Read Futuna-Aniwa 2Yohanes 1 Bible Online

2Yohanes 1 - Futuna-Aniwa bible

2Yohanes 1

¹Ni Yohanes dib tenen nang kalingnanyi biryi sun dib tenen nang asi kerek sengna ton sekeibmasin. Sunda dib tenerandum nang ati niryi, “Ni kwinyabwe ni naiyabwe nun Nai Imtamnyi biryi wibdeiboka nabsou nang,” tenesunun. Tonda niryi sunti, “Ni mabwe nermabwe ara dib en uram deyok aryi, boukwe weik kusunun nang,” tenesunun. Ni kikwe sunsi boukwe weik kum kusunun. Erda, sun dib en uram bikoka kunuraming nang yuk nang nirya ababyi sunsi boukwe weik tenesunub.

²Dib en uram ara nunda dib tenen nang kanya dam iya kusurur ati, nunci sunsi boukwe weik kimsunub. A dib en uram ara tanglona kum uca nun dam iya kubkwansir ati ebman.

³Nun Nai Imtamnyi ab, Er Mi Yesus Kristus ab aryi nunsi bico tenen kisal dangsina teleb. Nun Nai ab nun Du Yesus ab aryi nun kanya asi antanirdeirisina teleb. Tonda, nun Nai ab nun Du Yesus ab aryi dib en uram lak kiboka boukwe weik tenesiringiryi, nun ab tonkwa kuna teleb.

⁴Niryi sunsi disunun uca, sun kankan dam kuraming nang aryi dib teneraming dinyi asi du mouboka dib en uram asi diboka talernururaming ati eirisunun deyok aryi, ni kanya kilkil weik kuranir. Ara, nun Nai Imtamnyi biryi, “Dib en uram kekebmunyi uca, du moubsurur,” eboka takubdeibsou to kunuraming ati, ni kanya kilkil kunurur ati ebman.

⁵Ura, ni naiyabwe ni kwinyabwe dib tenen nang, kekebnindarur. Ukuryok niryi sunsi ato eterebkwinsin, sun mamun boukwe weik kimdandarur. A eterebmasin uram ara ukuryok eterena uram kuma. Erda, a uram ara niryi sunsi minob aryi eterebmasise. Sunci a uram asi yuma kobdob aryi bikmandau asi niryi, “Diboka kunubting,” tenen a uram asi ukuryok tubto eterebmasin.

⁶Boukwe weik kimdana uram ara ato kurur, Nun Nai Imtamnyi biryi, “Ato-ato kubdarur,” en uram asi kunubibiryok, boukwe weik kibdankwayeb. Sunci minob uca kekebmandau to, nun Nai Imtamnyi biryi, “Boukwe weik kibdandoka teleb ukubdandarur,” eboka eteresurur.

⁷Tola uram eteren nang ilinto ara anaboka im dangna tukwe dangna nirya yibarkiringnung ati ebman. A nang ara nun Du Yesus Kristus deyok ati tola uram akwe eterenung. Ati, sunci tola ati eboka nun Du Yesus biti ato eraming, “Erda Imtamnyi kurur ati, tukwetam kum yuryanmou ci, ninyi kum kibdanmou,” eraming. Ato uram etererandinyi bira ninyi kanya bowaningnanyi si antikristus kurur.

⁸Ati, sunci sundamnyi diboka kalikdandobmun ci, “Nun Du Kristus bokdonoksou nang aryi busul kuboka etereransei dib en uram ara wanikminiksicei,” tenen tanglona kum uca dib tenena teleb. Ara, “Nun Nai Imtamnyi biryi nunsi teleb kubdeiboka dengna dinyi karebkwansir,” tenen sunci tanglona kum uca dib en uram asi talebnurubdobkwandarur.

⁹Unanyi-unaner aryi tola uram dobdobmangiryi, nun Du Yesus Kristus bisi dib en uram asi kum talebnurubingnyi ura, a nang ara Er Imtamnyi dam kuna kum nang kuramingiryi. Ura, unanyi-unaner aryi a dib en uram asi talebnurubingnyi ura, a nang ara Er Imtamnyi ab Er Mi ab dam kun nang kunung.

¹⁰Unanyi-unaner aryi tola uram eterebsingnyi nang ara sunci sun ai dam du dongona mem. Sunci a nang asi, “Ni kwit teleb, ni kwin teleb,” ena mem.

¹¹Unanyi-unaner ara a tola uram eteren nang asi, “Ni kwit teleb, ni kwin teleb,” ebingnyi ura, a nang ara manmaliboka a tola uram eteren nang asi milinung ati ebman.

¹²Niryi sunsi deyok ilinto kerek sengna deici kerek seksitiniryok, niryi kerek sengna deib aryi ena ati ni li tenebman. Erda, ni nong asi sun dam yani ba, sun urasintam aryi yandoka uram sisikwayeb. Ba, ni ab sun ab tonkwa ebdatibyi uca, nun kanya ara sunglona kum uca kilkil weik kubkwansir ati ebman.

¹³Ni kunun atei dib tenen nang aryi sunsi, “Teleb,” ebmasing. Sun akatei buluraming dib tenen nang ara Er Imtamnyi biryi nun ab tonkwa wibdeibsou nang aryi sunsi, “Teleb,” ebmasing.