Read Futuna-Aniwa Wahyu 21 Bible Online

Wahyu 21 - Futuna-Aniwa bible

Wahyu 21

¹Ura, ton asing dinmase uca, ukuryok kiknibmou dinyi asing eibmase. Ara, imtam ai ukuryok kiknibmou dinyi ab, tukwetam ukuryok kiknibmou dinyi ab asing eibmase. Imtam ai yuma dinyi ab tukwetam yuma dinyi ab nirya tuba kum kubmou a nirya kum dau ati, Er Imtamnyi biryi a dinyi nirya ukuryok kikniabmou. Tonda, ilila mekwan ababyi tuba kum danmou.

²Tonda, iya teleb atei ara Yerusalem ukuryok dobmou atei asing eibmase. Akatei ara imtam aryi kuboka tukwetam yuryanganmou asi asing eibmase. Akatei ara iya teleb atei kuramwe. Ara, ninyi dobkwamaci ner aryi, “Ni akenyi kanya asi teleb kubdeibkwan,” tenen kiknibminikoka iya teleb ongon aling ongorande to, akatei ababyi kiknibminikmou uca, iya teleb kuramwe atei asi eibmase.

³Ura, kekenmase uca, imtam kuboka iya erebdob bun sokon aryi uram weikanun doboka ato ebmou, “Dirandum. Er Imtamnyi atei ara ninyi kankan kurur. Ba, Er Imtamnyi ab ninyi ab tonkwa antaniboka iya kubkwaming. Sunda Ersi miliboka Er mabwe nermabwe kubkwaming. Ba, Er Imtamnyi bira sun Nai kubdiryi, sun ab tonkwa iya kubkwaming.

⁴Er Imtamnyi biryi sun asimaka nirya asi kilibkwande uca, engen kanya tuba kum bobkwaming. Tonda, ninyi ara tuba kum dibkwaming. Tonda, u deyok ababyi tuba kum engebkwaming. Yuma dinyi nirya tuba kum dau ati, teleb akwe kubkwaming,” ebmou asi kekebmase.

⁵Ura, erebdob bun sokon bunanyi biryi ato ebmou. “Dibderum. Nira Imtamnyi biryi nirya utotoa dinyi asi ukuryok kikninun,” ebmou. Ebmou cok, Erci nisi ato ebmanou. “Kanci a uram asi kerek sekeibdum. A uram yuk-yuk ara kunurlon kum uram ab, dib en uram akwe kurur ati kanci kerek sekeibdum,” ebmou asi kekebmase.

⁶Ebmou cok, Erci nisi ato ebmanou. “A kunum sirya kiknibman. Nira Imtamnyi bira huruf kerek sengna yuma dinyi si Alfa kunun. Tonda, huruf kerek sengna sirya kobdob dinyi si Omega ababyi kunun. Nira yuma kobdob aryi nirya kikniamunyi kunun. Tonda, sirya kobdob aryi nirya kununyi kunun. Sun iya teleb me ataransici nang asi Nira Imtamnyi biryi me karebkwan. Ara, dengna kum uca, Niryi me utam me ara ninyi kam kurdeirin me aryi kuboka iya teleb me muna karebkwansin.

⁷Ati, sun malyi kun dinyi muna kibdongobmangnyi nang asi Nira Imtamnyi biryi a iya teleb dinyi nirya karebkwan. Nira a nang asi kalingnanyi kubnyi ba, sun Molobkwaningnyi kubkwan. Tonda, a nang ara Ni mabwe nermabwe kubkwaming.

⁸Bok, sun malyi kun nang yuk-yuk asi Niryi yakdonokwan. Ara, sun ilil kanya bon nang ab, sun dib tenen kum nang ab, sun iya malyi kun nang ab, sun ninyi on nang ab, sun ner talyi yoramingnyi nang ab, sun kir don nang ab, sun kwemdina molon nang ab, sun tola uram en nang ab ara yakdonokwan. Ba, a nang nirya ara iya kubkwaming sokon uk buk ilinto angdur mekwan dam asi kubkwaming. A nang dobdobkwaming dinyi ara tubto tamuboka liki bitinyi din dinyi ara iya din dinyi asi dobdobkwaming,” ebmou asi kekebmase.

