Read Futuna-Aniwa 1Yohanes 5 Bible Online

1Yohanes 5 - Futuna-Aniwa bible

1Yohanes 5

¹Unanyi-unaner aryi nun Du Yesus biti, “Erda Er Imtamnyi biryi Bokwetebunyi bira nun Lemsinanyi si Kristus kurur,” teneramingnyi ura, a nang ara Er Imtamnyi mabwe nermabwe kuramingiryi. Tonda, unanyi-unaner aryi Er Nai Imtamnyi bisi boukwe kimnamingnyi ura, a nang ara Er Imtamnyi mabwe nermabwe ababyi boukwe weik kimnamingiryi.

²Nun Er Imtamnyi mabwe nermabwe asi boukwe kimnamibyi ura, nunci Er Imtamnyi bisi boukwe weik kiboka Erci, “Ukubdarur-Ukuna mem,” ebdeibsou uram yuk-yuk asi kunuramibiryi. Ato kubibyi ura, nundamnyi aryi, “Nunda Er Imtamnyi mabwe nermabwe boukwe kimnub,” tenen bingdaramib.

³Nun Nai Imtamnyi bisi boukwe kimna ara ato, nunci Erci, “Ukubdarur-Ukuna mem,” ebdeibsou uram yuk-yuk asi kunuramibyi ura, Ersi boukwe weik a kunum kimdamibiryi. Nun Nai Imtamnyi biryi takubdeibsou uram ara ikin kuma. Erda, caknam akwe kurur.

⁴Unanyi-unaner aryi Er Imtamnyi mabwe nermabwe kuramingnyi nang ara sun malyi kun nang aryi kuraming dinyi ara bai donokoka muna kimdonung. Muna kimdonung ati, sunci Er Imtamnyi biryi takubdeibsou uram ara, “Ikin dinyi,” tenena kum kunung. Malyi kun dinyi asi muna kimdongona ara nun Du Yesus bisi dib tenena deici aryi muna kimdongoraming ati ebman.

⁵Unanyi-unaner aryi sun malyi kun dinyi asi bai donokoka muna kimdonung do? Sun, “Yesus bira Er Imtamnyi Mi kurur,” dib tenen nang akwe muna kimdonub ati ebman.

⁶Nun Du Yesus Kristus yanmou ara me wengbana ton ining sangna ton ati yanmou. Me dongona akwe ati Er kum yanmou. Erda, Er ining sakwamwe ati Er yanmou. Ara, ninyi me dongoramunyi biryi Ersi me dongobmou ani, aminda aryi ninyi aryi Ersi co lase laboka bing dakmai ura, nun Du Yesus Er ining sakmou. Asi, Er Imtamnyi Kanya Roh Kudus ara, “Dib,” eboka ato lak eteresurur ati, a uram ara diboka dib en uram kurur. Roh Kudus ara dib en uram eterena deyoknyi kurur ati ni ato ebman.

⁷Sun a uram ara, “Dib en uram kurur,” eboka lak kimsunung nang ara winiryi kunung. Ara, nun Nai Imtamnyi ab, Er Imtamnyi Uram Nong ab, Er Imtamnyi Kanya Roh Kudus ab ara imtam kunung ci, “A uram ara dib en uram kurur,” eboka lak kimsunung. A winiryi nang ara Allah tentok kunung.

⁸Tonda, tukwetam ababyi, “A uram ara dib en uram,” eboka lak kimsunung dinyi ara winiryi kunung. Ara, Er Imtamnyi Kanya Roh Kudus aryi lak kimsurur uram ab, er ninyi me dongoramunyi biryi nun Du Yesus bisi me dongoamwe me ab, tonda nun Du Yesus Er ining sakwe dinyi ab aryi, “Ato kubwe,” eboka lak kimsunung. A winiryi dinyi ara neik dinyi akwe lak kimsunung.

⁹Nun ninyi aryi, “A uram ara dib en uram,” ebingnyi ura, nunci sun lak enmangnyi uram asi dororamib. Bok, Er Imtamnyi biryi, “A uram ara dib en uram,” ebmar ati, nunci a uram asi minola dib tenena teleb. Er Imtamnyi bira dib uram ena deyoknyi kurur ara Er Imtamnyi biryi nun Du Yesus deyok ati lak eterebmou uram asi, nunci, “Dib en uram kurur,” tenena teleb.

