Read Futuna-Aniwa Wahyu 1 Bible Online

Wahyu 1 - Futuna-Aniwa bible

Wahyu 1

¹A kerek sengna ara nun Nai Imtamnyi biryi aminda kunubkwansir dinyi asi lak kibdeibmou ci, nun Du Yesus Kristus biryi ebmuruboka nunsi lak eterebsou uram kurur. A uram ara minola kunubkwansir dinyi ati nun Nai Imtamnyi biryi nun Du Yesus bisi minob lak kibdeiabmou. Ara, “A uram ati Ni Mi Yesus Kristus biryi Nira Imtamnyi bisi milin nang asi lak kibdeibkwande,” tenen Er Imtamnyi biryi nun Du Yesus bisi a uram minob lak kibdeiabmou. A lak kibdeibsou dinyi ara nun Nai Imtamnyi biryi minob teneamwe to, bisik sekmanto kum kurur ati, diboka kunubkwansir. Ura, nun Du Yesus biryi Er Imtamnyi Uram eryuryangananyi ton bokwetebmou ci, ni Yohanes er wa irmilinanyi bisi ebmuruboka lak kibdeibmanou.

²Ura, nira Yohanes biryi kunumna deici aminda kunubkwansir dinyi asi asing eibmase ati, “Dib en uram aca,” eboka lak esunun. Ara, nun Nai Imtamnyi biryi lak kibdeibnou uram ara dib en uram kurur. Tonda, nun Du Yesus Kristus biti lak en uram ababyi dib en uram akwe kurur.

³Sun a uram ara Er Imtamnyi Uram ebdeibmaci uram nukoka ebde basingnyi nang asi nun Nai Imtamnyi biryi kisal dakwansir. Tonda, sun a uram kekeboka kunuramunyi nang asi nun Nai biryi kisal dakwansir. A dinyi nirya kunubkwansir talak ara minola yankwansir ati, sunci a uram umbura aryi kerek sekmasise to diboka kunubdarur ati ebman.

⁴Teleb, ni kwityabwe. Sunda nun Du Yesus bisi dib tenen nang Asia mutuk kurandum nang asi ni Yohanes biryi kerek sekeibmasin. Sun tabaryi atei kuramun ci, atei yuk-yuk bulurandum nang asi niryi, “Teleb,” ebmasin. Nun Nai Imtamnyi bira sunsi kisal dangsina teleb. Ara, nun Nai ukuryok kam kurutnyi ton, yuma talak aryi kam kuramunyi ton, aminda aryi kam kubkwandanyi biryi sunsi kisal dangsina teleb. Tonda, Erci antanibdeiboka sun kanya yuk-yuk asi teleb akwe kurdeirisina teleb. Tonda, Er Imtamnyi erebdob bun sokon urasintam aryi kurutnyi Roh Kudus ara kikliboka, “Mikib kanya tabaryi,” enubnyi biryi sunsi teleb kurdeirisina teleb.

⁵Tonda, nun Du Yesus Kristus bibabyi sunsi kisal dangsina teleb. Nun Du bira tola uram utotoa kum eboka dib en uram akwe enanyi kurur ati ebman. Erda sirya dibmou ani, kam tubto bukokmounyi biryi sunsi teleb kurdeirisina teleb. Nun Du bira yuma kobdob aryi kam bukokmou to, nunda Ersi dib tenen nang ara aminda aryi neiktoto kam bukokwayeb. Nun Du bira Iya Erebdobnyi kurur ci, sun weik sien nang asi kalingdurnyi kurur ci, sunsi teleb kurdeirisina teleb. Nun Du bira nunsi boukwe weik kusurur aryi nunci Ersi si weik ebkwayeb. Erda Er ining deib aryi nun malyi kun dinyi asi kiliboka lebdeibsounyi bisi erebdobkwayeb.

⁶Sirya lebdeibsou ura, Erda Iya Weik Sienyi biryi nunsi antaniboka Er amwetam bun nang kibdeibsou. Kibdeibsou ura, nunda Er Imtamnyi kan ninyi kan noutam kuboka antanirdeirin nang ato kuramibiryi, nun Du Yesus Er Nai Imtamnyi bisi miliboka Er wa inub. Nun Nai Imtamnyi bira tuba-tuba iya weik sienyi kurandiryi, Erda iya mikibnyi tuba kuna teleb. Aminda kubde bankwayeb talak nirya aryi nunci tanglona kum uca Ersi si weik ebkwayeb ati ebman. Amin.

⁷Asing dibdendarur. Nun Du bira imtam aryi kuboka yuryankwansir ba, ninyi nirya aryi asing dinmangnyi ba, duwa deici aryi yan yaniboka abdiryi, yuryankwande asi asing eibkwaming. Ba, sun nun Du Yesus bisi obmai nang ara, “Tebalang aryi lukdarur,” eboka arukmai nang ababyi asing dinmangnyi ba, nun Du Yesus yuryankwande. Yuryangaci ura, sun im dangna tukwe dangna kunung nang nirya aryi nun Du Yesus biti se tenen engebkwaming. Diba. Amin.

⁸Nun Nai Imtamnyi bira nun Arungdeirisurutnyi biryi ato eboka lak eteresurur, “Ni Yuma Kobdob kuransinyi kunun. Tonda, Sirya Kobdob kubkwananyi ton kunun. Ni yuma kam kuansinyi ton, ukuryok kam kununyi ton, minola yuryankwananyi ton kunun. Ni utotoa nirya asi taleboka iya mikibnyi kunun,” ebmou.

