Read Futuna-Aniwa Wahyu 5 Bible Online

Wahyu 5 - Futuna-Aniwa bible

Wahyu 5

¹Ura, ni Yohanes biryi dinmase uca, iya erebdob bun sokon bunanyi taruk siriktam taruk aryi kerek sengna ton talebmou asi asing eibmase. A kerek sengna ara langdeiboka sekwe dina-dina nirya sekwe asi asing eibmase. Ba, kerek sengna akubtaleboka kitirdongon meterai tabaryi deiamwe ba, a kerek sengna ara tengeibman kum uca, a sekamwe to nukoka bikmanto kum kubmou.

²Asing dinmase uca, Er Imtamnyi Uram eryuryangananyi ton asing eibmase. Anyi bira mikibnyi kuramuryi, uram weik dobmou ci, ato eboka lak ebmou. “Unanyi biryi akurtalen kerek sengna deici kitirdongon meterai yuk-yuk asi dangminingna ati kikib kurur do? Unanyi biryi a kerek sengna asi tengeiboka a sekamwe to nukoka bikwande ati kikib kurur do?” ebmou.

³Ato eboka asibdenmou bok, imtam kuramnyi nang kankan ababyi, tukwetam kuramnyi nang kankan ababyi, ninyi tentok ababyi uram kum dekeibmou. Ara, tukwetam kuraming nang tentoknyi bibabyi kikib kum. Tonda, Er Imtamnyi Uram eryuryangan nang tentoknyi bibabyi kikib kum. Tonda, neb-neb eryibarande dinyi yuk dinyi tentoknyi bibabyi ara a kerek sengna asi tengeiboka nungna ati kikib kum.

⁴Ninyi tentoknyi bibabyi a akurtalen kerek sengna asi tengeiboka nukwamwe babyi, ai umbura tam dirdena ababyi iya kikib kum kubmou deyok aryi, ni Yohanes bira engena weik engenmase.

⁵Engena weik engenmase bok, ninyi kalingna nang dua puluh empat baryi kankan aryi ninyi tentok aryi nisi ato ebmanou, “Kan engena mem. Kilikdum. Kilikminyi ura, a dibderum. Nun Du bira Yehuda yalanyi biryi deibmounyi kurur. Erda, yu kam singa kurande to mikibnyi kurur ci, muna kibdongobmou. Nun Du bira nun aibwe Daud yalanyi iya weik sienyi kurutnyi bisi a kerek sengna tengebdeiboka nungna asi kikibnyi kurur. Nun Du biryi a kerek sengna deici kitirdongon meterai tabaryi asi dangminingna ara kikibnyi kurur,” ebmou.

⁶Ura, ton dinmase uca, Domba Mi atonyi asing eibmase. Ara, ninyi aryi oamnyi domba mi asi kam bukokamwe atonyi bisi asing eibmase. A Domba Mi atonyi ara iya erebdob bun sokon noutam asi tikmou bok, isin neb-neb eryibarande dinyi dumbaryi ab ninyi kalingna nang dua puluh empat baryi nang ab aryi noutam dongobdongoboka aknabdongo tikmai. A Domba Mi atonyi bira mikib weiknyi kuramuryi, akola tabaryi beleamwe. Tonda, asing tabaryi boramwe. A asing tabaryi ara kikliboka Er Imtamnyi biryi tukwetam bokwetebsou Roh Kudus aryi borur asing kuramwe.

⁷Ura, nun Du Yesus Domba Mi atonyi bira yandoka imtam aryi kuboka erebdob bun sokon bunanyi taruk siriktam taruk aryi a kerek sengna kitibtalen dinyi dobdobmou.

⁸Sirya dobdobmou ura, sun isin neb-neb eryibarande dinyi dumbaryi ab sun ninyi kalingna nang dua puluh empat baryi ab aryi sun kutam ikdongoboka nun Du Domba Mi atonyi si weik ebmai. A nang yuk-yuk ara bilul si kecapi talebmai ci, uk kalum yangabdeiboka boban moyok ara milil weik dinyi si emas kiknin moyok talebmai. A moyok yuk-yuk umbura ara tong teleb keken dinyi uk buk abmou. A tong teleb keken dinyi yuk-yuk ara kikliboka sun dib tenen nang molona yuk-yuk kubmou ci, Er Imtamnyi bisi muna karen dinyi asi kubmou eibmase.

