Read Futuna-Aniwa Wahyu 2 Bible Online

Wahyu 2 - Futuna-Aniwa bible

Wahyu 2

¹“Yohanes, kanci sun Efesus atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Ni sun Du bira Ni taruk siriktam aryi kurya tabaryi asi diboka talenunyi biryi ato esunun. Ni uk buk diniboka burdeirin dinyi ara emas aryi kiniamnyi dinyi tabaryi kankan dam yibarkiringnunyi biryi ato esunun.

²Nira sun kurandum to yuk-yuk asi diboka bingsunun. Ati, sunci busul kuboka Nira sun Du Kristus bisi miliranurum ara Ni bingsunun. Tonda, ninyi aryi sunsi mambul kurdeiriransing ababyi, sunci Nisi tanglona kum uca miliranurum ara Ni bingsunun. Tonda, sunci sun malyi kun nang ati, ‘A nang kuraming to nun li,’ tenerandum ara Ni bingsunun. Ton nang ara tola ati, ‘Nunda nun Du Yesus Kristus uram Teleb Uram eterebde ban nang kunub,’ erdaramnyi asi sunci a nang kuramnyi to lilibmandau uca, ‘Tola ati ato eramnyi,’ tenen bikmandau.

³Ninyi aryi mambul dinyi kurdeiriransing ababyi, sunci Nira sun Du bisi tanglona kum uca miliranurum ara Ni bingsunun. Tonda, sunci Ni si deyok aryi, mambul dinyi borandum cok, ‘Nun Du bisi taklobkwayeb,’ tenena kum kurandum ara Ni bingsunun.

⁴Ato kurandum bok, Niryi sunsi wenena uram ton ebkwinsin. Ara, sunci minob yuma kobdob aryi boukwe weik kurandau asi, ukuryok ara a boukwe weik kimnandau dinyi taklobmarum ati Niryi wenebkwansin.

⁵Ati sunci, ‘Minob dib tenebkalibmoubwe talak ara boukwe weik kuramoubwe,’ tenen kanya teneibdarur. Ara, sunci sun boukwe tenerlon dinyi asi takloboka, boukwe weik tubto kibdarur. Ba, sunci boukwe tenerlon dinyi asi kum taklobmunyi ura, Nira sun Du biryi yandoka sun dam kuboka uk buk diniboka burdeirin dinyi asi iya dobdobkwan.

⁶Niryi wenena uram ebmasin cok, kisal dangsina uram ababyi ebkwinsin. Ara, Nira sun Du biryi tola uram eterenanyi si Nikolaus bisi milin nang aryi kuraming to asi dongdonongnun to, sunbabyi neiktoto a nang aryi malyi kuraming to asi dongdonongnandum.

⁷Sunda amol borandum nang ara Er Imtamnyi Kanya Roh Kudus aryi eteresurur uram ara diboka kekebdarur. Ara, sun atei yuk-yuk asi bulurandum dib tenen nang asi eteresurur uram kekebdarur. Sun katabum eboka dib tenermururamun ci, muna kibdobmunyi nang asi Ni sun Du biryi, ‘Iya kam kurdeirin co aryi mourande du teleb dinyi asi dakoka ur doyibdum,’ ebkwansin. Ara, ‘Er Imtamnyi biryi co dam si Firdaus aryi iya kam kurdeirin co du kurur asi dakoka ur yibkwandum,’ ebkwan,” ebmou.

⁸“Ura, kanci sun Smirna atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Ni sun Du yuma kobdob kuransinyi ton, sirya kobdob talak kubkwananyi ton aryi ato esunun. Ni dibmase ani, tubto kam bukokmasinyi biryi ato esunun.

⁹Ninyi aryi sunsi mambul kurdeiriransing ara Ni bingsunun. Tonda, bona mitikanun ababyi sun taruk dam ton kum kuransir ara Ni bingsunun. Ato kurandum cok, sun dib tenena ara langdeiboka kuransir deyok aryi, sunda bona bon nang ato kurandum. Tonda, sun Yahudi yala nang aryi sunsi malyi uram eransing ara Ni bingsunun. A nang ara, ‘Nunda Yahudi yala nang kunub,’ erdaramingiryok, Er Imtamnyi milin nang diboka kum kunung. Erda, isa sienyi si Iblis milin nang kunung.

