Read Upper Grand Valley Dani Lukas 18 Bible Online

Lukas 18 - Upper Grand Valley Dani bible

Lukas 18

¹Esigit diluk yogisasikesik nen, at Yesus agoromi ane waganggo laguka mende yomenogo sembayan yisi dogoluk nen inakla mbuk atluk togot digidek, kunik-kunigat yisi dogowagaluk, wene omanggi oba lisogo men yogisasike,

²“O unggul omanggi, ap nggok mende wene inoba ʼbigik, nggokik, kagarigogo mende omanggi Allah ayuk degat dogolik akoni inalon palinakidegat welagike.

³Esigit diluk werekma, kwe soge mende omanggi o unggul etila welagikeat. Dogolik, at kwe eti kibitngge-yogongge ap etnogo oba mondok wago dogolik, men yogoko lagike, Ap omanggi an nimbisak weyak mende kat nen nirli woknabinok nen yiluk wagi o, yiluk yogosi wako lagike.

⁴Esigit diluk yogosi wagonem, ap nggok etnogo nen alebagik ane kolkidek aʼit kasi lagike mendeat, yabunggane akla ebeko dogolik, An nobabut, Allah nayuk degat dogolik, akoni inalon palinakidegat mendeat,

⁵at kwe soge mende yi, ane noba weyagarogo yoknisi wirigogo yi, awene mbalikidek togot diyamo, noba wago mondok dogolik nakla mep dagik-dagokogo kagako dogunogo yiluk, awene eti mbalisigin, yiluk akla ambasike o,” yiluk Yesus nen yogisasike.

⁶Esigit diluk yogisasikesik nen, at ninewe Endaganggok Yesus nen, omanggi men yogisasike, “Ap eti obabut nggorlo dogolik wene akoni inoba ʼbigik, nggokik, kagarigogo mende yeke eti didini o.

⁷Eti kak, at Allah nen aʼburi mikogo ʼbiyasike mende nen dinggagane kibanggone inane obatnerogo ayonggo ʼbisi kalok, inirli woginabigin dek nogo? Inane nggonko dogoluk nen, yabunggane kalok inirli woginabigin nogo?

⁸Dek o. Ibat-ibat inirli woginabigin o, yiluk eberogonat yokisigi. Esigit diluk kagarinabigin mende, an abat endak lasi wagagi etnogo yabunggane witluk nen, akoni agat oba mende yoma amberek inendainggen noba panggot diluk werekma kiya wisigin a? Dek a,” yiluk yogisasike.

⁹Esigit diluk yogisasikemo, it akoni amberek yomenogo inakla nen, men ambasi laguka, “It akoni taʼbokogonat yoma erlok dek negen mendeat, nit yi ninarligat, ninebe nggok dogolik motogo kagarigogi o,” yiluk ambasi lagukama, at Yesus nen wene oba lisogo men yogisasike,

¹⁰“Ap inebe mbere mende sembayan yuwogoluk, Allah ago palekma unggi laguka. Ap omanggi, Farisi mende. Nen, ap omanggi, pemerintah inake uang nggino yiluk nandorligogo mende.

¹¹Imbisak unggi lagukasik nen, ap Farisi mende etnogo asokne ndiyokogo melasi lagikesik sembayan yisi dogolik, men yisike, Allah nombae o! An nobabut akoni taʼbokogonat inobabut kak dek o. It akoni yugunat ininggi abusak waganigogo mende inom, nggorlo kagarigogo mende inom, kumi yogot kagarinabigogi mende inom, ap pemerintah inake uang nggino yiluk nandorligogi mende yi inom, inobabut eti kak, an esigit diluk mondok dek nogo nen, keyagi watkabigogo o.

¹²An, minggu omanggi paga ninggi mbere paga kimbiri ninggidek kwan ʼbiluk welagik, namende yi mende ndi mende pago dogoligogo mende, taʼbokogonat ninggi wenago, 10 asi wagonem, omanggi kat kake ʼbagagik, kagarigogo o. Nombae yiluk yisike mende,

¹³at ap pemerintah inake uang nggino yiluk nandorligogo mende etnogoat, ebe walegat mendek dogolik urowak wusagik ilenggen mbogot oba liya kigidek ayukogo dogolik, inggi nen endainggen kuselasi dogolik, men yisike, Allah nombae o! An weyak kagarigogo mende yi naʼbuwa niyan o, yiluk yogokike.

