Read Upper Grand Valley Dani Yohanes 3 Bible Online

Yohanes 3 - Upper Grand Valley Dani bible

Yohanes 3

¹It akoni Yahudi mende inewe nggok ap Farisi mende inawene pago welagike mende omanggi endaga Nikodemus welagike.

²Nen, ap eti o kibanggo ininggi omanggi paga Yesus oba wagikesik nen, men yogokike, “Newe. Ap omanggi Allah imbisak kunik dek kalok, kat nen elalin mende kagarik noko lagan eti kak, kagasusak mondok erlok dek o. Eti paga, kat nen wene yanggul nisawagaluk Allah nen laʼbagi wagama wagan yiluk ninilu aga,” yiluk yogokike.

³Esigit diluk yogokikemo, at Yesus nen, men yogokike, “Akoni Allah nen inebe yabunggane suguluk ngget endaginakidek kalok, at apma ʼbiyaligogoma etoma inilenggen kugun mondok dek o, yiluk, nane eberogonat yokirigogo o,” yiluk yogokikemo,

⁴at Nikodemus nen, men yisike, “A! Akoni inarluwe paga nen yabunggane ninggit diluk endaginabusak ambegen? Inagoya lak inakla unggiluk nen yabunggane erlok endaginabusak a? Erlok dek o,” yiluk yogokikemo,

⁵at Yesus nen, men yisike, “Akoni i paga inom, Allah Agurengge paga inom, endaginakidek kalok, Allah nen apma ʼbiyaligogoma etoma unggugun mondok dek o, yiluk, nane eberogonat yokirigogo o.

⁶Nen, akoni nen endaginabigogi eti akoniat endak larigogi o. Nen, Allah Agurengge nen endaginabigogo eti Allah Agurengge mendeat ngget endak larigogi o.

⁷Kit kinebe dombok yabunggane suguluk ngget endak lasusak, yiluk yokigi eti paga, Iya. Nayuk o, yiluk, kakla ebekup o.

⁸Kwiyakne eti abusagat yugunat pul kasinem, aneat kasuk koligogon mende, ebe wirigogo kolak nggoma nen salek wirigogo. Nen, liligogo kolak nggomangge salegat. Kat konggodek o. Eti kak, akoni Allah Agurengge nen endaginabigogo eti inebe dombok esigit dilugat endaginabigogo o,” yiluk yogokike.

⁹Esigit diluk yogokikemo, at Nikodemus nen, men yogokike, “Wene yegen eti ninggit diluk kagarinabusak paga yegen,” yiluk kinok waganggikemo,

¹⁰at Yesus nen, men yogokike, “Newe. Kat kebe, akoni Yahudi mende wene yanggul isaligogo mende, an nen wene yokigi eti didigidek werek a? E a.

¹¹Nit nen wene ninilu mendeat yokisigik, ninilenggen kogo mendeat ʼbukakogo yokisigik, yisi lago mende, ninane yisi kolkidek kinobakanini kagako lagap yiluk, nane eberogonat yokirigogo o.

¹²An nen wene agat oba mende pasik yokisasinem, kit nen eberogonat yiluk didiligogi dek kalok, an nen wene mbogot oba mende pasik yokisamo yabunggane ninggit diluk nen wene eti eberogonat yiluk didugun ambegep. Didugun mondok dek o,” yiluk yogokike.

¹³Esigit diluk yogokikesik nen, men yogokike, “Ap omanggi agat oba nen mbogot oba mondok dagagidek. An mbogot oba nen abat endak lasi wusa wagagi etnogoat o.

¹⁴“Nen, ap Musa o limo akoni dekma etoma dogolik, warlo negen kagarogo o paga liyaʼbisike eti kak, it akoni yoma inendainggen an abat endak lasi wagagi mende yi noba panggot dugun mende, inebe dombogat iniluk mondok dogowagaluk, an esigit dilugat liyaʼbanusak obaat liyaʼbanugunat o.

¹⁶Allah nen yi akoni ndi akoni taʼbokogonat inaʼbuwa mondok nggok ambasikesikmo, inebe inendainggen an noba panggot dugun mende inebe dombok watlatluk nen, nuk agidek iniluk mondok dogowagaluk, at Aʼbut an nebe omanggiat endago mende wogisasike.

¹⁷Nen, an Allah Aʼbut agat oba yoma laʼbani wagike eti yi akoni ndi akoni wene inoba ʼbiluk weyagarinabuwagaluk laʼbani wagike ʼbuk. Mende, inebe ndil inabuwagaluk laʼbani wagike o.

¹⁸Eti paga, ta nen endainggen an noba panggot disi kalok, Allah nen wene oba ʼbiluk weyagat digin dek mende, ta nen endainggen an Allah Aʼbut omanggiat endago mende yi noba panggot digidek eti nenat, weyagat digin mende wene arat oba ʼbisikemo werek o.

