Read Futuna-Aniwa Wahyu 13 Bible Online

Wahyu 13 - Futuna-Aniwa bible

Wahyu 13

¹Ni Yohanes biryi ton asing dinmase uca, ilila kam weik dinyi ara ilila mekwan umbura aryi anabmou. A kam ara kisok tabaryi boramwe ba, er kisok akola ara takubaryi beleamwe. Er asok yuk-yuk ara si yuk-yuk kerek sekamnyi ara Er Imtamnyi si yan yanin dinyi asi kerek sekamnyi. Ba, ilila kam kisok deici ara akola takubaryi beleamwe ba, weik sien nang kisok kaluna takubaryi kaluramwe.

²A kam nong bol ara cung yibarande yu kam si macan ato kuramwe. Ba, kam yan ara ilila kam si beruang yan ato kuramwe. Tonda, kam urasin ara ilila kam si singa urasin ato kuramwe. Ilila kwatima si Korotnyi ara ilila kam asi er mikib karebmou ci, erebdob bun sokon ab erebdob si ababyi karebmou.

³Ilila kam kisok tentok ara dilaka sakamwe uca, dibmanto kuamwe bok, sirya kwetebmou. Sirya kwetebmou ati, im dangna tukwe dangna nang nirya aryi, “Naie,” tenen ilila kam asi miliramnyi.

⁴Ura, ninyi nirya ara sun kutam ikdongoboka ilila kwatima si Korotnyi si weik ebmai. “Ilila kam asi mikib karebwe,” tenen bikmai ati ilila kwatima si Korotnyi si weik ebmai. Tonda, sunci kutam ikiboka ilila kam ababyi si weik ebmai. Ilila kam si weik ebmai ci, sunci ato ebmai. “Unanyi bira ilila kam ato mikib kubmar do? Unanyi biryi mar ordandoka ilila kam asi muna kibte do?” ebmai.

⁵Ilila kwatima aryi mikib karebmou uca, a ilila kam aryi wingdana uram eramuryi, weik sienyi ato kuramwe. Ara, Er Imtamnyi biryi teleb teneamwe to, wala empat puluh dua kuramwe ba, ilila kam ara ato kuramwe.

⁶Ura, ilila kam aryi er si akoka suboka Er Imtamnyi ab Er Imtamnyi si ab yan yaniramwe. Tonda, Er Imtamnyi kurur ai imtam ai asi ilila kam aryi sumnamwe. Tonda, imtam kunung nang ababyi sumnamwe.

⁷Er Imtamnyi biryi, “Ur,” tenebmou uca, ilila kam aryi mar ordandoka sun dib tenen nang asi muna kibdobmou. Tonda, Er Imtamnyi biryi ersi mikib karebmou uca, ilila kam aryi sun im dangna tukwe dangna kuramnyi ninyi yala nirya asi kalingnamwe. Tonda, mutuk nirya ab yuk-yuk uram en nang nirya ab bangsa nirya ab asi ilila kam aryi kalingnamwe.

⁸Ura, sun im dangna tukwe dangna kuramnyi nang nirya aryi sun kutam ikdongoboka ilila kam si weik ebmai. Ara, Er Imtamnyi biryi Kam Kurdeirin dinyi Kerek Sengna aryi sun si kum sekamnyi nang ara ilila kam si weik ebmai. A kerek sengna ara iya kam kun dinyi karebkwansir nang si yuk-yuk eboka kerek sengna asi nun Nai Imtamnyi biryi imtam tukwetam kiknibmou kum cok, kerek sekamwe. Sirya kerek sekamwe ura, nun Du Yesus Domba Mi atonyi bira ninyi aryi oaminyi biryi a kerek sengna asi talerur.

⁹Sunda amol kusurur nang ara diboka kekebdarur.

