Read Futuna-Aniwa 1Yohanes 2 Bible Online

1Yohanes 2 - Futuna-Aniwa bible

1Yohanes 2

¹Ni mabwe nermabwe boukwe weik kusunun nang, kekebnindarur. Niryi sunsi a dinyi kerek sekeibmasin ara, “Malyi kubingnyei,” tenen kerek sekeibmasin. Ba, yuknyi kum yuk ner kum aryi malyi dinyi kubmangnyi ababyi, nun Nai Imtamnyi biryi sun malyi kun dinyi kilibkwamasir. Er Imtamnyi kan ninyi kan noutam kuboka molormilisurutnyi biryi nunti molormilisurur ba, nun Nai Imtamnyi biryi nun malyi kun dinyi kilisurur. Nun Du Yesus Kristus bira Er Imtamnyi kan ninyi kan noutam kuboka molormilisurutnyi kurur ati ebman. Nun Du bira teleb dinyi akwe kurutnyi kurur ati, nun Nai Imtamnyi biryi Er molobmaci tok kunurdeisurur.

²Tonda, nun Du Yesus biryi Erdamnyi karebdanmou ci, nunti dibmou ati, nun Nai Imtamnyi biryi nun malyi kun dinyi nirya asi kilisurur. Nun malyi kun dinyi akwe kuma. Erda, im dangna tukwe dangna nang sun malyi kun dinyi nirya ababyi Erci kilirur.

³Ura, nunda Er Imtamnyi bisi diboka bingna nang kunub ati, una kuboka bingdanub do? Ara, nunci Er Imtamnyi biryi, “Ato-ato kubdarur,” esurur uram asi diboka kunubibyi uca, “Nunda Er mabwe nermabwe kunub,” tenen diboka bikdandobkwanub ati ebman.

⁴Ba, unanyi-unaner aryi, “Nira Er Imtamnyi bisi diboka bingnun,” ebdanmatingiryok, nun Nai Imtamnyi Uram asi diboka kum kunuramingnyi nang ara sunbaramnyi tola ati erdaraming. Sun ato kun nang ara Er Imtamnyi mabwe nermabwe kum kuramingnyi aryi Er Imtamnyi Uram dib en uram ara sun kanya dam kum kurur.

⁵Bok, Er Imtamnyi Uram asi diboka kunuramingnyi sal kum ner kum ara Er Imtamnyi mabwe nermabwe kuramingiryi. Er Imtamnyi biryi nunsi boukwe weik kusurur to, nunda Er Uram diboka kunubiryok, nunci suklobman kum kuboka Er Imtamnyi bisi boukwe weik kunub. Ato kubibyi ura, nunda nun baramnyi biti, “Er Imtamnyi dam kun nang kunub,” tenen bingdanub.

⁶Unanyi-unaner aryi, “Nira Kristus dam kunanyi kunun, nira nun Du Yesus bisi milin ner kunun,” ebdating ura, sibambol dem aryok ato ena mem. Erda, nun Du Yesus Kristus bisi diboka miliramingnyi ura, Erci telebto kuramwe to sunbabyi kununa teleb.

⁷Ni kwityabwe ni boukwe weik kimsunun nang, kekebnindarur. Niryi sunsi, “Ato-ato kunubdarur,” en uram ton kerek sekeibmasin. Ara, ukuryok uram kuma, erda sunci minob sirya kekerandau uram asi ukuryok ara niryi tamuboka kerek sekeibmasin. Ara, nun Nai Imtamnyi biryi minob uca, “Ato-ato kunubdarur,” eboka takubdeiansou uram asi tubto kerek sekeibmasin.

⁸Ato ebman cok, niryi ukuryok uram ababyi ton kerek sekeibkwamasin. Ara, nun Du Yesus teleb kuramwe to, sun dib tenen nang ababyi neiktoto kununa teleb. Nun Du biryi dib en uram ara nun kankan dam sirya berekeibmasir ati, kunuk dinyi ara bindorande.

⁹Unanyi-unaner aryi, “Nira berengna dam kunun,” eramingiryok, sun kwityabwe asi bimsa yariramingnyi nang ara berengna dam kum kuramingiryi. Erda, kunuk dam tuba kuramingiryi.