⁹A sirya ura, Er Imtamnyi Uram eryuryangananyi tentok aryi nisi uram ton ebmanou. Anyi bira min eianse uram eryuryangan nang tabaryi kankan tentoknyi bisi tubto eibmase. A uram eryuryangan nang ara moyok ara wenen dinyi sirya kobdob dinyi tabaryi langdeibmou moyok yuk-yuk asi taleamnyi. Ura, a uram eryuryangan nang tabaryi kankan aryi tentoknyi biryi nisi ato ebmanou. “Kan a yarum ba, niryi kansi Nun Du Domba Mi atonyi dobkwande ner asi amubdeibkwankin ati yarum,” ebmanou.

¹⁰Ura, kunumna deici aryi erci nisi bobinmanou ci, weik mutuk kon erebdob mutuk kon asi binmanumwe. Binmanumwe ura, nunda iya teleb atei si Yerusalem asi asing eibmanumwe. Dinmanumwe uca, akatei ara Er Imtamnyi urasintam aryi kuboka tukwetam yuryanmou asi eibmanumwe.

¹¹Akatei ara milil weik kubmou. Ara, nun Nai Imtamnyi biryi er berengna aryi karebmou uca, akatei ara milil weik kubmou. Akatei milil ara dengna weik keil si Yaspis ato kubmou.

¹²Akatei weik lika ara imtam ereboka doamwe asi, lika bublan ara amolbaryi botoamwe. A amolbaryi lika bublan dam ara Er Imtamnyi Uram eryuryangan nang amolbaryi kalikoka tikmai. A amolbaryi lika bublan deici ara sun Israel yala nang yala si amolbaryi kerek sekeiamnyi.

¹³Akatei lika yaletam kuboka ara lika bublan winiryi botoamnyi. Ba, kitingbantam ababyi lika bublan winiryi botoamnyi. Ba, me utam ababyi lika bublan winiryi botoamnyi. Tonda, me youkwa tam ababyi lika bublan winiryi botoamnyi.

¹⁴Akatei kalingna lika deyok ai ara keil amolbaryi aryi yangabdeiamnyi. A lika deyok dam amolbaryi ara ninyi amolbaryi nang si kerek sekamnyi. Ara, nun Du Yesus Domba Mi atonyi biryi bokdonokmou Teleb Uram deyok kouboka eterebde bana nang amolbaryi asi sun si sekamnyi.

¹⁵Ura, Uram eryuryangananyi bira nisi uram ebmanunyi biryi kiklin kama ara emas ato dinyi talebmou. Ara, akatei ab, atei lika ab, atei lika bublan yuk-yuk ab asi kiklibkwamwe ati, erda kiklin kama asi talebmou.

¹⁶Akatei asi kiklin kama aryi kiklibmou uca, akatei cang ab ila ku ab ara neiktoto kuboka dobyi eibmou. Akatei cang kuramwe dam ara stadia dua belas ribu baryi stadia doamnyi. Ba, akatei ila ab ku dam ababyi stadia dua belas ribu baryi kikliboka doamnyi.

¹⁷Ura, akatei lika ku asi kiklin kama aryi kiklibmou uca, akatei lika ku ara taruk in kukab dangdongona seratus empat puluh empat dobyi eibmou. Ara, nun tukwetam nang aryi kiklina aryi kikliramib to, Er Imtamnyi Uram eryuryangananyi aryi kikliraming ci, nungdamib to ati kiklibmou ebman.

¹⁸Ura, akatei lika nirya ara dengna weik keil si Yaspis aryi doamnyi. Tonda, akatei ai yuk-yuk ara dengna weik keil si emas aryi doamnyi. A emas ara emas kobdob aryi doamnyi. Ara, yuk dinyi ab talbalin dinyi asi kum doamnyi. Erda, dib anmalangne kimil ato diboka asing eibmanto aryi doamnyi.

