Read Futuna-Aniwa Wahyu 22 Bible Online

Wahyu 22 - Futuna-Aniwa bible

Wahyu 22

¹Er Imtamnyi Uram eryuryangananyi ni ab tonkwa tuba kunmanumuryi, erci nisi weik yiban me amubdeibmanou. A weik yiban me ara kam kurdeirin me asi amubdeibmanou. A me ara nun Nai Imtamnyi ab nun Du Yesus Domba Mi atonyi bururung erebdob bun sokon aryi u doboka anaramwe asi asing diboka eibkatabman me asi yibaramwe.

²A weik yiban me ara ukuryok atei Yerusalem atei keta noutam asi bokoka yibaramwe. Ba, a yiban me dinatam katum-dinatam katum ara kam kurdeirin co tingnamwe. A kam kurdeirin co du mourirur ara tuba-tuba du mourirur. Ara, kwalina tentok asi liki amolbaryi du mourirur. Tonda, a kam kurdeirin co bok ara sun im dangna tukwe dangna nang asi kwetebkwande co bok kurur.

³A deyok aryi sumna utotoa ara kum dankwande. Tonda, nun Nai Imtamnyi ab nun Du Yesus Domba Mi atonyi ab bukwanding bun sokon ara akatei umbura kubkwanding. Ba, Er Imtamnyi wa irmilin nang ara Er si weik ebkwaming.

⁴A nang ara Er Imtamnyi urasin asing eibingnyi ura, Er Imtamnyi si asi kerek sengna ara sun asok deici kerek sekeibkwande.

⁵Ura, lukunda ababyi tuba kum dankwande. Nun Nai Imtamnyi biryi sunsi berekeibkwande aryok, sunci, “Uk buk berengna abdeibkwayeb,” ena tuba kum kubkwaming. Tonda, “Kiting aryi berekeibsute,” ena tuba kum kubkwaming. Ato kuboka Er Imtamnyi wa irmilin nang ara weik sien nang kibingnyi ura, tanglona kum uca kalikwaming. Ara, aminda kubde bankwaming kwalina yubwa-yubwa kubingiryi, tanglona kum uca kalikwaming.

⁶Ura, Er Imtamnyi Uram eryuryangananyi ni ab tonkwa tuba kunmanumwe anyi biryi nisi ato ebmanou. “A uram nirya ara erlona kum uram akwe kurur, tonda dib en uram akwe kurur. Nun Nai Imtamnyi bira Er kunubkwande dinyi ebdeibmaci to lak etereramnyi nang sun kanya eteresurutnyi kurur ci, Erci nira Er Uram eryuryangananyi sirya bokwetebnou. Ara, Er wa irmilin nang asi minola kunubkwande dinyi nirya lak kibkwamwe ati, Erci nira Er Uram eryuryangananyi sirya bokwetebnou,” ebmou.

⁷Ura, nun Du Yesus biryi ato ebmou, “Dirandarur. Nira sun Du bira minola yankwan. Sun a kerek sengna umbura aryi kerek sekeibwe to diboka kunubkwamingnyi nang ara Ni Nai biryi kisal dangsurur nang kunung,” ebmou.

⁸Ura, ni Yohanes bira a dinyi nirya kekeransiryi, asing eiriranse. Sirya kekeboka eiriranse ura, niryi Er Imtamnyi Uram eryuryangananyi bira a dinyi nirya amubdeibmanou anyi biti, “Ni nai er si weik erebdeibkwan,” tenen er urasin dam aryi ni kutam ikdongobmase.

⁹Kutam ikdongobmase bok, erci nisi ato ebmanou. “Kanci ato kuna mem. Nibabyi Er Imtamnyi biryi wa arungnanyi kunun. Kan ab kan duweityabwe ab Er Imtamnyi kunubkwande dinyi ebdeibmaca bobaramnyi nang ara Er Imtamnyi wa arungna nang kurandum to, nibabyi neiktoto Er Imtamnyi wa arungnanyi kunun. Tonda, sun Er Imtamnyi Uram kunubde baramingnyi nang nirya ara Er Imtamnyi wa arungna nang kurandum to, nibabyi Er Imtamnyi wa arungnanyi kunun. Nun Nai Imtamnyi bikwa, ‘Nun Nai,’ tenen kan kutam ikdongoboka Er si weik ebdum,” ebmou.

¹⁰A sirya ebmou ura, erci nisi ato ebmou. “Kanci a uram ara nun Nai Imtamnyi biryi kunubkwande uram asi kitiboka deibminyei. Nun Du yankwande talak ara dam kubmar ati ato ebman.

