Read Upper Grand Valley Dani Yohanes 6 Bible Online

Yohanes 6 - Upper Grand Valley Dani bible

Yohanes 6

¹Esigit diluk yogisasi lagikesik yabunggane, at Yesus i yenggelek Galilea, endaga omanggi Tiberias yiligogi eti aik ilibagangge wundalkike.

²I aik ilibagangge wundalkonem, alebat akoni inoba u warek mende elalinat kagarinakonem inilenggen kasukasikmo nogo nen, akoni inebe dogalegat dogal diluk, at omborlik laguka.

³Omborlik lago nggorlek, at Yesus agoromi ane waganggo laguka mende yomenogo inomat dukisukasik, ndom unggul oba dagasukasik korek laguka.

⁴Nen, eta mot-mot, it akoni Yahudi mende nen, “Allah nen ndil ninakike,” yiluk inakla eberogo pesta endaga Paskah niligogi etnogo nausak paga arat panggok yi wagike.

⁵Esigit diluk korek lagukasik, at Yesus ilenggen eragalilungge lagiyasike kak, akoni dogalegat nandorli wagonem ilenggen lagiyalok, Filipus men yogokike, “Filipus. Akoni dogalegat etoma kimbiri nowak nen, o nggoma mende onggo mbalisa luwok,” yiluk yogokike.

⁶Esigit diluk yogokike eti at Yesus nen kagasigin mende ilu dogoligat, at Filipus aren mbaligiluk yogokike.

⁷Esigit diluk yogosigin ambasike, at Filipus nen, men yogokike. “Akoni nen yabu ininggi omanggi pasik kagakonem ininggi onggo uang perak wogisiligogi eti mende nit nen 200 paga kimbiri roti mende onggo mbalisa lamo, akoni yoma, ʼbugurlak ʼbugurlak enggen wagan kigik erlok nausak a? Erlok dek o,” yiluk yisikemo

⁸at Yesus nen agoromi ane waganggo laguka mende omanggi endaga Andreas, Simon Petrus etnogo agot nen, men yogokike,

⁹“Newe. Yoma elege omanggi kimbiri roti jelai werago mende 5 paga, nen ikan mbere mende inom pago werek mende, akoni mondok dogalegat yigirlikmo erlok nausak a? Erlok dek o,” yiluk yogokikemo

¹⁰at Yesus nen agoromi yomenogo men yogisasike, “Nagoromi. Akoni etoma korek lasuwak nen, yogisani o,” yiluk yisikemo, ndundu erlo kunik dogalegat ndalek werekma korek larik lagukama, akoni inebe dogalegat mende, ap arlek inebe 5.000 paga ininggi wenakuka.

¹¹Esigit diluk korek larik lagukama, at Yesus nen kimbiri roti mende eranogo inggimo waganggikesik nen, “Allah nombae,” yiluk keyagi warogo, akoni dogalegat korek laguka mende yomenogo sumburisalok, ikan eranogo esigit dilugat sumburisasike. Sumburisasikemo, it inakla nen, nau ambasuka kagat, kimbiri inaʼit togo nasuka.

¹²Kimbiri inaʼitogo nasukama, at agoromi ane waganggo laguka mende yomenogo men yogisasike, “Kimbiri nenggasik ilugun ndindurogo ʼbega mende etoma mbo laʼbisinem yiluk, nandorlogo omanggimo ʼbini o,” yiluk yogisasikemo,

¹³kimbiri roti jelai mende werago 5 paga yomenogo nasukasik nen, ndindurogo ʼbisuka mende mul yago 12 mende ambem kerokigik yukarlogo ʼbisuka.

¹⁴Esigit diluk yukarlogo ʼbisukama, at Yesus nen ebe diduwagaluk elalin kagakike mende eti it akoni inilenggen kasukasikmo nogo paga, men yisuka, “Ap omanggi nen Allah wene agat oba yoma yoknisa wisigin yisuka etnogo eberogonat, ebe yiat o,” yiluk yisuka.

