Read Futuna-Aniwa Wahyu 3 Bible Online

Wahyu 3 - Futuna-Aniwa bible

Wahyu 3

¹“Ura, kanci sun Sardis atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Ni sun Du bira Roh Kudus ara, ‘Er Imtamnyi Kanya mikib kanya tabaryi,’ enubnyi bisi talenunyi ton, kurya tabaryi asi talenunyi biryi ato esunun. Niryi sun kurandum to bingsunun. Ara, ninyi aryi sunti, ‘Er Imtamnyi bisi miliraming nang,’ eransing bok, sunda Nisi diboka kum miliranurum. Sunda kam bukokmangnyi nang ato kum kurandum. Erda, din nang ato kurandum ati ebman.

²Ati, sunci bukoka kalikdandarur. Sun teleb dinyi kununa ati waningminingna kum dinyi ati, sunci, ‘Wanikminiksicei,’ tenen katabum ebdeibsindarur. Sun kuraming to ara Ni Nai Imtamnyi urasintam ara sunglondarur ba, kikiman kusurur asi ton kum eirisunun. A deyok aryi, Nira sun Du biryi, ‘Bukoka kalikdandarur,’ ebmasin.

³Ati, sunci minob ura kekebmandau ci, talerandau uram asi diboka teneibdarur. Teneibminyi ura, sunci sun malyi kurandum dinyi asi takloboka minob kekebmandau uram asi kunubdarur. Sunci kum bukokmun ci, sundamnyi kum kalikdamunyi ura, Nira sun Du biryi lukdandoka sun dam yankwan uki tum ara kum bikwandum. Ukula donanyi lukdandoka doryangarande to, Nira sun Du bibabyi neiktoto lukdandoka yankwan. Ara, Ni yankwan tum ara kum bikmamunyi bok, Ni sun dam yankwan.

⁴Ba, sun Sardis atei kankan asi ton nang ara malyi kun dinyi kum ingkiringmandau. A nang ara nining kum aling asi tuba ongoraming nang ato kunung ati ebman. A nang ara teleb dinyi akwe ingkiringnamnyi ati, Nira sun Du ab tonkwa kubibiryok, kait ongon aling ongobkwayeb.

⁵Sun katabum eboka dib tenermururamun ci, muna kibdobmunyi nang ara ukuboka kait ongon aling asi ongobkwaming ati ebman. A nang si yuk-yuk ara Er Imtamnyi biryi iya kam kuna karebkwande ati kerek sekoka deibmou si ara Nira sun Du biryi kum kilibkwan. Erda, Ni Nai Imtamnyi ab Er Uram eryuryangan nang urasintam aryi Niryi sun si yuk-yuk lak ebkwan.

⁶Sun amol borandum nang ara Er Imtamnyi Kanya Roh Kudus aryi eteresurur uram asi diboka kekebdarur. Ara, sun atei yuk-yuk asi bulurandum dib tenen nang asi eteresurur uram kekebdarur,” ebmou.

⁷“Ura, kanci sun Filadelfia atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Nira sun Du bira teleb akwe kununyi ton, dib en uram akwe enunyi ton kunun. Nira weik sienyi Daud biryi taleramwe bublan kungna talenunyi kunun. Nira bublan kukeibnyi ura, yuknyi biryi bublan tirikman kum. Ba, Niryi bublan tirikdongobnyi ura, yuk nang aryi bublan kukeibman kum. Ati, Nira sun Du biryi ato esunun.

⁸Ni sun Du biryi sun kurandum to bingsunun. Sun kekendarur. Niryi sunti bublan kukeibmasin ba, ninyi aryi tirikman kum ati ebman. Sunda mikib kum kurandum cok, Ni uram asi kunurandau ci, Nira sun Du si kum dokdonokmanindau. Erda, sunci Ni si lak eranindau. A deyok aryi, bublan kukeibmasin ati ebman.

⁹Kekendarur. Nira sun Du biryi karebnyi uca, isa sienyi si Iblis milin nang ton sun kankan yandoka, ‘Nunda Yahudi yala nang kunub,’ ebdankwaming bok, a nang ara nun Nai Imtamnyi bisi kum miliraming. Erda, tola ati ato ebkwansing. A nang ara sun dam yanmai ura, sun kutam ikdongoboka sunti, ‘Nun naiyabwe, nun kwinyabwe,’ ebkwansing. Ara, Nira sun Du biryi sunti boukwe weik kimsunun tenen bikwaming ati ato kubkwaming.

¹⁰Sunci Ni uram diboka talebmandau ati, Nibabyi neiktoto sunsi diboka talebniryi, lebkwansin. Ati, Niryi sunsi, ‘Mambul kubdeibsingnyi ababyi, Nisi tanglona kum uca milibdarur,’ ebmasise to, sunci kunurandau. Kunurandau ati, Niryi sunsi lebkwansin. Ara, im dangna tukwe dangna nang nirya asi mambul weik dinyi yangasici tum kubkwande ba, ninyi ilinto aryi Nisi taklobniting ababyi, Ni sun ab tonkwa kuramibiryi, lebsin uca, sunci Nisi tanglona kum uca milibmurubkwanurum.

