Read Futuna-Aniwa Wahyu 4 Bible Online

Wahyu 4 - Futuna-Aniwa bible

Wahyu 4

¹Ni Yohanes biryi a uram sirya kekebmase ura, asing tuba dibdenmase ba, imtam ai bublan bisik tentok kuklobmou asi eibmase. Ura, a bisik aryi uram weik dobmou asi kekebmase. A uram ara minob kekebmase uram ato ebmou ci, buena si sangkakala uram ato weik dobmou. A uram ara imtam aryi kuboka nisi ato ebmanou, “Kanci Ni dam weleyaminyi ura, aminda kunubkwan dinyi bisik sekmanto dinyi asi kansi lak kibdeibkwankin ba, eibkwandim ati a weleyarum,” ebmanou.

²Ato ebmou ura, Er Imtamnyi Kanya Roh Kudus aryi karebnou uca, niryi anmalakoka kunumna asing ton eibmase. A kunumna deici dinmasiryi, erebdob bun sokon imtam kuramwe asi eibmase. A erebdob bun sokon deici asi Iya Erebdobnyi ton bukmou asi eibmase.

³Erebdob sokon bunanyi bira kiting sinarya atonyi kuramwe asi eibmase. Ba, Er urasin ara milil weik keil si yaspis ab, sardis ab ato kuramwe asi eibmase. Tonda, erebdob bun sokon ara mita sinarya marande ato noutam dongoramwe asi eibmase. A mita milil ara milil weik kuramuryi, milil weik keil si Zamrud ato kuramwe.

⁴Ura, asing dinmase uca, a iya erebdob bun sokon asi erebdob bun sokon dua puluh empat baryi aryi aknabdongobmai asi asing eibmase. A erebdob bun sokon yuk-yuk deici ara ninyi kalingna nang dua puluh empat baryi buramnyi. A buramnyi nang ara kait ongon aling ongoramnyi. Tonda, weik sien nang kisok kaluna emas dinyi kaluramnyi.

⁵Ba, iya erebdob bun sokon aryi kuboka bebe yuk-yuk likeibde banmou ani, liman ebde banmou. Ba, erebdob bun sokon urasintam aryi berengna tabaryi kuramuryok, uk buk weik ato abmou. A berengna tabaryi ara Er Imtamnyi Kanya Roh Kudus ara, “Er Imtamnyi Kanya mikib kanya tabaryi,” enubnyi kuramwe.

⁶Ura, iya erebdob bun sokon urasintam asi weik mekwan ato dinyi ton deiamnyi. A mekwan ara mekwan diba kuma, erda, kimil kukumna weik dinyi asi weik mekwan ato deiamnyi asi asing eibmase. A dinyi ara milil keil si kristal ato dinyi deiamyi asi asing eibmase. Ba, erebdob bun sokon asi isin neb-neb eryibarande dinyi dumbaryi aryi noutam dongobdongoboka aknabdongobmai asi asing eibmase. A isin neb-neb eryibarande dinyi yuk-yuk ara asing ilinto boramwe. Ara, urasintam ababyi dongtam ababyi asing ilinto boramwe.

⁷Isin neb-neb eryibarande dinyi yuma kobdob dinyi ara yu kam si singa dinyi kuramwe ato asi eibmase. Ba, isin neb-neb eryibarande dinyi bitinyi dinyi ara bisam si sapi ato dinyi kuramwe asi eibmase. Ba, isin neb-neb eryibarande dinyi winiryi dinyi ara ninyi urasin ato deiamwe asi eibmase. Tonda, isin neb-neb eryibarande dinyi dumbaryi dinyi ara maka bib lang-lang eryibarande ato dinyi kuramwe asi eibmase.

⁸A isin neb-neb eryibarande dinyi dumbaryi yuk-yuk ara maka ol ato dinyi nabaryi boramwe. Tonda, sun nong nirya ara asing ilinto bordaramwe asi eibmase. Sun maka ol ato amwetam ababyi asing ilinto bordaramwe. Ura, a isin neb-neb eryibarande dinyi dumbaryi ara kitingtam lukunda nirya ara Er Imtamnyi si weik eraming. Ara, tanglona kum uca, ato eraming. “Iya teleb, iya teleb, iya teleb. Nun Nai Imtamnyi, Iya Mikibnyi bira iya telebnyi kurur. Minob kuramunyi, ukuryok kurutnyi, aminda kubkwandanyi biti, ‘Iya Telebnyi,’ enub.”

⁹Ato kuboka sun isin neb-neb eryibarande dinyi dumbaryi aryi erebdob bun sokon deici bunanyi bira iya kam kurutnyi si ererdeirinmai. “Yi nun Nai, nunsi teleb kurdeirisurumnyi,” eboka Er Imtamnyi si weik eboka Ersi kiboka kisal dakoka kimai asi asing eibmase.

¹⁰Ererdeiriraming ba, sun ninyi kalingna nang dua puluh empat baryi aryi sun kutam ikdongoboka er iya erebdob bun sokon bunanyi si weik eraming. Ati sunci, “Nun Nai,” tenen sun kaluraming weik sien nang kalun kisok kaluna yuk-yuk asi doboka iya erebdob bun sokon dam deiriraming. Deiriramingiryok, ato eraming,

¹¹“Kanda nun iya weik sienyi kurum. Kanda nun Nai Imtamnyi kurum. Kanda nunci si weik ererdeirikunubnyi ton, mikib bororumnyi kurum ati, kikib to kuboka nunci Kan si weik eboka erekunub. Kanda utotoa nirya asi minob kiknibmumwe ati, Kanci minob teleb teneamumwe to utotoa nirya asi kubdeiamumwe ati, nunci, ‘Kan kikwe iya weik sienyi kurum,’ enub ara kikib. Tonda, ‘Kan kikwe iya mikibnyi kurum,’ eboka Kan si weik ekinub,” ato enmai asi asing eiboka kekebmase.