Read Futuna-Aniwa Wahyu 12 Bible Online

Wahyu 12 - Futuna-Aniwa bible

Wahyu 12

¹Ura, asing dinmase uca, imtam aryi kuboka kunumna ilil weik tenen dinyi kibmou asi asing eibmase. Ara, sien ner tentok kubmou asi er ongon aling ara kiting berengna ato kubmou. Ba, er yan deirin ai ara wala milil ato kubmou. Ba, er kisok kaluna ara sien nang milil kaluna ato kubmou. A kisok kaluna deici ara kurya amolbaryi kubmou.

²Ura, a ner ara mundu boamwe ani, mi deibkou ati mi deyok aryi ngolokmou.

³Asing dinmase uca, imtam aryi kuboka yuk kunumna ilil tenen dinyi ababyi eibmase. Ara, ilila kwatima si Korotnyi asi asing eibmase. Ilila kwatima si Korotnyi er bol ara bi kuramwe ba, kisok tabaryi boramuryi, akola takubaryi beleramwe. Ilila kwatima Korotnyi ara weik sienyi kuramwe ati, kisok kaluna tabaryi boramwe.

⁴Ilila kwatima si Korotnyi er amwe ara mikib weik kuramwe asi kurya ilinto libdobmou ci, tukwetam donokwetebmou. Imtam aryi kurande kurya nirya ara bokdoba winiryi bok, bokdoba tentok tam asi libdobmou uca, tukwetam donokwetebmou. Ba, bokdoba bitinyi winiryi tam ara ur tuba kubmou. Ura, ilila kwatima ara mi deibkou sien ner dam tikokmou ci, “Mi deibkwanci ura, er mi asi anmalakoka oyibkwan,” tenen dam deibdongoboka tikmou.

⁵Ato tenen tikmou ba, a ner ara sal mi deibmou. A mi ara weik sienyi kibdiryi, weik sien nang taleraming kama talebdiryi, sun im dangna tukwe dangna nang nirya asi mikib kuboka kalikwande. Mi sirya deibmou ura, a mi ara anmalakoka Er Imtamnyi urasintam bobinmai.

⁶Ura, a sien ner ara lemdarbindoka ninyi kun kum ai bindobmou. Ara, Er Imtamnyi biryi sirya kiknibminikmou dam asi bindobmou ura, a ner ara ninyi kun kum ai asi kuramwe. Uki seribu dua ratus enam puluh baryi ninyi kun kum ai kuramwe bok, Er Imtamnyi biryi yina kareboka ersi dirniliramwe.

⁷Ura, imtam aryi kuboka mar ordana weik obdanmai. Ara, Er Imtamnyi Uram eryuryangan nang sienyi si Mikhael ab er milin nang ab aryi ilila kwatima si Korotnyi ab obdanmai. Ara, ilila kwatima si Korotnyi ab er milin nang ab obdanmai.

⁸Ilila kwatima Korotnyi ab er milin nang ab aryi mikib kuboka mar ordanmai asi Mikhael ab er milin nang ab aryi muna kibdobyi. Muna kibdobiryi, ilila kwatima Korotnyi ab er milin nang ab asi yakdonokmai uca, a nang ara imtam tuba kum kubmai.

⁹Ati, sunci ilila kwatima si Korotnyi asi doboka tukwetam dobkwetebmai. Ilila kwatima Korotnyi ara min talak kuramwe kwatima kuramwe. Anyi si ara Ninyi Malyi Kurminingnanyi ton, Iblis ton kurur. Anyi biryi sun im dangna tukwe dangna nang nirya asi bowaningminingdur. Anyi bira ilila kwatima si Korotnyi kuramwe asi er milin nang ab tonkwa doboka talebmai ci, tukwetam bokwetebmai.

¹⁰Ura, imtam aryi kuboka uram weik dobmou ati kekebmase. A uram ara dib tenen nang aryi ebmai uram ara ato ebmai. “Nun Nai Imtamnyi biryi lemdeirisin dinyi ab mikib dinyi ab kiknibmar ci, iya weik sienyi kurur ara ukuryok lak kibmar. Tonda, nun Du Yesus Kristus bira Er Imtamnyi biryi bokwetebmounyi bira iya erebdob sienyi kurur ara ukuryok lak kibmar. Nun duweityabwe dib tenen nang asi tola ati tatab-tatab enanyi bisi tukwetam dobkwetebmang ati ato ebmab. Iblis bira imtam tuba kum kurur ati, erda bukman mabman Er Imtamnyi urasintam tuba kum yankwande. Iblis bisi muna kibdongobmang ati, erda nun Du Yesus Er weityabwe asi tuba-tuba tatab-tatab ebmana asi tuba kum kurur.

¹¹Iblis bisi muna kibdongobyi, nun Du Yesus domba Mi atonyi Er ining deib aryi muna kibdongobyi. Tonda, nun Du Yesus uram dib en uram katabum eboka lak ebmai deib aryi Iblis bisi muna kibdongobyi. A nang ara, ‘Obsingnyi ababyi nunti teleb,’ tenen ilil kanya kum bobmai. Erda, mikib kuboka Iblis bisi muna kibdongobyi.

¹²A deyok aryi, sunda imtam aryi kurandum nang nirya ara kilkil weik kuna teleb. Ba, sun tukwetam weik mekwan tam asi wenena tum dam kubmar. Iblis bira, ‘Obkwan,’ tenen tukwetam yuryanmar ati sun tukwetam kurandum nang dam kubmasir. Erda yu weik kubmar ati ebmab. ‘Uki mitikanun ur obkwan,’ tenen bikmar ati, er yu weik kubmar,” ebmou.

¹³Ura, ilila kwatima si Korotnyi biryi, “tukwetam dobkwetebmaning,” tenen bikmou uca, erda mi deibmou sien ner ati, “Obtinyi,” tenen domkiringnamwe.

¹⁴Ba, sien ner asi maka bib ol ato dinyi bitinyi asi karebmai. Ba, ninyi kun kum mutuk ilila kwatima Korotnyi binmana kum ai asi ola bindobkwamwe ati, maka ol asi ersi karebmai. Ninyi kun kum ai ara ilila kwatima Korotnyi binmana kum kuramwe. A mutuk ara Er Imtamnyi biryi a ner asi yina kareboka dibnilibkwamwe. Ara, talak bitinyi ab ton talak bisina kum uca tabakdongoboka Er Imtamnyi biryi a sien ner asi dibnilibkwamwe.

¹⁵Ura, a kwatima aryi, “A ner asi me oboka ilinto me aryi siklibte ba, dibte,” tenen me ilinto asi dukdonokmou.

¹⁶Kwatima aryi, “Ner obtinyi,” tenen me ilinto dukdonokmou bok, tukwetam aryi, “A ner lebdeibkwan,” tenen um aklobmou uca, kwatima aryi dukdonokmou me ara tukwe angdona bisik wekmou.

¹⁷Ura, a kwatima aryi a ner asi obman kum kubmou ura, erci a ner asi yu weik kubmou ba, er mabwe nermabwe asi mar ibinmou. Ara, Er Imtamnyi Uram kunuboka nun Du Yesus biti dib en uram lak eraming nang ab mar ordaramnyi.

¹⁸Ura, kwatima ara ilila mekwan katum dam tikmou.