Read Futuna-Aniwa Wahyu 16 Bible Online

Wahyu 16 - Futuna-Aniwa bible

Wahyu 16

¹Ura, ni Yohanes biryi kekenmase uca, Bait Allah ai imtam kurande ai umbura aryi uram weik dobmou ati kekebmase. A uram ara sun Er Imtamnyi Uram eryuryangan nang tabaryi asi ato ebmou, “Sunci anaboka Er Imtamnyi biryi weik wenen dinyi tukwetam dikdongobdarur. Ara, uk yangaboka boban moyok tabaryi aryi kuboka weik wenen dinyi asi tukwetam dikdongobdarur,” ebmou.

²Uca, Uram eryuryangananyi yuma tentoknyi biryi bindoka erci talebmou uk yangaboka boban moyok aryi tukwetam dikdongobmou uca, ninyi bol ara malyi torok ilinto deibmou. Malyi torok ilinto deibmou uca, u weik yibmou. Sun torok aryi yibmou nang ara malyi kam milin nang akwe kubmai. Tonda, malyi kam ato kiknin dinyi si weik en nang akwe kubmai.

³Ura, Uram eryuryangananyi bitinyi anyi biryi bindoka erci talebmou uk yangaboka boban moyok aryi ilila mekwan tam dikdongobmou uca, ilila mekwan me ara ining ato kibmou. Ara, ninyi din nang ining ato kibmou uca, ilila mekwan umbura aryi isin neb-neb eryibarande dinyi nirya dibsekmou.

⁴Ura, Uram eryuryangananyi winiryi anyi biryi bindoka erci talebmou uk yangaboka boban moyok aryi weik yiban me ab me u dam ab asi dikdongobmou uca, weik yiban me ab me u dam me ab ara ining ato kibmou.

⁵Ura, tubto niryi kekenmase uca, Uram eryuryangananyi bira ilila mekwan ab yiban me ab kalingnande sienyi biryi ato ebmou, “Imtamnyi, Kanci kikibto kuboka wenebmumwe, Kanda iya telebnyi kurum. Kanda ukuryok kurumnyi, minob kuramumunyi kurum. Kanda iya telebnyi kurum.

⁶Kanci wenebmumwe nang ara sun dib tenen nang obmai ci, Kan Uram ebdeibmaci to lak etereramnyi nang ining asi diksakmai. Ati, a diksakmou ining ara Kanci dekoka tamubkarebmumwe uca, a nang ara ining me yinung. Kanci a nang asi wenebmumwe ara kikibto kuboka akwe kurur,” ebmou asi kekebmase.

⁷Ura, ton kekenmase uca, Er Imtamnyi dama deirina dam keil lamna dub aryi kuboka yuk uram ton enmou asi kekebmase. A uram ara ato ebmou, “Dib ebmarima, Nai Imtamnyi utotoa nirya kalingdum Sienyi kurum. Kanci wenerum dinyi nirya ara kikib kuboka akwe wenerum,” ebmou asi kekebmase.

⁸Ura, Uram eryuryangananyi dumbaryi anyi biryi bindoka erci talebmou uk yangaboka boban moyok aryi kiting tam asi dikdongobmou uca, kiting sinarya ara mikib weik dobdobmou uca, ninyi ara kiting tin aryi daboka dinibmou.

⁹Kiting u weik yibmou uca, sun tukwetam kuramnyi nang ara Er Imtamnyi si yan yanibmai. Ara, “Er Imtamnyi biryi a wenen dinyi karebsou,” tenen bikmai ati, Er Imtamnyi bisi submai. Submai ci, sunci sun malyi kun dinyi kum taklobmai ci, Er Imtamnyi bisi si weik kum ebmai.

¹⁰Ura, Uram eryuryangananyi amubaryi anyi biryi bindoka erci talebmou uk yangaboka boban moyok aryi malyi kam buramwe erebdob bun sokon asi dikdongobmou uca, malyi kam kalingnamwe mutuk ara kunuk weik dakmou. Ba, er milin nang ara u weik yibmou bok, sun silalum si tobdanmai.

¹¹U weik yibmou aryi, tonda malyi torok deibmou aryi sunci Er Imtamnyi si suboka yan yanibmai. Yan yanibmai ci, sunci sun malyi kun dinyi kum taklobmai.