¹⁰Unanyi-unaner aryi Er Imtamnyi Mi bisi dib tenebingnyi nang ara sun kanya dam aryi dib en uram ara sirya bingnamingiryi. Ba, unanyi-unaner aryi Er Imtamnyi bisi dib kum tenebingnyi nang ara nun Nai Imtamnyi biti, “Tola uram enanyi bica,” teneramingiryi. Ara, Er Imtamnyi biryi Er Mi biti dib en uram ebmou to asi dib kum teneramingci nang ara, sunci Er Imtamnyi biti, “Tola uram enanyi bica,” teneraming ati ebman.

¹¹Er Imtamnyi biryi nunsi ato lak eteresurur dib en uram ara ato kurur. Nun Nai Imtamnyi bira iya kam kun dinyi nunsi karebmasou. A iya kam kun dinyi ara Erci Er Mi biriman aryi Erci nunsi karebmasou.

¹²Unanyi-unaner aryi Er Imtamnyi Mi dam kun nang kuramingnyi ura, a nang ara iya kam kun dinyi dororamingiryi. Ba, unanyi-unaner aryi Er Imtamnyi Mi dam kun nang kum kuramingnyi ura, a nang ara iya kam kun dinyi kum doronung.

¹³Ni mabwe nermabwe, Ni Yohanes biryi sunsi a dinyi kerek sekeibmasin ara sunci Er Imtamnyi Mi asi dib tenen nang ati kerek sekmasin. Ara, sunci, “Iya kam kun dinyi ara sirya dobdoboubwe,” tenen bikwandum ati kerek sekmasin.

¹⁴Ura, nunda dib tenen nang ara Er Imtamnyi urasintam yandoka ilil kum asa aryi kuna teleb. Ilil kum asa aryi kuramibiryok, nunci, “Nun Nai biryi teleb tenebmaci to dinyi molobibyi ba, Erci kunuboka karebkwamasir,” tenena teleb.

¹⁵Ba, nunci, “Nun Nai Imtamnyi bira nun molobmabyi tok kekebkwansir,” tenen bingdamibyi ura, nunci, “Nun Nai biryi nun molona kekeboka kareransir,” tenebkwanub.

¹⁶Unanyi-unaner aryi sun kwit malyi kubmaci asi asing eibmangnyi ura, a nang ara Er Imtamnyi bisi molormilina teleb. Molormilibingiryok, sunci Er Imtamnyi bisi ato ena teleb, “Nai Imtamnyi, Kanci nun kwit bisi leboka iya kam kun dinyi karebdum.” Sunci ato eboka molona teleb. Ton nang ara iya malyi kuraming ati, Er Imtamnyi biryi sunti, “Iya wenebkwan,” tenerur. Sunci sun ato kubmangnyi iya malyi kun nang asi molobmilibmunyei.

¹⁷Manmalina nirya ara malyi kun dinyi akwe kurur. Ba, ton malyi kun dinyi ara iya wenebman malyi kun dinyi kurur ura, ton malyi kun dinyi ara iya wenebman kum malyi kun dinyi kurur.

¹⁸Unanyi-unaner aryi Er Imtamnyi mabwe nermabwe kuramingnyi ura, a nang ara malyi dinyi ton kum kunung. Erda, nun Du Yesus Er Imtamnyi Mi kobdob ara a nang asi diboka kalingsurur ati, malyi kun deyoknyi Iblis biryi a nang asi diboka kum dumderansir. A dinyi ara nunci diboka bingnub.

¹⁹Nunda Er Imtamnyi mabwe nermabwe kunub ati, nun bingnub. Ba, sun malyi kun nang nirya ara malyi kun deyoknyi si Iblis milin nang kunung.

²⁰Er Imtamnyi Mi ara tukwetam sirya yuryanmou ara nun sirya bingnub. Ati, Erci nunti, “Ni Nai bira dib en uram enanyi bisi bikting,” tenen Erci Er Imtamnyi bisi nunti lak kibkwansou ati yuryanmou. Ura, nunda dib tenen nang ara nun Nai dib en uram erutnyi dam kun nang kunub. Tonda, nunda Er Mi Yesus Kristus dam ababyi kun nang kunub. Nun Du bira diba ati Allah kurur ci, iya kam kurdeirin deyoknyi kurur ati ebman.

²¹Ni mabwe nermabwe, sunci sundamnyi kalikdamun ci, kwemdina dinyi nirya kisibdobdarur.