¹⁰Ba, unanyi-unaner aryi sun kwityabwe asi boukwe weik kibingnyi nang ara diba ati berengna dam kuramingiryi. Sun ato nang ara teleb dinyi akwe kuramingnyi aryi yuk nang ababyi kum sangdeiraming.

¹¹Bok, sun kwityabwe asi bimsa yarin ner sal ara kunuk dam tuba kuramingnyi aryi sun asing ara eibman kum kurur. A nang ara kunuk aryi sun asing kurminingdur ba, sun baron bisik kum bingdoraming.

¹²Ni mabwe nermabwe, kekebnindarur. Niryi sunsi kerek sekeibmasin ara, “Nun Nai Imtamnyi biryi nun Du Yesus Kristus biriman aryi sun malyi kun dinyi kilibmasou,” tenen kerek sekeibmasin.

¹³Ni naiyabwe, kekebnindarur. Niryi sunsi kerek sekeibmasin ara, “Nun Nai Imtamnyi bira yuma kobdob aryi kuramunyi bisi sirya bingdarur,” tenen kerek sekeibmasin. Ni kwityabwe kam nang, kekebnindarur. Niryi sunsi kerek sekeibmasin ara, “Nun Nai Imtamnyi biryi karebmou uca, malyi kun deyoknyi si Iblis bisik sekoka sirya muna kibdongobyi,” tenen kerek sekeibmasin.

¹⁴Ni mabwe nermabwe, boukwe weik kusunun nang. Sunda nun Nai Imtamnyi bisi bingnandau ani, ukuryok ababyi tuba bingnandum ati, niryi sunsi kerek sekeibmasin. Ni naiyabwe. Sunda nun Nai Imtamnyi bira yuma kobdob aryi kuramunyi bisi bingdarur ati, niryi sunsi kerek sekeibmasin. Ni kwityabwe kam nang. Sunda mikib kuboka nun Du Yesus bisi dib tenendarur ati, Er Imtamnyi Uram sun kanya dam iya kusurur ati, niryi sunsi kerek sekeibmasin. Sunci malyi kun deyoknyi bisi bisik sekoka muna kibdongobmandau ati, niryi sunsi kerek sekeibmasin.

¹⁵Sun malyi kanya bon nang ati sunci, “Milibkwayeb,” tenebmunyei. Tonda, sun malyi kanyi bon nang aryi malyi dinyi kuraming to sunci, “Ato kubkwayeb,” tenebmunyei. Unanyi-unaner aryi sun malyi kanya bon nang aryi malyi kuraming to, “Niti teleb,” tenebingnyi nang ara Er Imtamnyi bisi boukwe weik kimna dinyi ara sun kanya dam kum kurandiryi.

¹⁶Sun malyi kanya bon nang aryi malyi kuraming to ara nun Nai Imtamnyi biryi kum kiknibmou. Erda, a malyi dinyi ara ninyi kanya dam aryi teneiboka kikniraming. Tonda, malyi tenen dinyi ara, “Nun teleb tenebyi to malyi kun dinyi kunubkwayeb,” teneraming. Yuk malyi tenen dinyi ara, “Nun asing eibibyi dinyi teleb kubsici to asi dobdobkwayeb,” teneraming. Ura, yuk malyi tenen dinyi ara sunbaramnyi erebdandoka, “Nunda sien nang, nunda bona bon nang,” tenerdaraming.

¹⁷Sun malyi kanya bon nang nirya ara iya kum dankwaming. Tonda, sun kanya teleb kuranci malyi kun dinyi ababyi nirya kum dankwande. A dinyi nirya ara kum dankwande bok, “Nun Nai Imtamnyi biti teleb kimdein dinyi kunubkwan,” teneraming nang ara iya kam kubkwaming.

¹⁸Ni mabwe nermabwe, kekebnindarur. Ukuryok ara sirya kobdob uki tum sirya berekmar. Sunci sirya kekebmandau to, antikristus bira, “Er Kristus bisi bisik sektinyi,” tenenanyi sirya yanmar. Ukuryok ara antikristus nang ilinto aryi, “Er Kristus bisi bisik sektibyi,” tenen yanmang ati ebman. Antikristus nang ilinto yanmang ara sirya kobdob uki tum sirya berekmar ati nun sirya bingnub.

