Read Futuna-Aniwa 1Yohanes 1 Bible Online

1Yohanes 1 - Futuna-Aniwa bible

1Yohanes 1

¹Ni Yohanes biryi kerek sekeibwinsin uram ara nun Du Ninyi Kam Kimdeirisurutnyi deyok ati sekeibkwinsin. Nun Nai Imtamnyi bira imtam tukwetam kum kikniamwe bok, nun Du Ninyi Kam Kimdeirisurur Uram ara minob kuramwe. Kuramwe ani, nun Du bira ninyi danmou ura, nunbabyi Er Uram ara iya kam kimdeirisin uram asi kekeramoubwe. Ati, nun Du ninyi danmou ura, nunci Ersi asing eiriramoubwe. Asing eiriramuburyi, nunci nun Du biti, “Naie,” tenen liliramuburyok, Er taruk taleramoubwe. A ninyi kam kimdeirisurur uram deyok asi bikmoubwe to, nunci kuboka sunti kerek sekeibmasib.

²Ninyi Kam Kimdeirisurutnyi bira lak kum kuramwe ani, ukuryok ara laktoto kibdanmou. Ba, nunci a Iya Kam Kimdeirisurutnyi bisi asing eiramoubwe. Tonda, nunci Er deyok ati, “Anyi bira Iya Kam Kimdeirisurutnyi diboka kurur,” eboka lak kimsunub. Iya Kam Kimdeirisurutnyi bira nun Nai Imtamnyi ab tonkwa kurandei ani, ninyi dandoka nunsi lak kibmasou.

³Nunci nun Du bisi asing eiramoubwe to ab, nunci nun Du deyok ati kekeramoubwe to ab ababyi, nunci ebmuruboka sunsi lak etereransib. Ati, sunbabyi dib teneboka neik kanya bobmun ci, nun ab tonkwa antaniboka kubkwayeb ati, nunci sunsi etereransib. Nun dib tenen nang ara nun Nai Imtamnyi ab, Er Mi Yesus Kristus ab tonkwa antanironub. Ati, sunbabyi nun ab tonkwa antanirona teleb ati ebmab.

⁴Ba, Ninyi Kam Kimdeirisurutnyi deyok ati kerek sekeibmasib ara ato ati sekeibmasib, “Nun kwityabwe aryi kekebingnyi uca, nun ab tonkwa antanibdabyi ura, nun kanya ara kilkil weik kubsute,” tenen kerek sekeibmasib.

⁵Nun Nai Imtamnyi bira berengnanyi kurur. Kunuk ara Er dam ton kum kurur. Nun Du Yesus biryi ato eboka etereransou ati, nun a uram kekebmoubwe nang aryi ermuruna sunsi lak eterebmasib.

⁶Ati, nunci, “Nun Nai Imtamnyi ab tonkwa antaniboka kunub nang,” erdaramibiryok, malyi kuramibyi ura, nunda Er Imtamnyi dam kun nang diboka kum kuramibiryi. Sun ato kuramingnyi nang ara tola ati ato erdaramingiryi. A nang ara kunuk dam tuba kuramingiryi, Er Imtamnyi dib en uram ara kum kunuraming.

⁷Ba, nunci Er Imtamnyi Uram kunubingnyi uca, nunda berengna dam kun nang ato kuraming ati, nun Nai Imtamnyi dam kun nang diboka kunub. Nun Nai Imtamnyi bira berengnanyi kurur ati, nunda teleb dinyi kuramibyi nang ara neiktoto berengna dam kun nang kunub ati ebman. Ato kuramibyi ura, nunda dib tenen nang ara neik kanya boboka antaniboka kubkwayeb. Ura, nun malyi kuramoubwe dinyi ati nun Du Yesus biryi Er ining aryi kilisurur. Ara, Er Imtamnyi Mi Yesus Er ining aryi nun malyi kun dinyi nirya asi kiliransir ati ebman.

⁸Ba, nun dib tenen nang aryi, “Malyi kun dinyi iya ton kum kunub,” ebtibyi do? Ato ara ebdanman kum. Nunci ato uram ebibyi nang ara nunsi dib en uram ara nun kanya dan ton kum kuansici aryi nunbaramnyi tola ati erdaramib.

⁹Ba, nunci, “Ni malyi dinyi kilibnurum,” eboka nun malyi kun dinyi lak ebibyi ura, nun Du Yesus biryi nun malyi kun dinyi nirya kilibkwansir. Erda teleb dinyi akwe kunanyi kurur. Tonda, Erda, “Ninyi yakdonokwan,” tenen kanya ara ton kum borutnyi kurur. Erda, Erci, “Ni uram kunubkwan,” tenenanyi kurur. A deyok aryi, Erci nun malyi kun dinyi kilibsici ura, tuba kum teneiransir.

¹⁰Ba, nunci, “Malyi kun dinyi iya ton kum kunub,” ebibyi ura, nunci nun Du Yesus bisi tola uram enanyi bitonyi kimdeiriramib. Ato kubibyi ura, nun Du Uram ara nun kanya dam kuna kum kuransir.