¹⁰Ati sunci, ‘Ninyi aryi mambul dinyi takubdeibsingnyei,’ tenen ilil kusina mem. Kekebdarur. Isa sienyi Iblis biryi, ‘Dib tenen nang asi sakeibtinyi,’ tenen karebci uca, ninyi aryi sun kankan kuboka dib tenen nang ton asi ninyi wenen ai dongoboka absingiryi, sunsi mambul ara uki takubaryi dobkwandum. Ati sunci, ‘Ninyi aryi nunsi obsingnyi ababyi, nunda nun Du Yesus bisi tanglona kum uca milibkwayeb,’ tenen katabum kanya bobdarur. Ato kubmunyi uca, Ni sun Du biryi muna kibdongoboka abniryi, weik sienyi borande kisok kaluna ato dinyi kalubdeibkwansin. Ara, iya kam kun dinyi karebkwansin ba, dobdobkwandum.

¹¹Sunda amol borandum nang ara Er Imtamnyi Kanya Roh Kudus aryi eteresurur uram asi diboka kekebdarur. Ara, sun atei yuk-yuk aryi bulurandum dib tenen nang asi eteresurur uram diboka kekebdarur. Sun katabum eboka dib tenermururamun ci muna kibdobmunyi nang asi Nira sun Du biryi karebsici uca, liki bitinyi kum dibkwandum. Ara, iya kum dibkwandum,” ebmou.

¹²“Ura, kanci sun Pergamus atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Ni sun Du bira iya Mikibnyi kunun ba, Ni silalum aryi kuboka ninyi on ya dina-dina yu weik dinyi ananurutnyi biryi ato esunun.

¹³Sun kurandum ai Ni bingsunun. Ara, sun kurandum atei ara isa sienyi si Iblis er erebdob bun sokon kurur atei asi kundarur ara Ni bingsunun. Sunda akatei kurandum cok, sunci Nisi dib teneranurum dinyi ara kum taklobmanindau. Erda, sunci Nira sun Du si lak eranurum. Ara, Ni miliranounyi si Antipas tanglona kum uca Ni si lak eranou uca, ninyi aryi Ni si deyok aryi ersi obmai talak ababyi, sunda Iblis bun sokon atei kurandum nang aryi Nisi kum taklobmanindau.

¹⁴Sunci Nisi kum taklobmanindau bok, sun kurandum to dinyi asi mitikanun ati Ni sun Du biryi, ‘Ni li,’ tenesunun. Ara, sun kankan asi ton nang ara minob tola uram eramunyi si Bileam etereramwe to etereraming. Anyi Bileam biryi, ‘Sun Israel yala nang aryi malyi dinyi kubting,’ tenen weik sienyi Balak bisi ato eboka eterebmou. ‘ “Kwemdina dinyi asi muna karen yina asi yibingiryi, malyi kubting,” tenen kwemdina yin dinyi deibdarur,’ ebmou. Tonda, ‘ “Ner talyi yobting,” tenen sakeibdarur,’ ebmou.

¹⁵Tonda, sun kankan asi ton nang ara tola uram eterenanyi si Nikolaus eterena asi taleraming.

¹⁶A deyok aryi, Niryi sunsi ato ebkwinsin. Sunci tola uram utotoa takloboka dib en uram akwe talebnurubdarur. Tola uram kum taklobmunyi ura, Ni sun Du biryi yandoka sunsi wenebkwansin. Ara, ninyi on ya ara Ni silalum aryi ananurur dinyi aryi sunsi obkwansin ati ebman.

¹⁷Sunda amol borandum nang ara Er Imtamnyi Kanya Roh Kudus aryi eteresurur uram asi diboka kekebdarur. Ara, sun atei yuk-yuk bulurandum dib tenen nang asi eteresurur uram diboka kekebdarur. Sun katabum eboka dib tenermururamun ci, muna kibdobmunyi nang asi Nira sun Du biryi imtam kwaning si Mana inibdeibse ba, lak kum kurur dinyi asi karebkwansin. Tonda, kait keil deici asi sun ninyi si yuk-yuk ukuryok si kerek sekeibnyi ura, sunsi karebkwansin. A ukuryok dobkwansin si yuk-yuk ara Niryi sunsi yuk-yuk dobkwansin. A si ara yuk nang aryi bikman kum. Erda, sunda kait keil dobkwandum nang yuk-yuk sun dem bikdankwandum,” ebmou.

¹⁸“Ura, kanci sun Tiatira atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Ni sun Du bira Er Imtamnyi Mi aryi ato esunun. Ni asing uk ubna ato kununyi, tonda Ni yan ara milil dinyi tembaga ato kunurutnyi biryi ato esunun.

