Read Futuna-Aniwa Wahyu 9 Bible Online

Wahyu 9 - Futuna-Aniwa bible

Wahyu 9

¹Ura, Er Imtamnyi Uram eryuryangananyi amubaryi anyi biryi sangkakala dobmou uca, imtam aryi kuboka kurya ton tukwetam sakmou asi asing eibmase. A kurya ara mikib kuramunyi bisi iya wenena ai ara ilila tukwe angdona ai bublan kungna asi karebmai.

²Ura, a kurya aryi ilila tukwe angdona asi bublan kukeibmou uca, tukwe umbura aryi uk tulum weik anabmou. Ara, weik kwalina tum aryi keil leibmangnyi uca, uk buk weik aboka tulum weik welerande ato kubmou. Tukwe umbura aryi anaboka tulum weik kubmou uca, kiting ab im ab nirya libmou.

³Ura, a uk tulum aryi kuboka kwising ilinto anabmou. A kwising ara tukwetam yuryanmai asi Er Imtamnyi biryi mikib karebmou uca, ninyi si tobkwamai ati mikib karebmou. Ara, kwising si kalum aryi ato si torande uca, mikib weik kuboka u doraming to kubkwamai.

⁴A kwising si tobmai ara kalum ato mikib kuramwe asi Er Imtamnyi biryi ato ebmou. “Tukwetam kurande maning ab sungsunga ab co ab utotoa yibmunyei. Erda, sun Er Imtamnyi bisi milin kum nang ara Er sisa itinto kurdeirin dinyi asok dam kum boramingnyi nang asi si tobmunyi ura, u dobting,” ebmou.

⁵Ato ebmou ura, kalum ato kwising mer asi, “Ninyi si toramunyi ababyi oboka yibsicei, erda wala amubaryok wenebkwandarur,” ebmou. Uca, kwising mer aryi a nang asi si tobde yibinmai uca, sun mambul weik dobmou. Kalum aryi si torande uca, mambul weik kurande to, a nang ara mambul weik dobmai.

⁶Ato dinyi kunubkwande talak aryi sun ninyi aryi u weik deyok aryi, “Nun dibtibyi se,” tenen kubingnyi bok, ninyi tentok ababyi sunsi kum obkwande. Tonda, u weik deyok aryi, “Dibtibyi,” tenen ola dibmanto dinyi ukuramingnyi bok, kam tuba kubkwaming.

⁷A ninyi lukde yiramwe kwising mer ara mikib weik kubmai. Ara, yin doun nang borande yan daran limna limdongoraming kuda ato mikib weik kubmai. A kuda ara ting ato dinyi kiningnamingiryi, mikib weik kunung ato a kwising mer neiktoto mikib weik kubmai. Sun kisok ai ara weik sien nang kisok kaluna emas dinyi ato kalubmou. Ba, sun urasin ara ninyi urasin ato kubmou.

⁸Sun kisok otong ara cang kubmou ati, nerabwe kisok otong ato kubmou. Tonda, sun si ara ilila bai kam si singa si ato yu weik kubmou.

⁹Tonda, sun taram bol nirya libmai ting ara besi ting kiningnaming ato kuramnyi. Kwising mer yibanmou ci, sun ol aryi lilim ilinto ebmou. Kuda ilinto aryi yin doun nang bon limna asi libdongoboka mar ordan dam cung banmangnyi uca, lilim weik eraming to, a kwising mer yibanmaia lilim ara lilim weik eramwe.

¹⁰A kwising mer ara kalum mer ato kubmou ati, kalum amwe ato bobmai cok, kalum si tob dinyi borande to ababyi bobmai. Sun amwe ara mikib weik kubmou ati, sunci wala amubaryi kuramiryok, ninyi lukde yiramiryi, weneramnyi.