¹⁵Esigit diluk yisukama, at Yesus akla nen, “It eti witluk, an it inewe nggok dogowagaluk inane inobatnerogo mendanugun kigi,” yiluk inaren enggagat iyasikesik nen, o etoma togot diyalok ndom oba arligat dagasike.

¹⁶At Yesus ebe arligat dagasikesik, agoromi ane waganggo laguka mende yomenogo inoba wagidek awan werek nggorlek, o arat ki agikemo, it i yenggelek etnogo aik oba wusa wagukasik nen, nggu paga unggisukasik, warogo o Kapernaum wundaluwogoluk waguka.

¹⁷

¹⁸Wundali wagonem, kwiyakne aninirogo pulka wagike eti paga, i kokdabu nggok wagike.

¹⁹I kokdabu nggogat wako nggorlek, it yomenogo nggu warik ndurlem kisogo 5 kilometer a, 6 kilometer a, walegat asi laguka kak, at Yesus etnogo i agum pagangge iyok ʼbilik inoba mot-mot korogat wagonem, inilenggen lakalok nen inayuk mondok aguka.

²⁰Inayuk mondok agukama, at Yesus nen, men yogisasike, “Nagoromi, Kinagurakma. An nebeat wirigogo. Kinayuk agup o,” yiluk yogisasikemo,

²¹it inakla arlenggentogo Yesus ebe nggu paga nggola ʼbuwogoluk kagako nggorlek eranogoat, nggu etnogo it nen i aik oba elaat wundalugun o, yiluk inakla ambasukama eranogoat arat wundali waguka.

²²Wundali wagukasik oba nen, noge yiluk kubulukngge, it akoni dogalegat i aik ilibagangge ʼbiyalok waguka mende yomenogo inakla nen, “Iya. Keyam nggu omanggiat welaga mende, at Yesus ebe inom dek. At agoromi ane waganigogi mendeat nggu warogo wundalkonem ninilenggen iyogo,” yiluk inakla ambasuka. Esigit diluk nggu ebe dek kalogat yisuka mende,

²³yabunggane nggu ninat mende amberek akoni o endaga Tiberias mende nen warik, ninewe Endaganggok Yesus nen sembayan Allah keyagi warogo nen kimbiri roti mende sumburisasikemo nasukama eranogo eragalilu wundali wagukasik werekma, inilenggen kasuka.

²⁴Inilenggen kasukasik inakla nen ambasi dogolik, “Yesus ebe inom, agoromi at ane waganigogi mende inom, inebe dek yoma,” yiluk, nggu akla unggiluk, Yesus ebe kweyarik o Kapernaum wundali waguka.

²⁵It akoni yomenogo wundali wagukasik, at Yesus o Kapernaum werekma oba wagukasik nen, men yogokuka, “Ninewe. Kat o yoma ngginem wagan,” yiluk oba kinok wagangguka mende

²⁶at Yesus nen, men yogisasike, “An wene omanggi yokisak. An nebe didanubagik nen yiluk elalinat kagakonem kinilenggen niyegep etnogo nen kweyak nabik wagap ʼbuk. Dek o. Kimbiri roti mende sumbusogo wokisigima kinaʼitogo nenggep etnogo nenat kweyak nabik wagap kiyigi o, yiluk, eberogonat yokisigi.

²⁷Kimbiri pirli atluk dek asusak mende ake yabu kagakup o. At te, kimbiri mondok dogogin mende nonggo dogolik, iniluk mondok dogusak mende eti an nenat wokisasi dogowagaluk, nombae nen nayonggo ʼbiluk laʼbani wagikemo, an abat endak lasi wagagi eti ake yabu kagako dogono o,” yiluk yogisasike.

