Read Futuna-Aniwa Wahyu 6 Bible Online

Wahyu 6 - Futuna-Aniwa bible

Wahyu 6

¹Ura ton dinmase uca, nun Du Yesus Domba Mi atonyi biryi kerek sengna kitirdongon dinyi meterai tabaryi dongobmai asi meterai yuma dinyi asi dakminikmou ati asing eibmase. Dakminikmou ura, isin neb-neb eryibarande dinyi dumbaryi kuramuryok, a dinyi kankan aryi tentoknyi biryi liman ato uram weik dobmou uca, “Yarum,” ebmou.

²Ura, dinmase uca, bisam kuda bol kait kuda anabmou asi asing eibmase. Ura, diranse uca, kait kuda deici asi ninyi tentok ninyi on mar ab yin ab asi doubmou ci, bukmou asi eibmase. Ura, anyi bira Er Imtamnyi biryi muna kimdongonanyi kira kisok kaluna karebmou uca, anyi biryi anaboka er ordana nang asi muna kimdongonmou ci, “Ni ordana nang nirya asi muna kibdongobkwan,” tenen yibaramwe asi asing eibmase.

³A sirya ura, nun Du Yesus Domba Mi atonyi biryi kerek sengna kitirdongon dinyi deib aryi deibdongobmai keica meterai bitinyi dinyi asi dakminikmou. Dakminikmou ura, isin neb-neb eryibarande dinyi dumbaryi kuramuryok, a dinyi kankan aryi bitininyi biryi nisi, “Yarum,” ebmou.

⁴Ura, dinmase uca, bisam kuda bol bi kuramwe asi anabdobmou ba, asing eibmase. A bol bi kuda deici bukmounyi bisi Er Imtamnyi biryi mikib karebmou. Mikib karebmou uca, anyi biryi tukwetam nang kankan aryi antanirdan dinyi nirya dobde binkwamwe ati anabdobmou. Tonda, anyi biryi mar deyok koubkwamwe uca, sun tukwetam kuramnyi nang aryi sun mamun ordankwamnyi ati anabdobmou. Ara, Er Imtamnyi biryi anyi bisi ninyi on ya weik dinyi karebmou ura, anyi biryi anaboka mar deyok kourbinmou asi asing eibmase.

⁵A sirya ura, nun Du Yesus Domba Mi atonyi biryi kerek sengna kitirdongon dinyi deib aryi deibdongobmai keica meterai winiryi dinyi asi dakminikmou. Dakminikmou uca, isin neb-neb eryibarande dinyi dumbaryi kuramuryok, a dinyi kankan aryi winirinyi biryi nisi, “Yarum,” eboka nabmou. Ura, dinmase uca, bisam kuda bol mirin anabdobmou asi asing eibmase. Bol mirin kuda deici bukmounyi bira kwakne dirina ara yin dinyi kiklina asi doubmou asi asing eibmase.

⁶A sirya ura, isin neb-neb eryibarande dinyi dumbaryi dinyi kuramwe bok, a dinyi kankan aryi uram ton ato ebmou asi kekebmase. “Kwaning atan li kubkwande ba, kwaning si gandum mitikanun kubkwande bok, a kwaning ara dengna weik dinyi aryi dekdobkwaming. Tonda, kwaning si jelai ababyi mitikanun kurur bok, dengna weik dinyi aryi dekdobkwaming. Kwaning atan li karebmin cok, co du si zaitun ab co du si anggur ab kum daneibminyei,” ebmou asi kekebmase.

⁷A sirya kekebmase ura, nun Du Yesus Domba Mi atonyi biryi kerek sengna kitirdongon dinyi deib aryi deibdongobmai meterai dumbaryi dinyi asi dakminikmou. Dakminikmou ura, isin neb-neb eryibarande dinyi dumbaryi kuramuryok, a dinyi kankan aryi dumunyi biryi, “Yarum,” eboka nabmou.

⁸Ura, dinmase uca, bisam kuda ara uk sikci bol kuda asi anabdobmou asi asing eibmase. Uk sikci bol kuda deici bukmounyi si ara Ninyi Dimdeirinanyi kuramwe. Anyi bisi dongtam miliramunyi bira din nang taleramunyi si Tukwe Dongon Dam Deyoknyi kuramwe. A nang susuk asi Er Imtamnyi biryi mikib karebmou uca, sunci tukwetam kuraming nang nirya asi meici kukoka dumbaryi bok, ninyi deici tentok tam asi obkwandei ati anabdobmarei. Ara, a nang susuk anabmarei ara ninyi on ya douboka ninyi ilinto obkwandei ati anabdobmarei. Tonda, a nang susuk aryi kwaning atan karebkwandei uca, ninyi ilinto dibkwamnyi. Ba, yuk nang ara yun karebkwandei uca, ninyi yun taleboka dibkwamnyi. Ba, yuk nang ara im dangna tukwe dangna kunung yu kam ab bisam ab aryi oboka yin dinyi karebkwandei uca, ninyi dibkwamnyi ati anabmarei asi eibmase.

