Read Upper Grand Valley Dani 1Tesalonika 2 Bible Online

1Tesalonika 2 - Upper Grand Valley Dani bible

1Tesalonika 2

¹Nagarlagi nirugi o. Kit kinakla nen, “It Paulus agarlagi inom ninoba waguka eti we yugunat wirlikogo wagidek,” yiluk, kinenggaerek kiniluat o.

²Kit kinoba awan wagidek, o Filipi etoma werekma, akoni etoma mende nen inakla kai dinaniluk yi aik ndi aik kagat ninako laguka. Esigit diluk mende, ninombae Allah nen ane pano wene etnogo ninayuk dekogo yokisa wisuwagaluk kagat ninakikemo wagagusik yokisasi werekma akoni dogolegat nen, “Wene eti ninaʼit o,” yiluk, yisi nggorlegat, ninobatnerogo yokisasi lagagu etnogo, kiniluat o.

³Wene yokisasi dogolik kinasuk wako lagagu eti, kit nuk asuwagaluk nggorlo wene yokisigik, ninendainggen mbere dogolik yokisigik, ninane ʼbindokogo yokisigik, yisi lagagu dek o.

⁴At te, at Allah nenat ninaren mbalogo nen, “Pano wene eti kirat wolok noko dogobagik,” yiluk, ninayonggo ʼbisike ndak-ndagat yokisasi dogolik, akoni inakla nen, It pano, yiluk ambawagaluk yokisiligogi ʼbuk. Dek o. At te, Allah ninaren mbaligogo mende etnogo akla nen, It pano, yiluk ambawagaluk yokisiligogi o.

⁵Nit ninakla nen, yi mende ndi mende ninarligat ninamende dogolep a yiluk ambasi dogolik, ninane paga nen enagogo yogisasi lago dek eti, kit kiniluat o. Nen, Allah iluatma, at nenat, “Eti eberogonat,” yiluk ʼbukakogo yuwak.

⁶Kit nen nit pogot ninakik, it amberek nen pogot ninakik, akoni mende nen esigit diluk pogot ninabuwagaluk yiligogi dek o. At te, Kristus nen ninayonggo ʼbiluk laʼbinani wagikemo wene indewerek dogolik, ninane ninobatnerogo yokisausak erlok werek o.

⁷Esigit diluk mende, inagoyalak nen ineyagi alelogo woginabiluk nen pagisek dogoligogi kak, nit kit ninom dogolik alelogo pakisek dogolik kagako lagagu o.

⁸Nit nen kit kinebe kinaʼbuwarogo werek eti paga, Allah wene eti arlek sumbut kisasugu ʼbuk. Dek o. At te, kinebe kinaʼbuwa mondok werek eti paga, ninakla arlenggen kasi dogolik, ninebe inomat wokisasuguat o.

⁹Nagarlagi nirugi o. Nit Allah wene pano wene eti yokisasinem, yi mende ndi mende pasik, kit amberek kinoba angginet kinabunogo yiluk, nit ninenggaerek nen dinggagane kibanggone ninobatnerogo kagakik, mep dagik-dagokogo kagakik, kagako lagagu etnogo, kiniluat o.

¹⁰Nit kit wene eberogonat yiluk waganggigip mende ninom dogolik, akoni nen, “It weyak kagaka,” yiluk, wene ninoba ʼbusak degat nggaʼberek dogolik, motogonat kagako lagagu etnogo, kit Allah kinomat kinilumo, “Eti eberogonat,” yiluk ʼbukakogo yusak o.

¹¹Kit Allah apma unggiluk pogorarigogoma etoma unggiluk dogobagik nen yiluk, kinayonggo ʼbisike mende etnogo akla warlok ambaligogo mende motogonat kagako dogobagik nen yiluk, nit nen inombaelak nen inaʼburi inasuk warigogi kak, kinebe dombok kinasuk wakik, kinendainggen sebelkik, kinakla nggagalkik, kagako lagagu etnogo, kit kiniluat o.

¹³Nit nen wene Allah wene etnogo yokisasugumo, kit nen, “Wene eti akoni inane mende dek o. At te, Allah weneat o,” yiluk waganggigip eti eberogonat Allah weneat waganggigip o. Eti paga, nit puk agidek Allah keyagi wako mondok werek o. At Allah nen kit kinendainggen Kristus oba panggot disigip mende kinakla nggagalko mondok werek o.

¹⁴Nagarlagi nirugi o. It Allah aʼburi amberek Kristus Yesus inom kunik dogolik, o Yudea etoma nandorligogi mende, inenggaerek inagarlagi inom Yahudi mende nenat, yi aik ndi aik kagarinako laguka kagat, kit kinagarlagi kinom mende nenat yi aik ndi aik kagat kinabigogi o.

¹⁵It ap Yahudi mende nenat, it ap paganeat Allah wene yogisasi laguka mende inebe inakik, ninewe Endaganggok Yesus ebe wakik, kagakuka kagat, nit yi aik ndi aik kagat ninabigogi eti Allah nen pano yiluk ambaligogo dek. It eti akoni amberek inom weyagat dogolik,

¹⁶Allah nen it akoni sikman mende ndil inabuwagaluk nit nen pano wene yogisilik lagonem, akoni inagolak mbaligogi kak, it akoni Yahudi mende nen, “Wene pano wene eti yogisausak dek,” yiluk wenemuk mbaligogi o. Esigit diluk kagako dogolik, kibitngge-yogongge weyak kagarigogi mende obarluk kagarigogi eti paga, Allah akla agaga dagiluk, wene nggok mende inoba ʼbeke o.

¹⁷Nagarlagi nirugi o. Nit nen kit kinasokne ʼbinagaluk wagagusik, yogondak ya elalma pasik ninebe walegat werek mende, ninendainggen kit ninom omanggimo werek negen o. Esigit diluk dogolik, “Inelokonggen ninilenggen iya lelep o,” yiluk, paganeat nen ninakla warlok mondok ambasi dogolik kinoba wisuwogoluk walkasi lagosik.

¹⁸Walkasi dogolik, an Paulus nenggaerek ninggi alep omanggi wisigiluk walkigik, yabunggane omanggi wisigiluk walkigik, kagakigi mende, Iblis nen nagolak mbalkikemo puk agagi o.

¹⁹Nit nen, “Pano asigin,” yiluk ninakla arlenggen kiligogi eti sani pasik nogo. Ninewe Endaganggok Yesus ebe witluk, “Pano kagakep,” yiluk, at il oba enggagat ʼbinanumo pogorakagun eti erlo nggi paga nen nogo. Erlo ninat mende paga ʼbuk. Kit kinebe pasigat pogorakagun o.

²⁰Ninakla arlenggen kigik, pogorakigik, kagarigogi eti kit kinebe pasigat o.