Read Futuna-Aniwa Wahyu 11 Bible Online

Wahyu 11 - Futuna-Aniwa bible

Wahyu 11

¹Ura, ai kiklin kama ato dinyi asi nisi karebmanou ura, erci nisi ato ebmanou. “Kanci Bait Allah ai ara Er Imtamnyi dama deirin ai biminyi ura, akai asi kama aryi kiklibdum. Tonda, Er Imtamnyi ai umbura kurande dama deirin dam ababyi kiklibdum. Tonda, akai umbura Er Imtamnyi si weik en nang nirya asi nukde birum,” ebmanou.

²Bait Allah ai asi aitam dinyi akwe kiklibdum. Akai baitam keta asi kiklibminyei. Baitam keta ara sun Er Imtamnyi biti walwal nang dinyi kubkwande ati, kanci kiklibminyei. A nang ara yan yaniboka Er Imtamnyi biryi mining atei iya teleb atei asi wengbingiryi, malyi kun dinyi kunubkwaming. Ara, wala empat puluh dua baryi kubingiryi, Er Imtamnyi ai keta baitam dinyi asi yan yanibsitabkwaming ati kiklin kum.

³Ura, dib en uram eranding nang bitinyi asi niryi mikib karebnyi uca, Er Imtamnyi Uram lak eterebmilibkwanding. Ara, uki seribu dua ratus enam puluh baryi kubingiryi, engen weik kanya bobkwaming deyok aryi malyi aling ongobingdingiryi, Nira Imtamnyi biryi uram lak eterebmurubkwanding.

⁴Er Imtamnyi Uram lak eterebmurubkwanding nang bitinyi ara im dangna tukwe dangna kalingdur iya Weik Sienyi urasintam aryi tingdurung. Ninyi sirik bitinyi ati ato kum ebman. Erda, co si zaitun bitinyi ab berengna deirin dinyi bitinyi ab ati ato ebman. A dinyi bitinyi ara Er Imtamnyi im dangna tukwetam nirya Arungdeirisurutnyi urasintam aryi tingdurung co bitinyi ara kikliboka dib en uram diboka lak kimnandei.

⁵Ura, ninyi aryi a dib en uram lak kimnandei nang ati, “Dilaka sakeibtibyi,” tenen malyi kibdeibingnyi ba, ninyi yin uk ara sun sibambol aryi anaboka a malyi kimdeirin nang asi yibkwande. Unanyi-unaner ara a dib en uram lak kimdeirin nang bitinyi ati malyi kibdeibingnyi nang ara bisik sekmanto kum kuboka ato dibkwanung.

⁶Er Imtamnyi biryi mikib karebmou uca, a bitinyi nang ara imtam aryi kuboka mo bublan diboka tiringdongona ati mikib borurung. Ati, sunci dib en uram lak eterebmurubkwanding talak ara, “Mo cebcei,” ebdiringnyi uca, mo mitikanun ababyi kum cebkwande. Ba, mikib weik dobdobmarei uca, sunci, “Yiban me nirya ara ining dandur,” ebdiringnyi ura, yiban me nirya ara ining dankwande. Tonda, sunci, “Wenebkwinim,” tenebmaringyi uca, wenena utotoa aryi sun im dangna tukwe dangna nang asi wenebkwanding.

⁷Ura, a bitinyi nang dib en uram sirya lak eterebmilibdingnyi ura, ilila bai kam ara ilila tukwe umbura aryi anabkwande. Sirya anabci ura, ilila bai kam aryi yandoka a bitinyi nang asi diba obkwande.

⁸A bitinyi nang asi obci ura, ninyi aryi sun nong asi tukwe kum dongobkwaming. Erda, sun nong ara weik atei kuboka ninyi ilinto yiban ai keta tam asi talyi mabkwandei. A weik atei ara kuraming nang ara malyi weik kunung ati, akatei si kebdeiboka, “Sodom atei,” ton, “Mesir mutuk,” eboka dobtibyi. Akatei dam aryi minob ura nun Du Yesus bisi co lase deici deibmai ci, mambul weik kubdeibmai.

⁹Ura, uki winiryi ara mabmangnyi ani, uki dumbaryi kum bisibmaci bok, im dangna tukwe dangna aryi yangan nang ara a nang bitinyi nang oblobmaca tukwi ara asing dibdeningiryok, “Tukwe dongona nun li,” tenebkwaming. Ara, im dangna tukwe dangna mutuk nirya ab, ninyi yala nirya ab, yuk-yuk uram en nang nirya ab, bangsa nirya ab aryi yangan nang ara asing dibdeningiryok, a bitinyi nang asi tukwe kum dongobkwaming.

