Read Futuna-Aniwa Wahyu 7 Bible Online

Wahyu 7 - Futuna-Aniwa bible

Wahyu 7

¹A sirya ura, asing dinmase uca, Er Imtamnyi Uram eryuryangan nang dumbaryi asi asing eibmase. A uram eryuryangan nang ara tukwetam kubkub dam dumbaryi asi tikmai ci, “Kumwe utotoa dobcei,” tenen bisik sekmai. Ara, “Tukwe kibtam babyi, weik mekwantam babyi, co tentok kuranci ai babyi, kumwe utotoa dobcei,” tenen bisik sekwamnyi ati tikmai.

²Ura, asing dinmase uca, Er Uram eryuryangananyi yuknyi biryi yaletam aryi kuboka yanganmou asi asing eibmase. Anyi bira yanganmou ci, nun Nai Imtamnyi iya kam kurutnyi biryi wibdeibsou nang itinto kurdeirin meterai asi talebmou. Ura, anyi biryi uram weikanun dobmou ci, er kwityabwe uram eryuryangan nang dumbaryi asi uram ton ebmou. Ara, tukwe kib ab weik mekwan nirya ababyi malyi kubminikwamnyi ati Er Imtamnyi mikib dobdobmai nang asi erci ato ebmou.

³“Tukwe kib ab weik mekwan ab co deici ab malyi kurminingna ati ukubloabdarur. Nun Nai Imtamnyi wa irmilin nang asok asi sisa dinyi deirina kabul ati, malyi kurminingna ara ukubloabdarur,” ebmou.

⁴Sirya ebmou ura, tuba kekebmase bok, sun asok deici itinto kurdeirin dinyi dobdobmai nang nirya asi nungmai asi, sun nungna kekebmase. A nang ara Israel yala amolbaryi nang aryi deiamnyi ba, antaniboka seratus empat puluh empat ribu nang kuramnyi.

⁵Yehuda yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Ruben yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Gad yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai.

⁶Asyer yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Naftali yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Manasye yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai.

⁷Simeon yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Lewi yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Isakhar yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai.

⁸Zebulon yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Yusuf yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai. Benyamin yala aryi deiamnyi nang ara dua belas ribu baryi nang asi Er Imtamnyi wa irmilin nang itinto kurdeirin dinyi dobdobmai.

⁹A sirya ura, ni Yohanes biryi dinmase uca, ninyi ilinto bulubmai asi asing eibmase. A nang ara yubwa-yubwa ilinto kuboka bulubmai ati, nukman kum kubmai. A nang ara mutuk nirya, ninyi yala nirya, weik sien nang taleramnyi mutuk kuramnyi nang nirya, uram yuk-yuk eramnyi nang nirya kunmai ci, iya erebdob bun sokon urasintam asi tikmai ci, nun Du Yesus Domba Mi atonyi urasintam asi tikmai. Ba, a buluboka tikmai nang ara ongon aling ara kait aling akwe ongobmai ci, sun taruk dam ara atar ato co si palem bok doubmai nang akwe tikmai.

¹⁰Ura, a nang ara uram weikanun dobmai ci, ato ebmai. “Nun Nai Imtamnyi iya erebdob bun sokon bunanyi bira ninyi Lemsurutnyi kurur. Nun Du Domba Mi atonyi bira Ninyi Lemsurutnyi kurur. A iya erebdob nang bitinyi si yuk-yuk weik ebkwayeb,” ebmai.

¹¹Ba, sun Er Imtamnyi Uram eryuryangan nang nirya aryi iya erebdob bun sokon aknabdongoboka tikmai. Tonda, ninyi kalingna nang dua puluh empat baryi ab isin neb-neb eryibarande dinyi dumbaryi ab ara noutam tikmai asi sun Uram eryuryangan nang aryi sunsi aknabdongoboka tikmai. Iya erebdob bun sokon urasintam aryi tikmai ci, sunci sun kutam ikdongoboka Er Imtamnyi si weik ebmai.

¹²Ara, sunci ato ebmai, “Amin, diba ati ebmab. Nun Nai Imtamnyi bisi kisal dakoka Er si weik ebkwayeb. Erda diboka bingna deyoknyi kurur, ton Erda ninyi aryi kisal dakoka, ‘Nun Nai,’ enubnyi kurur. Er urasintam aryi ninyi aryi luknubdongoboka Er si weik enub. Nun Nai bira iya weik sienyi ton iya mikibnyi ton kurur. Ati, nunci tuba-tuba ato ebibiryi, aminda kubkwayeb talak nirya kubibiryi, nun Nai si weik ebkwayeb. Amin,” ebmai asi kekebmase.

¹³A sirya ebmai ura, ninyi kalingna nang tentoknyi biryi ni Yohanes bisi ato eboka asibdenmanou, “A nang kait ongon aling ongobmang nang ara unato nang kunung ati tenebmarim do? Dantam aryi kuboka yanmang tenebmarim do?” eboka asibdenmou.

¹⁴Ato eboka asibdenmanou bok, niryi ersi, “Nai, kan sirya bikmarim ati, kanci nisi lak ebdeibnurum,” ebmase. Ato ebmase uca, a ninyi kalingnanyi biryi nisi ato ebmanou, “A nang ara ninyi aryi mambul weik kimdeiriramnyi bok, muna kibdongobmai ura, lemdaryangan dam sirya wengdoryanmai. Imtam ai sirya wengdoryanmai ura, sunci sun ongon aling asi me ilikmai. Me diba aryi kum ilikmai. Erda, nun Du Yesus Domba Mi atonyi Er ining biriman aryi ilikmai uca, sun ongon aling ara kait kibmou.

¹⁵Muna kibdongobmai ati kait ongon aling ongoraming deyok aryi, a nang ara Er Imtamnyi erebdob bun sokon urasintam asi iya kunung. Er Imtamnyi dam kun ai imtam ai umbura kunung ci, sunci kitingtam lukunda nirya aryi Er Imtamnyi si weik enung. Tonda, er iya erebdob bun sokon bunanyi biryi sunsi kalikwande. Keis ol ai ara akai umbura kun nang asi limdongorande to, Er Imtamnyi biryi a nang asi limdongoboka kalikwande.

¹⁶A nang ara kwaning ataramwe ara kwaning tuba kum atabkwande; A nang ara me ataramwe ani, me tuba kum atabkwande. Kiting yu ara sunsi kum yibkwande.

¹⁷Ara, nun Du Yesus Domba Mi atonyi bira iya erebdob bun sokon noutam kurutnyi biryi sunsi menekoka kalikwande. Domba kalingnanyi er domba asi diboka kalingnande to, nun Du Domba Mi atonyi biryi menekoka er milin nang asi diboka kalikwande. Erci sunsi menekoka me u dam bobinkwande uca, kam kimdeirin me langdeiboka yibkwaming A nang ara mambul weik aryok engena weik engeramnyi asi nun Nai Imtamnyi biryi teleb kubdeibdiryi, sun asimaka nirya kilibminikwande.” Ninyi kalingnangyi nisi ato eboka ebmanou.