Read Futuna-Aniwa Yudas 1 Bible Online

Yudas 1 - Futuna-Aniwa bible

Yudas 1

¹Ni kwityabwe dib tenen nang, teleb. Ni Yudas bira Yakobus er weit aryi sunsi teleb eboka kibdobmasin. Nira nun Du Yesus Kristus Er wa irmilinanyi kunun cok, sunti kerek sekdeibmasin. Sunda nun Nai Imtamnyi biryi boukwe kiboka nabsou nang kurandum ci, nun Du Yesus Kristus biryi kalingsurur nang ati niryi kerek sekdeibmasin.

²Nun Nai Imtamnyi biryi sunsi bico tenesina teleb. Tonda, Erci Er antanirdeirisin dinyi karebsiri ba, sun kanya teleb kurdeirisina teleb. Tonda, nun Nai biryi sunsi boukwe weik kimsina teleb. Ati, Erci sunsi langdeiboka ato kimdeirisina teleb.

³Ni kwityabwe boukwe kusunun nang. Niryi sunti, “Kerek Sengna ton sekdeibkwan,” teneansiryi, niryi ato teneansise, “Nun Du biryi nunda dib tenen nang asi tonkwa lebdeibsou deyok ati kerek sekwabman,” teneansise. Ato diboka teneansisiryok, niryi a deyok ati ukuryok kum kerek sekdeibkwinsin. Erda, yuk deyok asi dobniryi, niryi sunsi, “Dib en uram ati katabum eboka erebdeibdarur,” eboka kerek sekdeibmasin. A dib tenena uram ara nun Nai Imtamnyi biryi, “Iya talebkwaming,” tenen nunda dib tenen nang asi ebdeibsou deyok ati niryi sunsi, “Tola uram asi bisik sekmun ci, dib en uram katabum eboka erebdeibdarur,” eboka katabdeibmasin.

⁴Ton nang ara dib en uram asi diboka kum kunuraming ati ato ebman. A nang ara malyi kun nang kuramingiryok, sun dib tenen nang kankan dam yandoka kunung. A malyi kun nang ara nun Nai Imtamnyi uram asi kum kunuramingiryok, sundamnyi lak kum kimdaraming. A nang ara sun kanya dam aryi alyi weik tenen dinyi akwe teneramingiryok, sunci, “Er Imtamnyi biryi lebdeiboka nunsi Er mabwe nermabwe kibdeibsou,” eboka etereraming. Ati, sunci, “Ner talyi yobkwayeb ababyi nun Nai Imtamnyi biryi nunda Er mabwe asi kum wenebkwansir,” teneraming. A nang ara nun Du Yesus Kristus biti, “Nunsi arungdeirisurur Iya Weik Sienyi,” tenena kum uca, nun Du Yesus bisi diboka kum miliraming. Erda, sunci nun Du Yesus biti, “Nun li,” teneraming. Nun Nai Imtamnyi bira a nang asi diboka ikin dinyi kareboka iya takubdeibkwande ati ebman. Er Imtamnyi Uram umbura aryi minob kerek sekamnyi to, nun Nai Imtamnyi biryi Er Uram asi kunubdiryi, a nang asi diba ati wenebkwande.

⁵Ura, ni kwityabwe. Sunda sun Israel yala nang aryi minob dobdobmai dinyi sirya bikmarum bok, niryi a deyok ati tabakoka kerek sekdeibmasin. Ara, minob ura nun Nai Arungdeirisurutnyi biryi sun Israel yala nang nirya asi lebmou ura, Erci sunsi Mesir mutuk aryi kuboka bobinmou. Leboka bobinmou bok, sun Israel yala nang kankan aryi ton nang ara nun Nai bisi dib kum teneramnyi. Dib kum teneramnyi deyok aryi, nun Nai biryi sunsi weneboka obmou. Sunci a dinyi asi diboka teneibdarur.