¹²Ura, Uram eryuryangananyi nabaryi anyi biryi bindoka erci talebmou uk yangaboka boban moyok aryi weik yiban me si Efrat deici asi dikdongobmou uca, weik yiban me Efrat ara nirya cebdobmou. Me nirya cebdobmou ati, sun kitingban mutuk kuramnyi nang weik sien nang ab sun milin nang ab ara, “Mar irbinkwayeb,” tenen nang ara me kouboka ur tukwe kib tam yibinmanto kubmou.

¹³Ura, asing dinmase uca, ilila kwatima si bura aryi kuboka isa ton anabmou. Tonda, malyi kam si bura aryi kuboka isa ton anabmou. Tonda, tola uram eterermururamunyi si bura aryi kuboka isa ton anabmou. A isa winiryi ara bita ato kiboka sakaboka anabmai.

¹⁴A isa ara, “Ninyi nirya milibsiting,” tenen ilil tenen dinyi kikniraming. Tonda, im dangna tukwe dangna mutuk nirya yibindoka sunci sun weik sien nang nirya namnaming. Ara, “Er Imtamnyi bisik sekoka mar ordankwayeb,” eboka a isa ara sun weik sien nang namnaming. Er Imtamnyi Iya Mikibnyi biryi Er ordana nang asi wenebkwande uk tum berekci ura, nunci bisik sekoka mar ordankwayeb ati eboka namnaming.

¹⁵“Dibdendarur. Ni sun Du bira lukdandoka yankwan. Ukula donanyi lukdandoka ai dorwengyangarande to, nibabyi neiktoto lukdandoka yankwan. Sundamnyi diboka kalikdaramingnyi nang ara Er Imtamnyi biryi kisal dakwande. Sun Er Imtamnyi Uram kunun nang ara, ‘Ni ongon aling wanikminiknicei,’ tenen kalingdana nang ato kunung. A nang ara, ‘Nong dem baning yibanmabyi asi nun Nai biryi alyi kibdeibsicei,’ tenen Er Imtamnyi Uram kununung. Sun ato kun nang asi Er Imtamnyi kum wenebkwande.”

¹⁶Ura, isa nang winiryi aryi im dangna tukwe dangna kuramnyi weik sien nang ab sun milin nang ab asi neik ai bulubdeibmai. Neik bulubdeibmai ai si ara Ibrani uram aryi ena ara Harmagedon enung mutuk asi bulubdeibmai.

¹⁷Ura, Uram eryuryangananyi tabaryi anyi biryi bindoka erci talebmou uk yangaboka boban moyok aryi im bila asi dikdongobmou uca, Bait Allah ai imtam kurande ai dam aryi kuboka uram weikanun dobmou. A uram ara Er Imtamnyi biryi ebmou uram ara ato eboka dobmou, “Weik wenena ara a kunum sirya kunubmar,” ebmou.

¹⁸Sirya ebmou uca, bebe ilinto likeibmou ura, liman ilinto ebmou. Tonda, mutuk eimna weikanun dobmou. A mutuk eimna ara ninyi aryi minob uca tukwetam kuramnyi talak ababyi ton kum dorderamwe mutuk eimna asi, ukuryok aryok mutuk eimna weik kuboka dobmou.

¹⁹Ura, mutuk eimna weikanun dobmou uca, weik atei si Babel nirya ara daksakoka winiryi bokmou. Tonda, im dangna tukwe dangna kuramwe weik atei yuk-yuk ababyi nirya daksakmou. Ara, Er Imtamnyi biryi weik atei Babel nang aryi malyi kuramnyi to teneibmou ci, Erci sunsi yu weik kuboka wenebmou.

²⁰Uca, im dangna tukwe dangna kuramwe me dumdum nirya ara kum danmou. Tonda, mutuk kon nirya ababyi kum danmou ati asing eibmanto kum kubmou.

²¹Ura, lumtaiya deiboka mo ilila weik dinyi ara imtam aryi kuboka sakmou uca, ninyi obmou. A lumtaiya keil du yuk-yuk ara ikin weik dinyi lima puluh kilo dinyi ato kuboka sakmou. A wenena ara ikin weik kubmou uca, ninyi aryi Er Imtamnyi bisi submai.