Read Futuna-Aniwa Wahyu 15 Bible Online

Wahyu 15 - Futuna-Aniwa bible

Wahyu 15

¹Ura, niryi asing dinmase uca, ilil tenen dinyi yuk dinyi asi eibmase. Ara, Er Imtamnyi Uram eryuryangan nang aryi weik wenen dinyi tabaryi asi boyanmai. A weik wenen dinyi yuk-yuk ara sirya kobdob wenebkwande dinyi asi boyanmai. A weik wenen dinyi sirya kunubmou ura, Er Imtamnyi biryi weik wenen yuk dinyi ton kum tabakoka wenebkwamwe.

²Ura, ton dinmase uca, ilila mekwan asi kimil kukumna ato dinyi eibmase. A ilila mekwan ara kimil kukumna bisik ato dinyi ab uk du birbitik erdarande ato kuramwe asi antaniamwe dinyi ton eibmase. Ura, a ilila mekwan kimil kukumna ato mekwan katum dam asi yu kam asi muna kimdongona nang tikmai asi eibmase. A nang ara yu kam ab yu kam ato kiknin dinyi ab yu kam angka ab nirya ati, “Nun li,” tenen katabum eboka dib tenebmai ci, muna kibdongobyi. Muna kibdongobyi ura, Er Imtamnyi biryi karebmou uca, sun nirya ara bilul si kecapi yuk-yuk taleboka tikmai asi asing eibmase.

³Ura, kekenmase uca, a talebmai cok, mot sebmai asi kekebmase. Ara, Er Imtamnyi arungnanyi si Musa biryi mot ab nun Du Yesus Domba Mi atonyi mot ab sebmai. Mot sebmai ara, sunci ato eboka semai. “Nai Imtamnyi, Kanda Er Iya Mikibnyi kurum. Kanci kiknirum dinyi yuk-yuk ara ilil tenen dinyi akwe kurur. Kanci arungsurum dinyi yuk-yuk ara dib kikib kurur. Kanda iya weik sienyi kuboka ninyi yala yuk-yuk asi tuba-tuba kalingsurum.

⁴Nai Imtamnyi, ninyi nirya ara Kan uram kunubingiryi, Kan si weik ebkwanking. Kan kikwa Teleb dinyi kunurumnyi kurum ati ato kubkwaming. Im dangna tukwe dangna kuraming nang ara Kan dam yankwaming. Yangnyi ura, sunci, ‘Nun Nai,’ tenen sun kutam ikdongobkwaming. Imtamnyi, Kanci teleb kurandim dinyi nirya asi Kanci lak kibmumwe ati ato kubkwaming,” eboka mot semai asi kekebmase.

⁵A sirya kekebmase ura, asing dinmase uca, Bait Allah ai imtam kurande ai asi bublan kuklobmou asi asing eibmase. Ara, akai Bait Allah ai ara Dib En Uram lak kimdeirin Ai bublan kubkeibmou ba, asing eibmase.

⁶Ura, a Bait Allah ai imtam kurande ai aryi kuboka Er Imtamnyi Uram eryuryangan nang ninyi tabaryi anaboka weik wenen dinyi tabaryi boyanmai. A nang ara nining kum ongon aling milil weik dinyi ongobmai. Tonda, sun taramtam aryi kuboka dongtam ara emas ato dinyi asi dumbatinga labkwetebmai.

⁷Ura, isin neb-neb eryibarande dinyi dumbaryi kankan aryi tentoknyi biryi a tabaryi nang asi uk yangaboka boban moyok tabaryi karebmou. A uk yangaboka boban moyok tabaryi yuk-yuk dongobmou dinyi ara Er Imtamnyi iya kam kurutnyi biryi weik wenen dinyi dongobmou dinyi asi karebmou.

⁸Sirya karebmou ba, dobtalebmai ura, Bait Allah ai imtam kurande ai ara tulum weik langdeibmou. Ara, Er Imtamnyi biryi Er berengna ab Er mikib ab lak kibmou uca, tulum weik ababyi anabmou. Er Imtamnyi Uram eryuryangan nang aryi weik wenen dinyi tabaryi asi kum kunubmai bok, ninyi tentok ababyi Er Imtamnyi ai Bait Allah asi wengbinman kum kubmou.