Read Futuna-Aniwa Wahyu 14 Bible Online

Wahyu 14 - Futuna-Aniwa bible

Wahyu 14

¹Niryi asing dinmase uca, nun Du Yesus Domba Mi atonyi bisi asing eibmase. Ara, mutuk kon si Sion aryi kuboka tikmou ba, Er milin nang seratus empat puluh empat ribu baryi nang ara Er ab tonkwa kunmai. Ba, a nang nirya sun asok tam asi Domba Mi atonyi si ab Er Nai Imtamnyi si ab sekamwe kunmai asi asing eibmase.

²Ura, kekenmase uca, imtam aryi kuboka lilim weik ara weik me lum lilim ato lurum-lurum enmou asi kekebmase. Tonda, liman bulangnande lilim ato uram asi kekebmase. Niryi kekebmase uram ara bilul uram en nang aryi bilul si kecapi kwemnaming lilim ato uram kekebmase.

³A nang nirya ara ukuryok mot sebmai. Ara, Er Imtamnyi burur erebdob bun sokon urasintam aryi tikmai cok, isin neb-neb eryibarande dinyi dumbaryi ab ninyi kalingna nang ab urasintam aryi tikmai cok, ukuryok mot sebmai. Yuk nang ara a mot sebman kum kuramnyi. Erda, a bulubmai nang seratus empat puluh empat ribu baryi akwe a ukuryok mot sebman kuramnyi. A nang ara nun Nai Imtamnyi biryi tukwetam aryi dekoka lebdeibmou nang kuramnyi.

⁴A nang ara ner don kum nang ato kuramingiryi, sundamnyi diboka kalikdandoka teleb dinyi akwe kunung deyok aryi, ner ton yordena kum nang ato kunung. A nang ara nun Du Domba Mi atonyi dantam yibanmaca nirya Ersi tuba-tuba milinung. A nang ara im dangna tukwe dangna nang kankan aryi dekmou ati, du nang kunung ci, nun Nai Imtamnyi ab, nun Du Yesus Domba Mi atonyi ab asi deyok kouboka arungna nang kunung.

⁵Ba, a nang ara sun sibambol dam ara tola uram ton kum eraming. Tonda, mitik malyi dinyi ababyi kum kuraming ci, sunsi tatab-tatab ebman dinyi ton kum kuraming.

⁶Ura, niryi asing dinmase uca, Er Imtamnyi Uram eryuryangananyi yuknyi bira im kan tukwe kan noutam aryi lang-lang ebmou bok, asing eibmase. Anyi bira Teleb Uram iya kubkwande uram asi talebmuryi, sun im dangna tukwe dangna kuramnyi nang asi lak etererbinmou. Ara, mutuk yuk-yuk ab, yuk-yuk uram en nang ab, ninyi yala yuk-yuk ab, bangsa yuk-yuk ab asi Teleb Uram lak etererbinmou.

⁷Im kan tukwetam kan noutam aryi lang-lang ebmuryi, erci uram weik doboka ato ebmou. “‘Nun Nai bira ilil tenenubnyi,’ teneboka Er Uram kunubmun ci, sunci Er Imtamnyi bisi si weik ebdarur. Nun Nai biryi ninyi malyi kun dinyi lilibkwande uki tum sirya yanmar ati ato ebman. Nun Nai bira imtam tukwetam mekwantam me utam ababyi kiknibmou ati, sunci kutam ikdongoboka Er si weik ebdarur,” ebmou.

⁸Ura, Er Imtamnyi Uram eryuryangananyi yuknyi yanmou ci, uram weik doboka ato ebmou. “Sirya daksekmar. Sirya daksekmar. Weik atei Babel ara ninyi bowaningminingna atei ara Er Imtamnyi biryi sirya daksekmar. Akatei ara talyi yon ner ato kuboka ninyi nirya asi walina talin me yibkareboka bowaningminingnamwe uca, Er Imtamnyi biryi yu weik kuboka akatei wenebmar,” ebmou.

⁹Ura, Uram eryuryangananyi winiryi anyi biryi aminda yanmou ci, uram weik doboka ato ebmou. “Unanyi-unaner aryi kutam ikdongoboka ilila kam ab, kam ato kikniboka molon dinyi ab si weik ebingnyi ura, a nang ara weik wenena dobdobkwaming. Ara, sun ilila kam sisa dinyi asi sun asok tam kum, sun taruk tam kum sirya dobdobingnyi nang weik wenen dinyi dobdobkwaming.

