Read Upper Grand Valley Dani Galatia 5 Bible Online

Galatia 5 - Upper Grand Valley Dani bible

Galatia 5

¹Nit Kristus nen ninasokneat ʼbinanggikemo yogondak ninasokneat werek. Eti paga, yi mende ndi mende anggin weyak mende it akoni inanduwanengge mende nen o mberlago wolok lowagaluk inomorlo paga ʼbiligogi kak, anggin mende eti yabunggane kinoba ʼbunogo yiluk, kinobatnerogo mendek dogono o.

²An Paulus nenggaerek nen wene eberogonat yokisak. Kit kinenggaerek nen kinowado kinenggarlimo mende it amberek nen mbal kinabuwagaluk inayonggo ʼbiligogi kalok, at Kristus nen panot kinabigin dek o. Elamarogoat kagat lakagun o.

³Kit amberek kinowado esigit diluk mbal kinabuwagaluk, it amberek inayonggo ʼbugun kalok, kinebe dombok kinasuk omanggi inom wasik. Esigit diluk mbalkinako kalok, wene Allah nen ninasuk wakike wene etnogo togot digidek taʼbokogonat motogo kagako dogusak o.

⁴Kit amberek nen, “Wene Allah nen ninasuk wakike wene eti paga panggot diluk, at nen, wene ninoba mende nggorogo togot diyalok, ninom yabunggane suguluk kunogo ʼbinanuwak,” yiluk kagarigogi kalok, Kristus kinom mbalagasip nen, at Allah obabut pano nen woknisiligogo mende etnogo togot diyalok dukegep o.

⁵Mende, nit nen, ninendainggen Kristus oba panggot disugusik, “Allah Agurengge nen esigit diluk yamak niyasi nggorlek, Allah nen wene ninoba mende nggorogo togot diyalok at ninom yabunggane suguluk kunogo ʼbinanigin werek,” yiluk oba eberek werek o.

⁶Eti paga, nit Kristus Yesus ninom kunik dogolik, ninowado ninenggarlimo mende mbalek mende inom, it amberek mbalek dek mende inom, inom ndak-ndak werek. Eti paga, eti pasik mbenasusak dek. Nggok ebe, ninendainggen Kristus oba panggot diluk dogolik, akoni inaʼbuwa kiligogi eti paga enggagat arigogo.

⁷Akoni ta ae aʼbusuk werek yiluk mbirirli liligogi kak, kit paganeat nen, ebe wene eti pasik kinobabut anggilukogo kagako lagagip mende, yabunggane ta nen kinakla nggagalko lagama ebe wene eti kologo motogo kagakidek, kinakla mbuk werek nogo.

⁸Eti ninewe Endaganggok kinayonggo ʼbisike mende etnogo nen, “Inakla esigit diluk nggagalino,” yiluk yekemo nen kinakla nggagaligogi ʼbuk. Dek o.

⁹Roti pisuwagaluk enggen pirigogo mende ʼbugurlagat akla ʼbisinem taʼbokogonat pirik dukiligogo kak, wene nggorlo mende eti paga kinebe taʼbokogonat weyagat kinabik launogo yiluk yigi o.

¹⁰Esigit diluk mende, ninewe Endaganggok ninom omanggiat agosik kunik werek eti paga, an nakla nen, “It inobabut wene ninat mende omanggi oba ebesugun degat,” yiluk, didinagaligogo o. Ta nen kit weyagat kinabigiluk kinakla nggagaligogo mende eti Allah nen wene oba ʼbigin werek o.

¹¹Nagarlagi nirugi o. An nen, inowado inenggarlimo mende mbaligogi wene eti pano yiluk yanggul isasi dogolepma, noba yi aik ndi aik kagat nabigogi eti kagat nako dogolep ambegep? Mondok dek o. An wene eti wene yanggul isasi dogolepma, wene Kristus ebe o paga mendiluk wakuka wene eti yanggul isasinem akoni inasuk kol diluk nen, iniyok nggit oba dikogo wariligogi kak, inakla mbuk atluk wene togot diyelep degat o.

¹²Kit weyagat kinabiluk kinowado esigit diluk mbal kinabuwogoluk kinakla obatnerogo nggagaligogi mende eti kit Allah aʼburi kinakla nen ʼbogokogo mondok korla dukuwak o!