⁶Tonda, yuma talak aryi Er Imtamnyi Uram eryuryangan nang ara nun Nai Imtamnyi bisi miliramnyi. Miliramnyi ani, a Uram eryuryangan nang ton nang ara Er Imtamnyi biti, “Nun li,” tenebmai ci, nun Nai bisi taklobmai. Taklobmai ati, nun Nai Imtamnyi biryi sunsi weneboka yakdonokmou. Yakdonokmou uca, sunda sun kuramnyi ai imtam asi takloboka Er Imtamnyi amwetam bun nang tuba kum kunung. Erda, nun Nai Imtamnyi biryi a Uram eryuryangan nang asi weneboka iya kunuk dam dongobwe. Ara, “Sirya uki tum berekci ura, iya wenebkwan,” tenen Erci sunsi lobdanman kum to tabwe aryi debwe uca, sunda iya kunuk dam iya kuraming. Ati, sunci a dinyi ara luba kibmunyei.

⁷Tonda, minob atei si Sodom kuramnyi nang ab atei Gomora kuramnyi nang ab ato kuboka neiktoto malyito kuramnyi. Akatei nang ab yuk atei dam atei nang ababyi ara talyi yobdandoka iya alyi tenen dinyi kuramnyi. Kuramnyi uca, nun Nai Imtamnyi biryi sunsi wenebmou. Ara, uk asi mo cemnande ato karebmou uca, akatei nirya iya kum danmou. Tonda, akatei yuk-yuk asi kuramnyi sal ner mitik mabwe nermabwe ababyi lukdandoka dibmai. Ato kuboka nun Nai Imtamnyi biryi sun Sodom atei kuramnyi nang ab Gomora atei kuramnyi nang ab sun malyi kuramnyi to kuboka minob wenebmou. A uram ara kiklina uram ato kurur. Nun Nai Imtamnyi biryi sun Sodom atei nang ab Gomora atei nang asi wenebmou to, Erci sun ukuryok malyi kuramingnyi nang ababyi weneboka abdiryi, weik uk mekwan ara tangabdeibman kum uk asi dongobkwande.

⁸Ura, sun kankan dam asi yandoka kunung nang ara neiktoto iya malyi kunung. A nang ara lengdera deib aryi alyi dinyi akwe teneirdaraming. A nang ara ner talyi yordaraming. Tonda, sunci sun kalingna nang ati, “Nun li,” teneraming. Tonda, a nang aryi sun imtam ai kuraming nang ara Er Imtamnyi Uram eryuryangan nang asi malyi uram kareraming.

⁹A nang aryi ukuraming to ara kikib kum kurur. Er Imtamnyi Uram eryuryangan nang sienyi si Mikhael biryi isa sienyi si Iblis bisi malyi uram karerande do? Ato kum kurur. Minob ura, nun aibwe Musa dibmou ura, Mikhael ab Iblis ab aryi Musa er tukwi ati lulubdanmarei cok, Mikhael biryi Iblis bisi malyi uram ton kum ebmou. Erda, erci, “Nira Iya Erebdobnyi kum kunun,” tenen, “Niryi Iblis bisi malyi uram eboka kerebnyei,” tenebmou cok, erci erdamnyi kum erebdeibdanmou ci, Iblis bisi, “Er Imtamnyi biryi kansi wenekina teleb,” ebmou.

¹⁰Ura, Er Imtamnyi Uram eryuryangan nang sienyi biryi isa sienyi bisi malyi uram kum ebmou asi, unato ati a tola uram eteren nang aryi Er uram eryuryangan nang asi malyi uram enung do? Ato dinyi ara kikib kuma. A tola uram eteren nang ara dib en uram asi bita kum bingnung cok, “Malyi kurdeirin dinyi aca,” enung. Tonda, sunci dib en uram ton ati bikmangiryok, sunci a dinyi ati, “Nun li,” tenen sikliraming. A nang ara ninyi kanya bona kum uca bai kam kanya bonung. Malyi dinyi ukuna akwe bingdonung ci, sundamnyi waningminingdaraming.