⁹Ura, nun Du Yesus Domba Mi atonyi bira meterai amubaryi dinyi asi dakminikmou ura, asing dinmase uca, sun dib tenen nang diamnyi nang sun kanya yuk-yuk asi asing eibmase. A dib tenen nang ara Er Imtamnyi Uram diboka taleamiryi, nun Du Yesus uram dib en uram lak eamnyi deyok aryi, ninyi aryi, “Nun li,” tenen sunsi oamnyi. Sirya obmai ura, a dib tenen nang diamnyi nang sun kanya yuk-yuk ara imtam bindoka Er Imtamnyi bisi ninyi dama deirin ai amwetam kuramnyi asi asing eibmase.

¹⁰Kuramiryi, sun dib tenen nang diamnyi nang sun kanya yuk-yuk aryi antaniboka weik uram ebmai ci, ato ebmai, “Nai Du, Kanda iya mikib dinyi talerandim Sienyi ton, iya telebnyi kurandimnyi ton, kan ebmumwe to diboka kunurandimnyi ton kurum. Tukwetam tuba kuraming nang aryi nunsi obmai deyok aryi, Kanci unato tum aryi sunsi wenebkwandim do? A nang aryi obmasei uca, nun ining saksou asi Kanci dekeibmin cok, a nang asi minola wenebdum ati molobmakib,” ebmai asi kekebmase.

¹¹Ura, Er Imtamnyi biryi a dib tenen nang diamnyi nang yuk-yuk asi kait ongon aling karebmou ci, “Ukubloabmun ba,” ebmou. Ara, Erci ato ebmou, “Tukwetam nang aryi sun kwityabwe dib tenen nang yuk nang ababyi obingyi ara Niryi minob, ‘Ur obting,’ teneanse to nang nirya obingnyi ura, Nira Imtamnyi biryi sun obmasei nang asi wenebkwan,” ebmou.

¹²Ura, dinmase uca, nun Du Yesus Domba Mi atonyi biryi kerek sengna kitirdongon dinyi deici aryi deibdongobmai keici meterai nabaryi dinyi asi dakminikmou ati asing eibmase. Dakminikmou ura, mutuk eimna weik dobmou ci, kiting berengna nirya kum berekmou ci, iya kunuk dakmou. Kambing kala aryi kiknin aling ara mirin kobdob kurande to, kiting ababyi iya mirin tub ato akwe dakmou. Tonda, wala ara ining bol dinyi ato kibmou.

¹³Ba, kurya nirya ara imtam aryi kuboka tukwetam daksakmou. Ara, ibalya weik dorande aryi, co du kwarang du eng orande dinyi tukwe ai minola dangsangnande to, kurya nirya ababyi neiktoto tukwetam daksakmou.

¹⁴Ura, im bila tuba kum danmou. Kertas kwilikdoba kitibtaleboka donongnaming ato, im bila ababyi neiktoto kitiboka donokmou. Tonda, mutuk kon tukwe kib nirya ab me dumdum nirya ababyi lulukmou ci, er kuamwe dam tuba kum kubmou. Erda, yuk ai kisiboka bindoka kubmou.

¹⁵Ura, sun tukwetam nang asi kalingnamnyi erebdob sien nang ab, sun erebdob sien nang amwetam bun nang ab, tonda sun yin doun nang seribu baryi arungdeirin nang ab asi ilil weik kubmou ba, sundamnyi lemdarbinkwamai ati keil umbura dam yuk-yuk wengdorbinmai. Tonda, sun bona bon nang ab, sun mikib nang ab, sun yuk nang aryi arukmangnyi tok ikin wa bon nang ab, sun tenebdobmangnyi tok wa in nang ababyi, “Inibdandoka lemdarbinkwayeb,” tenen aryi keil umbura dam yuk-yuk wengdorbinsekmai.

¹⁶“Lebdandobkwayeb,” tenebmai ci, sunci uram weik doboka mutuk kon ab keil ab asi molobmai. Ara, sunci ato eboka molobmai. “A mutuk kon, nun iya erebdob bun sokon bunanyi urasintam aryi lak kubibyei ati, kanci toboka tonok oboka nunsi siklibdeibsurum. Tonda, Domba Mi atonyi biryi nunti yu weik kuransir ati wenebsicei. Ati, mutuk kon aryi siklibsimin ci, nunsi Er urasintam aryi inibdeibsurum o,” eboka molobmai.

¹⁷“Er Imtamnyi ab Domba Mi atonyi ab aryi yu weik bosururung ani, sun weik wenena wenebkwinsing uki tum sirya berekmar ati, ninyi tentok ababyi sun karebkwansing wenena weik asi kum bobte,” ebmai asi kekebmase.