Read Futuna-Aniwa Wahyu 8 Bible Online

Wahyu 8 - Futuna-Aniwa bible

Wahyu 8

¹Ura, kerek sengna deici kuramwe kitirdongon keica meterai tabaryi dinyi dakminikmou ura, imtam umbura aryi uram utotoa nirya kilikmai. Ara, kiting yakna tentok kum noutam dinyi kubmai bok, uram utotoa enmai asi kilikmai.

²Ani, asing dinmase uca, Er Imtamnyi Uram eryuryangan nang tabaryi asi asing eibmase. A nang ara Er Imtamnyi urasintam aryi tikoka nun Nai uram kunuraming. Nun Nai Imtamnyi biryi arukmou uca, a nang tabaryi yuk-yuk asi buena si sangkakala karebmou ba, doboka tikmai asi asing eibmase.

³Ura, Er Imtamnyi Uram eryuryangananyi yuknyi biryi yandoka Er Imtamnyi bisi dama deirin dam tikmou. Tingyanmou ci, erda moyok emas dinyi talebmou. Ara, uk aboka tong teleb dinyi deirin moyok talebmou. Dama deirin dam tingyanmou ura, uk aboka tong teleb dinyi ilinto ersi karebmai. Ara, erci a dinyi asi taleboka Er Imtamnyi urasintam aryi kurur dama deirin dam deici aryi deibkwamwe ati karebmai. Ara, sun dib tenen nang nirya aryi Er Imtamnyi bisi molobkwamnyi ba, erci a dinyi asi dama deirin dinyi emas aryi kiknin dinyi deibkwamwe ati, sunci ersi a dinyi karebmai.

⁴Ura, Er Imtamnyi Uram eryuryangananyi biryi a tong teleb dinyi nirya dobdobmou ura, dama deirin dam deibmou. Sirya deibmou ura, uk aboka tong teleb dinyi tuluboka ara Er Imtamnyi urasintam dam yanmou. Ara, sun dib tenen nang nirya aryi Er Imtamnyi bisi molobmai ba, tong teleb dinyi dama deibmou.

⁵Ura, Er Imtamnyi Uram eryuryangananyi biryi moyok emas dinyi asi dobtalebmou ura, dama deirin dam aryi uk angmou kalum asi dobtaleboka a moyok umbura kibdongobmou. Sirya dongobmou ura, Uram eryuryangananyi biryi a moyok asi imtam aryi kuboka tukwetam asi yakwetebmou. Tukwetam yakwetebmou uca, bebe lingebmou ura, liman dobmou. Tonda, lilim weik dobmou ba, mutuk eimna dobmou.

⁶Ura, sun Uram eryuryangan nang tabaryi aryi kiknikminikdanmai cok, sun buena si sangkakala yuk-yuk asi dobmai.

⁷Uram eryuryangananyi yuma kobdobnyi biryi sangkakala dobmou ba, imtam aryi kuboka lumtaiya du-du mo cebmou. Tonda, imtam aryi kuboka uk ara tukwetam sakmou. Tonda, ining ara uk ab tonkwa kuboka tukwetam sakmou. A dinyi nirya asi tukwetam yakwetebmou uca, im dangna tukwe dangna mutuk nirya ara bokoka winiryi bok, tukwe deici tentok tam asi uk nirya yibmou. Ba, tukwe deici bitinyi winiryi tam ara ur tuba kubmou. Tonda, im dangna tukwe dangna kuramwe co nirya ara meici kukoka winiryi bok, deici tentok tam asi uk nirya yibmou. Ba, deici bitinyi winiryi tam ara uk kum yibmou. Tonda, maning yik dinyi nirya asi uk nirya yibmou.

⁸Ura, Uram eryuryangananyi bitinyi anyi biryi sangkakala dobmou uca, uk arande mutuk kon weik ato dinyi ara daksakaboka ilila mekwan umbura wekmou. Daksakoka wekmou uca, ilila mekwan ara wilibdeiboka winiryi bok, deici tentok tam asi ining kibmou. Ba, mekwan deici bitinyi winiryi tam ara ur tuba kubmou.

⁹Uca, ilila mekwan umbura aryi neb-neb eryibarande dinyi nirya ara meici kukoka winiryi bok, deici tentok tam asi dibmou. Ba, deici bitinyi winiryi tam ara kam tuba kubmou. Tonda, mekwan asok deici yibarande co ngun-ngun nirya ara meici kukoka winiryi bok, deici tentok asi dakoka me wekmou. Ba, deici bitinyi winiryi tam ara dakoka me wengna kum kubmou.

¹⁰Ura, Uram eryuryangananyi winiryi anyi biryi sangkakala dobmou uca, kurya weik dinyi ara uk buk weik angnande ato kuboka angmou tok imtam aryi kuboka tukwe ai sakmou. Ara, me u dam ton yiban me ton nirya bokdoba winiryi bok, bokdoba tentok tam asi sakmou. Ba, me u dam ton yiban me ton bokdoba bitinyi winiryi tam asi kurya kum sakmou.

¹¹A kurya si ara Sik Kimdeirina Kurya. Uca, me u dam ton yiban me ton nirya ara bokdoba winiryi bok, bokdoba tentok tam ara sik kibmou. Ba, me u dam ton yiban me ton bokdoba bitinyi winiryi tam ara kib tuba kubmou. Me sik aryi ninyi ilinto aryi yibmai uca, dibsekmai.

¹²Ura, Uram eryuryangananyi dumbaryi anyi biryi sangkakala dobmou ba, kiting sinarya ara bokoka winiryi bok, deici tentok tam asi kunuk dakmou. Ba, kiting sinarya deici bitinyi winiryi tam ara tuba berekmou. Tonda, imtam kurande kurya nirya ab, wala tilil ababyi ara meici kukoka winiryi bok, deici tentok tam asi kunuk dakmou. Ba, deici bitinyi winiryi tam ara tuba berekmou. Tonda, kitingtam nirya ara bokoka winiryi bok, deici tentok tum asi kunuk dakmou. Ba, deici bitinyi winiryi tum ara kiting tuba berekmou. Tonda, lukunda nirya ababyi bokoka winiryi bok, deici tentok tum asi kunuk nirya dakmou. Ba, deici bitinyi winiryi tum ara wala ab kurya ab tilil tuba kubmou.

¹³Ura, asing dinmase uca, maka bib ara im kan tukwe kan noutam aryi lang-lang ebmou asi asing eibmase. Im kan tukwe kan noutam aryi lang-lang ebmou cok, maka bib aryi uram weik doboka ato ebmou asi kekebmase. “Wenen tum dam kubmar! Wenen tum dam kubmar! Nun Nai Imtamnyi biryi sun tukwe kun nang asi wenebkwande uki tum dam kubmar! Sun im dangna tukwe dangna mutuk asi tuba kuraming nang mambul weik dobkwaming! Er Imtamnyi Uram eryuryangan nang dumbaryi ara sun buena yuk-yuk asi sirya dobmai. Ba, uram eryuryangan nang yuk nang winiryi ara sun sangkakala minola dobkwabmang. Sun im dangna tukwe dangna kuramingnyi nang ara mambul weik dobkwaming ati ato ebman,” ebmou asi kekebmase.