Read Futuna-Aniwa 2Petrus 3 Bible Online

2Petrus 3 - Futuna-Aniwa bible

2Petrus 3

¹Ni kwityabwe boukwe weik kusunun nang. Niryi sunsi minob uca kerek sengna kerek sekeibmasise ani, ukuryok a kerek sengna ara bitinyi dinyi kerek sekeibmasin. Min kerek sengna umbura aryi niryi sunti, “Manmalina kum uca dib en uram akwe tenebting,” tenen kerek sekeibmasise to, ukuryok ababyi neik dinyi tenesunun ci, kerek sekeibmasin.

²Ati, sun minob talak aryi Er Imtamnyi Uram ebdeibmaci to lak etereramnyi nang nabi-nabi nang aryi eramnyi to asi tamuboka kanya teneibdendarur. Tonda, nun Du Yesus ninyi Lemsinanyi biryi Er bokdonokmou nang Teleb Uram deyok kouboka eteren nang biriman aryi, “Ato kubde bindarur,” eboka erdeiriransou uram ababyi sunci tamuboka kanya teneibde bindarur.

³“Yuma kobdob bikdobkwayeb,” tenen dinyi ara ato. Sirya kobdob talak kubci ura, nun Du Yesus bisi ina ngilingna nang sun kankan dam yankwaming. A nang ara sun kanya dam aryi anabmaci malyi tenen dinyi kubde bingiryok, dib en uram ati ina ngilikwaming.

⁴Ara, sunci ato ebkwaming, “Er Imtamnyi biryi, ‘Tukwe tam yuryankwan,’ ebdeibmou ara, ‘Ura dantam yanganmar da?’ aminda ababyi da kum yankwande. Minob uca, nun aibweyabwe aryi dibde buramnyi ani, diamnyi talak ababyi, ukuryok ababyi Er Imtamnyi ton kum yuryangarur. Tonda, im ab tukwe ab ara minob kiknibmou to akwe iya a kublobwe tok ton dangurminingna kum kurur ati da kum yankwande,” ebkwaming.

⁵Ato eboka ina ngilikwaming bok, sunci tola ati ato ebkwaming. Nun Nai biryi diboka yuryankwansir ati ebman. Nun Nai Imtamnyi biryi Er Uram dem aryok imtam tukwetam nirya kiknibmou ati sunci teneiboka luba kimnaming. Tonda, ilila mekwan kankan aryi tukwe kib anabdeibmou ba, er uram biriman aryi kiknibmou ati sunci teneiboka luba kimnaming. “Er Imtamnyi biryi eranci to ara diboka kunurur,” tenen ato ebman.

⁶Ani, Er Imtamnyi biryi, “Ninyi asi wenebkwan,” tenen karebmou uca, neik me ilila mekwan aryi weiktoto obmou uca, a minob kikniamwe im dangna tukwe dangna nirya asi kum daneibmou ati ebman.

⁷Ato kubmou bok, ukuryok a tuba asing eiriramib im ab tukwe ab ababyi Er Imtamnyi Uram dem aryi kiknibmou to, tubto neik uram dem aryok, uk dongobkwande ati kalikeiboka dibde burur. A sirya kobdob weik wenen uki tum berekci ura, Er Imtamnyi biryi sun malyi kun nang ababyi kum daneibkwande.

⁸Ato kubkwande bok, ni kwityabwe sun ni boukwe weik kusunun nang, sunci a ebkwinsin uram asi luba kibmunyei, erda kanya tam diboka bobdarur. Uki tentok ati nun Du Yesus biryi, “Kwalina seribu baryi ato,” tenerur. Ba, kwalina seribu baryi ati Erci, “Uki tentok tum ato kurur,” tenerur.

⁹Nun Du bira, “Ni ebdeibmase uram nimalyok-nimalyok kunubdeibkwan,” tenena kum kurur. Sun kankan asi ton nang ara nun Du Yesus biti, “Er ebdeibmou uram ara kum kunubkwande,” tenerandum bok, nun Du Yesus biryi Er Uram nimalyok kum kunubkwande ati ebman. Erda, Erci sunti bico tenesurur ci, “Ninyi tentok ababyi Niryi kum daneibnyei,” tenen wenen dinyi minola kum boyasurur. Tonda, “Ninyi nirya aryi sun malyi kun dinyi takloboka nisi milibniting,” tenen Erci ninyi ati malyi kun dinyi tanglon uki lordeirsurur.

