Read Upper Grand Valley Dani 1Tesalonika 1 Bible Online

1Tesalonika 1 - Upper Grand Valley Dani bible

1Tesalonika 1

¹Kit Allah aʼburi o Tesalonika nandoko dogolik, ninombae Allah inom, ninewe Endaganggok Yesus Kristus inom, kinom kunik werek mende, nagarlagi nirugi o. An Paulus, Silas Timotius imbisak ninom nen, wene yi kolal mbalogo kinoba laʼbi wago o. Ninombae Allah obabut pano etnogo nen pano mende wokisigik, kinendainggen kambuk dinagagik, kagako dogowak o.

²Nit nen sembayan kit taʼbokogonat kinake kinendaga kunogo yisi dogolik, Allah keyagi wako mondogat werek o.

³Ninombae Allah il oba sembayan esigit diluk yisi dogolik, kit kinendainggen Allah oba panggot diluk dogolik kagako lagap mende inom, akoni amberek inaʼbuwarogo dogolik, kinobatnerogo yamagiyasi lagap mende inom, kinakla nen, “Ninewe endaganggok Yesus Kristus nen pano kagat ninabigin,” yiluk kinebe kinobakanini kambuk yiluk werek mende inom, nit nen kit kagarigogi mende eti pasik kinobarlikmat digidek, eberek mondok werek o.

⁴Nagarlagi nirugi o. Kit kinebe Allah nen kinaʼbuwarogo dogolik mikinakikemo werek eti ninilu o.

⁵Nit pano wene wolok yokisa wagagu etnogo, ninane paga arlek yokisasi lagagu ʼbuk. At te, Allah Agurengge etnogo ninakla dogolik, obatnerogo yamak niyasi nggorlek, ninakla nen, “Wene yi eberogonat,” yiluk ninendainggenma didisugusik nenat yokisasi lagagu o. Nit o etoma ninom dogolik, kit kinakeat kagako lagagu etnogo kit kiniluat o.

⁶Kit yi aik ndi aik kagat kinako nggorlegat, kinakla arlenggen kasi dogowagaluk Allah Agurengge nen kinakla nggagalkikemo, kinakla arlenggen kasi dogolik, pano wene waganggigisip, nit ninobabut waganggik, ninewe Endaganggok obabut waganggik, kagakigip o.

⁷Ninewe Endaganggok nen kagakike wene etnogo kit werekma nen wikalarik wikalarik o Makedonia, Akhaya, lagike o. Mende, eti arlek ʼbuk. Kit kinendainggen Allah oba panggot disigip mende eti, kinabok o yi ai ndi ai taʼbokogonat lagikemo inilumo, nit nen yabunggane kinabok yogisausak dek aga o. Eti paga, akoni o Makedonia mende inom, o Akhaya mende inom, pano wene eberogonat yiluk wagangguka mende taʼbokogonat nen, “It pano kagarigogi,” yiluk, kinobabut waganogo kagarigogi o.

⁹It nen wene men yiligogiat, “It akoni o Tesalonika mende nen, Paulus agarlagi inom inebe woginabiluk nen, Allah iluk mondok dogoligogo mende eti eberogonat o, yiluk apma dogolik, at ake kagakik, at aʼbut mbogot oba ner wusa wisigin eti ebe anggorlem welagik, kagasuwogoluk ngganengge togot diyalok, ineloke dagakogo Allah wogokukasik werek o. Allah nen aʼbut watlagikesikmo ilugut disike mende, ebe Yesus etiat o. Nen, Allah akla agaga dagiluk wene akoni inoba ʼbisi dogolik, nit Yesus eti nenat ndil ninabigin o,” yiluk, kinabok pano yiligogiat o.