Read Futuna-Aniwa Wahyu 18 Bible Online

Wahyu 18 - Futuna-Aniwa bible

Wahyu 18

¹A sirya eibmase ura, Er Imtamnyi Uram eryuryangananyi yuknyi ton imtam aryi kuboka yuryanganmou asi asing eibmase. Anyi bira mikib weiknyi kurur aryi, er milil aryi im dangna tukwe dangna mutuk nirya berekmou.

²Yuryanganmou ci, anyi biryi uram weikanun doboka ato ebmou. “Sirya daksakmar. Sirya daksakmar. Erebdob atei Babel ara sirya daksakmar. Weik atei Babel ara isa atei kibdobmang. Weik atei ara malyi maka atei kibdobmang. Erebdob atei Babel ara bai kam atei kibdobmang.

³Akatei ara talyi yon ner ato kuramuryi, ‘Ni anggur du yung yiryandarur,’ eboka du dongoramwe uca, ninyi yala nirya aryi er ab tonkwa malyi dinyi kuramnyi. A ner ara, ‘Talyi yobniting,’ tenen malyi kun dinyi ilinto kuramwe uca, sun bona-bona dengdana nang ara bona bon dinyi ilinto dororamnyi,” ebmou asi kekebmase.

⁴A sirya kekebse ura, kekenmase uca, yuk uram aryi imtam aryi kuboka ato ebmou. “Ni mabwe nermabwe, akatei aryi kuboka anabdobdarur. Akatei ara malyi atei kurur ati, sunci akatei malyi kun dinyi milibmunyei. Er Imtamnyi biryi akatei wenebkwande ati, sunci lebdandoka akatei aryi kuboka anabindobdarur.

⁵Akatei nang malyi kun dinyi ara weiktoto kurur. Er Imtamnyi biryi asing eibmar ati, Erci er malyi kun dinyi diba ati wenebkwande.

⁶A ner ara malyi dinyi ilinto kuramwe to, sunci diboka dekoka wenebdarur. Liki bitinyi dektabakoka er malyi kun dinyi wenebdarur. A ner aryi talerur moyok umbura aryi mambul kurdeirin dinyi liki bitinyi tabakoka dongobmun ci, a ner asi dinibdarur.

⁷A ner ara bona bon dinyi ilinto dororamwe to, sunci ersi wenen dinyi ilinto karebdarur. A ner ara, ‘Nira weik sien ner a bunun,’ teneramwe to, sunci ersi mambul weik kibdeibdarur. A ner ara, ‘Nira sulyi ner kuma,’ tenen ner asi obkabokdarur. ‘Engena kanya iya kum bobkwan,’ tenen ner ara diba ati wenebdarur.

⁸Ato eboka erdamnyi erebdanmar deyok aryi, wenen dinyi ilinto er dam yankwande. Ara, uki tentok kubde ba, wenen dinyi ilinto er dam yankwande. Ara, ninyi dina ab, engena weik dinyi ab, kwaning atan dinyi ab er dam yankwande. Tonda, a ner asi uk aryi yibkwande. Nun Nai Imtamnyi iya mikibnyi biryi ersi wenebmar ati, a wenen dinyi nirya ara a ner dam yankwande.

⁹Ura, akatei ara uk yibci ura, tulum weik welebci asi asing eibingnyi ura, sun im dangna tukwe dangna weik sien nang aryi akatei ati engena weik engebkwaming. Ara akatei malyi kun dinyi miliramingnyi nang ab, er bona bon dinyi asi dororamnyi nang ab aryi engena weik engebkwaming.

¹⁰A nang ara dam kum mutuk aryi tikoka asing dinmangiryi, weik atei dangsangna ati ilil weik kubde bok, engena weik engebkwaming. Ura, sunci ato ebkwaming. ‘Daksakmar se. Dakmaksar se! Mikib nang atei Babel asi daksakmar se! Kiting yakna tentok kum bisibmar bok, Babel atei daksakmar se!’

¹¹Ba, sun bona bon dinyi dengna nang ababyi engena weik engebkwaming. Babel atei ara sirya daksakmar ati, sun bona bon dinyi doboka dengdamnyi nang tuba kum dekwaming deyok aryi ato eboka engebkwaming.

¹²Ara, dengna weik dinyi emas ton perak ton dengna weik keil yuk dinyi ton tuba kum dekwaming. Tonda, dengna weik ongon aling yuk dinyi-yuk dinyi ababyi tuba kum dekwaming. Tonda, dengna weik co ton, bisam gajah si dengna weik dinyi ton, tembaga ton, besi ton, iya kat keil ton tuba kum dekwaming.

