Read Futuna-Aniwa Wahyu 17 Bible Online

Wahyu 17 - Futuna-Aniwa bible

Wahyu 17

¹Ura, Er Imtamnyi Uram eryuryangan nang uk yangaboka boban moyok talebmai nang tabaryi kankan aryi tentoknyi biryi yandoka ni Yohanes bisi ato ebmanou. “Kan a yarum. Iya malyi kun ner wenena asi lak kibdeibkwaman eibkwandim ati yarum. A ner ara den yin ner ato kurur ner aryi mekwan ilinto ab yiban me ilinto ab deici burur ci, ninyi ilinto malyi kiminingdur ati lak kibkwankin ati diryarum.

²A ner ara sun im dangna tukwe dangna kuraming weik sien nang asi bowanikminikmou. Tonda, sun im dangna tukwe dangna nang nirya ara a ner talyi yortamne ner aryi sunsi kareramwe walina talen me yiramnyi uca, walina talen nang ato kuboka a ner asi milinung,” ebmou.

³A sirya ura, a Uram eryuryangananyi biryi ni Yohanes bisi bobindoka kunumna deici ninyi kun kum mutuk binmanumwe. Ninyi kun kum mutuk binmanumwe ura, sien ner tentok asi asing eibmase. A sien ner ara ilila kam bi bol kam deici bukmou. Ilila kam ara kisok tabaryi boramwe uca, akola takubaryi beleamwe. Ilila kam bol nirya ara Er Imtamnyi bisi keren si kerek sekoka libmou.

⁴Ilila kam deici bukmou ner ara sien ner kuramuryi, iya teleb ongon aling ongoramwe. Er ongon aling bol ara im bila ab ining bol ab kuramwe aling ongoramwe ner asi bukmou. Tonda, emas dinyi ab dengna weik keil yuk dinyi-yuk dinyi ab karangnamwe ner bukmou. Ura, a ner er taruk ai ara moyok emas dinyi asi taleboka bukmou. A moyok umbura ara iya malyi dinyi ab ninyi kanya bowaningminingna dinyi ab kibdongoboka bukmou.

⁵Ura, a sien ner si yuk-yuk ara er asok tam kerek sekdanamwe. Er si ara ninyi aryi kum bingnamnyi bok, “Erebdob Atei Babel,” ton, “Talyi Yon Deyok Ner,” ton, “Im Dangna Tukwe Dangna Iya Malyi Kun Dinyi Deyok Ner,” ton eboka kerek sekdanamwe asi asing eibmase.

⁶Ura, ton asing dinmase uca, a sien ner ara anggur du ilinto yibmou uca walina talebmana ato kubmou asi asing eibmase. Anggur du sirik kum yibmou. Erda, sun dib tenen nang ining asi ilinto yibmou. A ner ara nun Du Yesus uram dib en uram lak en nang ilinto asi ingkirikoka obde baramwe ati ato ebman. Niryi a ner asi asing eibmase ba, ilil asa aryi, “Naie,” tenebmase.

⁷Niryi dinmase uca, ato kubmou asi eibmase ura, “Naie,” tenebmase uca, Er Imtamnyi Uram eryuryangananyi biryi nisi ato ebmanou. “Kanda unato ati, ‘Naie,’ tenebmarim do? Niryi lak ebkinyi uca, kanci a ner deyok ati lak kum kuanci dinyi bikwandim. Tonda, kam ara a ner bukmar kam deyok ati inin dinyi bikwandim. A kam ara kisok tabaryi kubwe bok, akola takubaryi belebwe ara ato kubwe ebkwamakin ca.

⁸Kanci asing eibmumwe kam ara minob kam kuramuryok, ukuryok kam tuba kum dau. Ukuryok kam kum dau cok, a kam ara aminda aryi tukwe umbura aryi anabkwande, Sirya anabci ura, iya dibkwande. Ura, sun im dangna tukwe dangna nang aryi asing eibingiryok, ‘Naie,’ tenebkwaming. Ara, a kam ara minob kuramwe uca, ukuryok kum kurur ba, aminda aryi tubto yankwande kam ati, ‘Naie,’ tenebkwaming. A, ‘Naie,’ tenen nang ara Er Imtamnyi bisi milin kum nang kunung. Nun Nai Imtamnyi biryi im dangna tukwe dangna nirya kum kikniamuryi, Erci Er milin nang si yuk-yuk asi, ‘Kam Kubdeibkwan,’ tenen kerek sekamwe Kerek Sengna umbura aryi kerek sekeiamuryok, Erci a kam ati, ‘Naie,’ tenen nang si yuk-yuk kum sekamwe. Ati, ilila kam asi asing eibkwaming ba, a nang aryi, ‘Naie,’ tenebkwaming.

