Read Upper Grand Valley Dani 1Korintus 16 Bible Online

1Korintus 16 - Upper Grand Valley Dani bible

1Korintus 16

¹Yogondak kit nen uang nandorlogo kinagarlagi kinirugi Allah aʼburi amberek ʼbiyawogoluk yegep eti, wene it Allah aʼburi o Galatia mende yanggul isigi eti kak kagatno o.

²An nebe wagonem nen nandorlusak dek o. Ya pagaat hari Minggu paga kibitngge-yogongge kagako dogolik, kinebe dombok kininggimo ago kalok, nandorlogo ʼbiyalok pago dogono o.

³ʼBiyalok nen, ap wolok lugun mende kit nen, “It erlok,” yiluk ambegep mende kalok inayonggo ʼbino. Esigit diluk inayonggo ʼbiluk werekma, an nebe witluk nen, kit nen ʼbiyegep mende eti wolok lowak nen, surat o Yerusalem laʼbigin o.

⁴Mende, an nebe lausak pano ago kalok, an ninomat lugun o.

⁵An o Makedonia ligin yiluk nakla ambigirikmo, etoma lalok ya paklagik arat lalok nen, kit kinoba wisigin o.

⁶Kinoba witluk nen, an kit ninom ninggi mbereat dogoluk nen a? O weyak werek nggorlek ninggi amberek inomat dogoluk nen a, kit nen o an ligin ambaligogoma etoma laʼbanubagik nen yiluk yokisigi o.

⁷An esigit diluk o werlekmangge lagaluk lago dogolik ninggi omanggi pasik ninom dogusak, naʼit. Ninewe Endaganggok nen pano yisi kalok, an ninggi amberek inom ninom dogogun o, yiluk nakla ambaligogo.

⁸Wisik nen, o Efesus yoma akoni, “Wene ninaʼit,” yiluk wenemuk mbaligogi mende inebe dogalegat werek mende, an nen it amberek yogisasinem wene waganusak mende dogalegat werek eti paga, yoma dogoluk hari Pentakosta arat kagat diluk nen wisigin o.

¹⁰At Timotius eti, an nen ninewe Endaganggok ake kagarigogo kak kagarigogo mende kit kinoba wisigin eti, ebe wago kalok, kit kinom ayuk dekogo dogowak nen, ebe panorogo waganino o.

¹¹At wagonem it akoni amberek nen, “At ebe erlok dek,” yiluk inakla kai dusak mondok dek o. At iyogoba noba wago dogolik, ninagarlagi ninirugi amberek yomenogo inom ʼbitniya wisuwagaluk inanggorlek werek eti paga, at kolak oba panorogo yamakasi dogono o.

¹²Ninagarlak Apolos etnogo nen, it ninagarlagi ninirugi amberek yomenogo wogisek kinoba wisuwagaluk, alep-yabungga akla nggagalko lagi mende, at yogondak ya wisusak yiluk akla ambiligogo dek o. Mende, yabunggane wisusak ambasi kalok wisiginat o.

¹³Kinobabut kwalogo dogolik, kinendainggen Allah oba panggot diluk, mendegat dogono o. Kinobabut abat dogolik, kinobatnerogo dogono o.

¹⁴Kit yi mende ndi mende kagasuwogoluk, akoni inebe inaʼbuwarogo kagako dogono o.

¹⁵Nagarlagi nirugi o. Wene omanggi yi kinakla nggagalik. At Stefanus aʼburi inom yomenogo inebe kinilu o. O propinsi Akhaya etoma it ndak Allah aʼburi agukasik nen, it Allah aʼburi amberek yamagiyasi doguwogoluk inendainggen oba nenat yisukasik nen yamagiyiligogi o.

¹⁶It inobabut negen kalok, it amberek it inom inobatnerogo kagako kalok, taʼbokogonat inapma unggiluk inane kologo dogono o.

¹⁷Stefanus inom, Protunatus inom, Akaikus inom, noba wagakasik, kit nen an nake kagako dogu kak, it nen pano kagarigogi eti paga, nakla arlenggen kiligogo o.

¹⁸It wagakama, an nakla pano aga kak, kit kinakla pano asigin o. Eti paga, it akoni amberek inobabut it negen mende kalok, inalon palko dogono.

¹⁹Allah aʼburi o Propinsi Asia etoma ya nda nandorligogi mende yoma nen kit keyagi watkinaka o. Ap Akwila age Priska imbisak, nen, Allah aʼburi it inaguma nandorligogi mende inomat nen, ninewe Endaganggok inom kunik dogolik keyagi mondok dogalegat watkinaka o.

²⁰Nen, ninagarlagi ninirugi o yoma mende taʼbokogonat nen keyagi watkinakaat o. “Nit taʼbokogonat ninebe Allah aʼburi,” yiluk nen, kit-kit keyagi kinambe sarluk wat-wat yilik lano.

²¹An Paulus nenggaerek ninggi paga kolal mbalogo keyagi watkinaki o.

²²At omanggi nen, ninewe Endaganggok endainggen kunik dek kalok, Allah nen at eti ebe alem ʼbuwak o. Mende, ninewe Endaganggok ibat eme o, yu kak, Maranata, yiluk yigi o.

²³Ninewe Endaganggok Yesus obabut pano etnogo nen kinanggorlem mondok dogowak o.

²⁴Kristus Yesus ninom kunik dogolik, kinebe taʼbokogonat kinaʼbuwa yiluk keyagi watkinaki o.