Read Upper Grand Valley Dani Markus 16 Bible Online

Markus 16 - Upper Grand Valley Dani bible

Markus 16

¹Esigit diluk kasukasik, ininggi 7 paga Hari Sabat Allah ake werlegat welagukasik nen, it kwe Maria ago Magdalena mende etnogo inom, kwe Maria Yakobus agoya etnogo inom, kwe Salome inom, ambusu obasi pano mende Yesus warek oba wasi luwogoluk onggo mbali laguka.

²Onggo mbalogo ʼbiluk noge yiluk kubulukngge hari Minggu paga kuben siyakogo mulinggi dagi wago nggorlek, oila etoma waguka.

³Wago dogolik nggit mondok nggok mende ndetnokogo lat disukama nogo nen, it-it yisi dogolik men yisuka, “Warek nggit ndetnokogo lat dega etnogo, ta nen dimbilogo su kuwal niyagin,” yiluk yilik waguka. Esigit diluk yilik inut somaksek wago lagukasik nen, inilenggen liyakasuka mende, nggit etnogo dimbilogo laʼbisukama su kuwalek werekma kasuka.

⁵Kasukasik korokogo wagukasik inebe unggisuka mende, ap elege mende omanggi iyom nggut uwanat mende yugu ininggi ebengge mot-mot korek werekma inilenggen kalok nen, inagut laguka.

⁶Inagut lagukama, at ap elege mende etnogo nen, men yogisasike, “Kinagut lagup o. Yesus ago o Nazaret mende o paga mendiluk waka etnogo kweyarigogi mende, ebe yoma dek. Allah nen ilugut dekemo werek o. Warek ʼbegama yoma obaligat yi kinilenggen ʼbikani o.

⁷ʼBikalok kit nen at agoromi ane waganggo lagaka mende Petrus agoromi inom yomenogo yogisa lani o. At Yesus nen, An o Galilea dagiluk kinelokoma dogogin o, yiluk yokisasike kagat dagigin etnaga o. Kit dagiluk at ebe kinilenggen kugun o, yiluk yogisa lani o,” yiluk yogisasike.

⁸Esigit diluk yogisasikemo inobaka mbalagukasik inowak del kilik lo dukisukasik inayuk nen wene akoni amberek yogisigidek mbiyokogo laguka.

⁹[At Yesus ebe hari Minggu paga melagike etinem kubulukngge kuben siyakogo melagikesik, at kwe Maria ago o Magdalena mende kugi inobabut weyak mende inebe 7 paga akla unggisukasik werekma paganeat mukogo wula ʼbiyasike mende etnogo nen ndak, “Alebagik ilenggen niyawak,” yiluk elokoma winam agike.

¹⁰Elokoma winam agikemo ilenggen kalok, yonggo it akoni at Yesus inom welaguka mende de akonem inoba lagike.

¹¹Lagikesik men yogisasike, “At Yesus iluk agasik werek o. Ebe arat nilenggen kigi,” yiluk yogisasikemo, inasuk kolkuka mende, eberogonat yiluk ambasuka dek.

¹²Esigit diluk ambasukasik werekma, yabunggane ap inebe mbere o unggul ʼbugurlagatma omanggi wisuwogoluk wagonem at Yesus ebe ninat kagat latluk, “An nebe inilenggen niyawak,” yiluk inomborlik wagike.

¹³Inomborlik wagikemo inilenggen kalok suguluk inagarlagi amberek yomenogo yogisa laguka mende, it inakla nen eberogonat yiluk ambasuka degat.

¹⁴Esigit diluk kagarik wago lagikesik, ebe yabunggane, it at Yesus agoromi inebe 11 paga yomenogo korek kimbiri nasi werekma, “Inilenggen niyawak nen,” yiluk inoba unggisikesik inelokoma winam agikesik men yogisasike, “Kit yoma kinakla nen eberogonat yiluk ambigidek kinakla mbugat yoma! Allah nen an nebe arat nilugut nakemo werekma, it amberek nen inilenggen niyegasik yokisa wagaka mende, kinakla nen eberogonat yiluk ambigidegat yoma!” yiluk mberisasike.

¹⁵Esigit diluk mberisasikesik, wene omanggi men yogisasike, “Kit, akoni inunggulowak endaga dombok o yi ai ndi ai etoma taʼbokogonat wene pano wene yi yogisilik lago dogoni o.

¹⁶Yogisilik lagonem it akoni amberek nen wene eti eberogonat yiluk ambagun mende, ima wusa ʼbiyagun mende, Allah nen ndil inabigin o; it amberek wene eti eberogonat yiluk waganugun dek mende Allah nen wene inoba ʼbiluk weyagarinabigin o.

¹⁷It akoni amberek nen wene eti eberogonat yiluk ambawagaluk, it wene eberogonat yiluk waganugun mende nen, yigit diluk kagako dogogun. Kugi inobabut weyak mende it amberek inakla unggiluk werekma an nendaga mbalogo mukogo wula ʼbiyigik, inane it akoni ninat mende inane inonggodek mende elalinat yigik, kagako dogogun.

¹⁸Esigit diluk kagako dogolik, warlo mbelal akoni inarigogo mende ininggimo waganggik, it inebe watlasuwagaluk akoni watlarigogi mende iyak akla nggolabogo wogisasinem ninggik, kagasugun mende, eti nen weyagarinako dogogin dek o. Nen, akoni omanggi u inakonem, it nen ininggi sebel inabumo pano ago dogogunat o,” yiluk yogisasike.

¹⁹Wene esigit diluk arat yogisasikemo, at Allah nen Yesus ebe mbogot oba wolok dagasike. Esigit diluk wolok dagasikemo eragalilu inggi ebengge nggok korek werek.

²⁰Esigit diluk wolok dagasikemo at Yesus agoromi yomenogo o yi ai ndi ai taʼbokogonat wene yogisilik laguka. Wene yogisilik lagonem akoni nen, “It wene yoknisalik wagaka eti eberogonat,” yiluk wene diduwagaluk, ninewe Endaganggok inom mondok dogolik, it nen elalinat kagakonem, at nen wene eti obatne disike].