¹⁹Nira sun Du biryi sun kurandum to diboka bingsunun. Tonda, sun boukwe weik kanya borandum dinyi ab dib tenerandum dinyi ab ara Ni bingsunun. Tonda, sunci yuk nang asi dirnilirandum ara Ni bingsunun. Tonda, ninyi aryi mambul kurdeiriransing bok, sunci Nisi tuba milirandum ara Ni bingnun. Sun minob ura dib tenebkalibmandau talak aryi kuboka teleb dinyi kunurandau ani, ukuryok ara tabakoka teleb dinyi ilinto kunurandum ati ebman.

²⁰Kunurandum bok, sun kurandum to mitikanun ati Niryi, ‘Ni li,’ tenesunun. Ara, tola uram en sien ner si Izebel biryi tola uram etereransir asi sunci, ‘Tola uram ena takdum,’ kum erandum ati Niryi sunsi wenebmasin. A ner ara, ‘Nira Er Imtamnyi Uram ebdeibmaca eteren ner kunun,’ eboka abdiryi, tola uram akwe eteresurur. Tola uram eteresurur cok, a ner aryi Ni milin nang asi bowanikminikoka, ‘Sal ner talyi yordana ara mem kum,’ eboka, ‘Kwemdina muna karen dinyi yina ara mem kum,’ eboka eteresurur.

²¹Ni sun Du biryi a ner aryi kuramwe to ara, ‘Ni li,’ teneransiryok, Niryi ersi minola kum wenebmase. Erda, Niryi, ‘Er malyi kun dinyi taklobkwande kum, iya kurmurunkwande kum?’ tenen uki karebdenmase bok, wenebloboka mambul dinyi kabul takubdeibmase. Niryi a ner ati minola kum wenebmase bok, a ner aryi, ‘Talyi yordana eterena uram asi taklobnyei,’ tenen tola uram eterebmuruboka ninyi kanya asi tuba bowaningminingdur.

²²Ati sunci kekendarur. Nira sun Du biryi a talyi yordana ner ab er wa irmilin nang ab asi diba ati wenebniryi, yun weik dinyi asi karebnyi uca, sun man sokon yuk-yuk deici aryi mabkwaming. Ara, sun malyi kuramingnyi dinyi kum takloboka abingiryi, Ni sun Du bisi kum tamuboka milibningnyi ura, Niryi a talyi yon ner ab er wa irmilin nang ab asi wenebkwan.

²³Ba, a ner uram keken nang ara er mabwe nermabwe ato nang ara Nira sun Du biryi diboka obkwan. Ato kubne uca, sunda akatei okatei bulurandum dib tenen nang aryi Nira sun Du biti, ‘Ninyi kanya yuk-yuk asi liliboka bingsurutnyi kurur,’ tenen bikwanurum. Tonda, ‘Ninyi malyi kuraming to wenesurutnyi,’ tenen bikwanurum.

²⁴Ba, sunda Tiatira atei kurandum nang yuk nang asi Niryi wenena uram kum takubdeibkwansin. Ara, sunda a tola uram asi kum talerandum nang ati ato ebmasin. Ara, ninyi aryi eraming to, isa sienyi si Iblis kwemdina dinyi asi kum bingnandum nang asi Niryi ikin uram kum takubdeibkwansin.

²⁵Erda, sun dib en uram asi diboka talerandum to, tanglona kum uca talebnurubdarur ati ebman. Dib en uram asi talebnurubmunyi ura, Nira sun Du tamuryankwan.

²⁶Ura, katabum eboka dib tenermururamun ci muna kibdobmunyi nang ara Ni teleb tenesunun dinyi tanglona kum uca kunuramunyi nang ati uram ton ebkwansin. A nang asi Niryi erebdeiboka weik sien nang kibdeibkwansin. Ara, Niryi sunsi, ‘Sun im dangna tukwe dangna kuraming nang asi kalikoka, “Ato-ato kubdarur,” ebdarur,’ ebkwansin.

²⁷Anyi bira weik sienyi kibdiryok, ninyi wenen kama asi bobdiryok, er uram keken kum nang asi mikib kuboka wenebkwande. Er Uram ati keken kum nang asi erci diboka obkwande. Ninyi aryi malyi moyok tolobdeiboka bai donongnaming to, erci sun malyi kun nang asi oboka bai donokwande.

²⁸Ni Nai Imtamnyi biryi Nisi erebdeibnou to, Nibabyi neiktoto sunda Ni milin nang asi erebdeibkwansin. Erebdeibsiniryok, Niryi sunsi ulul kurya karebkwansin.

²⁹Sunda amol borandum nang ara Er Imtamnyi Kanya Roh Kudus aryi eteresurur uram asi diboka kekebdarur. Ara, sun atei yuk-yuk asi bulurandum dib tenen nang asi eteresurur uram diboka kekebdarur,” ebmou.