¹¹Nun Nai Imtamnyi biryi a nang asi diba ati wenebkwande. A nang ara er weit obmunyi si Kain bito nang kunung. Ton, “‘Dengna weik karebniting,’ tenen ati, tola uram eterebkwan,” teneramunyi si Bileam bito nang kunung. Ton, sunda, “Nun kalingsina nang uram kekena ni li,” teneramunyi si Korah bito nang kunung. Er Imtamnyi biryi Korah bisi obmou to, Erci sun Korah kuramwe to kuramingnyi nang ababyi wenebkwande.

¹²Ura, sunda dib tenen nang ara, “Nun Du Yesus ab nun kwityabwe dib tenen nang asi boukwe kunub,” tenen kwalina kwalirandum ba, a malyi kun nang ababyi sun ab tonkwa kuboka kwalirandum. Kwalirandum cok, a malyi kun nang ara alyi kuna kum uca sunda dib tenen nang ab tonkwa kuboka kwalirandum. A nang ara sundamnyi ati, “Nunda ninyi kalingna nang,” ebdanmangiryok, sunci dib tenen nang asi diboka kum kalingnaming. Erda, sunci, “Nun dam nang akwe dibnilibdandobkwayeb,” tenen nang akwe kunung. Duwa caknam aryi mo kum cemnande ara talyi kurande to, a malyi kun nang ababyi neiktoto talyi akwe kunung. Kumwe aryi duwa asi atam boyana otam bobina akwe kurkiringnande to, malyi kun dinyi ara a nang asi boyana bobina akwe kurande. Ba, du kum mourande co ato nang ababyi talyi akwe kunung. Yating kum dananci co ara minola yalangnande ati, talyi kurur ato, a nang ababyi talyi akwe kunung. A nang ara malyi kuraming deyok aryi, diba ati din nang ato kuraming ati ebman.

¹³Weik mekwan ara langkirbisinmaci ura, me silong deici ara me siring dikna borande. Sun kankan kuboka malyi kuraming nang ababyi neiktoto kunung. Ara, sun malyi kun dinyi langkirbisirande. Tonda, sunci alyi kurdeirin dinyi akwe bordeirirdaraming. Kurya dangsangdande ara bisik kiringnande to, a nang ara bisik kiringdaraming. Dib en uram kum kunuraming ati ato ebman. Nun Nai Imtamnyi biryi, “Wenebkwan,” tenen a nang asi iya kunuk dam kiknibminikwe.

¹⁴Minob ura, nun aibwe kisok Henokh bira Adam yalanyi dika tabaryi anyi biryi a malyi kun nang ati ato eboka lak kibmou. “Dibdendarur. Nun Nai Arungdeirisurutnyi ab Er dam kun nang Er uram eryuryangan nang seribu-ribu baryi ab ara imtam aryi kuboka yuryankwaming.

¹⁵Ara, ninyi nirya aryi ukuramingnyi to asi diboka lilibkwande ati yuryankwaming. Tonda, sun malyi kun nang asi wenebkwande ati yuryankwaming. A malyi kun nang ara Er Imtamnyi Uram asi kum kunuraming ci, Er Imtamnyi Uram asi malyi uram eraming ati, nun Nai Erebdobnyi biryi sunsi liliboka wenebkwande.” Ato eboka nun aibwe kisok Henokh bira Er Imtamnyi Uram minob bikoka ebmurubmou ci, sun malyi kun nang ati minob ebmou.

¹⁶A nang ara tuba-tuba, “Nun li,” en nang kunung. Ton, sunda yuk nang asi tuba-tuba kereraming. A nang ara, “Malyi dinyi kubkwayeb,” teneramingnyi tok, kubde baraming. A nang ara wingdaboka sunbaramnyi kisal dangdaraming. Tonda, “Dengna karebsiting,” tenen sunci yuk nang asi teleb-teleb kimdeiriraming.