²⁸Esigit diluk yogisasikemo, it nen at men yogokuka, “Ninewe. Allah akla ambaligogo mende kagako doguwok nen, nit kinobabut ninggit diluk kagako dogogun?” yiluk, oba kinok waganggukama,

²⁹at Yesus nen, men yogisasike, “Allah akla ambaligogo mende kit nen kagasusak eti ebe yiat o. An Allah nen laʼbani wagikemo wagagi mende yi, kinendainggen noba panggot dusak etiat o,” yiluk yogisasikemo,

³⁰it nen men yogokuka, “Kebe didaguwogoluk, elalin mende omanggi kagakonem ninilenggen kiyalok, ninendainggen koba panggot duwok nen, ebe nggi mende kagasigin. Omanggi ninggit diluk kagasigin.

³¹Nit ninakomba lak o limo akoni dekma dogolik, kimbiri nau kak, endaga manna mende nasi laguka yiluk, Allah wene kolal men yiluk mbalek werek, It inambiri nasi dogowagaluk, at nen mbogot oba nen wusabi wago lagike, [4] yiluk kolal mbalek werek kagat, nasi laguka,” yiluk yogokuka.

³²Esigit diluk yogokukama, at Yesus nen, men yogisasike, “An nen wene eberogonat mende omanggi yokisak. Kimbiri mbogot oba nen wusakisa wago lagike eti, at Musa nen ʼbuk. Dek o. At te, kimbiri ebe mende eti nombae nen an nebe akoni agat oba mende inilugurinabigogo mende mbogot oba nen wusa wagagi etiat wokisaligogo o,” yiluk yogisasike.

³³

³⁴Esigit diluk yogisasikemo, it nen, men yogokuka, “Ninewe. Kimbiri eti mende woknisasi mondok dogono o,” yiluk yogokukama,

³⁵at Yesus nen, men yogisasike, “Kimbiri inilugurinabigogo mende eti an nebeat o. Ap ta nen noba wagik, endainggen noba panggot digik, kagasigin kalok, kimbiri abu agik, i abu agik, kagako dogogin dek o.

³⁶Mende, an nen wene alebat yokisigi kagat, kinilenggen niyiligogi mende, kinendainggen noba panggot dusak kinaʼit o.

³⁷Mende, an mbogot oba nen wusa wagagi eti an nenggaerek nakla nen nggagalogo kagasigiluk wusa wagagi ʼbuk. At laʼbani wagike mende akla ambaligogo mende etiat motogo kagasigiluk wusa wagagi eti paga, akoni an nombae nen woknirigogo mende inebe dombok noba wagonem, an nen, Kit an noba wisusak dek, yiluk, mberisagin mondok dek o.

³⁸

³⁹Nen, at akla ambaligogo mende an nen kagasuwagaluk laʼbani wagike eti ebe yi, At nen akoni an woknirigogo mende taʼbokogonat omanggiat nal digidegat, o ilugun kurli paga, an nenat inilugurinabuwagaluk,

⁴⁰nombae akla ambaligogo o. Nen, nombae esigit diluk akla ambasi dogolik, akoni nen Allah aʼbut nebe yi inilenggen niyigik, inendainggen noba panggot digik, kagako kalok, inebe dombok iniluk mondok dogowagaluk, o ilugun kurli paga, an nen inilugurinabuwagaluk akla ambaligogo o,” yiluk yogisasike.

⁴¹Nen, at Yesus nen esigit diluk yogisasi dogolik, “Kimbiri roti mbogot oba mende eti an nebeat wusa wagagi o,” yiluk yogisasike eti paga, it ap Yahudi mende nen, at abok nggurli-nggurli mbalko dogolik,

⁴²“At yi endaga Yesus, ap Yusuf aʼbut. Nen, at ombae agoya ninilu mendeat, at nen yisi dogolik, An nebe mbogot oba nen wusa wagagi, yiluk yeke eti ninggit diluk nen yiligogo ambegep,” yiluk yisukama,

⁴³at Yesus nen, “Kit-kit nabok nggurli-nggurli mbaligogi eti mbalko ʼbuk o.