¹⁴It sembayan esigit diluk yisuka eti pasik, an wene omanggi yokisak. Ap ta nen endainggen siyat dakalok pogorakasi kalok, Allah nen sebel diligogo o. Nen ap ta nen endainggen sebel dakalok, An erlok dek, akla ambasi kalok, Allah nen siyat diligogo eti paga, at ap sembayan alebagik yisike mende eti Allah nen wene oba mende sagalogo deget digidek togot disike. Mendeat, at ap sembayan yabunggane yisike mende etiat, Allah nen wene oba mende sagalogo deget disikemo aguma lagike, yiluk yokisigi,” yiluk yogisasike.

¹⁵At Yesus nen esigit diluk yogisasikesik werekma, yabunggane akoni nen inaʼburi elege ʼbugurlakndek mende Yesus nen inggi paginabuwagaluk, oba wogisek waguka. Esigit diluk wogisek wagonem, at Yesus agoromi ane waganggo laguka mende yomenogo nen inilenggen iyalok nen wenemuk mberisasuka.

¹⁶Esigit diluk mberisasuka mende, at Yesus nen elege ʼbugurlakndek yomenogo wisuwagaluk waisasikemo wago nggorlek, at ane waganggo laguka mende yomenogo men yogisasike, “Akoni inobabut it elege eti inobabut ndak-ndak kagat lasugun kalok, Allah nen apma ʼbiyaligogoma etoma indewerek asugun eti paga, elege ʼbugurlakndek etoma an noba witnek. Wenemuk mbalko ʼbuk o.

¹⁷Ta nen, elege ʼbugurlakndek mende Allah nen apma ʼbiyaligogo wene waganiluk unggiligogi eti kak unggigidek kalok, unggigin mondok dek o, yiluk eberogonat yokisigi,” yiluk yogisasike.

¹⁸Esigit diluk yogisasikemo, it akoni Yahudi mende inewe nggok omanggi nen Yesus men yogokike, “Newe. Wene yanggul nisasi lagan eti kat pano o. An naberlal-kaberlal inde asik nen, na nobabut ninggit diluk kagako dogusak,” yiluk yogokikemo,

¹⁹at Yesus nen, men yogokike, “Kat pano, yiluk yokneken eti ninggit diluk nen yokneken. At omanggi pano dek o. At Allah arligat pano o.

²⁰Wene Allah nen, Yigit diluk kagatno, ndigit diluk kagatno, yiluk ninasuk wako dogolik, men yisikemo werek, Kumi yogot paʼbiyausak dek o. Akoni inasusak dek o. Kininggi abusak waganusak dek o. Kinenggalat inabok mbalusak dek o. Kinagoya kinombae inalon palinako dogusak o, yiluk ninasuk wakike etnogo kat kiluat o,” yiluk yogokikemo,

²¹at ap etnogo nen, men yogokike, “Wene yokneken eti taʼbokogonat, an nebe elege paga nenat nasuk kologo motogo kagarigogo mendeat o,” yiluk yogokikemo,

²²at Yesus asuk kolkikesik, men yogokike, “Wene omanggiat inom kagasusak mende, kagakidek welagan o. Kat kamende etoma taʼbokogonat it amberek inoba onggo wagani lano. Woʼbiluk onggo wokisugun mende uang eti it akoni inamende dek ininggi dek mende eti mondok sumburisa lan o. Esigit diluk arat kagaken kalok, kat mbogot oba mende nggogat indewerek asigin o. Esigit diluk arat sumbusogo wogisalok nen, an nomborlik noko dogonok nen yiluk witno,” yiluk yogokikemo,

²³at ap etnogo asuk kolkikesik nen, amende mondok dogalegat etnogo nen, akla mondok weyak agike.

²⁴Akla esigit diluk mondok weyak agikemo, at Yesus nen ilenggen enggagat didiluk nen, agoromi men yogisasike, “Iya. Nayuk a. Akoni inamende dogalegat mende Allah nen apma ʼbiyaligogoma etoma ninggit diluk ungguʼbugat o.

²⁵Wam unta nggok muluk mende eti disu elo perlelekma nggola ʼbumo erlok lelokogo unggusak mende, it akoni inamende dogalegat mende Allah nen apma ʼbiyaligogoma etoma unggusak mondok erlok dek o,” yiluk ygoisasike.