¹³Nagarlagi nirugi o. Kit kinasokneat dogowagaluk Allah nen kinayonggo ʼbisikemo werek. Esigit diluk mende, kinakla nen, “An nasokneat werek,” yiluk, akoni inobabut inikogat dogolik kagarigogi mende inobabut waganogo yugunat kagako dogogup. At te, wene Allah nen ninasuk wakike wene etnogo taʼbokogonat dambukogo wene omanggi yiat nggok yisike o. “Kit nen, akoni kinom werek mende eti, kinenggaerek kinebe kak kinendainggen kunik dogono o,” [11] yiluk yisikemo kolal mbalogo ʼbisuka eti paga, akoni amberek inebe inaʼbuwarogo dogolik kit-kit yamak-yamak kagako dogoni o.

¹⁵Esigit diluk mende, wam enggaerek nen wam omanggi aik nen liʼbilkik, warogo kaum ninggik, kagarigogo kak, kit-kit kinenggaerek nen esigit diluk kagako dogogun kalok, kinebe elamatlarik launogo yiluk kinobabut kwalogo dogono o.

¹⁶An nakla yigit diluk ambigirik nen yigin. Ninobabut ninikogat dogolik kagarigogi mende eti paga, Allah Agurengge akla warlok ambaligogo mende eti warogo wula ʼbigiluk kagakik, nen, at Allah Agurengge nen, nit ninobabut eti mende warogo wula ʼbigiluk kagakik, kagako dogolik, imbisak wim mbalek mondok kagarigogi o. Imbisak esigit diluk kagatluk, kit nen, “Esigit diluk kagatlep o,” yiluk, kibitngge-yogongge, ambaligogi mende, ebe kagarigogi dek o. Eti paga, Allah Agurengge kinom kunik dogolik pano kagako dogono o. Esigit diluk kagako dogogun kalok, kinobabut kinikogat dogolik, yi warlok ndi warlok kagarigogi mende eti yabunggane esigit diluk kagako dogogun dek o.

¹⁸Allah Agurengge nen, “Esigit diluk kagatno,” yiluk, yanggul kisasinem kagako dogogun kalok, wene Allah nen ninasuk wakike wene etnogo paga yabunggane wene kinoba ʼbigin dek o.

¹⁹Akoni agat oba yoma inobabut inikogat dogolik kagarigogi mende ebe enggagat yi. Inil arurlu yugunat kagarinakik, inalilo werek mende kagakik, inoba aganggen kagakik,

²⁰inendainggen ngganengge paga panggot diluk dogolik kagakik, akoni inebe weyak asuwagaluk wusarogo kagakik, akoni inom wim mbalek kagakik, wenemuk akik, uwa mbalkik, inakla agaga dagigik, inenggaerek pasigat nggokogo kagarigik, akoni inebe omanggiat mende inom naʼit-kaʼit nok-nok kagakik,

²¹inakla nen, it ninat mende inamende, Warlok a, ambigik, ambusu weyak mende nalok kunu-gunu agik, pesta nalok weyak kagakik, kagarigogi eti inom, amberek esigit diluk kagarigogi mende taʼbokogonat inom, pasik yigi o. It akoni esigit diluk kagarigogi mende, Allah apma ʼbiyiligogoma etoma indewerek asugun mondok dek o, yiluk, wene eti pasik alep yokisasigi kak, yabunggane kinasuk warogo yokisigiat o.

²²O enggen yirigogo kak, Allah Agurengge akoni inakla dogolik inobabut kagarigogi ebe yi. Akoni amberek inebe inaʼbuwarogo welagik, inakla arlenggen kigik, inendainggen dirlukogo welagik, inobakanini kambuk yiluk welagik, inobabut enago welagik, inobabut pano welagik, inobabut dombokogo welagik,

²³inendainggen sebekogo welagik, inenggaerek nen inasuk warek welagik, kagarigogi o. Inobabut esigit diluk kagakonem, wene omanggi inoba ʼbiligogi nogo? Mondok dek o.

²⁴Ninebe Kristus Yesus agoromi mende, ninobabut ninikogat dogolik, yi warlok ndi warlok ambasi lagagu mende eti Kristus Yesus ebe o paga mendiluk wakuka eti paga warogo ʼbisugu o.

²⁵Eti paga, yogondak Allah Agurengge nenat ninobabut ngget mende kagarogo ʼbinanggikemo niniluk dogolik, at nen yoknisiligogo mendeat motogo kagako dogusak o.

²⁶Esigit diluk kagako dogolik, ninenggaerek nen pogorakigidegat, nit-nit omanggi nen omanggi inakla weyak asuwagaluk kagakidegat, nit-nit uwa mbalogo omanggi nen omanggi ninaʼit diyigidegat, kagako doguwok o.