⁹Ni Yohanes bira sun kwit kunun ci, suntonyi kunun. Ara, sunda mambul dinyi borandum to, nibabyi neiktoto mambul dinyi bonun. Tonda, sunda nun Nai Imtamnyi amwetam bun nang kurandum to, nibabyi neiktoto Er Iya Weik Sienyi amwetam bunanyi kunun. Tonda, sunda mambul dinyi borandum ara tanglona kum uca borandum to, nibabyi neiktoto mambul dinyi bonun ci, tanglona kum uca bonun. Nira suntonyi kunun ci, me dumdum si Patmos kuranse. Ara, niryi Er Imtamnyi Uram ab nun Du Yesus deyok ati dib en uram ab asi lak eterenun deyok aryi, ninyi aryi nisi yakdongoboka Patmos dam boyanmanei.

¹⁰Me dumdum atei si Patmos tuba kuranse ura, nun Du Arungdeirisurutnyi si weik eboka molon uki tum ton berekmou. A uki tum berekmou ura, Er Imtamnyi Kanya Roh Kudus aryi karebmanou uca, kunumna ton asing eibmase. Ara, kunumna deici aryi kekebmase uca, ni dongtam aryi uram weik dobmou ba, ni kanya lukdanmanou. A uram ara liman ato, buena si sangkakala uram ato weik dobmou.

¹¹A uram weik dobmou ara nisi ato ebmanou, “Kanci asing eibkwandim dinyi asi kitibtalen kerek sengna umbura aryi sekeibdum. Sirya kerek sekeibmaminyi ura, sun tabaryi atei buluraming dib tenen nang asi deibdum. Ara, Efesus atei ab, Smirna atei ab, Pergamus atei ab, Tiatira atei ab, Sardis atei ab, Filadelfia atei ab, Laodikia atei ab asi jemaat yuk-yuk asi a dinyi nirya lak kibdeiboka kerek sekeibdum,” ebmou.

¹²A uram asi kekebmasiryok, niryi, “Unanyi biryi nisi uram ebmanir do?” tenen dongtam danguboka dirtamurderanse. Uca, uk buk dinirdongona dinyi tabaryi ara neik dam-dam kubmai asi asing eibmase. A uk buk diniboka burdeirin dinyi ara milil weik dinyi emas aryi kikniamnyi asi asing eibmase.

¹³A uk buk diniboka burdeirin dinyi kankan ara Ninyi Damunyi bitonyi tentok tikmou. Anyi bira ongon aling cang dinyi asi ongobmou uca, Er yan nirya asi libmou. Tonda, taram tam ara emas ato kikniamnyi aling milil aling ongobmou.

¹⁴A tikmounyi kisok otong kul otong tingdamnyi asi iya kait kuramwe. Ara, domba otong iya kait kurande ato, lumtaiya iya kait kurande ato, a tikmounyi otong ara iya kait kuramwe. Tonda, Er asing ara uk ubna ulul atonyi tikmou.

¹⁵A tikmounyi yan ara milil dinyi si tembaga kat kurande yan boamunyi bisi tikmou. Tembaga ara uk dam dongoraming uca, milil weik kurande to, a tikmounyi yan ara milil weik kuramwe. Tonda, Anyi biryi eramwe uram ara melum weik sangna aryi lurum-lurum erande to kubmou.

¹⁶A tikmounyi taruk siriktam aryi kurya tabaryi asi diboka talebmou. Tonda, Er silalum deici aryi ninyi on ya anabmou. A ninyi on ya ibwe dina-dina ara yu weik kuramwe ya si anabmou. Tonda, Er urasin ara milil weik kubmou. Kitingtam kurande ba, kiting ara tin kuboka berengnande to, a tikmounyi urasin ababyi neiktoto berekmou.

¹⁷Ura, Anyi bisi asing eibmasiryi, ni Yohanes bira, “Ni Nai,” tenen tukwetam maryurbinmase. Ara, ilil aryi din nang atonyi kibmase ura, ni tukwetam maryurbinmase. Bok, Anyi biryi er taruk siriktam asi ninikoka ni deici deibdongobmanou. Ura, erci nisi ato ebmanou, “Kan ilil kubkicei. Nira Yuma Kobdobnyi ton Sirya Kobdobnyi ton kunun,” ebmou.

¹⁸“Tonda, Nira iya kam kununyi kunun. Asing dibdenurum. Nira dibmase ani, kam tubto bukokmase. Nira iya kam kununyi tuba-tuba kunun. Aminda kubde binkwayeb talak nirya aryi Ni kam iya kubwan. Nira din dinyi asi bublan tiringna talenun. Tonda, din nang kuraming ai bublan kungna ababyi talenun. Talenun ati, Niryi din nang asi kam bukeibkwan ati mikib bonun.

¹⁹Ati, kan asing eibmarim dinyi nirya ara kerek sengna umbura kerek sekeibdum. Ara, ukuryok kurande dinyi ton aminda aryi kunubkwande dinyi ababyi nirya kerek sekeibdum.

²⁰Ura, Ni taruk siriktam doubmonwe tabaryi kurya ara kemdeirin dinyi ato kurur ati ebman. A kurya tabaryi ara kebdeiboka sun jemaat tabaryi asi Er Imtamnyi Uram ebmuruboka lak eteren nang tabaryi kunung. Tonda, uk buk diniboka burdeirin dinyi tabaryi ara kemdeirin dinyi ato kurur. A uk buk diniboka burdeirin dinyi tabaryi ara kebdeiboka sun Asia mutuk kuraming jemaat tabaryi kunung ati, uk buk burdeirin dinyi tabaryi deibmonwe,” ebmou.