¹⁰Ninyi ati uki karesurur bok, nun Du Yesus tamuryankwande uki tum ara lukdandoka kunubkwande. Ukula donanyi biryi ai damnyi kum bikmari bok, ai wengyandoka dorongnyi asi eiboka lungdaraming to, nun Du Yesus bira neiktoto lukdandoka yankwande. A talak ara imtam tukwetam nirya kum dandobkwande. Ara, imtam ara lilim weik eboka daksakoka kum dandobde ba, imtam kurande dinyi nirya ara uk aryi yibsekwande. Tonda, tukwetam kurande dinyi nirya ara kum dankwande.

¹¹Nun Nai Imtamnyi biryi imtam tukwetam dinyi nirya kum daneibkwande ati, sunci, “Nunbabyi wenebsicei,” tenen sundamnyi kalingdana teleb. Ati, sunci Er Imtamnyi dam kun nang kuramun ci, nun Nai urasintam aryi teleb dinyi akwe kunubde bindarur. Tonda, Er Imtamnyi biryi ebdeibsou to kunubdarur.

¹²Ato kuramun ci, sunci, “Er Imtamnyi yuryankwande uki tum minola yarur,” tenen dibde bukmunyi uca, nun Nai minola yuryankwande. A uki tum berekci ura, imtam nirya asi uk aryi yibsekwande. Ba, imtam kurur dinyi nirya ara uk tin aryi kum dankwande.

¹³Ato kubkwande bok, nunda nun Nai biryi, “Ukuryok im ab, ukuryok tukwe ab kiknibkwan,” ebdeibsou dinyi ati dibde bunub. A ukuryok dinyi dibde bunub im ab tukwe ab ara Er Imtamnyi urasintam aryi teleb kun nang sokon iya kibkwande.

¹⁴A deyok aryi, ni kwityabwe, ni boukwe kimsunung nang, sunci a dinyi nirya ati dibde buramunyi ura, sunci busul kuboka sundamnyi kalikdandoka teleb dinyi akwe kunubkwandarur. Tonda, tatab-tatab ebman kum kuna teleb. Tonda, nun Nai Imtamnyi biryi Er ab tonkwa antanibdeiansici dinyi ara diboka kalikdobkwandarur.

¹⁵Nun Nai Imtamnyi bira, “Yuryankwan,” eboka ebdeibmasou asi minola kum kunurur. Ara, “Weik wenena aryi wenebnyei,” tenen nunsi lebkwansir ati Erci Er Uram minola kunuboka yangana kum kurur ci, nunti uki karesurur. Sunci a dinyi teneibdarur. Nun kwit boukwe weik kunubnyi Paulus bisi Er Imtamnyi biryi bingdon dinyi karebmou uca, erci neik dinyi ati eboka kerek sekeibmasou. Ara, nun kwit Paulus biryi sunsi kerek sekeibmasou to, ni Simon Petrus bibabyi neik dinyi akwe eboka kerek sekeibmasin.

¹⁶Nun kwit Paulus biryi sekeibmou kerek sengna nirya umbura aryi a deyok ati eteresurur. Erci sekeibmou kerek sengna ara utotoa nirya caknam kum aryi minola bikman kum, ton dinyi ara ikin mitik kum kurur. Ba, walwal nang ara ato uram asi dangubminikoka tola uram kimnaming. A nang ara Er Imtamnyi Uram yuk uram ababyi neiktoto dangubminikoka tola uram kimnaming. Ato kuraming nang ara Er Imtamnyi Uram yuk uram ababyi neiktoto dangubminikoka tola uram kimnaming asi, Er Imtamnyi biryi sunsi weneboka kum daneibkwande.

¹⁷A deyok aryi, ni kwityabwe, boukwe weik kimsunun nang, sunci a dinyi sirya bikmarum ati, sunda sundamnyi kalingdana teleb. Sunci, “Sun malyi kun nang aryi nunsi malyi kun bisik bowanikminiksingnyei,” teneboka abmun ci, katabum eboka sun dib tenen dinyi wanikminiksicei ati sundamnyi kalingdana teleb.

¹⁸Sundamnyi kalingdamunyi ba, nun Du Yesus Kristus ninyi Lemsinanyi biryi sunsi tabakdongoboka kisal dangsina teleb. Tonda, sunci tabakdongoboka-tabakdongoboka nun Du Yesus bisi bingdona teleb. Ninyi nirya ara ukuryok ababyi, aminda kubkwayeb talak nirya ababyi nun Du Yesus bisi Er si iya weik ermuruna teleb ati ebman. Amin.