Read Futuna-Aniwa 1Yohanes 4 Bible Online

1Yohanes 4 - Futuna-Aniwa bible

1Yohanes 4

¹Ni kwityabwe, boukwe weik kusunun nang. Tola uram eteren nang ilinto anaboka im dangna tukwe dangna mutuk nirya yibinkiringmang ati, sunda dib tenen nang ara kalikdandobdarur. A tola uram eteren nang ara, “Er Imtamnyi Uram ebdeibmaca boboka eterebkwansib,” eransingnyi bok, sunci sun eramingnyi uram asi anmalakoka dib tenebmunyei. Erda, sunci, “A nang aryi eterenmang uram ara Er Imtamnyi Kanya Roh Kudus aryi eteresina uram ab antaniboka enmar do kum do?” tenen kanya teneibdeboka abmun ci, sun eterenmangnyi uram asi diboka lilibkwandarur.

²Roh Kudus aryi dib en uram eterenung nang ara ato eboka eterenung, “Nun Du Yesus Kristus bira Er Imtamnyi Mi kurur cok, ninyi kibdanmou.” Sun ato eboka eterebingyi nang ara ebmuruboka Er Imtamnyi Uram dib en uram asi diboka eterenmangiryi ati ebman.

³Ba, sun nun Du Yesus biti, “Ninyi ton kum kibdanmou,” eboka eterebingnyi nang ara nun Nai Imtamnyi dam kuna kum nang kuramingnyi aryi nun Nai biryi dib en uram kum eterermururaming. Erda, a nang ara nun Du Yesus bisi, “Bisik sektinyi,” tenenanyi si antikristus milin nang kuramingiryi. Ato enanyi bira ninyi kankan dam yankwande ena ara sun sirya kekebmandau. Asi, anyi bira ukuryok sirya yanmar ci, ninyi kankan dam kunmar ati ebman.

⁴Ni mabwe nermabwe, dib tenen nang. Sunda Er Imtamnyi mabwe kundarur ati ebman. Sunci sun tola uram eteren nang uram asi dib kum tenerandum ci, “A nang asi bisik sektibyi,” tenen muna kibmandau. Er Iblis bira sun malyi kun nang kanya dam ara mikibnyi kurur. Mikibnyi kurur bok, nun Nai Imtamnyi bira Iya Mikibnyi biryi sun dib tenen nang kanya dam kusurur. A deyok aryi, sunda dib tenen nang aryi sun malyi kun nang asi bisik sekoka muna kibmandau.

⁵A tola uram eteren nang ara sun malyi kun nang mabwe nermabwe kunung. A nang ara sun malyi kun nang mabwe nermabwe kunung deyok aryi, sunda malyi uram akwe etereraming. Malyi uram etereraming ba, sun malyi kun nang aryi sun eterebingnyi uram kekeraming.

⁶Nun dib tenen nang ara Er Imtamnyi mabwe nermabwe kunub. Ati, unanyi-unaner aryi Er Imtamnyi bisi bingnamingnyi nang ara nun lak etereramib uram asi kekeraming. Ba, unanyi-unaner aryi nun Nai Imtamnyi mabwe nermabwe kum kuramingnyi nang ara nun etereramib uram ara kum kekeraming. A dinyi deici aryi nunci, “Ei, anyi bira ebmuruboka Er Imtamnyi Kanya Roh Kudus aryi dib en uram eteresurur,” tenen bingnub. Tonda, “Se, anyi bira tola uram, ninyi bowaningminingna etererur,” tenen bingnub.

⁷Ni kwityabwe boukwe weik kusunun nang. Nun mamun boukwe weik kimdana teleb. Nun Nai Imtamnyi bira boukwe weik kimna deyoknyi kurur ati, nunbabyi boukwe weik kimdana teleb. Unanyi-unaner aryi boukwe weik kimnamingnyi nang ara Er Imtamnyi mabwe nermabwe kuramingiryi. Sun ato kuramingnyi nang ara nun Nai Imtamnyi dam kun nang kunung cok, Ersi diboka bingnung.

⁸Unanyi-unaner aryi boukwe weik kum kimnamingnyi nang ara Er Imtamnyi dam kun nang kum kuramingiryi, nun Nai bisi kum bingnung. Nun Nai Imtamnyi bira boukwe weik kimna deyoknyi kurur ati, niryi ato ebman.

⁹Nun Nai Imtamnyi bira boukwe weik kimsurur ci, nundam asi lak kibmasou. Ara, Erci nunsi boukwe weik kibmasou ci, Er Mi tentoknyi bisi tukwetam bokwetebmou. Ara, Erci nunti, “Ni Mi biriman aryi iya kam kun dinyi dobdobting,” tenen, Erci Er Mi tentoknyi bisi nunti bokwetebmasou.