¹¹Sun malyi kuramingnyi nang ara malyi dinyi ur tabakwanung. Tonda, sun alyi tenen dinyi kunuramingnyi nang ara alyi tenen dinyi ur kurtabangdongonkwanung. Ba, sun Er Imtamnyi Uram kunuramingnyi nang ara Er Imtamnyi Uram akwe ur kunurmurubkwanung. Tonda, sun, ‘Malyi dinyi kununa nun li,’ tenen kilibdob kanya boraming nang ara kilibdob kanya bobmurubkwanung,” ebmou.

¹²Ura, nun Du Yesus biryi ato ebmou, “Asing dindarur. Nira sun Du minola yankwan. Niryi dengna dinyi yuk-yuk bobniryi, yankwan ati ebman. Ara, sun yuk-yuk aryi kubde barandum to, Niryi sunsi kisal dangsin dinyi kum, wenen dinyi kum karebkwansin ati dengna dinyi yuk-yuk bobniryi, karebkwansin ati yankwan.

¹³Ni sun Du bira huruf kerek sengna yuma dinyi si Alfa kunun. Tonda, huruf kerek sengna sirya kobdob dinyi si Omega ababyi kunun. Nira yuma kobdob kam kunanyi kunun, tonda sirya kobdob talak aryi iya kubkwandanyi kunun. Nira yuma kobdob aryi utotoa nirya kikniansinyi kunun. Tonda, utotoa nirya kunubdeibkwananyi kunun,” ebmou.

¹⁴Sun ongon aling me ilingnamingnyi nang ara, “Malyi dinyi kubde bana nun li,” tenen nang ara nun Nai Imtamnyi biryi kisal dangdur nang kunung. Ara, nun Nai biryi a nang asi sokon karebmou uca, sunci kam kurdeirin co dam bindoka co du dakoka ur yibkwaming. Tonda, a nang ara atei lika bublan bisik bindoka Yerusalem atei ukuryok atei asi ur wengbinkwaming.

¹⁵Bok, sun malyi kun nang ara baitam iya kubkwaming. A nang ara sun kam yal don nang ton, sun kir don nang ton, sun ner talyi yordana nang ton, sun kwemdina molon nang ton, sun tola uram talen nang ton, sun tola uram kunun nang ton kuraming. A nang nirya ara baitam iya kubkwaming.

¹⁶“Ni Yesus biryi Ni Uram eryuryangananyi bokwetebmasise. Ara, erci sunsi eterebsici ba, sunci a dib en uram asi sun dib tenen nang buluraming nang atei yuk-yuk asi lak kibdeibdarur. Ni Yesus bira sun aibwe Daud co kabwe atonyi kunun. Ba, Nira er Daud yalanyi ababyi kunun. Nira milil weik kurya si ulul atonyi kunun,” ebmou.

¹⁷Uca, Er Imtamnyi Kanya Roh Kudus ab nun Du Yesus biryi dobkwande ner ab aryi antaniboka, “Nai Du, yarum,” eranding. Tonda, sun a uram kekebmunyi nang ababyi, “Nai Du, yarum,” ebdarur. Unanyi-unaner ara yik me atabci ura, a nang ara yandoka ur yinung. Sun “Yik me yibtinyi,” tenen nang ara dengna kum uca, kam kurdeirin me ur yibkwaming ati ebman.

¹⁸Sun a uram ara Er Imtamnyi biryi kunubkwande en uram kekebingnyi nang yuk-yuk asi niryi yan memen uram ton yan memebkwinsin. Unanyi-unaner aryi yuk uram aryi a uram umbura asi ebtabakingnyi nang ara nun Nai Imtamnyi biryi sun a kerek sengna umbura kerek sekmar to wenen dinyi karebdiryi, wenebtabakwande.

¹⁹Tonda, unanyi-unaner aryi a kerek sekeibwe uram ara Er Imtamnyi biryi kunubdeibkwande uram asi kilibkabingnyi ura, Er Imtamnyi biryi a nang kam kurdeirin dinyi asi kum daneibkwande. Sun ato kuramingnyi nang ara a kerek sengna deici kerek sekeibwe to, kam kurdeirin co du dakoka kum yibkwaming. Tonda, ukuryok atei Yerusalem kum wengbinkwaming.

²⁰Ura, nun Du Yesus bira a uram ati, “Dib en uram,” enanyi biryi, “Diba, Ni minola yankwan,” ebmasir. Ba, nunci, “Diba, amin. Nai Du Yesus, ur yarum,” enub.

²¹Nun Du Yesus biryi kisal dakoka absiriryi, sunda Er dam kun nang nirya ab tonkwa kuna teleb. Amin.