⁴⁴An nombae laʼbani wagike mende etnogo nen, akoni lit-lit an noba wogisek wagidek kalok, noba wisusak erlok dek o. At nen, it amberek lit-lit wogisek wagonem noba wisugun kalok, o ilugun kurli paga, an nen inilugurinabiginat o.

⁴⁵Wene eti ake it ap Allah wene yogisasi laguka mende yomenogo nen kolal mbalogo ʼbisi dogolik men yisuka, It akoni taʼbokogonat Allah nenat wene yanggul isagin o, [5] yiluk, kolal mbalogo ʼbisuka eti kagat, akoni an nombae ane inasuk kol diluk, at nen yanggul isasinem yanggulko kalok, inebe dombok an noba wirigogi o.

⁴⁶Wene yokisigi yi, it akoni omanggiat nen, an nombae eti inilenggen kasuka yiluk yokisigi ʼbuk. Dek o. At te, an narligat Allah werekma nen wagagi mende yiat, nombae nilenggen kasigi o.

⁴⁷Ap ta nen endainggen an noba panggot disi kalok, iniluk mondok dogoligogo mende indewerek agasik werek o, yiluk, eberogonat yokisigi o,” yiluk yogisasikesik nen,

⁴⁸wene omanggi men yogisasike, “Kimbiri inilugurinabigogo mende eti an nebeat o.

⁴⁹Kit kinakombalak o limo akoni dekma dogolik kimbiri nau kak, manna eti mende nasi laguka mende, inebe watlarik wagukaat.

⁵⁰Esigit diluk watlarik waguka mende, kimbiri ebe mende mbogot oba nen wusa ʼbi wagike o. Esigit diluk wusa ʼbi wagikesikmo, ta nen kimbiri eti mende nasi kalok, at ebe watlagidek iluk mondok dogogin o.

⁵¹Kimbiri inilugurinabigogo mende mbogot oba nen wusa ʼbi wagike eti, an nebeat o. Kimbiri an nen wokisagin mende eti ta nen nasi kalok, at ebe iluk mondok dogogin o. Akoni agat oba mende iniluk dogowagaluk an nebe it inake watlasigin eti an nebeat wogisagin o,” yiluk yogisasike.

⁵²Esigit diluk yogisasikemo, it ap Yahudi mende yomenogo nen, it-it wene mbalko dogolik, wene men yisuka, “Warligi yi. Ap yi ebe mende nit nowagaluk ninggit diluk woknisagaluk nen yokniseke ambegep,” yiluk yisukama,

⁵³at Yesus nen, “An nen wene omanggi yokisak o. An abat endak lasi wagagi etnogo nebe ninggik, namep ninggik, kagakidek kalok, iniluk mondok dogoligogo mende, kit inde agidek werek o, yiluk eberogonat yokisigi.

⁵⁴Mende, ta nen an nebe ninggik, namep ninggik, kagarigogo kalok, iniluk mondok dogogun mende inde atluk werekma, o ilugun kurli paga an nen ilugut digin o.

⁵⁵An nebe inom, namep inom, eti, kinambiri kinagi ebe mendeat o.

⁵⁶Ta nen an nebe ninggik, namep ninggik, kagarigogo kalok, at nen an nimbisak kunigat, nen, an nen, at nimbisak kunigat, dogogun o.

⁵⁷An nombae iluk mondok dogoligogo mende nen laʼbani wagikemo wagagi etnogo, at iluk werek eti paga an niluk dogoligogo kak, ta nen, an nebe nasi kalok, an niluk werek eti paga, at ilugat dogogin o.

⁵⁸Nen, kimbiri mbogot oba nen wusa ʼbi wagike mende yi, kit kinakombalak nasi laguka mende inebe watlago laguka eti negen dek mende, ap ta nen kimbiri ebe mende yi nasi kalok, iluk mondok dogogin o,” yiluk yogisasike.

