Read Futuna-Aniwa 1Yohanes 3 Bible Online

1Yohanes 3 - Futuna-Aniwa bible

1Yohanes 3

¹Naie! Nun Nai Imtamnyi bira nunsi diboka boukwe weik kusurur. Boukwe weik kusurur aryi Erci nunsi, “Ni mabwe nermabwe,” eboka dororansir. Nunda nun Nai Imtamnyi Er mabwe nermabwe kunub ati ebman. A deyok aryi, sun malyi kanya bon nang ara nun dam kum kunung ci, nunsi kum bingsunung. A nang ara nun Nai Imtamnyi bisi kum bingnung ati, Er Imtamnyi dam kun nang kum kunung. A deyok aryi, a nang ara nun Er Imtamnyi mabwe nermabwe dam kum kunung.

²Ni kwityabwe, ni boukwe kusunun nang. Nunda ukuryok Er Imtamnyi mabwe nermabwe kunub. Ba, nun aminda talak kubkwayeb to ara bita kum bingdanub. Ato kuboka bita kum bingdanub cok, “Nun aminda ara nun Du Yesus Kristus bito nang kubkwayeb,” tenena ara sirya bingdanub. Nun Du bira imtam aryi kuboka lak kibkwande tum berekmaci ura, nunda nun Du Yesus kurur to nang kibkwayeb. A uki tum ara nunci Ersi diboka asing eibkatabkwayeb.

³Unanyi-unaner aryi nun Du Yesus bisi dibde buramingyi nang ara, “Malyi kun dinyi ni li,” tenen kanya bonung. Ara, nun Du Yesus biryi, “Malyi kun dinyi ni li,” tenen teleb dinyi akwe kurur to, nunda dib tenen nang ababyi, “Malyi kun dinyi ni li,” tenen teleb dinyi akwe ingkiringnub.

⁴Unanyi-unaner aryi malyi dinyi kubmangnyi nang ara nun Nai Imtamnyi biryi, “Ukubdarur-Ukuna mem,” ebmasou uram asi yan yaniraming. Malyi dinyi kuna ara nun Nai Imtamnyi biryi etereransir uram asi yan yanina ati ebman.

⁵Ura, nun Du Yesus bira tukwetam yuryandoka Erdamnyi lak kibdanmou ara nun malyi kun dinyi kilibkwansou ati, Erdamnyi lak kibdanmou. Tonda, nun Du Yesus Er kanya dam ara malyi kun dinyi ton kum kurur.

⁶A deyok aryi, sun tanglona kum uca nun Du Yesus dam kuramingnyi nang ara malyi dinyi tuba kum kunung. Ba, sun tanglona kum uca malyi kuramingnyi nang ara nun Du Yesus dam kun nang kum kunung aryi nun Du Yesus bisi asing kum eirinung ci, nun Du Yesus bisi sun kum bingnung.

⁷Ni mabwe nermabwe, kekebnindarur. Ninyi tentok ababyi sunsi bowanikminiksingyei. Unanyi-unaner ara tanglona kum uca Er Imtamnyi biryi eteresurur uram kunubingnyi ura, a nang ara teleb kun nang kunung. Ara, nun Du Yesus Kristus biryi Er Imtamnyi Uram kunurur ati, teleb kunanyi kurur to, a nang ababyi neiktoto Er Imtamnyi biryi eteresurur uram kununung ati, teleb kun nang kunung.

⁸Ba, unanyi-unaner aryi malyi tuba kuramingnyi ura, a nang ara isa sienyi si Iblis er mabwe nermabwe kuramingiryi. Iblis bira yuma kobdob aryi malyi dinyi deyok kouamuryi, ukuryok ababyi tuba malyi kurur ati, sun malyi kun nang ara Iblis er mabwe nermabwe ato kunung ati ebman. Ato kuramwe deyok aryi, Er Imtamnyi Mi yuryanmou ara er Iblis malyi wa asi kum daneibkwamwe ati, Erci yuryandoka Erdamnyi lak kibdanmou.

⁹Ba, unanyi-unaner aryi Er Imtamnyi mabwe nermabwe kuramingnyi ura, malyi dinyi tuba kum kuraming. A nang ara Er Imtamnyi dib en uram sun kanya dam bororaming ati, malyi kun dinyi ara tuba kum kuraming. Er Imtamnyi bira sun Nai kurur ati, sunda Er Imtamnyi mabwe nermabwe kuramingnyi aryi malyi kun dinyi ton kum kuraming.

¹⁰Er Imtamnyi mabwe nermabwe ab, Iblis mabwe nermabwe ab ara yuk-yuk kunung. A dinyi ara laktoto kurur. Ara, unanyi-unaner aryi Er Imtamnyi Uram kum kunuramingnyi nang ara Er Imtamnyi mabwe nermabwe kum kuramingiryi. Ba, unanyi-unaner aryi sun kwityabwe boukwe weik kum kimnamingnyi nang ara Er Imtamnyi mabwe nermabwe kum kuramingiryi.

¹¹Ura, yuma kobdob aryi kekebmandau ara, “Sun mamun boukwe weik kibdandarur,” en uram ara sirya kekebmandau.