¹⁹Nen, Allah nen wene inoba ʼbiligogo eti ebe yigit diluk. An nen liya kagarinabigogo mende nebe arat agat oba wusa wagagi mende, akoni inobabut weyak kagarigogi eti paga, At liya eti ninaʼit o. At te, o amum etiat warlok, yiluk inakla ambaligogi.

²⁰Nen, it akoni weyak kagarigogi mende inebe dombogat inakla nen ambasi dogolik, Nit liya eti paga lugun kalok, nit weyak kagarigogi mende ʼbuwal atluk winam asunogo, yiluk ambalok, an liya mende yi mondok inaʼit nen, noba wagidek puk arigogi.

²¹Esigit diluk inakla ambaligogi mende, it amberek inobabut motogo kagarigogi mende inebe dombogat, inakla ambasi dogolik, Allah ninom kunik dogolik yigit diluk pano kagako lagoma, yiluk, winam asuwagaluk, an liya mende noba wirigogi o,” yiluk yogisasike.

²²Esigit diluk arat yogisalok nen, yabunggane at Yesus ebe inom, agoromi ane waganggo laguka mende inom, o Yudea wusasukasik, akoni ima wusaginako dogolik ininggi ʼbugurlagat inom welaguka.

²³Esigit diluk kagako werekma, Yohanes inggi kerle warogo o kerle warek ʼbiyiligogoma awan nggolaʼbigidek dogolik, o endaga Ainon o Salim eragalilu etoma i dogalegat werekma akoni ima wusaginabuwagaluk, Yohanes oba wagonem, ima wusa ʼbiyasi lagikeat.

²⁵Esigit diluk ima wusa ʼbiyasi werekma, at Yohanes agoromi ane waganigogi mende inom, it ap Yahudi mende amberek inom, it akoni Yahudi mende nen yi mende ndi mende sobalogo dombok kagarigogoma nogo nen, wene eti pasik wene dogalegat mbalko laguka.

²⁶Wene mbalko lagukasik nen, Yohanes oba lagukasik, men yogokuka, “Ninewe. Ap omanggi kat kimbisak i Yordan aik ilibagangge dogolik, at pasik abok ʼbukakogo yoknisegen mende etnogo nen ima wusa ʼbiyasinem akoni inebe taʼbokogonat at oba wirigogi o,” yiluk yogokuka.

²⁷Esigit diluk yogokukama, at nen, men yogisasike, “Warligi yi. Nagoromi. Ap omanggi Allah nen yogokidekma, at enggaerek akla nen nggagalogo kagasusak erlok dek o.

²⁸Ap eti nen akoni ndil inabuwagaluk Allah nen ayonggo ʼbiluk laʼbi wisigin yisike etnogo, an nebe dek mende, at yabunggane wisigiluk an alebagik laʼbani wagama wagi o, yiluk, yokisasinem kit arat kinasuk kolko lagagip ambigi.

²⁹Nen, ap omanggi age yikasi kalok, kwe eti ebe agun, ap etiat o. Nen, ap age yikagin mende eti agarlak omanggi eragalilu mendek dogolik, at ane yisinem asuk kolek dogolik akla nen arlenggen kiligogo kak, an yogondak esigit dilugat nakla arlenggen nggogat kiligogo o.

³⁰Ap eti endaganggok asusak obaat endaga nggogat agik, an nendaga dek asusak obaat, nendaga dek agik, kagasigin o,” yiluk yogisasike.

³¹Nen, akoni taʼbokogonat, inendaga dek arlek. Mende, at ombo etoma nen wusa ʼbi wagike mende etiat endaganggok o. Ap omanggi ebe agat oba nen endago mende kalok, ebe agat oba mendeatma, wene agat oba mendeat yiligogo o. It akoni taʼbokogonat inendaga dek negen werek nggorlek, ap omanggi mbogot oba nen wusa ʼbi wagike mende etiat endaga nggogat werek o.

³²At ilenggen kasike mende inom, asuk kolkike mende inom, ʼbukakogo yogisasi nggorlegat, it akoni taʼbokogonat nen, at nen wene ʼbukakogo yogisiligogo mende eti inobakanini togot diligogi o.

³³Esigit diluk togot diligogi mende, it akoni amberek nen, At nen wene ʼbukakogo yoknisiligogo eti eberogonat yiluk waganigogi mende nen, Allah wene eti eberogonat yiluk waganigogi o.

³⁴At Allah nen laʼbi wagike mende eti Allah Agurengge kurli yi paga waganin o, yigidek mondogat wogokike eti paga, Allah weneat yoknisiligogo o.

³⁵At ombae nen aʼbut ebe endainggen kunik dogolik, yi mende ndi mende taʼbokogonat at indewerek dogowagaluk wogokike.

³⁶Eti paga, ta nen endainggen Allah aʼbut oba panggot diligogo kalok, iniluk dogogun mende eti inde agasik werek o. Mende, ta nen, at aʼbut eti ane kolkidek obakanini togot diligogo kalok, iniluk mondok dogogun mende eti inde asigin dek o. At Allah akla agaga at oba mondok ʼbiluk dogogin o.