Read Futuna-Aniwa 2Petrus 2 Bible Online

2Petrus 2 - Futuna-Aniwa bible

2Petrus 2

¹Sun Israel yala nang minob kuramnyi nang kankan ababyi tola uram eteren nang kuramnyi to, ukuryok sun dib tenen nang kuranduma kankan ababyi tola uram eteren nang kubkwaming ati ebman. A nang ara iniboka tola uram asi etereraming bok, sun uram keken nang aryi, “A nang etereransing uram ara tola uram asi etereransing,” tenen ara ola kum bikwaming. A tola uram ara ninyi kanya bowaningminingdur uram kurur asi eterenung ati ebman. A nang ara nun Du Yesus Kristus biti, “Nun Nai Lebsounyi, erebdob Arungdeirisurutnyi,” tuba kum tenebkwaming. Erda, sunci nun Du Yesus biti, “Anyi nun li,” ebkwaming. Ato ebingnyi uca, nun Nai Imtamnyi biryi a nang asi weneboka minola kum daneibkwande.

²Tonda, a tola uram eteren nang ara alyi kun kum asa aryi, “Talyi yobdatibyi,” tenen malyi kun dinyi utotoa kubkwaming. Ukubkwaming ba, ninyi ilinto aryi miliboka neik malyi kun dinyi kubkwaming. Dib tenen nang kankan asi ninyi ilinto aryi ato kuboka malyi kubkwaming deyok aryi, sun dib tenen kum nang aryi, “Sun Kristus milin nang ara malyi dinyi akwe kunung se,” eboka tatab-tatab ebkwansing.

³Tonda, a tola uram eteren nang aryi sun tula kiringna deyok aryi, “Nun uram kekesin nang aryi co bok ilinto karebsiting,” tenen sun kanya aryok nunung kuna liboka utotoa eterebkwansing. Bok, nun Nai Imtamnyi biryi minob talak aryi kuboka a nang ati, “Diboka wenebkwan,” teneramwe deyok aryi, Erci sunsi minola kum daneibkwande.

⁴Minob ura, Er Imtamnyi Uram eryuryangan nang kankan ara ton nang aryi Er Imtamnyi biti, “Nun li,” tenen malyi kubmai. Ura, nun Nai Imtamnyi biryi a nang ati, “Ni amwetam kun nang kunung ati Niryi wenena kum kubkwan, erda boukwe kubkwan,” kum tenebmou. Erda, Erci a nang ara Er uram eryuryangan nang asi ilila uk mekwan dam yakdonokmou. Ura, nun Nai biryi, “Sirya kobdob talak aryi weik wenena wenebkwan,” tenebmou ci, a nang asi tabwe deboka iya kunuk mutuk dam yakdonokmou. Ura, nun Nai biryi Er Uram eryuryangan nang ati, “Diboka wenebkwan,” tenerur bok, Erci nun tukwetam malyi kuramingnyi nang kankan kuboka tola uram eteresin nang asi wenena kum kubkwande tenebmarum do? Ato tenen kum.

⁵Tonda, sun minob talak kuramnyi nang aryi Er Imtamnyi Uram kum kunuramnyi ura, nun Nai Imtamnyi biryi a nang ababyi wenebmou. Ara, nun Nai biryi ilila on me karebmou uca, ninyi nirya me yibsekmou. Yuk nang ara nirya me yibsekmou bok, nun Nai Imtamnyi biryi nun aibwe Nuh ab er mabwe nermabwe ab ninyi inbaryi nang ab lebdeiboka kalikmou. Nun aibwe Nuh bira, “Er Imtamnyi urasintam aryi teleb dinyi kunubdarur,” eboka eterermururamunyi biti ato ebman.

⁶Tonda, sun minob Sodom atei ab Gomora atei ab kuramnyi nang aryi malyi kun dinyi kuramnyi ababyi, nun Nai Imtamnyi biryi sunsi wenebmou. Ara, nun Nai biryi imtam aryi uk mo karebmou ba, akatei bitinyi asi ai ab ninyi ab uk aryi nirya yibsekmou. A wenebmou dinyi ara nun Nai Imtamnyi biryi sun Er Uram kununa kum kuramingnyi nang nirya asi aminda neiktoto kuboka weik wenen dinyi karebdiryok, sunsi diba ati wenebkwande to lak kimsurur.

