Read Futuna-Aniwa Wahyu 20 Bible Online

Wahyu 20 - Futuna-Aniwa bible

Wahyu 20

¹Asing dinmase uca, Er Imtamnyi Uram eryuryangananyi tentok ara imtam aryi kuboka yuryanmou asi asing eibmase. Anyi bira ilila tukwe um bublan tirikdongon dinyi talebmou. Tonda, besi tabwe cang dinyi asi taruk talebmou ci, yuryanganmou asi asing eibmase.

²Ura, anyi biryi yandoka ilila kwatima si Korotnyi bisi taleboka besi tabwe aryi debmou. Ilila kam ab minob talak uca ninyi bowaningminingna kwatima ab ara neiknyi kuramwe. Ara, isa sienyi si Iblis kuramwe. Asi, kwalina seribu baryi tabwe debdeiboka kalikwamwe ba, kubkwamwe ati, besi tabwe aryi debmou.

³Besi tabwe aryi sirya debmou ura, erci isa sienyi Iblis bisi taruk talebdongoboka ilila tukwe angdona umbura asi donokmou. Sirya donokmou ura, erci ilila tukwe angdona tiringdon bublan aryi iya diboka tirikdongobmou. Ara, “Im dangna tukwe dangna nang tubto bowanikminikcei,” tenen diboka tirikmou. Ura, kwalina seribu baryi sirya bisibci ura, tabwe lobdeibci ura, isa sienyi Iblis bira uki mitikanun ur kubkwande.

⁴Ura, ton asing dinmase uca, erebdob bun sokon ilinto kuramwe asi eibmase. A erebdob bun sokon yuk-yuk deici ara malyi kun dinyi lilin nang bukmai asi Er Imtamnyi biryi sunsi mikib karebmou uca, malyi kun dinyi lilinmai asi eibmase. Tonda, dib tenen nang kanya yuk-yuk asi eibmase. A nang ara nun Du Yesus si lak eramnyi deyok aryi, ya ngang sekoka oamnyi nang sun kanya kunmai asi asing eibmase. Tonda, Er Imtamnyi biryi dib en uram lak eramnyi deyok aryi oamnyi nang sun kanya kunmai asi asing eibmase. A nang ara malyi kam si weik kum eramnyi. Tonda, malyi kam sisa asi sun asok tam ton taruk tam ton kum dobdoamnyi. A nang ara kam bukoka yanmai ura, weik sien nang kiboka kwalina seribu baryi aryi nun Du Yesus ab tonkwa kalingdamnyi.

⁵Ura, sun diamnyi nang yuk nang ara sun ab tonkwa kam kum bukokmai. Erda, kwalina seribu baryi sirya bisibmou ura, sunbabyi kam bukokmai. Sun dib tenen nang kam burdeirina ara kam burdeirina yuma dinyi kam bukeibkwande nang aryi ato kubkwaming.

⁶Sun kam burdeirina yuma dinyi dobdobkwaming nang ara kisal dangna nang kunung. A nang ara teleb kun nang kunung. A nang ara liki bitinyi din dinyi doboka kum dibkwaming. Erda, sunda Er Imtamnyi kan ninyi kan kuboka antanirdeirin nang kubkwaming. Tonda, weik sien nang kibingnyi ura, kwalina seribu baryi kubde bok, nun Du Yesus Kristus ab tonkwa kalikwaming.

⁷Ura, kwalina seribu baryi sirya bisibci ura, isa sienyi Iblis bisi tabwe lobdeibkwande.

⁸Tabwe lobdeibci ura, Iblis bira anaboka sun im dangna tukwe dangna mutuk kuramingnyi nang bisik deici dumbaryi yibinkirikoka bowanikminikwande. Ara, mutuk si Gog kuraming nang ton mutuk si Magog kuraming ton bowanikminikci ura, mar ordana ati bulubdeibkwande. A bulubdeibkwande nang ara yubwa-yubwa mitik kum kubkwaming. Ara, ilila mekwan katum dam aryi kurande me winingna du ato kubkwaming.

⁹A mar ordana nang ara im dangna tukwe dangna mutuk nirya aryi anaboka Er Imtamnyi bisi milin nang dam yankwaming. Ara, Er Imtamnyi biryi boukwe kurur atei asi aknaboka yankwaming. Aknaboka yankwaming bok, Er Imtamnyi biryi karebci uca, imtam aryi kuboka uk daksakoka abdiryi, a mar ordana nang nirya asi uk yibkwande.

¹⁰Ura, a nang asi bowaningminingnandinyi isa sienyi si Iblis bibabyi talebdongoboka tangabman kum uk mekwan umbura donokwande. Ara, malyi kam donokamwe to ab, tola uram ermururamunyi bai donokamwe to ab, Iblis bibabyi neik dam bai donokwande. Ba, a uk dam aryi iya kitingtam lukunda nirya kubingiryi, mambul weik dinyi dobdobkwaming.

¹¹Ura, niryi asing dinmase uca, iya erebdob bun sokon ara kait ilinto dinyi asi asing eibmase. Tonda, iya erebdob bun sokon deici burutnyi bisi asing eibmase. Anyi bira iya mikibnyi kuramwe ba, im ab tukwe ab nirya asi ilil aryi binsekdobmai ba, sun lemdarbin dam ingkiringmai bok, kum eibmai.

¹²Asing dinmase uca, erebdob bun sokon urasintam aryi diamnyi nang nirya tikmai asi asing eibmase. Ara, weik nang ab talyi nang ab tonkwa erebdob bun sokon urasintam aryi tikmai. Ura, ninyi aryi kunuramnyi to kerek sekamwe kerek sengna yuk-yuk tengebdeibmou. Tonda, yuk kerek sengna ababyi tengebdeibmou. A kerek sengna ara, “Ninyi kam kubdeibkwan,” tenen kerek sengna kuramwe. Ura, sun diamnyi nang yuk-yuk aryi minob kunuramnyi to, wenena uram kum, dorona uram kum lak ebmou.

¹³Er Imtamnyi biryi karebmou uca, ilila mekwan kuramnyi diamnyi nang ara ilila mekwan umbura aryi anabmai ura, kam bukokmai. Tonda, tukwe umbura dongobmai nang ababyi anaboka kam bukokmai. A diamnyi nang nirya ara kam bukokmai ura, sun yuk-yuk aryi minob kuramnyi to, wenena uram kum, dorona uram kum dobdobmai.

¹⁴A sirya ura, Er Imtamnyi biryi din dinyi ab tukwe umbura dongon dinyi ab asi donokmou ci, tangabman kum uk mekwan dam asi dongobmou. A uk mekwan dam ara liki bitinyi dinyi din dinyi doron dam iya dongobmou.

¹⁵Tonda, ton nang ara uk mekwan dam asi donokmou. Ba, kam kubdeibkwande nang kerek sengna umbura aryi sun si kum kerek sekamwe nang ara tangabman kum uk mekwan dam asi donokmou.