⁹Sun isin neb-neb eryibarande dinyi dumbaryi ab ninyi kalingna nang dua puluh empat baryi ab aryi nun Du Yesus Domba Mi atonyi si weik ebmai ci, mot ukuryok semna dinyi asi seboka ato ebmai, “Kanda nun Du bira kikibnyi kurum. Ara, kitirtalen kerek sengna asi tengebkwandim ara kikibnyi kurum. Kanci kerek sengna deici deibwe kitirdongon meterai asi dangminingna kikibnyi kurum. Ninyi aryi nun Du Yesus Kansi minob oankei uca, Kanci Kan ining aryi ninyi asi dekoka lebdeibsum ci, Er Imtamnyi mabwe nermabwe kibdeibsumwe ati, Kanda kikib kurum. Kanda nun Du biryi nunda ninyi yala nirya kankan aryi deiriransei nang asi lebsumwe. Tonda, uram yuk-yuk enub nang asi deksumwe. Tonda, weik sien nang taleansei mutuk yuk-yuk kuramoubwe nang asi dekoka lebsumwe.

¹⁰Kanci antanibdeibsumwe uca, nunda nun Nai Imtamnyi amwetam bun nang ato kunub. Tonda, Er Imtamnyi Uram asi kunubibiryi, nunda Er Imtamnyi kan ninyi kan noutam kuboka antanirdeirin nang ato kunub. Ato kubibiryi, nunda weik sien nang ato kuboka tukwetam nang nirya asi kalikwayeb,” ebmai asi kekebmase.

¹¹Asing dinmase uca, uram weik dobmou asi kekebmase. Ara, Er imtamnyi Uram eryuryangan nang ilinto aryi antaniboka uram weik ebmai asi kekebmase. A Er Imtamnyi Uram eryuryangan nang ara nukmanto kum kuramnyi. Ara, seribu baryi nang buluna yuk-yuk ara seribu baryi ato kuramnyi. Tonda, sepuluh ribu baryi nang buluna yuk-yuk ara sepuluh ribu baryi ato kuramnyi. A uram eryuryangan nang nirya ara iya erebdob bun sokon aknabdongoboka tikmai. Ara, sun neb-neb eryibarande dinyi dumbaryi ab ninyi kalingna nang dua puluh empat baryi ab tonkwa erebdob bun sokon aknabdongoboka tikmai.

¹²A nang nirya ara antaniboka uram weik ebmai ci, ato eboka mot sebmai. “Nun Du Domba Mi atonyi oaminyi bira mikib dinyi dorona ara Erda kikibnyi kurur, Erda mikib nirya ab bona bon dinyi nirya ab diboka bingna dinyi nirya ab talerurnyi kurur. Ati nunci nun Du Domba Mi atonyi bisi si weik eboka erebkwayeb,” ebmai asi kekebmase.

¹³Ato eboka mot sebmai ura, sun imtam tukwetam tukwe amwe tam mekwan dam kuraming neb-neb eryibarande dinyi nirya aryi ato eboka sebmai, “Nun Nai iya erebdob bun sokon bunanyi bisi si weik ebkwayeb. Tonda, Nun Du Domba Mi atonyi bisi si weik erebkwayeb. A nang amse asi kisal dakwayeb. Aminda kubde binkwayeb talak nirya ababyi tanglona kum uca, ‘Nun kalingsina mikib nang,’ ebkwayeb,” eboka sebmai asi kekebmase.

¹⁴Ato eboka sebmai kekebmase ura, sun isin neb-neb eryibarande dinyi dumbaryi aryi, “Diba, Amin,” ebmai. Ebmai uca, sun ninyi kalingna nang dua puluh empat baryi nang aryi nun Nai Imtamnyi si ab nun Du Yesus asi, “Nun Nai, nun Du Yesus,” teneboka sun kutam ikdongoboka si weik ebmai.