ara tuba-tuba teneibkwanung,” tenen busul kuboka abniryi, a eterena uram asi tamuboka eterebde binkwansin.

¹⁶Nunci sunsi, “Nun Du Yesus Kristus bira iya mikibnyi ton, milil weiknyi kuboka tamuryankwansir,” eboka etereransoubwe ara nunung uram kum etereransoubwe. Erda, nunci nun Du Yesus milil asi asing eiramoubwe to, nunci nun Du Yesus deyok ati dib en uram akwe etereransoubwe. Ara, nun Du Yesus tukwetam tuba kuramwe talak aryi nun winiryi nang Er ab tonkwa mutuk kon welebmaburyi, asing dinmoubwe uca, nun Du Yesus bira Erdamnyi milil weiknyi lak kibdanmou.

¹⁷A talak aryi nun Nai Imtamnyi biryi nun Du Yesus bisi mikib ab milil ab karebmou ati ebman. Ura, nun Nai Iya Erebdobnyi biryi nun Du Yesus biti ato lak ebmou. “Anyi bira Ni Mi, ni boukwe weik kununyi kurur. Erda Ni Mi, Ni kanya iya teleb kunurur Mi kurur,” ebmou.

¹⁸Ato ebmou ara, nunda nun Du Yesus ab tonkwa iya teleb mutuk kon kubmoubwe nang winiryi aryi nun amol kekebmoubwe bok, imtam aryi kuboka uram ato ebmou.

¹⁹Ato ebmoubwe asi, nunsi sun Er Imtamnyi Uram ebdeibmaci to lak etereramnyi nang aryi eransei uram ababyi iya dib en uram kurur deyok aryi nunsi katabum erdeirisurur. Ati, sunci a uram ati, “Kunuk ai berengdeirisurur uram,” tenen diboka diblilibdarur. A uram asi diboka dibnilibmunyi uca, nun Du bira kurya ulul atonyi anamyandoka abdiryi, sun kanya yuk-yuk asi berekeibkwansir.

²⁰A uram ara ninyi tenen kanya aryi kum anaramwe ba, uram ermurunanyi biryi, “Lak kibdeibkwan,” tenen kanya ababyi kum anaramwe. Yuma kobdob iya bikwamunyi dinyi ara ato.

²¹Er Imtamnyi Uram ara tukwetam nang tenen kanya aryi kum anaramwe ati ebman. Erda, Er Imtamnyi Kanya Roh Kudus aryi tek deib aryi erkareramwe uca, Er Imtamnyi bisi wa irmilin nang aryi a uram asi ermururamnyi ati ebman.