Read Upper Grand Valley Dani Matius 1 Bible Online

Matius 1 - Upper Grand Valley Dani bible

Matius 1

¹At Yesus Kristus Abraham inom, Daud inom, inomba etnogo akombalak inom erlo paga nen endak larik waguka mende inendaga yi o.

²At Abraham nen Ishak endakik, Ishak nen Yakub endakik, Yakub nen Yehuda agoromi inom endaginakik,

³at Yehuda nen kwe Tamar waganggikesik nen, Peres inom, Zerah inom, imbisak endaginakik, nen, at Peres nen Hezron endakik, Hezron nen Ram endakik, kagakike.

⁴Nen, Ram nen Aminadab endakik, Aminadab nen Nahason endakik, Nahason nen Salmon endakik, kagakike.

⁵Nen, Salmon nen kwe Rahab waganggikesik nen, Boas endakik, Boas nen kwe Rut waganggikesik nen, Obed endakik, Obed nen Isai endakik, kagakike.

⁶Nen, Isai nen, ap Daud endaganggok etnogo endakik, at Daud nen Uria age ndilogo wolok dukisikesik nen, Salomo endakik, esigit diluk endak larik waguka.

⁷Nen, Salomo nen, Rehabeam endakik, Rehabeam nen Abia endakik, Abia nen Asa endakik, kagakike.

⁸Nen, Asa nen Yosafat endakik, Yosafat nen Yoram endakik, Yoram nen Uzia endakik, kagakike.

⁹Nen, Uzia nen Yotam endakik, Yotam nen Ahas endakik, Ahas nen Hizkia endakik, kagakike.

¹⁰Nen, Hizkia nen Manasye endakik, Manasye nen Amon endakik, Amon nen Yosia endakik, kagakike.

¹¹Nen, Yosia ap Yahudi mende o Babel wogisek laguka eta amot at Yekhonya agarlagi inom endaginakik, esigit diluk endak larik waguka.

¹²Nen, akoni Yahudi mende o Babel wogisek lagukama dagolik, yabunggane at Yekhonya nen Sealtiel endakik, Sealtiel nen Zerubabel endakik, kagakike.

¹³Nen, Zerubabel nen Abihud endakik, Abihud nen Elyakim endakik, Elyakim nen Azur endakik, kagakike.

¹⁴Nen, Azur nen Zadok endakik, Zadok nen Akhim endakik, Akhim nen Eliud endakik, kagakike.

¹⁵Nen, Eliud nen Eleazar endakik, Eleazar nen Matan endakik, Matan nen Yakub endakik, kagakike.

¹⁶Nen, Yakub nen Yusuf, kwe Maria agun etnogo endakik, kwe Maria nen Yesus, nit nen Kristus yiligogi etnogo endakik, erloma nenat endak larik waguka.

¹⁷Esigit diluk endak larik waguka eti, ap Abraham endak lagike kurli nen, ap Daud endak lagike eti kurli paga inakombalak inebe 14 kurli nen endak larik waguka. Nen, Daud endak lagike kurli nen, akoni Yahudi mende wogisek o Babel laguka eti kurli paga inakombalak 14 kurli nen yabunggane endak larik wagukaat. Nen, ap Yahudi mende o Babel wogisek laguka kurli nen, Kristus endak lagike eti paga, inebe 14 kurli nen yabunggane endak larik wagukaat o.

¹⁸At Yesus Kristus endak lagike eti ebe yigit dilugat endak lagike. Agoya Maria eti, ap Yusuf ebe waganggidek, inom wene warek werekma, Allah Agurengge nen eyak aburla disike.

¹⁹Aburla disikemo at Yusuf obabut pano etnogo paga, at akla nen, “An kwe eti akoni inil oba togot diyamo enggarli asunogo nen, limago togot diyagin,” yiluk, akla ambasi lagike.

²⁰Esigit diluk ambasi werekma, kibanggo noge yisinem at malaikat Allah mbogot oba nen yonggo wusa ʼbiya wirigogo mende omanggi oba wagikesik nen, men yogokike, “Yusuf Daud omba yi. Kat korlak Maria eti waganu naʼit yiluk kakla ambagup o. Eyak eti Allah Agurengge nenat aburla dekemo. Eti paga, waganin o.

²¹Eyak eti ebe abat endasigin o. Endasumo, at nen ewe agot weyak kagarigogi mende nggorogo waganiluk ndil inabigin o, yiluk endaga Yesus salino,” yiluk yogokike.

²²Esigit diluk kagasugun yiluk, ninombae Allah Endaganggok nen, ap omanggi paganeat ayonggo ʼbisikemo wene yogisasi dogolik, kolal mbalogo ʼbisike mende ndak-ndagat kagat lasuwagaluk yisike o.

²³At eti nen, “Korlak omanggi eyak aburla atluk, eyak abat endasigin o. Endak lago kalok, nit ninane paga, Allah ninom werek, yu kak, endaga Imanuel yisi dogogun,” [1] yiluk kolal mbalogo ʼbisike mende ndak-ndagat kagat lagike o.

²⁴At Yusuf iluk agikesik, malaikat Allah nen laʼbi wagikemo yogokike mende etnogo ndak-ndagat, nge etnogo waganggikesik

²⁵imbisak noge yigidek welagukasik nen, eyak abat endakikemo, endaga Yesus salkike.