¹²Ara, nunci ninyi obmunyi si Kain bito nang kubibyei. Anyi bira malyi kuna deyoknyi si Iblis mi kuramuryi, er weit asi obmou. Unato ati erci er weit obmou tenebmarum do? Er Kain bira malinyi kuramwe aryi er weit asi obmou ati ebman. Ba, er weit ara Er Imtamnyi Uram kunuramunyi kuramwe deyok aryi, erci ersi obmou.

¹³Ni kwityabwe, kekebnindarur. Sun kanya ara kankana kubsicei. Sun malyi kanya bon nang aryi nun dib tenen nang asi bimsa yariransing ati ebman. Ati, sunci, “Se, unatoa ati nunda teleb kun nang asi bimsa yariransing do?” tenebmunyei.

¹⁴Nunda dib tenen nang ara din nang ato kuramoubwe ani, ukuryok kam kun nang ato kibdandoboubwe. Nunda nun kwityabwe dib tenen nang asi boukwe weik kunub ati, nunci nunbaramnyi ati, “Kam bukokmangnyi nang ato kibdobmoubwe,” tenen bingdanub. Unanyi-unaner aryi sun kwityabwe dib tenen nang asi boukwe kum kimdamingnyi nang ara din nang ato tuba kuramingiryi.

¹⁵Unanyi-unaner aryi sun kwityabwe asi bimsa yariramingnyi nang ara ninyi on nang ato kuramingiryi. Sun kwityabwe asi kum obmangiryok, bimsa yariramingnyi nang ababyi nun Nai Imtamnyi biryi, “Ninyi on nang ato kunung ati Niryi wenebkwan,” tenerur. Ura, ninyi on nang ara iya kam kum kubkwaming ati ebman. Sun kwityabwe bimsa yariramingnyi nang ara Er Imtamnyi dam kun nang tuba kum kunung.

¹⁶Nun kwityabwe asi boukwe weik kimna deyok ati nun sirya bingnub. Ara, nun Du Yesus Kristus nunsi boukwe kibsou to, nunbabyi neiktoto nun kwityabwe asi boukwe kimna teleb. Ati, Erci nunti, “Lebkwan,” tenen Erdamnyi karebdanmou ci, nunti dibmasou. Ura, nunbabyi neiktoto nun kwityabwe dib tenen nang asi boukwe weik kimna teleb. Ara, ninyi aryi obsingnyi ababyi, sun kwityabwe ati, “Teleb kubdeibkwayeb,” tenen sundamnyi karerdana teleb.

¹⁷Unanyi-unaner bona boramingnyi nang aryi sun kwityabwe iya ataranci nang ab ebdandoka asing eibmangiryiryok, bico kum tenebingiryok, sun ataranci to kum karebmangnyi ura, a nang ara Er Imtamnyi mabwe nermabwe kunung do? Ato tenen kum. Sun ato kun nang ara sun kwityabwe asi bico kum teneraming ati, Er Imtamnyi bibabyi boukwe weik tuba kum kunung ati ebman.

¹⁸Ni mabwe nermabwe, kekebnindarur. Nunci sibambol dem aryi uram eboka boukwe kibibyei. Erda, nunci nun dinyi kareboka nundamnyi karebdandoka yuk nang asi diboka boukwe weik kimna teleb.

¹⁹Ura, nunci Er Imtamnyi urasintam yandoka, “Dib en uram asi diboka kunubmoubwe do kum do?” tenebdabibiryi, nun kanya ara ilil kubsicei. Erda, nunci, “Nun kwityabwe dib tenen nang asi boukwe weik kiboka diboka dibnilibmoubwe,” tenena teleb. Nunda nun kwityabwe asi boukwe weik kiboka dibnilibibyi ura, nunci, “Dib en uram asi diboka kunubmoubwe,” tenen bingdanub.

²⁰Nunci nun kanya dam aryi, “Malyi dinyi ton kubmoubwe,” tenen bingdamabyi ababyi, nun kanya ara mambul kubsicei. Erda, nunci, “Nun Nai bira Iya Erebdobnyi kurur ci, utotoa nirya bingsurur,” tenebibiryok, Er urasintam yana teleb.

²¹Ni kwityabwe, boukwe weik kusunun nang. Nunci nun kanya dam aryi, “Malyi kun dinyi kum kubmoubwe,” tenen bingdamabyi ura, nunda ilil asa kum uca nun Nai Imtamnyi urasintam yangana teleb.

²²Ura, nun moloramibyi tok, nun Nai Imtamnyi biryi nunsi karebkwansir. Ati, nunci Er Imtamnyi biryi, “Ato-ato kubdarur,” erdeirisurur uram asi kunuboka Er Imtamnyi kanya teleb kurdeiriramib ati, nun Nai Imtamnyi biryi nun moloramibyi tok kunubdeibkwansir.

²³Nun Nai Imtamnyi biryi nunsi, “Ato-ato kubdarur,” en uram ara ato kurur. “Er Imtamnyi Mi Yesus Kristus bisi dib tenebdarur,” eboka, “Sun mamun boukwe weik kimdandarur,” eboka Erci nunsi eteresurur.

²⁴Sun Er Imtamnyi Uram kunuramingnyi nang ara nun Nai dam kun nang tuba kuramingiryi. Tonda, nun Nai Imtamnyi bira tanglona kum uca a nang dam asi tuba kurur. Nun Nai Imtamnyi biryi Er Kanya Roh Kudus asi nun kanya dam karebsou aryi, nun Nai bira nun dam iya kurur ara nun bingnub.