⁵⁹Wene Yesus nen esigit diluk yogisasike eti at ebe o Kapernaum o akoni Yahudi mende sembayan yiligogoma wene yanggul isasi dogolik yogisasike.

⁶⁰At Yesus nen wene esigit diluk yogisasikemo, it at agoromi ane waganggo laguka mende yomenogo amberek inebe dogalegat wene eti inasuk kolkukasik nen, men yisuka, “Wene yeke eti, anggin werekma, ta kak nen waganigin ambegep? Erlok dek o,” yiluk yisuka.

⁶¹Esigit diluk at ebe yogokidek yisuka mende, at Yesus nen, “Wene yigi etnogo pasik nagoromi nen uwa mbalogo wene mbaligogi kigi,” yiluk inaren enggagat mbalkikesik nen, men yogisasike, “Wene yokisigi mende yi paga, At ninaʼit, yiluk nggolelogo togot danuwogoluk kagarigogi a?

⁶²An abat endak lasi wagagi etnogo alebat welagigimo yabunggane niyogoba dagisinem kinilenggen niyalok nen, kinakla ninggit diluk ambagun.

⁶³Allah Agurengge nen akoni inilugurinabigogo o. Nen, akoni agat oba mende inobatne paga omanggiat kagasusak erlok dek o. Mende, wene an nen yokisaligogo eti Allah Agurengge nenat kagarigogo mende nogo nen, akoni inilugurinabigogo wene yokisaligogo o.

⁶⁴Wene eti paga inilugurinabigogo mende ogwe, kit pelakngge yoma eberogonat yiluk kinendainggen an noba panggot digidek werek kigi,” yiluk yogisasike. Esigit diluk yogisasike eti, it amberek inendainggen at oba panggot digidek mende inom, at omanggi nen Yesus ebe wasuwagaluk yonggo ligin mende inom, it ap eti esigit diluk kagasugun, yiluk at nggeranem nenat ilu welagikesikmo nogo nen, wene esigit diluk yogisasike.

⁶⁵Esigit diluk yogisasikesik nen, wene omanggi men yogisasike, “Esigit diluk yiluk, an nen, Akoni Allah nen inakla nggagalkidek kalok, an noba wisusak erlok dek eti paga, wene esigit diluk yokisigi o,” yiluk yogisasike.

⁶⁶Wene esigit diluk yogisasi lagikemo, it akoni at ane kolek welaguka mende yomenogo nen, inebe dogalegat Yesus ebe togot diyalok dukisukasik nen, yabunggane omborlik noko doguwogoluk, oba wagidek puk asi waguka.

⁶⁷Akoni amberek esigit diluk omborlik lagidek puk agukama, at Yesus nen agoromi 12 yomenogo men yogisasike, “Kit, esigit dilugat togot daniluk dukuwogoluk ambaligogi a?” yiluk yogisasike.

⁶⁸Esigit diluk yogisasikemo, at Simon Petrus etnogo nen, men yogokike, “Iya. Newe. Ninebe niniluk mondok dogusak mende wene, kat nen yoknisiligogon kak yoma re. Kat togot dagaluk ap ta oba lausak ambegen? Dek o.

⁶⁹Nit nen, ninewe kat Allah enggaerek ake mendagaluk eberogonat at nen laʼbagi wagikemo yiluk, didagogosik ninendainggen kat koba panggot diluk werek,” yiluk esigit diluk yogokikemo,

⁷⁰at Yesus nen men yogisasike, “An nen kit kinebe 12 paga yi mikinakigi dek nogo? An nenat mikinakigi mendeat, kat omanggi Iblis mendeat werek o,” yiluk yogisasike.

⁷¹Wene esigit diluk yisike eti ap Simon Iskariot aʼbut endaga Yudas pasigat yisike. At ap eti ebe Yesus agoromi inebe 12 yomenogo mende, yabunggane Yesus ebe wasuwagaluk yonggo lagike eti mende pasik yisike o.