¹¹Ni sun Du bira minola yankwan. Ati, sunci dib en uram asi talerandau to talebmurubdarur. Ara, ‘Yuknyi biryi muna kibdobsicei,’ tenen, ‘Muna kibdobkwandanyi kisok kaluna asi yuknyi biryi dobdobcei,’ tenen katabum eboka talebmurubdarur.

¹²Sun katabum eboka dib tenermururamun ci, muna kibdobmunyi nang asi Niryi Ni Nai Imtamnyi dam kun ai asi iya bukeibkwansin. Er Imtamnyi dam kun ai abyokomna ara katabum eboka tingdur cok, akai asi iya kurur ato, sun muna kibdobmunyi nang ababyi Er Imtamnyi ai umbura iya kubkwandum. Ura, a abyokomna deici Niryi Ni Nai Imtamnyi si kerek sekwan. Tonda, Ni Nai Imtamnyi biryi ukuryok dobkwande atei si Yerusalem Ni kerek sekwan. Akatei ara imtam aryi kuboka tukwetam yuryankwande ati ebman. Tonda, a abyokomna deici Niryi sun muna kibdobkwamingnyi nang si yuk-yuk kerek sekwan. Tonda, Ni si ukuryok dobdobkwan si ababyi kerek sekwan.

¹³Sunda amol borandum nang ara Er Imtamnyi Kanya Roh Kudus aryi eteresurur uram asi diboka kekebdarur. Ara, sun atei yuk-yuk asi bulurandum dib tenen nang asi eteresurur uram kekebdarur.”

¹⁴“Ura, kanci sun Laodikia atei kuboka buluraming dib tenen nang ati kerek sekeibmin ci, akatei kurandanyi Er Imtamnyi Uram ebmuruboka lak eterenanyi bisi ato eboka ebdeibdum: Ni sun Du bira Dib en Uram enanyi si Amin biryi ato esunun. Ara, Niryi lak eransin uram diboka kunununyi ton, im dangna tukwe dangna dinyi nirya asi kiknina deyoknyi kunun cok, ton ato esunun.

¹⁵Nira sun Du biryi sun kurandum to bingsunun. Ara, sunda ikib kan tin kan me ato kurandum. Ati, Niryi sunti tenesunun ara, ‘Tin me ato kubting uca, sun mitang nang asi teleb kubdeibting.’ Tonda, ‘Ikib me ato kubting uca, sun me atan nang asi teleb kubdeibting,’ tenesunun.

¹⁶Bok, sunda ikib kan tin kan me ato kurandum ati, Nira sun Du bisi katabum eboka kum miliranurum ati, sunti dungna asa kuranir uca, dukwansin.

¹⁷Sun Laodikia nang ara sundamnyi ato erdarandum. ‘Nunda bona bon nang kunub. Tonda, bona bon dinyi ilinto ara talenub deyok aryi, ton dinyi ara nunsi kum ataransir,’ erdarandum bok, sunda sundamnyi ara walwal kundarur. Sunda malyi nang ato kurandum ati ebman. Sunda bona ton kum bondarur nang ato kundarur asi, ninyi aryi bico tenen nang ato kurandum. Sunda asing kun nang ato kurandum ci, ongon aling kum ongoraming nang ato kurandum.

¹⁸Ati, Nira sun Du biryi sunsi ato wenebmasin. Sunda, ‘Utotoa ton kum boronub,’ tenen Ni dam yandoka dengna weik dinyi si emas ato dekdobdarur. Ara, ‘Nun Du biryi iya teleb dinyi karebsici uca, nunda diboka bona bon nang ato kubkwayeb,’ tenen Ni dam yandobdarur. Tonda, sunci Ni karebkwansin kait ongon aling asi dekdobdarur. Ara, ‘Nong dem kuna ato ara nun alyi kuransir,’ tenen sunci Ni karebkwansin kait ongon aling dekoka ongobdobdarur. Tonda, sunci Ni karebkwansin asing kweten me asi dekdobdarur. Ba, sunda asing kun nang ato kurandum ati, ‘Asing eibkatabtibyi,’ tenen asing kweten me dekdobdarur ba, asing eibkatabkwandum.

¹⁹Ni sun Du biryi boukwe weik kunun nang asi bitabdeiboka wenenun. Ati, sunci busul weik kuboka sun malyi kun dinyi taklobmun ci, Nisi tuba milibnindarur.

²⁰Asing dirdendarur. Nira sun Du biryi sun dam kunun ati, bublan dam tingnun ci, congom-congom enun. Ati, unanyi-unaner aryi Ni uram kekebingnyi nang ara bublan kukeibningnyi ura, Nira sun Du biryi wengyaniryi, sun ab tonkwa bukoka yibkwayeb.

²¹Sun katabum eboka dib tenermururamun ci, muna kibdobmunyi nang asi erebdeibsinyi uca, Ni ab tonkwa erebdob bun sokon bukwayeb. Ara, Nira sun Du biryi muna kibdobmase ura, Ni Nai Imtamnyi ab tonkwa Er erebdob bun sokon bununum to, sun kankan kuboka muna kibdobmunyi nang ara Ni ab tonkwa bukwayeb.

²²Sunda amol borandum nang ara Er Imtamnyi Kanya Roh Kudus aryi eteresurur uram asi diboka kekebdarur. Ara, sun atei yuk-yuk asi bulurandum dib tenen nang asi eteresurur uram kekebdarur,” ebmou.