Read Futuna-Aniwa Wahyu 19 Bible Online

Wahyu 19 - Futuna-Aniwa bible

Wahyu 19

¹A sirya ebmou asi kekebmase ura, tubto kekeranse uca, imtam aryi kuboka uram weik dobmou asi kekebmase. A uram ara ninyi ilinto neik dam bulubmang ura, antaniboka uram weikanun dobmang to kekebmase. Uram weikanun doboka ato ebmai. “Haleluya. Er Imtamnyi si weik ebdarur! Nun Nai Imtamnyi bira Lemsina Kimdeirin Deyoknyi kurur. Tonda, nun Nai bira iya erebdob Sienyi kurur, tonda iya mikibnyi kurur. Nun Nai biryi wenerur dinyi yuk-yuk ara kikib akwe kurur.

²Weik atei ara den yin ner ato kuramwe atei asi diba ati wenebmar. Akatei ara er talyi yon dinyi biriman aryi im dangna tukwe dangna nang nirya bowaningminingnamwe. Tonda, Er Imtamnyi milin nang asi oramwe. A deyok aryi Er Imtamnyi biryi akatei asi dekoka wenebmar,” ebmai.

³Ura, liki bitinyi dinyi sunci weik uram doboka ebmai. “Haleluya. Akatei ara dakoka uk yibmai uca, er tulum ara iya welebkwande,” ebmai.

⁴Ura, sun ninyi kalingna nang dua puluh empat baryi aryi kutam ikdongoboka Er Imtamnyi si weik ebmai. Tonda, isin neb-neb eryibarande dinyi dumbaryi ababyi kutam ikdongoboka Er erebdob bun sokon bunanyi si weik ebmai. Ati, sunci uram weik doboka ato ebmai. “Diba, Amin. Er Imtamnyi si weik ebkwayeb. Haleluya!” ebmai.

⁵Ura, erebdob bun sokon aryi kuboka uram ara ato ebmou. “Nun Nai Imtamnyi si weik eboka mot sebdarur. Sunda Er Imtamnyi milirandum nang ab, Er Imtamnyi bisi, ‘Nun Nai,’ tenen nang ab, Talyi nang ab weik nang ab neiktoto, Er Imtamnyi si weik eboka mot sebdarur,” ebmou.

⁶Ura, kekebmase uca, uram weikanun dobmai asi kekebmase. A uram ara ninyi ilinto neik dam bulubmang aryi uram weikanun dobmang ato kubmou. Tonda, weik yiban me lilim weik ato kuramwe. Tonda, liman ato kubmou. Ati sunci ato ebmai. Haleluya. “Er Imtamnyi si weik ebkwayeb. Nun Nai Imtamnyi iya weik sienyi kurur. Nun Nai Iya Mikibnyi ara kalingsurur.

⁷Ati, nunci kilkil kuboka Er Imtamnyi si weik ebkwayeb. Nun Du Domba Mi atonyi er ner dobkwande tum sirya yanmar. Tonda, nun Du Yesus dobkwande ner ara Erdamnyi sirya kiknibdanmar. A deyok aryi, nunci Er Imtamnyi si weik ebkwayeb.

⁸Nun Du biryi dobkwande ner ara teleb ongon aling dengna weik aling sirya dobdobmar. Erci ongobkwande aling ara nining kum aling milil weik aling,” ebmai asi kekebmase. A nining kum aling ara milil weik aling ara kebdeiboka sun Er Imtamnyi milin nang teleb kuramib dinyi kurur ati ebman.

⁹Ura, Er Imtamnyi Uram eryuryangananyi biryi nisi ato ebmanou. “Kanci kerek sengna umbura aryi ato sekdum. ‘Er Imtamnyi biryi du dongobmou nang ara kisal dangna nang kunung. Ara, nun Du Yesus Domba Mi atonyi ner dobkwande tum weik kwalina yibkwaming nang ara kisal dangna nang kunung,’ sekdum,” ebmou. Ebmou cok, erci ato kuboka ebtabakmou. “Er Imtamnyi biryi ato ebmou tok ara dib en uram akwe kurur,” ebmou.

¹⁰Uca, niryi, “Ni nai bisi er si weik ebkwan,” tenen kutam ikdongobmase. Ikdongobmase bok, erci nisi, “Ato kuna mem,” ebmanou. Ura, erci nisi ato ebmanou. “Kanci ni si weik ebniminyei. Kanda Er Imtamnyi wa irmilirandim to, nibabyi neiktoto Er Imtamnyi wa ina kununanyi kunun. Tonda, kan duweityabwe ara nun Du Yesus uram dib en uram lak eraming to, nibabyi suntonyi kunun. Nun Nai Imtamnyi bitikwe si weik ebdum. Nun Du Yesus uram dib en uram lak ena ara Er Imtamnyi Uram ebdeibmaci bobana deyok akwe kurur ati ebman,” ebmou.

