Read Upper Grand Valley Dani 1Korintus 5 Bible Online

1Korintus 5 - Upper Grand Valley Dani bible

1Korintus 5

¹Akoni nen ap kit mende omanggi kwe waganusak dek mende waganggesik werek yiluk abok yisi dogolik yoknekama nasuk kolki o. It akoni Allah wene inonggodek mende nen esigit diluk kagarigogi dek mende, ap eti ombae age mende waganggesik werek o.

²Esigit diluk kagako nggorlegat, kit pogorakaligogi o. Kit kagasusak, kinakla weyak atluk, ap weyak kagake werek eti, wula ʼbiyausak mende kinom dambukogo werek o.

³An nebe walegat werek mende, nendainggen kit kinom werek negen o. Eti paga, nebe ninom dogolik yu kak, ninewe Endaganggok Yesus endago mbalogo, at ap weyak kagake werek eti wene oba ʼbigima werek o. Eti paga, kit omanggimo nandokonem, an nendainggen ninom werek negen eti paga, ninewe Endaganggok Yesus obatne paga, men kagatno.

⁵Ap eti endainggen ninewe Endaganggok wisigin etinem wago dogolik ndiluwak nen, yogondak ebe Iblis nen weyagat duwagaluk, at Iblis at wogotno.

⁶Akoni nen inane dagakogo yisi dogolik, “Kimbiri roti mende pisuwagaluk enggen pirigogo mende ʼbugurlagat akla ʼbilukmo nen, roti ebe taʼbokogonat pirigogo o,” yiluk yiligogi etnogo kinonggodek nogo? Kinilu dogolik pogorakaligogi eti pano ʼbuk. Weyak o.

⁷Akoni Yahudi mende Pesta Paskah nonggo dogolik, domba warogo, enggen roti pisuwagaluk wusabigogo mende wula ʼbiyalok, pikidek mende arlek niligogi kak kagatno o. Ninadomba wasu kak, Kristus nit ninake arat wakuka eti paga, kinebe roti ngget pikidek mende agasip werek kak eberogonat asubagik nen, enggen roti pisuwagaluk wusabigogo mende alep mende wula ʼbiyiligogi kak, weyak kagarigogo mende eti korogo togot diyano o.

⁸Eti paga, pesta Paskah nonggo dogolik, enggen roti pisuwagaluk akla wusabigogo mende akla wusakidek mende niligogi kak, nit weyak kagakik, kumi ap yugunat kagakik, kagako dogusak dek o. Ninendainggen omanggiat dogolik, eberogonat mende dombok kagako doguwok o.

⁹An nen alebagik wene kolal mbalogo kinoba laʼbi wago dogolik, men yisigi ambigi, “Kit, it kumi ap yugunat kagarigogi mende kinom dambukogo dogogup o,” yiluk yokisasigi o.

¹⁰Esigit diluk yokisasigi eti, it akoni Allah wene inonggodek dogolik kumi ap yugunat kagarigogi mende inom, inamikmak weyak kagarigogi mende inom, nuket diyiligogi mende inom, inendainggen ngganengge oba panggot diluk dogolik pogorarigogi mende inom, it eti pasik yisigi dek o. It esigit diluk kagarigogi mende kinom dogusak dek, yiluk yilepma, it akoni agat oba mende yoma mondok togot diyalok dukilep o.

¹¹Esigit diluk yokisasigi eti, wene ebe yigit diluk. At omanggi nen yisi dogolik, “An kinagarlak Allah aʼburat o,” yiluk yisi dogolik, kumi yugunat paʼbiyigik, amikmak weyak kagakik, endainggen ngganengge oba panggot diluk dogolik pogorakik, inabok weyak wene inenggalat inoba ʼbiyigik, ambusu kunu-gunu asuwogoluk niligogi etnogo mende nasi mondok welagik, ininggi abusak waganggik, kagarigogo mende eti negen mende inebe kinom dambukogo dogusak degat, kimbiri kinom nonggo dogusak degat, yiluk yokisasigi ambigi.

¹²It akoni Allah wene inonggodek mende wene an nen inoba ʼbusak nogo? Dek o. Allah nen inoba ʼbigin werek o. Allah wene kolal mbalogo ʼbisi dogolik, men yisuka, “At omanggi kinakla dogolik weyak kagarigogo mende eti, wula ʼbiyano,” [7] yiluk yisikemo kolal mbalogo ʼbisukama werek eti paga, ap omanggi kit Allah aʼburi kinom nandorligogi mende nen weyak kagako kalok, kit nen wene oba ʼbusak dek nogo? ʼBusagat o.