¹⁷Ba, sunda ni kwityabwe dib tenen nang ara ato dinyi ara kunubde bimunyei. Erda, Nun Du Yesus Kristus biryi bokdonokmou uca, Teleb Uram deyok kouboka eterena nang aryi minob etereransei uram asi sunci diboka kanya tam bobdarur.

¹⁸A nang ara sunsi ato eboka etereransei. “Sirya kobdob talak ara malyi uram en nang anaboka yankwaming. A nang ara Er Imtamnyi Uram kum kunubingiryok, sun teleb kubmaci malyi kun dinyi akwe kubkwaming.”

¹⁹A nang ara sunda dib tenen nang asi bongwalwalarminingnansing uca, sunda neik kanya tuba kum borandum. Er Imtamnyi Kanya Roh Kudus ara sun kanya dam kum kurur ati, sunda malyi kanya akwe boboka malyi kun dinyi akwe kuraming.

²⁰Ura, ni kwityabwe o. Sunda ato kubmunyei. Erda, sunci katabdongoboka nun Du Yesus bisi dib tenen dinyi talebnurubkwandarur. A dib tenena ara nun Nai Imtamnyi biryi teleb tenesurur to diboka kurur. Tonda, Er Imtamnyi Kanya Roh Kudus milibsiri ba, nun Nai Imtamnyi bisi tuba-tuba molobdobdarur.

²¹Nun Nai Imtamnyi biryi sunsi boukwe weik kusurur ati, sunda boukwe kiboka Er dam tuba-tuba kubdarur. Tonda, sunci, “Nun Du Yesus Kristus biryi bico tenen iya kam kun dinyi karebkwansir,” tenen nun Du Yesus bisi dibde bukdarur.

²²Sun kankan kuraming dib tenena nang aryi kankana kuranci ura, sunci kerebmunyei. Erda, sunci bico kiboka dib en uram katabdongoboka eterebkwandarur.

²³Sun malyi kuramingnyi nang asi sunci weneboka lebdeibdarur. Ara, “Uk bisik bingnyei,” tenen, sunci a nang asi, “Sun malyi kun dinyi taklobdarur,” eboka wenebmun ci, lebdarur. Tonda, malyi kun nang yuk nang ababyi sunci bico kibdarur. Bico tenebmun cok, sunci sundamnyi kalikdandoka, “A nang malyi kun dinyi milibibyei,” tenebdarur. Ara, “Malyi dinyi weik dinyi babyi mitik dinyi ababyi ukubibyei,” tenen kanya boboka sundamnyi kalikdandobdarur.

²⁴Ura, ni kwityabwe. Nunci nun Nai Imtamnyi bisi si weik ena teleb. Erda Iya Mikibnyi biryi sunsi diboka kalingsurur. Erda kalingsurutnyi biryi karebsici uca, sunda sangna kum uca malyi dinyi kum dorandum. Nun Nai Imtamnyi biryi kalingsici ani, Erci sunsi erebdeiboka er milil weik ai bobinkwansir. A talak aryi, Erci sunda malyi kurandau nang ati ato ebkwansir, “Sun malyi kun dinyi asi Niryi diboka kilibmasise,” eboka, “Malyi kun dinyi utotoa sun dam tuba kum kurur,” ebkwansir. Nun Nai Imtamnyi biryi kilkil weik kanya boboka sunda dib tenen nang ati ato ebkwansir.

²⁵Nun Nai Imtamnyi bira Iya Erebdobnyi tentoknyi kurur ati, nunci Er si weik ena teleb. Nun Nai bira nun Du Yesus Kristus biriman aryi ninyi lemsurur. Erda ninyi Lemsurutnyi kurur ati, nunci Ersi si weik ena teleb. Yuma kobdob aryi kuboka, ukuryok ababyi nun Nai bira iya mikibnyi ton Iya Erebdobnyi kurur. Ninyi nirya ara Er uram asi kununa teleb. Tonda, aminda yankwande tum ababyi, Erda tanglona kum uca iya mikibnyi kubkwande. Amin.