⁷Ura, Sodom atei nang ab Gomora atei nang nirya asi wenebmou bok, nun Nai biryi nun aibwe Lot bisi lebdeibmou. Nun aibwe Lot bira Er Imtamnyi urasintam aryi teleb dinyi kunuramunyi biti ato ebman. Nun aibwe bira Sodom atei ab Gomora atei tingyandoka kuramuryi, erci a nang aryi talyi yordan dinyi ati, “Se, malyito kuraming,” tenen mambul weik kanya boramwe. Ato kuramwe ba, nun Nai biryi lebdeibmou ba, nun aibwe bira akatei nang ab tonkwa kum dibmai.

⁸Nun aibwe Lot bira Er Imtamnyi urasintam aryi teleb dinyi kunuramunyi kuramuryi, sun Sodom atei nang ab Gomora atei nang ab tonkwa tuba-tuba kuramnyi. Ato kuramwe uca, nun aibwe biryi sun akatei nang malyi kun dinyi nirya asi asing eiriramuryi, uram kekeramwe aryi er kanya teleb ara mambul weik doramwe.

⁹Ato kuboka nun Nai Imtamnyi bira sun Er Uram kunuramingnyi nang ara lebde baransir. Ara, ninyi aryi mambul kimdeiriransingnyi ababyi yuk dinyi aryi mambul kimdeiriransici ababyi nun Nai biryi lebde baransir. Ba, sun malyi dinyi kuramingnyi nang ati Erci wenebde barur. Ani, weik wenen tum berekci ura, Erci sunsi weik wenena kareboka wenebkwande.

¹⁰Ara, sun, “Talyi yordan dinyi akwe kunubde binkwayeb,” tenen malyi kuramingnyi nang asi Er Imtamnyi biryi nunukoka wenebkwande. Tonda, sun nun Nai kalingsurutnyi biti, “Er Uram kununa nun li,” teneramingnyi nang ababyi Erci nunukoka wenebkwande. A malyi kun nang ara sundamnyi ererdeirirdaraming ci, sunci akata doboka sun imtam kuboka Uram eryuryangan nang ababyi ina ngilingnaming.

¹¹A nang ara tukwetam nang kuramingiryok, imtam kuboka Uram erban nang asi ina ngilingnaming. Ina ngilingnaming bok, Er Imtamnyi Uram eryuryangan nang ara mikib weik kuraming nang ababyi, a tola uram eteren nang asi nun Nai Imtamnyi urasintam aryi ina ngilingna kum kunung.

¹²A tola uram eteren nang ara sun bita kum bingnamingnyi bok, “Nunda diboka bingnub,” teneboka abingiryi, talyi ati ina nglilingnaming. A nang ara bai bisam yua kanya boboka ato kunung aryi, ninyi kanya kum bonung deyok aryi, sun kanya aryi malyi teneramingnyi to akwe kubde banung. Bai bisam yua ara ninyi aryi obde yiramingnyi uca, ola kum danarande to, a tola uram eteren nang ababyi ola kum dankwaming. Ara, nun Nai Imtamnyi biryi a nang asi diba ati wenebci uca, bai bisam kum danarande to minola dibsekwaming.

¹³A nang ara yuk nang asi malyi kimdeiriraming ati, nun Nai Imtamnyi biryi dekoka malyi kibdeibkwande. A nang ara alyi kanya ara kum bonung ci, “Yina ilinto yibibiryi, ner talyi yobtibyi,” teneboka kitingtam berengnande nirya ababyi sun kanya aryi malyi tenen dinyi laktoto kubde banung. A malyi kun nang ara kam kuramingnyi talak ara sun dib tenen nang ab tonkwa kwaliramun cok, sun kankan dam alyi weik dinyi akwe kunuraming ati ebman.

¹⁴A nang ara, “Ner talyi yobtibyi,” tenen nerabwe asi asing lingdon kanya akwe boraming. Tonda, sunda, “Nun malyi kunub to ara taklobkwayeb,” kum tenenung. Tonda, sun wise kanya borona kum nang asi sunci bowaningminingnaming. Tonda, sunci, “Bona-bona ilinto talebtibyi,” tenen kanya akwe kunung. A nang ara iya malyi kun nang kunung ati, nun Nai biryi sunsi diba ati wenebkwande.