¹⁹Ba, akatei lika deyok dam yuk-yuk ara dengna weik keil yuk-yuk aryi doamnyi. Lika deyok dam yuma dinyi ara keil si yaspis aryi doamnyi. Ura, lika deyok dam bitinyi dinyi ara dengna weik keil si nilam aryi doamnyi. Lika deyok dam winiryi dinyi ara dengna weik keil si mirah aryi doamnyi. Ura, lika deyok dam dumbaryi dinyi ara dengna weik keil si zamrud aryi doamnyi.

²⁰Tonda, lika deyok dam amubaryi dinyi ara keil si unam aryi doamnyi. Ura, lika deyok dam nabaryi dinyi ara dengna weik keil si sardis aryi doamnyi. Lika deyok dam tabaryi dinyi ara dengna weik keil si ratna cempaka aryi doamnyi. Ura, lika deyok dam inbaryi dinyi ara dengna weik keil si beril aryi doamnyi. Tonda, lika deyok dam toubnibaryi dinyi ara keil si krisolit aryi doamnyi. Ura, lika deyok dam takubaryi dinyi ara dengna weik keil si krisopras aryi doamnyi. Lika deyok dam koklom dinyi ara dengna weik keil si lazuardi aryi doamnyi. Ura, lika deyok dam amol dinyi ara dengna weik keil si kecubung aryi doamnyi.

²¹Ura, akatei lika bublan dam amolbaryi ara yalya keil dengna weik keil si mutiara aryi doamnyi. Tonda, akatei umbura weik keta ara ninyi ilinto yibaraming weik bisik ara dengna weik keil si emas aryi doamnyi. A dinyi ara kaca ato, asing dina teleb dinyi asi doamnyi.

²²Ura, niryi asing dinmase uca, akatei umbura ara Bait Allah ai ara Er Imtamnyi dama deirin ai ton kum kubmou eibmase. Nun Nai Iya Mikibnyi ab nun Du Yesus Domba Mi atonyi ab ara ninyi ab tonkwa iya kubkwamib. A deyok aryi Bait Allah ara, “Er Imtamnyi ab ninyi ab tonkwa kunub,” tenen kiklirdeirin ai tuba kum kubkwande asi asing eibmase.

²³Akatei asi kiting sinarya aryi ton kum berengdeirirande. Tonda, wala tilil ababyi akatei tuba kum lingerande. Erda, Er Imtamnyi berengna aryi akatei asi berengdeirirande. Tonda, nun Du Yesus Domba Mi atonyi ara uk ubna atonyi kurandiryi, akatei asi berengdeirirande.

²⁴A berengna berengdeirirande uca, sun im dangna tukwe dangna kuramingnyi nang ara talyi a berengna milil aryi ur dem yibinkwaming. Tonda, sun im dangna tukwe dangna nang kalingnaming weik sien nang ara, “Nun dama deibkwayeb,” tenen sun bona bon dinyi ton milil tenen dinyi ton boyankwaming.

²⁵Ba, akatei lika bublan yuk-yuk ara uki-uki nirya asi kuklobkwande. Lukunda inina ton kum kubkwande deyok aryi, iya kuklobkwande.

²⁶Ura, akatei dam boyankwaming dinyi ara sun im dangna tukwe dangna nang aryi iya bikdob tenen dinyi ab iya teleb dinyi akwe boyankwaming.

²⁷Bok, malyi kun dinyi tentok ababyi ara akatei kum wengbinkwande. Tonda, alyi tenen dinyi kikninanyi tentok ababyi ara akatei kum wengbinkwande. Tonda, tola enanyi tentok ababyi ara akatei kum wengbinkwande. Erda, sun Nun Du Domba Mi atonyi biryi, “Iya kam kun dinyi karebkwan,” tenen Er Kerek Sengna deici si kerek sekanci nang akwe akatei wengbinkwaming.