¹⁹A nang ara nun dib tenen nang ab tonkwa kuramibiryok, nun Du Yesus bisi diboka kum tenenung. A nang ara nun kwityabwe diboka kuranting ura, nun ab tonkwa iya kurantibyi. A nang ara nun Du Yesus bisi diboka dib kum tenenung. A nang ara nun kankan aryi kuboka bindobmai ati, nunci, “Dib tenen nang kuma,” tenen bingnub.

²⁰Sunda dib tenen nang nirya asi Er Imtamnyi Kanya Roh Kudus aryi langkibdeiboka eteresurur ati, sun nirya ara a dib en uram asi sirya bingnandum.

²¹Niryi sunsi kerek sekmasin ara, “Dib en uram kum bingnung,” tenen kum sekmasin. Erda, “Dib en uram sirya bingnung,” tenen niryi sunsi kerek sekmasin. Tonda, sunci, “Dib en uram aryi kuboka tola uram ton kum anasurur,” tenen bingdarur ati, niryi sunsi kerek sekeibmasin.

²²Tola uram en deyok nang ara danto nang kunung do? Tola uram en deyoknyi bira tola ati ato esurur, “Er Yesus bira Er Imtamnyi biryi bokdonokmounyi ninyi Lemsinanyi si Kristus kuma,” erur. Sun ato en nang ara nun Du Yesus bisi, “Bisik sektinyi,” tenenung nang ara antikristus kunung. Sun ato kun nang ara nun Du Yesus bisi dib kum tenenung ati, nun Nai Imtamnyi bibabyi dib kum tenenung.

²³Unanyi-unaner ara nun Du Yesus biti, “Ni li,” ebting ura, a nang ara nun Nai Imtamnyi dam kun nang kum kuramingiryi. Ba, unanyi-unaner aryi, “Nun Du bisi milinun,” eboka lak eramingnyi ura, a nang ara nun Nai Imtamnyi dam kun nang kuramingiryi.

²⁴Ura, nunci sunsi minob uca etereransou to asi, sunci sun kanya dam diboka talebnurubdobdarur. Sunci ato kuamunyi ura, nun Du Yesus Er Imtamnyi Mi ab nun Nai Imtamnyi ab tonkwa antaniboka iya kubkwandum.

²⁵Tonda, nun Du Yesus biryi nunti ebsou uram ara ato, “Iya kam kun dinyi karebkwansin,” ebsou.

²⁶Niryi sunsi kerek sekeibmasin ara sun tola uram eteren nang ara sunda dib tenen nang ati, “Bowanikminikdetibyi,” tenen nang ati sekman.

²⁷Sunda dib tenen nang asi nun Nai Imtamnyi biryi Er Kanya Roh Kudus aryi langkibdeiboka karebsou ati, Roh Kudus sun kanya dam iya kusurur. Ati, sunci, “Tola uram eteren nang aryi nunsi eterebsiting,” tenen kum. Erda, Roh Kudus aryi utotoa nirya asi lak kiboka sunsi eteresurur. Roh Kudus aryi eteresurur dinyi ara dib en uram akwe eteresurur ati ebman. Erci nunsi tola uram ton kum eteresurur. Ati, Roh Kudus aryi sunsi eteresurur to ara tanglona kum uca kunubdarur.

²⁸Ura, ni mabwe nermabwe, kekebnindarur. Sunda nun Du Yesus Kristus dam iya kubdarur. Ba, “Nun Du imtam aryi yandoka lak kibkwande tum berekci ura, alyi kubsicei,” tenen sunci nun Du Yesus Uram kunubmun ci, Er dam asi iya kubdarur. Tonda, sunci, “Nun Du imtam aryi kuboka yuryangaci ura, nunda ilil kum asa aryi Er ab tonkwa kubkwayeb,” tenen sunci Er Uram asi tuba-tuba kununa teleb.

²⁹Sun, “Nun Du bira teleb dinyi akwe kunanyi kurur,” tenen bingdamunyi ura, sun, “Teleb dinyi akwe kun nang ara Er dam kun nang akwe kunung,” tenen bikwandarur. Sun teleb kun nang ara nun Du Yesus bito nang kunung ci, Er mabwe nermabwe ato nang kunung.