¹⁰Unanyi-unaner ati nun Nai biryi, “Ninyi aryi taleboka wenen ai dongobting,” tenebsici ura, a nang ara wenen ai wekwaming. Unanyi-unaner ati nun Nai biryi, “Ninyi on ya aryi obting,” tenebsici ura, a nang ara ninyi on ya aryi obkwaming. Ati sun dib tenen nang ara mambul weik dobingiryok, teleb kanya bobingiryi, tanglona kum uca nun Du Yesus bisi milina teleb.

¹¹Asing dinmase uca, ilila kam yuk kam asi eibmase. A kam ara tukwe umbura aryi kuboka anabmou. A kam kisok deici ara akola bitinyi beleamwe. Domba mi ato akola bitinyi beleamuryi, er uram ara ilila kwatima si Korotnyi ato uram eramwe.

¹²Tukwe umbura aryi anabmou kam ara yuma kam mekwan aryi anamwe kam aryi mikib dobmou uca, weik sienyi kiboka sun im dangna tukwe dangna nang asi kalingnamwe. Kalingnamuryik, erci, “Mekwan aryi anamwe kam si weik ebdarur,” eboka takurdeiriramwe. Ato eboka takurdeiriramwe uca, ninyi nirya aryi kutam ikdongobmai ci, dilaka sakamwe bok, sirya kwetebmou kam si weik ebmai.

¹³A kam ara tukwe umbura aryi anabmou kam ara ilil tenen dinyi ilinto kiknibmou. Ara, ninyi nirya asing eibmai ba, erci, “Uk ara imtam aryi kuboka sakte,” ebmou uca, uk ara imtam aryi kuboka tukwetam sakmou.

¹⁴Ura, mikib dobdobmou uca, tukwe umbura aryi anabmou kam ara mekwan aryi anaamwe kam miliboka ilil tenen dinyi kikniramwe. Kikniramwe uca, erci sun im dangna tukwe dangna nang asi bowaningminingnamwe. Bowaningminingnamuryi, tukwe umbura aryi anabmou kam aryi arukmou uca, mekwan aryi anamwe kam ato kurande dinyi kiknibmai. Ara, “Ninyi on ya aryi dilaka karebmai bok, sirya kwetebmou kam si weik ebkwayeb,” tenen mekwan aryi anaamwe kam ati molon dinyi kiknibmai.

¹⁵Ura, mikib dobdobmou uca, tukwetam anabmou kam ara isin neb-neb en karebmou uca, kam ato kiknin dinyi ara uram ebmanto kuramwe. Tonda, sun, “Kam kiknin dinyi kutam ingdongona nun li,” tenen nang ati, “Obdarur,” ena ati mikib kuramwe.

¹⁶Ato kuramuryi, erci arukoka ato ebmou. “Ninyi nirya ara ilila kam milin nang kunung tenen bikdankwaming ati ni sisa deibkwansin dinyi asi dobdobdarur. Ilila kam sisa deirin dinyi ara sun taruk siriktam kum, sun asok kum dobdobkwanung. Ara, sun weik nang ab talyi masyarakat nang ab, sun bona bon nang ab, bona bon kum nang ab, sun yuk nang aryi arukmangnyi tok ikin wa bon nang ab, sun ikin wa bona kum nang ab, antaniboka ilila kam sisa deirin dinyi asi dobdobdarur,” ebmou.

¹⁷Ara, sun ilila kam sisa dobdob nang akwe bona dorkarebde dekwamnyi ati, erci ato eboka arukmou. Sun ilila kam sisa dona kum nang ati, erci, “Bona dorkarebde dengna mem,” ebmou uca, bona dorkarebde dekman kum kuramnyi. Ilila kam sisa deirin dinyi ara ilila kam si kuramwe. Tonda, ilila kam sisa deirin dinyi ara ilila kam er angka kuramwe.

¹⁸A uram deyok ara inibmanto dinyi kurur ati diboka tenebmun ci, bikdarur. Unanyi-unaner ara diboka teneboka bingna nang kurandum ci, ilila kam angka ati, “Unato dinyi kiklirdeirirur do?” tenen liliboka ingkirikdarur. Ilila kam angka ara enam ratus enam puluh enam kurur ba, tukwetamnyi bica kiklirdeirirur.