⁹A dinyi bingna ara diboka bingna nang akwe bikmanto kurur. Ilila kam ara weik atei kurur ci, er kisok tabaryi ara mutuk yim tabaryi kurur. A weik atei ara mutuk yim tabaryi deici kurur asi a ner ara a mutuk yim deici kurur.

¹⁰Tonda, kisok tabaryi ara weik sien nang tabaryi kunung. Weik sien nang amubaryi ara tuba kum kunung cok, weik sienyi nabnyi bira ukuryok kurur, ba weik sienyi tanyi bira kabul yanganmar. Aminda aryi yaci ura, Er Imtamnyi biryi karebci uca, anyi bira mitikanun kalikwande.

¹¹Ura, ilila kam ara minob kuramuryok ukuryok kum kurutnyi bira weik sienyi inbaryi anyi kurur. Anyi bira weik sien nang tabaryi damnyi kurur ba, aminda aryi iya dibkwande.

¹²Ura, kanci asing eibmumwe akola takubaryi ara aminda aryi kalikwaming weik sien nang kunung. A kalikwaming nang ara aminda aryi ilila kam ab tonkwa weik sien nang kiboka kalikwaming. Ara, kiting yakna tentok a kunum kalikwaming.

¹³A weik sien nang ara neik kanya bobingiryi, ilila kam asi, ‘Kanci nunsi kaliksurum,’ eboka sun mikib yuk-yuk ilila kam asi karebkwaming.

¹⁴A weik sien nang ara antaniboka nun Du Yesus Domba Mi atonyi ab mar ordankwaming. Mar ordankwamingnyi bok, nun Du Yesus Domba Mi atonyi biryi sunsi muna kibdongobkwande. Nun Du bira iya erebdob arungsurutnyi ton iya erebdob sienyi kurur ati, Erci sunsi muna kibdongobkwande. Nun Du bisi milibkwamingnyi nang ara sunbabyi muna kibdongobkwaming. A nang ara Erci nabmou nang ab, Erci wibdeibmou nang ab, Ersi tanglona kum uca Ersi iya milin nang aryi muna kibdongobkwaming,” ebmou.

¹⁵Ura, Uram eryuryangananyi biryi nisi ato ebmanou. “Kanci asing eibmumwe ilila mekwan ara im dangna tukwe dangna ninyi yala yuk-yuk ton ninyi uram yuk-yuk ton kunung. Ilila mekwan ara a den yin ner dam burur mekwan ati ato ebman.

¹⁶Ura, ilila kam ab akola takubaryi ab ara a den yin ner asi yu weik kubkwande ba, sunci mar longoboka akatei nirya daksakoka uk sekwaming. Ati, sunci akatei ati, ‘Den yin ner ato,’ tenen, ‘Er ongon aling nirya kwiribloboka alyi weik kibdeibkwayeb,’ tenen akatei asi daksekwaming. Tonda, ‘Den yin ner tub oyibkwayeb, uk dabkwayeb,’ tenen sunci akatei asi uk sekwaming.

¹⁷Ara, nun Nai Imtamnyi biryi teleb tenebmou to karebmou uca, ilila kam ab weik sien nang takubaryi ab aryi ato kuboka a ner asi oyibingiryi uk sekwaming. Ati, sunci, ‘Ilila kam nunsi kalikwansir,’ tenen sun mikib ilila kam asi karebkwaming. Ara, Er Imtamnyi teneamwe dinyi nirya kum kunubkwande ba, sunci ilila kam uram kekebkwaming.

¹⁸Talyi yon ner ara kanci asing eibmumwe ner ara erebdob atei kurur ati ebman. Akatei ara sun im dangna tukwe dangna kuramingnyi weik sien nang asi ukuryok kalingdur,” ebmanou.