¹¹Kwising mer sienyi bira ilila tukwe um deyoknyi kuramwe. Er si ara Ibrani uram aryi eboka Abadon dobmai. Ba, Yunani uram aryi eboka Apolion dobmai. [1]

¹²Wenen dinyi yuma dinyi sirya yanmou ani, bisibmou. Ba, yuk wenen dinyi bitinyi dinyi ab winiryi dinyi ab yankwamaringa dam kubmar.

¹³Ura, Er Uram eryuryangananyi nabaryi anyi biryi sangkakala dobmou ura, uram ton ebmou asi kekebmase. A uram ara Er Imtamnyi urasintam aryi kuboka emas kiknin dinyi ara dama deirin dam aryi ebmou. A uram ara dama deirin dam deici kuramwe sapi akola ato dinyi kankan aryi ebmou.

¹⁴A uram ara Er Imtamnyi Uram eryuryangan nang nabaryi anyi sangkakala talebmounyi bisi ato ebmou. “Sun ninyi wenebkwaming uram eryuryangan nang ninyi dumbaryi weik yiban me si Efrat dam tabwe deamnyi nang ara tabwe lobdeibdum,” ebmou asi kekebmase.

¹⁵Ba, a uram eryuryangan nang ara tabwe lordeirina kabul talak ara, “Er Imtamnyi biryi takubdeibmasou to, weneboka obkwayeb,” tenen a kwalina ab wala ab uki tum ababyi dibde bukeiamnyi. Ani, sirya lobdeibmou ura, a uram eryuryangan nang dumbaryi ara anaboka im dangna tukwe dangna nang ilinto obmai. Ara, ninyi nirya bokdoba winiryi bok, bokdoba tentok tam asi obmai. Ba, bokdoba bitinyi winiryi tam ara kum obmai.

¹⁶Sun milibmai yin doun nang ara bisam kuda deici bun nang nirya ilinto mitik kum kubmai. Nukmai ba, a nang ara dua puluh ribu liki sepuluh ribu nang kubmai asi kekebmase.

¹⁷Kunumna deici aryi asing dinmase bok, mar ordan kuda ab kuda deici bun yin doun nang ab ara ato kubmai. Sun taramtam nirya kinikmou ting ara bi aling ato kubmou. Tonda, im bila bol ato kubmou. Tonda, kumasan bol ato kubmou. Kuda kisok ara ilila bai kam si singa kisok ato boramwe. Sun sibambol aryi anabmou dinyi ara uk ab tulum ab uk tong ato yu keken dinyi si belerang ab anabmou.

¹⁸Ura, sun sibambol aryi anabmou uk ab tulum ab uk tong yu ato keken dinyi ab ara wenen dinyi winiryi aryi wenebmai uca, ninyi nirya ara bokdoba winiryi bok, bokdoba tentok tam asi dibmai. Ba, bokdoba bitinyi winiryi tam ara kum dibmai.

¹⁹A kuda ara mikib weik kubmai ci, sun si ab sun amwe ab ara yu weik kubmai. Sun amwe yuk-yuk ara kwatima ato kubmou. Sun amwe ara kwatima kisok ato bobmou uca, si tobmou.

²⁰Sun yuk nang ara a wenena aryi kum obmai nang ara sun malyi kun dinyi kum taklobmai. Erda, sunci isa asi tuba moloramnyi. Tonda, ninyi aryi kiknibmai kwemdina tuba moloramnyi. A kwemdina ara emas aryi doboka kiknibmai. Tonda, perak aryi doboka kiknibmai. Tonda, tembaga aryi doboka kiknibmai. Tonda, keil aryi doboka kiknibmai. Tonda, co aryi doboka kiknibmai. A kwemdina dinyi ara ninyi aryi kiknibmai ati asing eirin kum, amol kekebman kum, yibanman kum kunung dinyi asi moloramnyi.

²¹Tonda, yuk malyi kun dinyi ababyi kum taklobmai ci, ninyi tuba oramnyi, ninyi kir tuba doramnyi, sal ner talyi yordaramnyi, tonda yuk nang dinyi tuba ukula doramnyi.