¹⁵A nang ara udikum bisik tuba kum banung. Erda, bisik wanikminikmai ura, minob kuramnyi talak aryi tola uram eteren deyoknyi Beor mi Bileam bisi milin nang kunung. Anyi bira, “Dengna ilinto karebningnyi uca, malyi uram ebkwan,” tenena akwe kuramwe.

¹⁶Ato kuboka, “Malyi uram ebkwan,” teneramwe asi er boyibaramwe bisam keledai aryi ersi wenebmou. Keledai ara ninyi uram eramib to kum erur bok, Er Imtamnyi biryi karebmou uca, ninyi uram ato eboka Bileam bisi wenebmou. Ara, keledai aryi bikdob uram eboka wenebmou uca, tola uram eterenanyi biryi er talyi tenen dinyi asi bisik sekmou.

¹⁷A tola uram eteren nang ara me u dam cemnande to talyi tam kunung. Tonda, duwa asi ibalya aryi uboka bobde bindobci ura, mo kum cemnande ato, talyi tam kunung. Ba, nun Nai Imtamnyi biryi, “Iya kunuk ilinto ai yakdonokwan,” tenen a nang asi wenen sokon kiknibminikamwe.

¹⁸A nang ara sundamnyi erebdeibdandoka talyi uram akwe eterenung. Sunci ninyi kanya aryi, “Talyi yobdatibyi,” tenen dinyi akwe kunuboka, “Talyi yordana ara mem kum,” eboka eterebingnyi uca, ninyi ilinto aryi, “Nunbabyi talyi yobdatibyi,” teneraming. Ato kuboka sunci sun ukuryok, “Tola uram asi bai donokoka lebdandobtibyi,” tenen dib tenebkalibmangnyi nang ababyi bowaningminingnaming ati ebman.

¹⁹A nang ara, “Nun eterena milibmunyi uca, tabwe lobdeibsou nang ato kubkwandum,” eboka sun milin nang asi ebdeibingiryok, sunbaramnyi tabwe lobdeibsou nang kum kuraming ati ebman. Erda, malyi kun dinyi aryi sun kanya asi mikib kuboka talerur ati, malyi kun dinyi aryi tabwe deansou nang ato kunung. Ninyi kanya asi mikib kuboka taleranci dinyi ara ninyi kanya asi tabwe demnande ati ebman.

²⁰A nang ara nun Du Yesus Kristus ninyi Lemsinanyi bikdobmai ura, sunci, “Malyi kun nang aryi kunung to tuba kum kunubkwayeb,” tenen minob lemdarorbinmai cok, sunci tubto danguboka, “Malyi kun dinyi tubto kurantibyi,” tenen kunubmai uca, malyi kun dinyi asi sunsi muna kibdongobmou. Sun ato kuramingnyi nang ara nun Du Yesus bisi kum bingnamnyi talak aryi malyito kuramnyi ani, sunci nun Du Yesus bisi bikdobmai asi taklobmai ci, tabakoka iya malyito kuraming.

²¹Sun ato kuramingnyi nang ara Teleb Uram aryi, “Ato-ato kuboka Er Imtamnyi urasintam aryi teleb dinyi kunubdarur,” eboka eteresurur uram asi bikdobingiryok, taklobmai. Tonda, Er Imtamnyi biryi, “Ato-ato kubdarur,” eboka ebdeibsou uram asi bikdobingiryok, sunci a uram asi kunubde kum baramnyi. Sun ato kuramingnyi nang ara Teleb Uram kum bikmatingnyi uca, iya malyito kum kubmatingnyi.

²²A, “Malyi kun dinyi tamuboka kunubtibyi,” tenen nang aryi kuramingnyi to ara kemdeirin uram aryi lak erur to kunung. “Kam aryi yina boubmaci ba, dukmariryok, er mining dukna tubto tamuboka yirande.” (Amsal 26:11) Ba, “Bisam asi me ilikeibmangnyi bok, mintal ai tubto tamuboka leici demnande.” Ato kuboka nun Du bisi bikdobmangiryok, tubto tamuboka, “Malyi kun dinyi kunubtibyi,” tenen nang ati ato ebman.