Read Upper Grand Valley Dani Roma 10 Bible Online

Roma 10 - Upper Grand Valley Dani bible

Roma 10

¹Nagarlagi nirugi o. Allah nen it nagarlagi inom nirugi inom ninunggulowak endaga omanggiat mende eti, ndil inabilep a, yiluk nakla nen wene munini ebekik, Allah ayonggo ʼbigik, kagarigogo o.

²It nen Allah ake inobatnerogo kagarigogi mendeat ogwe, inobabut nilu. Eberogonat kagasusak mende inilu dogolik kagarigogi ʼbuk.

³It Allah nen wene inoba mende nggorogo ʼbiluk yabunggane suguluk inom kunogo ʼbiyawagaluk, at apma unggiluk dogolik kagasusak mende inonggodek nen kagakidek welaguka. Mende, inenggaerek inakla nen ambalok inobatnerogo kagako laguka o.

⁴At Kristus ebe agat oba wusa wagike eti paga, wene Allah nen ninasuk wakike wene etnogo ebeat agike o. Akoni inendainggen at Kristus oba panggot diligogi mende inebe dombok, wene inoba mende nggorogo ʼbiluk, yabunggane suguluk Allah inom kunogo ʼbiyiligogo.

⁵At Musa nen wene Allah nen ninasuk wakike wene etnogo paga, Allah nen wene ninoba mende nggorogo ʼbiluk yabunggane suguluk at ninom kunogo ʼbinanigogo eti ake men yisike, “Akoni wene eti kologo kagako dogolik, mot-mot kagako dogogun mende inebe dombok, wene eti paga iniluk mondok dogogun o,” [29] yiluk kolal mbalogo ʼbisike.

⁶Esigit diluk mende, akoni inendainggen Allah oba panggot disinem, at nen wene inoba mende nggorogo ʼbiluk yabunggane suguluk at inom kunogo ʼbiyiligogo eti ake, Allah wene paga kolal yigit diluk mbalogo ʼbisuka, “Kakla nen, Mbogot oba ta dagagin, yiluk ambagup o,” yiluk yisike eti ebe, Kristus ebe wolok wusa ʼbi wisuwagaluk yusak dek yiluk yisike o.

⁷Nen, “Wema paga ta wusagin, yiluk ambagup o,” yisike eti ebe, Kristus watlagikesikmo nit nen ilugut diluk wolok dagi wisuwagaluk yusak dek yiluk yisike o.

⁸Eti paga, wene eti men ambalok yisike, “Allah wene eti ebe korogat werek o. Eti kambe paga inom, kendainggenma inom werek o,” [30] yiluk yisike eti, akoni nen inendainggen Allah oba panggot dusak wene nit nen yogisiligogi eti pasigat yisike o.

⁹Kambe paga nen, “Ninewe Endaganggok Yesus at o,” yiluk ʼbukakogo yigik, nen, kakla nen, “Yesus ebe watlagikesikmo, Allah nen ilugut disikemo werek o,” yiluk eberogonat ambigik, kagasumo, ndil kabiginat o.

¹⁰Akoni inendainggen Allah oba panggot disinem, at nen wene inoba mende nggorogo ʼbiluk, yabunggane suguluk at inom kunogo ʼbiyiligogo. Nen, inambe paga nen, at abok ʼbukakogo yisinem nen, ndil inabigogo o.

¹¹Allah wene paga kolal mbalogo ʼbisi dogolik men yisuka, “Akoni inendainggen at oba panggot dugun mende inenggarli kugun mondok dek o,” [31] yiluk kolal mbalogo ʼbisuka.

¹²It akoni Yahudi mende ninat, nen, akoni sikmangge mende ninat, yusak dek. Nit taʼbokogonat ninombae Endaganggok, Allah omanggiat o. Nen, at nen wogisawagaluk ayonggo ʼbiligogi mende inebe taʼbokogonat nggokogonat wogisiligogo o.

¹³At nen yisi dogolik, “It amberek nen an kinombae Nendaganggok Allah nendaga mbaligogi mende, taʼbokogonat ndil inabigin o,” [32] yiluk yisikemo kolal mbalogo ʼbisuka.

¹⁴Allah nen wene omanggi men yisike, “Akoni pano wene wolok yogisa liligogi mende eti, pano mondok o,” [33] yiluk yisikemo kolal mbalogo ʼbisukama werek mende, pano wene eti wolok lowagaluk inayonggo ʼbiluk laʼbiyigidek kalok, ninggit diluk nen yogisa lausak. Nen, it amberek nen wene ebe yogisa lagidek werek nggorlek, at abok ninggit diluk inasuk kolusak. Nen, at abok kolkidek dogolik, ninggit diluk inendainggen at oba panggot dusak. Akoni inendainggen at oba panggot digidek dogolik, endaga ninggit diluk mbalusak.

¹⁶Mende, akoni inebe taʼbokogonat pano wene etiat waganusak mende, it amberek waganggidek werek o. At Yesaya nen, Allah men yogokike, “Ninombae. Nit wene yogisasinem, ta nen wene eti dideke. Didigidek mondok werek o,” [34] yiluk yogokike.

¹⁷Mende, pano wene eti, Kristus abok yogisa lagonemat inasuk koligogi o. Nen, wene inasuk kol diluk nen, inendainggen at oba panggot diligogi o.

¹⁸Mende, an nen kinok omanggi waganusak. It, pano wene eti inasuk kolkidek werek a? Dek o. Inasuk arat kolka. Allah wene paga, “It inane eti o yi ai ndi ai taʼbokogonat wika lagikesikmo, o ilugun ilugun eloma taʼbokogonat inasuk kolkuka o,” [35] yiluk yisikemo kolal mbalek werek eti paga yigi o.

¹⁹Kinok omanggi waganigat. It akoni Israel mende pano wene eti inonggodek a? Iniluat o. Nggeranemat, at Allah nen wene yisikemo, Musa nen men yogisasike, “An nen, it akoni amberek an naʼburi mende ʼbuk. Akoni werlek mende an nen inayonggo ʼbumo, kit nen uwa mbalubagik nen yiluk kagat kinakik, it inendainggen dek mende inayonggo ʼbumo, kit kinakla agaga daguwak nen yiluk kagat kinakik, kagasigin o,” [36] yiluk yogisasike.

²⁰Nen, yabunggane Allah nen, wene omanggi men yisike, “Akoni nen nebe kweyak nabigogi dek mende nen, kweyak naka o. Nen, akoni an noba nendema waganggidek mende nen, nebe niyawagaluk nenggaerek nen inelokoma winam agi o,” [37] yiluk yisikemo, Yesaya nen ayuk mondok degat yogisasike.

²¹Nen, Allah nen akoni Israel mende men yogisasike, “An kubengge inom, dinggagane inom, keyamnggengge inom, akoni yoma woginabigiluk ninggi lantogo mondogat werek mende, inasuk koluʼbuk inasingganok weyak werek o,” [38] yiluk yogisasikemo, Yesaya nen yogisasikeat o.