¹⁰Boukwe kimna deyok ara ato kurur. Nunda tukwetam nang aryi Er Imtamnyi bisi boukwe weik kimnamoubwe do? Ato ton kum kuramoubwe. Erda, Nun Nai Imtamnyi bira nunsi boukwe weik kuransou deyok aryi, Erci Er Mi asi nun dam bokwetebmasou. Ara, Er Imtamnyi Mi aryi Erdamnyi karebdandoka dibkwamwe uca, nun malyi kun dinyi kilibkwansou ati, nun Nai Imtamnyi biryi Ersi bokwetebmasou.

¹¹Ni kwityabwe, ni boukwe kusunun nang. Nun Nai Imtamnyi biryi nunsi ato kuboka boukwe weik kiansou ati, nunbabyi neiktoto nun mamun boukwe weik kimdana teleb.

¹²Ninyi tentok ababyi nun Nai Imtamnyi bisi asing ton kum eibmou. Nun Nai bisi asing kum eirinub asi Erda nun dam kusurur. Nunci nun mamun asi boukwe kimdaramibyi ura, nun Nai Imtamnyi bira nun kanya dam kusurur. Nun Nai bira nun kanya dam kusurur ati, nunci boukwe weik kimdanub dinyi ara suklobman kum kunub. Erda, nun Nai biryi karebsici uca, nunda langdeiboka boukwe weik kimdanub.

¹³Nunda nun Nai Imtamnyi dam kun nang iya kunub ati nundamnyi bingdanub. Tonda, Er Imtamnyi bira nun kanya dam iya kusurur ati nun bingdanub. Ara, nun Nai biryi Er Kanya Roh Kudus asi nun dam sirya dongobsou dinyi ara nun sirya bingnub.

¹⁴Nun Nai Imtamnyi biryi Er Mi tukwetam bokwetebmasou asi nunci asing eiramoubwe ati, “Dib,” eboka lak eteresunub. Ara, nun Du Yesus biryi sun im dangna tukwe dangna nang asi lebdobkwansou ati, nun Nai Imtamnyi biryi Ersi bokwetebmou. A dib en uram ara nunci lak eramib.

¹⁵Unanyi-unaner aryi, “Dib, Yesus bira Er Imtamnyi Mi kurur,” eramingnyi nang ara nun Nai Imtamnyi dam iya kun nang kuramingiryi. Ba, nun Nai bira a nang dam iya kurandiryi.

¹⁶Ura, nun dib tenen nang ara, “Nun Nai Imtamnyi bira nunsi boukwe weik kusurur,” tenen bingdanub. Tonda, nunci a uram ati, “Dib en uram,” tenen bingnub ci, yuk nang asi boukwe weik kimnub. Nun Nai Imtamnyi bira boukwe weik kimna deyoknyi kurur. Ati, unanyi-unaner aryi boukwe kimnamingnyi nang ara nun Nai Imtamnyi dam kun nang iya kunung. Tonda, nun Nai bira sun kanya dam iya kurur.

¹⁷Nun boukwe weik kimna ara suklobman kum kuboka boukwe weik kimnub. Ara, nun Nai Imtamnyi yuryankwande tum ara Erci sun malyi kun nang asi wenebkwande uki tum berekci ura, nun dib tenen nang kanya ara ilil kum kubkwansir. Erda, nunci, “Nun Du biryi ninyi boukwe weik kusurur to, nunbabyi neiktoto tukwetam kuramoubwe ura, ninyi boukwe kimnamoubwe,” tenen bikdankwamib. Ato dinyi tenen bikdandobibyi ura, ilil asa kum uca nun Nai Imtamnyi urasintam aryi katabdongoboka tikokwayeb.

¹⁸Sun boukwe weik kimdamingnyi nang ara ilil dinyi kanya dam ton kum bonung. Suklobmanto kum kuboka boukwe weik kimdaramibyi ura, nun kanya ara ilil kum kubkwansir. Ilil tenen kanya ara, “Wenebkwansir,” tenen kanya akwe kurur ati ebman. Unanyi-unaner ilil kanya boramingnyi nang ara boukwe kimdamingiryok, suklobmanto kuboka boukwe asi kunung.

¹⁹Nunda Er Imtamnyi ab yuk nang ab asi boukwe weik kuna ara ato kurur. Nun Nai Imtamnyi biryi nunsi minob boukwe kibmasou deyok aryi, nunbabyi boukwe kimnub.

²⁰Unanyi-unaner aryi, “Er Imtamnyi bisi boukwe kunun,” ebingiryok, sun kwityabwe asi bimsa yariramingnyi ura, a nang ara tola uram en nang kuramingiryi. Nun kwityabwe ara asing eiriramibyi nang asi boukwe kum kimdamibyi ura, nun Nai Imtamnyi asing kum eiriramibnyi bira wanok diboka boukwe kibtibyi do? Ato tenen kum.

²¹Ura, nun Nai Imtamnyi biryi nunsi, “Ato kubdarur,” ebdeibsou ba, nun sirya kekenub. Ara, Erci ato eboka ebdeibsou. “Unanyi-unaner aryi Er Imtamnyi bisi boukwe kimnamingnyi ura, sun kwityabwe ababyi boukwe weik kibkwandarur,” ebdeibsou.