¹³Tonda, teleb yin dinyi ton, tong teleb dinyi yuk-yuk ton tuba kum dekdankwaming. Tonda, anggur du yung ton, ara du yung ton, tepung ton, jagung ton tuba kum dekdankwaming. Tonda, bisam sapi ton, domba ton, bisam kuda ton, kereta ton tuba kum dekdankwaming. Tonda, ninyi nong ab ninyi kanya ab tuba kum dekdankwaming.

¹⁴Engena weik engebingiryi, sun bona dengna nang aryi ato ebkwaming. ‘Se, kanci, “Ni dobdobkwan,” teneamumwe dinyi ara kan dam tuba kum kukurur se. Se, kan bona bon dinyi ilinto dobdoamumwe asi, ukuryok ara nirya tuba kum kukurur se. Se, kanci aminda aryi a bona tubto kum talebkwandim se,’ ebkwaming.

¹⁵Ba, sun a bona dengna nang ara dam kum mutuk aryi tikoka asing dinmangiryi, akatei dangsangna ati ilil weik kuboka engena weik engebkwaming. Sun akatei aryi dengna ilinto dobdobmai nang ati ebman.

¹⁶Ati sunci ato ebkwaming. ‘Dakmar se. Dakmar se! Erebdob atei dakmar se! Teleb ongon aling ongorande sien ner ato kuramwe asi, emas dinyi anangdamwe ner ato kuramwe asi, dengna weik keil yuk dinyi amangdamwe ner ato kuramwe asi sirya dakmar se,’ ebkwaming.

¹⁷Kiting yakna tentok kum bisibmar bok, akatei aryi bulurdeiriramwe bona nirya kum danmar se. Tonda, co ngun-ngun bobana sien nang ab, co ngun-ngun deici ban nang ab, co ngun-ngun bobana nang ab ilila mekwan deici bindoka wa in nang yuk nang ara dam kum mutuk aryi tikoka asing dinkwaming.

¹⁸Weik atei asi uk yinmaci uca, tulum weik welebkwande asi asing eibingiryi, sunci engeboka uram weikanun doboka ato ebkwaming, ‘Yuk atei nang ababyi erebdob atei doamnyi bok, akatei ara iya erebdob atei doramnyi. Akatei ato ton kum kuamwe.’

¹⁹Sunci engenmangnyi ura, sun kisok dub asi uk sici dobtaleboka deibdangnyi ura, engena weik engeboka ato ebkwaming. ‘Daksakmar se. Daksakmar se. Erebdob atei asi nirya daksakmar se. Co ngun-ngun nirya dararyangan atei daksakmar se. Co ngun-ngun dam nang ara akatei dam bona ilinto bobaraming uca, dengna ilinto dororamnyi asi daksakmar. Kiting yakna tentok kum bisibmar bok, akatei nirya daksakmar se.’

²⁰Imtam kurandum nang nirya kilkil kanya weik bobdarur. Nun Du Yesus bisi dib tenerandum nang ab, Teleb Uram deyok kouboka lak etererandum nang ab, Er Imtamnyi Uram ebdeibmaca bobarandum nang ab sun kanya kilkil weik bobdarur. Akatei nang ara sunsi mambul weik kimdeiriransou to, Er Imtamnyi biryi dekoka ersi sirya wenebmou,” ebmou asi kekebmase.

²¹Ura, Er Imtamnyi Uram eryuryangananyi mikibnyi biryi ikin weik keil dobmou ura, ilila mekwan umbura donokmou. Mekwan dam donokmou cok, erci ato ebmou. “A ikin weik keil asi mikib kuboka ilila mekwan umbura donokman ato kuboka, erebdob atei Babel asi mikib kuboka ilila mekwan umbura donokwan. Sirya donokmanyi ura, akatei ara tuba kum kubkwande.

²²Mot semna nang ara akatei dam asi mot tuba kum sebkwaming. Tonda, bilul uram en nang ara akatei dam asi bilul tuba kum ebkwaming. Wa yuk-yuk in nang ara akatei umbura tuba kum kubkwaming. Jagung asi keil aryi darum-darum en nang ara darum-darum ena tuba kum kibkwaming. A deyok aryi, akatei aryi darum-darum ena lilim tuba kum kekebkwaming.

²³Tonda, berengna ara akatei dam tuba kum abkwande. Ner dobkwandanyi uram ton, er dobkwande ner uram ton, tuba kum ebdankwanding. Kan dam bona boramnyi nang ara im dangna tukwe dangna weik sien nang kuramnyi. Kanda kir don ner ato kurandim ner ara a nang nirya asi bowanikminikmumwe ati ebman.

²⁴Akatei nang ara sun Er Imtamnyi Uram ebdeibmaca bobaramnyi nang asi obmai. Tonda, nun Du Yesus bisi dib tenen nang asi ining diksakmai. Tonda, tukwetam asi obmai nang yuk nang ababyi akatei nang aryi obmai ati ebman,” ebmou asi kekebmase.