¹⁰Ara, Er Imtamnyi bira a malyi kun nang asi yu weik kuboka abdiryi, Erci Er wenen moyok asi langdeiboka a nang asi wenen dinyi diniboka karebkwande. Tonda, uk buk ilinto angdur ai dongoboka abdiryi, Erci a malyi kun nang asi mambul weik kibdeibkwande. Sun Er Imtamnyi Uram eryuryangan nang urasintam ab, nun Du Yesus Domba Mi atonyi urasintam ab aryi Erci a nang asi diba ati wenebkwande.

¹¹Sun ilila kam ab, kam ato kikniboka molon dinyi ab si weik ebingnyi nang ara uk tulum ilinto weleranci ai asi iya wenebkwande. Ba, lukunda kitingtam nirya mambul mitik kum dinyi dobkwaming. Ba, sun asok ai kum, sun taruk ai kum ilila kam si lak kimna dinyi deibdongoanci nang ababyi ato kuboka mambul mitik kum dobkwaming,” ebmou.

¹²Ati, sun dib tenen nang ara ukuryok mambul dinyi tiya dobdobingiryi, nun Du Yesus bisi tanglona kum uca milina teleb. Sun nun Nai Imtamnyi uram kunuraming nang ati ato ebman. Tonda, nun Du Yesus bisi tanglona kum uca milin nang ati ebman.

¹³Ura, amol kekebmase uca, imtam aryi kuboka uram ton ato ebmou. “Kanci ato kerek sekdum. ‘Sun nun Du Yesus bisi dib tenen nang diamingnyi ara ukuryok aryi kuboka nun Nai biryi kisal dakwande,’ sekdum,” ebmou. Ato ebmou uca, Er Imtamnyi Kanya Roh Kudus aryi ato ebmou. “Dib ebmarim. Sun nun Du Yesus bisi dib tenen nang ara busul kuboka teleb wa iamnyi ani, wau lobkwaming. Sun teleb kuboka iamnyi wa yuk-yuk ara imtam aryi kuboka lak kubkwande,” ebmou.

¹⁴Niryi asing dinmase uca, kait duwa bum deici asi Ninyi Dasinyi bitonyi bukmou asi asing eibmase. Anyi bira sien nang kaluraming kisok kaluna asi emas dinyi ato dinyi aryi kikniamnyi asi boramwe ati eibmase. Ba, Er taruk ai ara iya yu ya wala yang kemerande ato ya asi doubmou.

¹⁵Ura, Er Imtamnyi Uram eryuryangananyi bira Bait Allah ai imtam kurande ai aryi anabmou ci, uram weik doboka duwa deici bunanyi bisi ato ebmou. “Kanci wala yang kemerande ato ya asi doboka tukwetam kurande du moubmar asi sekoka dakdum. Du moubwe ara dangna tum sirya yanmar ati, Kanci tukwetam kurande du moubmar asi sekoka dakdum,” ebmou.

¹⁶Ato ebmou uca, duwa deici bukmounyi biryi Er ya kemen asi doboka tukwetam nirya asi talebde bubatikmou ura, du mouramwa nirya sekmou.

¹⁷Ura, Er Uram eryuryangananyi yuknyi biryi Bait Allah ai imtam kurande ai aryi anabmou ci, erbabyi wala yang kemerande ato ya asi yu ilinto ya doubdaki anamyanmou.

¹⁸Ura, Uram eryuryangananyi yuknyi bira akai Bait Allah ai dam kuamwe ani, anabmou. Anyi bira dama deirin uk deyoknyi kuramuryi, uram weik dobmou ci, ya kemena talenanyi bisi ato ebmou. “Kanci ya kemena yu dinyi asi dobmin ci, anggur du nirya asi sekdum. Anggur du nirya moubmar ati, ur sekdum,” ebmou.

¹⁹Ato ebmou uca, Uram eryuryangananyi biryi er ya kemena asi doboka tukwetam nirya asi talebde bubatikmou ci, anggur du moubmou asi nirya sekmou. Anggur du nirya bulubdeibmou ura, erci anggur yan yanin dam weik dinyi asi dokdonokmou. A yan yanin dam ara Er Imtamnyi biryi malyi kun nang wenen dam kurur ati ebman.

²⁰A malyi kun nang asi wenebmai ci, anggur du yan yaniraming to yan yanibmai. Ara, weik atei aryi kuboka bai tam boboka wenebmai. Anggur du yung ara anggur du yan yanina aryi weiktoto anarande to, a malyi kun nang ining ara wenena aryi weikto anaramwe. Sun ining ara weiktoto yibanmou cok, me ona ilinto me ato yibanmou uca, iya ilila mekwan ato kiknibmou.