¹⁰Erda, sun im dangna tukwe dangna nang ara kilkil weik kubingiryok, “Er Imtamnyi Uram ebdeibmaca bobana nang ara nun li tenen nang ara sirya dibmaring,” ebkwaming. Kilkil weik kubingiryok, sunci sun mamun muna karebdankwaming. Ati, sunci a dib en uram eterebmilibmarei nang ati, “Ilila kam aryi nun wenerdeiriransirei nang asi sirya obmar,” tenen kilkil weik kubkwaming.

¹¹Ura, uki winiryi tum bisibmou ura, uki dumbaryi aryi kiting dukduk ebmou ba, Er Imtamnyi biryi isin neb-neb ena karebmou uca, a nang bitinyi dibmarei asi kam bukokmarei. Kam bukokmarei ba, sun asing eibmai nang ara ilil weik kubmou.

¹²Ura, amol a kanya teleb kunmaci nang aryi kekenmangnyi uca, imtam aryi kuboka uram ton aryi doboka a bitinyi nang asi, “Ni dam weleyarurum,” ebmou. Uca, sun ordana nang aryi asing eibmai bok, a bitinyi nang ara duwa deici aryi kuboka imtam welebinmarei.

¹³Welebinmarei talak tuba kubmou bok, mutuk eimna weik dobmou. Mutuk eimna weik dobmou uca, weik atei nirya bokdoba takubaryi bok, bokdoba tentok tam asi ai nirya daksakmou. Ba, bokdoba toubnibaryi tam ara ur tuba kubmou. Ura, mutuk eimna aryi yibmou nang ara ninyi tujuh ribu baryi yibmou. Uca, sun ur tuba kubmai nang nirya aryi ilil weik kubmou bok, “Naie, Er Imtamnyi bira mikib weiknyi,” eboka Ersi weik ebmai.

¹⁴Ninyi wenena bitinyi dinyi sirya bisibmar. Ba, ninyi wenena winiryi dinyi dam kubmar.

¹⁵Ura, Er Imtamnyi Uram eryuryangananyi tabaryi anyi buena si sangkakala dobmou. Sirya dobmou ura, uram yuk-yuk aryi eboka imtam aryi kuboka uram weik dobmai. Ara, ato ebmai, “Nun Nai Imtamnyi bira imtam tukwetam arungdeirisurur iya weik sienyi kurur ara ukuryok lak kibmar. Nun Du Kristus bibabyi imtam tukwetam kalingdur iya weik sienyi kurur ara ukuryok lak kibmar. Sun nang amse tanglona kum uca iya kalikwansiring,” ebmai.

¹⁶Ura, sun ninyi kalingna nang dua puluh empat baryi ara Er Imtamnyi si weik erebdeibmai. Ati, sunda Er Imtamnyi urasintam aryi erebdob bun sokon deici bukmai nang ara, “Nun Nai,” tenen luknubdongobdanmai cok, sun urasin yuk-yuk asi tukwe ai dakdongoboka Er Imtamnyi si weik ebmai.

¹⁷Ara sunci ato ebmai, “Nun Nai Imtamnyi. Kanda Mikibnyi bisi nunci, ‘Ei, nun Nai,’ ekunub. Kanda iya kam kurumnyi kurum. Kanda minob kam kuramunyi kurum. Kanda iya mikibnyi kurum ci, iya weik sienyi kiboka kalingnandim ati, ‘Ei, nun Nai,’ ekunub.

¹⁸Sun ninyi yala yuk-yuk ara yu weik kurande ba, Kanci yu kuboka sunsi wenebkwandim uki tum sirya yanmar. Kanda Imtamnyi biryi sun din nang aryi malyi kun dinyi asi lilibkwandim uki tum sirya yanmar Tonda, Kanci Kan wa irmilikin nang ara Kan Uram ebdeibmaci to lak etereramnyi nang asi dekoka teleb kubdeibkwandim uki tum sirya yanmar. Ara, Kanda Imtamnyi bisi dam kun nang ton, Kan si weik teneranking nang asi teleb kubdeibkwandim tum sirya yanmar. Sien kum nang ton sien nang ababyi Kanci teleb kubdeibkwandim ati ebmab. Kanci sun im dangna tukwe dangna dangminingsina nang asi dakminikoka obmarim ati nunci, ‘Ei, nun Nai,’ ekunub,” ebmai.

¹⁹Ato eboka Er Imtamnyi si weik ebmai ba, Er Imtamnyi dam kun ai imtam ai kuramwe bublan kuklobmou. Sirya kuklobmou ati, akai imtam ai umbura co sangkol asi asing eibmai. A co sangkol ara Murdeirisina Kerek Sengna Deiamnyi Co Sangkol kuramwe. Bublan tuba kuklobmou bok, bebe yuk-yuk lingebmou ba, liman yuk-yuk ebmou. Tonda, mutuk eimna weik dobmou ba, lumtaiya ilinto ababyi deiboka mo cebmou.