Read Futuna-Aniwa 3Yohanes 1 Bible Online

3Yohanes 1 - Futuna-Aniwa bible

3Yohanes 1

¹Ni kwit Gayus, ni Yohanes bira dib tenen nang asi kalingnunyi biryi kanti kerek sekeibmakin. Niryi kansi diba ati boukwe weik bokunun ci, “Teleb,” ebmakin.

²Ni kwit, kan nong nirya ara kib akwe kuna teleb. Tonda, utotoa nirya ara kanti teleb akwe kuna teleb. Kan dib tenerandim ara katabum ekurur to, kan nong ab kan kanya ab ababyi neiktoto katabum ekina teleb. Ato tenekunun ci, niryi kanti nun Nai Imtamnyi bisi molormilikunun.

³Kanda dib en uram asi du mourirankir ba, teleb dinyi akwe kunurandim ba, dib tenen nang mikbaryi aryi ni dam yandoka, “Gayus bira teleb dinyi ara ato kuboka kunurur,” eboka nukmanei ba, ni kekebkisiryi ni kanya kilkil weik kuranir ati ebman.

⁴Ninyi yuk nang aryi nisi, “Kan mabwe nermabwe ara dib en uram asi diboka kunuraming,” eboka nukningnyi ba, ni kanya ara kilkil mitik kum kubmanir. Ato uram kekena ara ni kanya iya teleb kubdeibmanir ati ebman.

⁵Ni kwit, kanci sun dib tenen nang asi tanglona kum uca dirnilirandim ara ni kekebman. Kanci yuk atei aryi yanganmangnyi nang asi kan kum bingdamun cok, du dongoboka dirniliramumwe ara ni kekebmakin.

⁶A nang ara tamuryandoka nun dib tenen nang urasintam aryi tikoka kan deyok ati ato eboka nukmai, “Nun kwit Gayus biryi nunda yuk atei aryi yanganmoubwe dib tenen nang asi boukwe weik kiboka dibnilibmasou ci, du dongobmou.” Ato eboka nukmai asi ni kekebman. Ati, aminda ababyi yuk atei-yuk atei nang aryi yanganmangnyi ura, kanci sunsi neiktoto du dongobmin ci, yina karebkwandum. Karebminyi ba, sirya yibingiryi mabmamunyi ani, berekci ura, “Anabdobkwayeb,” eboka molobkingnyi uca, kanci sunsi yina karebmin ci, “Ur bindarur,” ebkwandum. Ato kubminyi uca, kanci nun Nai Imtamnyi biryi teleb tenesurur to kunubkwandim.

⁷A yuk atei aryi yanganmai nang ara nun Du Yesus si deyok aryi, yandoka Teleb Uram etereryanmai. A yanganmai nang aryi, sunci Er Imtamnyi Uram walwal nang asi, “Yina karebsindarur,” eboka kum molobmai.

⁸A deyok aryi, nunda dib tenen nang aryi sun ato nang asi du dongona teleb ati ebman. Ara, “Sun Teleb Uram eteren nang asi yuk atei aryi yanganmangnyi ababyi yina kareboka dibnilibkwayeb.” Ato kubibyi uca, nun ab sun ab tonkwa wa irmilin nang kibkwamibiryi.

⁹Ni kwit, nira kan kurandim atei kuraming dib tenen nang asi kerek sengna ton sirya kerek sekeibmasise. Kerek sengna kerek sekeibmasise bok, Diotrefes bira, “Nira sun dib tenen nang sienyi kunun,” tenenanyi biryi nunti, “Ni li,” tenesurur ci, ni uram kum kekenurur.

¹⁰Ni sun dam sirya yanyi ura, niryi Diotrefes bisi wenebniryi, er malyi kun dinyi lak kibkwan. Erci nunti tola ati, “Malyi nang,” eransir ati, niryi lak kibkwan. Ura, malyi kun dinyi yuk dinyi tabakoka erci sun dib tenen nang yuk atei aryi yanganmangnyi nang asi du kum dongorur. Tonda, Diotrefes biryi sun dib tenen nang asi, “Yuk atei aryi yanganmangnyi nang ara du dongobmunyei,” eboka takubdeibmou. “Yuk atei aryi yanganmangnyi nang asi du dongobmunyi nang ara sunbabyi yakdonokwansin.” Ato eboka Diotrefes biryi sun dib tenen nang asi bisik sekoka sun dib tenen nang yuk nang kankan aryi yangdonongdur.

¹¹Ni kwit Gayus, kanda a kurur to malyi kun dinyi milibminyei. Erda tanglona kum uca teleb kuramin ci, kanci sun dib tenen nang asi tuba-tuba du dongona teleb. Unanyi-unaner aryi teleb kuramingnyi nang ara Er Imtamnyi mabwe nermabwe kuramingiryi. Ba, unanyi-unaner aryi malyi kuramingnyi nang ara nun Nai Imtamnyi bisi diboka kum bingdamingnyi deyok aryi, Er dam kuna kum nang kunung.

¹²Ura, nun kwit Demetrius biti ninyi nirya aryi kisal dangnung. Erci du moubwe ba, dib en uram kunurur ati ebman. Ati, nunbabyi ersi kisal dangnub. Nunci lak ena uram ara talyi uram kuma. Erda dib uram kunurur ara kanbabyi bikmarim.

¹³Niryi kansi deyok ilinto kerek sekdeibkitiniryok, kerek sengna deici kum ebkwansin.

¹⁴Nira kan dam yankwabman ati, kan urasintam yanyi uca, kan ab uram sisikwanim.

¹⁵Nun Nai Imtamnyi biryi kan ab yuk nang ab asi tuba-tuba antanirdeirisina teleb. Nun kwityabwe dib tenen nang aryi kansi, “Teleb,” eboka kibdobmaking. Ura, kanci nun kwityabwe kan ab tonkwa kurandum dib tenen nang yuk-yuk asi, “Teleb ebmasir,” ebdum.