Read Futuna-Aniwa Wahyu 10 Bible Online

Wahyu 10 - Futuna-Aniwa bible

Wahyu 10

¹Asing tuba dinmase uca, Uram eryuryangananyi yuknyi biryi imtam aryi kuboka yuryanmou ati eibmase. Anyi bibabyi mikibnyi nun asi yuryanmou. Er ongon aling ara duwa ato kubmou ba, er kisok kaluna ara mita deiboka ongorande ato kubmou. Er urasin ara kiting ato berengna weik kubmou ba, er yan bitinyi ara milil weik kubmou cok, mikib weik kubmou. Ati, er yan ara uk buk weik arande dinyi ato kubmou.

²Anyi bira kitibtalen kerek sengna mitik dinyi tengebdeibmou dinyi talebmou. Ura, er siriktam yan asi ilila mekwan deici yanibmou ci, er kwanimtam yan ara tukwetam yanibmou.

³Ato kuboka tikmuryi, erda uram weik dobmou. Ara, ilil bai kam si singa bira uram weik dorande to, anyi biryi uram weik dobmou. Uram dobmou ba, liman tabaryi aryi debmou.

⁴Liman lilim tabaryi aryi deboka uram weik ebmai ba, nira Yohanes biryi, “Kerek sekun,” tenen kubmase. Ato tenen kubmase bok, yuk uram ara imtam aryi kuboka ebmou ati kekebmase. A uram ara ato ebmanou. “Liman lilim tabaryi aryi ebmai uram kerek sekeibminyei. Erda, ‘A uram ara kitirdongon meterai aryi iniraming uram ato kurur,’ tenen lak ebminyei,” ebmou.

⁵Ura, min ilila mekwan deici ab tukwetam deici ab yan yanibdongoboka tikmou eibmase Uram eryuryangananyi bira tuba tikmou aryi er taruk siriktam imtam erewelebmou.

⁶Taruk erebwelebmou cok, erci Er Imtamnyi si deici aryi katabum ena uram ara diboka kununa uram lak ebmou. Ara, Er Iya Erebdobnyi imtam tukwetam mekwantam aryi kurande dinyi nirya Kikniamunyi si deici aryi erci ato ebmou, “Wenen tum ara ukurlona kum uca yankur.

⁷Ba, Uram eryuryangananyi tabaryi anyi biryi sangkakala kum dobde bok, Er Imtamnyi biryi minob teneamwe dinyi ara lak kum eamwe dinyi asi lak kiboka kunubkwande. Ara, sun Er Imtamnyi bisi wa irmiliraming nang ara Er Uram ebdeibmaci to lak etereramnyi nang asi sirya lak kibdeibmou to, nun Nai biryi kunubkwande,” ebmou.

⁸Ura, min kekebmase uram ara imtam aryi kuboka ebmanou uram aryi tubto nisi ato ebmanou. “Kanci biminyi ura, Er Imtamnyi Uram eryuryangananyi biryi talebmar kitibtalen kerek sengna asi dobtalebdum. Mekwan dam tukwetam aryi tikmarnyi talebmar kerek sengna tengebdeibmar asi dobdobdum,” ebmanou.

⁹Ato ebmanou ura, niryi a Uram eryuryangananyi dam bindoka, “Nai, a mitik kerek sengna doubmarima ara ni karebnurum,” eboka molobmase. Molobmase uca, erci nisi ato ebmanou. “Kanci a kerek sengna doboka yibdum. A kerek sengna ara sibambol dam deirbiminyi ai ara kwiryi me minmin ato to weik kubkwankir. Bok, sirya yibkwetebminyi ura, mundu umbura wengbindoka maryurbikici ai ara sik weik kubkwankir,” ebmanou.

¹⁰Ato eboka karebmanou ura, Er Imtamnyi Uram eryuryangananyi taruk aryi mitik kerek sengna asi dobdobmase ura, yibmase. Ura, a kerek sengna asi yibmase uca, sibambol ai deirdongorbinmase ura, to ara kwiryi me ato kekebmase. Bok, mundu ai wengbindoka maryurbinmanou ura, danguboka sik weik dinyi ato kibmou.

¹¹Sirya yibmase ura, nisi ato ebmanou. “Kanci yibmarim dinyi ara Er Imtamnyi Uram asi ermururamin ci, ninyi ilinto asi dib en uram tubto lak ebkwandum. Ara, ninyi yala ilinto ab, weik sien nang taleraming mutuk nang ilinto ab, yuk-yuk uram eraming nang ilinto ab, ninyi kalingnaming weik sien nang ilinto ab asi Er Imtamnyi biryi kunubkwande uram asi lak kibdeibdum,” ebmanou.