¹¹Ura, asing dinmase uca, imtam bublan ara kuklobmou aryi kuda bisam ara kait bol bisam tikmou asi eibmase. A kuda kait bol bisam deici aryi bukmounyi si ara Dib en Uram ab Er Uram Ukurlona kum uca Kunurutnyi ab enubnyi bisi bukmou asi eibmase. Anyi bira dib en uram deici aryi ninyi wenerur ci, mar ordana deyoknyi kurur.

¹²Er asing ara uk buk weik abmar dinyi ato kubmou. Tonda, weik sien nang kisok kaluna ilinto kalubmou. Er dam deici kerek sekamwe si ara Er kikwe bikdanmou. Yuk nang aryi Er si kum bikmai.

¹³Erci ongobmou cang aling ara ining diksakmou asi likdongobmou aling asi ongobmou. Ura, Er si ara Er Imtamnyi Uram Kobdob Kurutnyi kuramwe.

¹⁴Sun imtam aryi kuboka mar ordana nang yubwa-yubwa ara Ersi milibmai. Ara, kuda kait bol bisam deici bukoka Ersi milibmai. Tonda, dengna weik dinyi teleb aling nining kum aling ongobmai ci, Ersi milibmai.

¹⁵Kait bol kuda deici aryi bunanyi sibambol aryi kuboka ninyi on ya anabmou. A ya ara sun im dangna tukwe dangna yala nang obkwamwe ya kuramwe ati yu weik kubmou. Anyi biryi mikib kuboka sun im dangna tukwe dangna nang asi kalikwande. Erci Er Imtamnyi Iya Mikibnyi biryi yu weik kuboka wenen dinyi kunubmou. Ara, anggur du yan yaniraming to, Erci yu weik kuboka sun wenebmanto nang asi yan yanibmou.

¹⁶Er ongon aling deici asi kerek sekmou si ton Er keil kum deici asi kerek sekmou si ara ato kubmou. “Iya Weik Sienyi tonda Iya Erebdob Arungdeirisurutnyi,” eboka kerek sekmou asi asing eibmase.

¹⁷Ura, asing dinmase uca, Er Imtamnyi Uram eryuryangananyi tentok ara kiting noutam tikokmou asi eibmase. Tikokmou, erci sun imtam yiban maka nirya asi nabdobmou. Ara, erci ato eboka du dongobmou. “Sunci buluryandoka Er Imtamnyi biryi karebkwansir weik kwalina yibdarur.”

¹⁸Du dongobmou ci, erci ato ebmou. “Sunci Er Imtamnyi ab ordana nang obmai asi yandoka sun tub yibdarur. Ara, sun weik sien nang tub ab, sun yin doun nang arungdeirin nang tub ab, sun yin doun nang mikib nang tub ab yibdarur. Tonda, mar ordan kuda tub ab, kuda deici bun nang tub ab, yuk nang tub ab nirya yibdarur. Ara, ikin wa in nang tub ab, ikin wa in kum nang tub ab, talyi nang tub ab sien nang tub ab, nirya yibdarur,” eboka nabmou asi asing eibmase.

¹⁹Ura, asing dinmase uca, malyi kam ab ersi milibmai weik sien nang ab sunsi milibmai yin doun nang nirya ab bulubdanmai ura, kait bol kuda bunanyi ab Ersi milibmai yin doun nang yubwa-yubwa ab mar ordanmai asi asing eibmase.

²⁰Ura, malyi kam asi muna kibdongobmai ci, talebmai. Tonda, malyi kam uram ermururamunyi bira malyi kam si deici ilil tenen dinyi kikniramunyi bibabyi talebmai. A tola uram ermururamunyi bira ilil tenen dinyi deici aryi ninyi ilinto bowanikminikamwe. Ara, sun malyi kam deirin sisa asi dobdobmai nang asi bowanikminikamwe. Tonda, malyi kam kiknin dinyi dam sun kutam ingdongon nang asi bowanikminikamwe. Ura, malyi kam ab tola uram ermururamunyi ab talebmai ura, kam tuba kubmaring ba, tangabman kum uk mekwan dam bai donokmai.

²¹Tonda, sun yuk nang ababyi kait bol kuda deici bukmounyi sibambol ai aryi anabmou ya aryi obmou. Ara, sun im dangna tukwe dangna maka nirya aryi yandoka sun a obmou nang tub asi yibmai ba, sun boubmou.