²⁶Esigit diluk yogisasikemo, it yomenogo inasuk kolkukasik at Yesus men yogokuka, “Eti paga, Allah nen akoni sani kak erlok ndilinabusak,” yiluk yogokukama

²⁷at Yesus nen, men yogisasike, “Akoni nen kagasusak mondok erlok dek mende, at Allah nen kagasusak erlogat o,” yiluk yogisasike.

²⁸Esigit diluk yogisasikemo, at Petrus nen, men yogokike, “Mende, nit kat komborlik noko doguwogoluk ninamende yi mende ndi mende togot diyalok wagosik noko lago mende yiat, ninggirlik,” yiluk yogokikemo,

²⁹at Yesus nen, men yisike, “At ta nen Allah apma dogigiluk ago palek inom, age inom, ewe agot inom, agoya ombae inom, aʼburi inom, togot diyalok wago kalok, o yogondak ya dogolik obalikmo mondok dogalegat oba dukogo wogosigin o. Nen, o yabunggane kagat lasigin etnogo dogolik, naberlal-kaberlal wogosiginat o, yiluk eberogonat yokisigi,” yiluk yogisasike.

³⁰

³¹At Yesus nen esigit diluk yogisasikesik nen, agoromi inebe 12 paga yomenogo wogisek, inasokne mbontogo lagikesik men yogisasike, “Nagoromi. Nit yogondak o Yerusalem wusa lago. Nen, arat wusa lalokma nen, it ap alep Allah wene yogisasi laguka mende yomenogo nen, an abat endak lasi wagagi etnogo yabunggane kagat nabugun mende kolal mbalogo ʼbisuka mende ndak-ndagat kagat nabugun o.

³²Nebe nasuwagaluk, yonggo lalok it akoni sikmangge mende ininggi paga ʼbanugun o. ʼBanumo, inane aik dagok yoknikik, wosi ʼbanggik,

³³ndugi laʼbisok nakik, kagatluk nebe mondok nasugun o. Nasugun mende, ninggi mbere warek dogoluk nen, ninggi omanggi paga, niluk asigin o,” yiluk,

³⁴esigit diluk ʼbukakogo yogisasike mendeat, limago mende yisi salek, at agoromi yomenogo ninggit diluk mende pasik yeke yiluk inonggodek welaguka.

³⁵At Yesus o Yeriko unggi lagaluk korokogo lagike kak, ap omanggi ilenggen mbuk dogolik ambe nggino weyak yisi lagike mende kolagarlem eranogo korek werekma,

³⁶akoni inane dogalegat yilik lagonem asuk kolkikesik nen, men yogisasike, “Inane etoma, nena mende kalok yilik wirigogi,” yiluk kinok waganggike.

³⁷Kinok waganggikemo, it akoni nen, men yogokuka, “Dek o. Yesus ago Nazaret mende etnogo kolak yingge wago agama yiligogi,” yiluk yogokukama,

³⁸ap etnogo nen ane nggokogo yisi dogolik, Yesus men yogokike, “Yesus Daud nen endago mende newe o! Naʼbuwa niyan o,” yiluk yogokikemo,

³⁹it akoni alebagik laguka mende yomenogo nen, “Kane!” yiluk mberekuka mende, yabunggane mondok ane nggokogo men yogokike, “Daud nen endago mende newe o! Naʼbuwa niyan o,” yiluk yogokikemo

⁴⁰at Yesus puk agikesik nen, akoni yomenogo men yogisasike, “Ap eti wolok witni o,” yiluk yogisasikemo, ebe Yesus eragalilu ʼbi wagukama, at nen kinok waganggo dogolik,

⁴¹“An nen ninggit diluk kagat kabuwagaluk yokneken,” yiluk yogokikemo, at ap etnogo nen, men yogokike. “Newe o. Nilenggen weyak yi pano kagat nabinok nen yiluk yokigi o,” yiluk yogokikemo,

⁴²at Yesus nen, men yogokike, “Kilenggen mbuk eti pano asin o. Kat kendainggen noba panggot degen eti pagaat pano agan o,”

⁴³yiluk yogoko nggorlek eranogoat, ilenggen mbuk mende etnogo pano agikesik, Yesus omborlik lago dogolik, Allah pogorarik lagike. Nen, it akoni taʼbokogonat yomenogo Yesus nen kagakike mende eti inilenggen kasukasik nen, Allah pogorakukaat.