Read Upper Grand Valley Dani 1Tesalonika 4 Bible Online

1Tesalonika 4 - Upper Grand Valley Dani bible

1Tesalonika 4

¹Nagarlagi nirugi o. Wene ilugun oba omanggi yi yokisak. Nit ninewe Endaganggok Yesus nen, “Kinobabut Allah akla nen, It pano, ambawagaluk, panorogo yigit diluk kagako dogono o, ndigit diluk kagako dogono o,” yiluk, yisikemo yanggul kisa wagagu etnogo kinilu. Esigit diluk yanggul kisasugumo, kit nen esigit diluk kagarigogi mende, yabunggane omanggi inom nggokogo kagako dogobagik nen yiluk, ninewe Endaganggok Yesus ninom kunik dogolik kinasuk warogo yokisigi o.

³Allah akla nen, men ambaligogo, “Kit kinebe an nake ʼbaniluk nggaʼberek mondok dogolik, kumi inil arurlu paʼbiyiligogi eti paʼbiyigidek mondogat dogono o.

⁴Esigit diluk dogolik, kinagugi dombok woginabiluk nen, kinom pano dogolik, kinebe an nake ʼbaniluk nggaʼberek dogolik, kinobabut motogo kagarigogi mende etiat kagako dogono o.

⁵It akoni sikmangge mende, an nebe inonggodek dogolik inoba aganggen dagisinem kumi yugunat paʼbiyiligogi eti esigit diluk kagako dogusak dek o.

⁶Eti mende pasik motogo kagako dogolik, kinagarlagi kinirugi inom inil limagogo inagoni inagugi mende inil arurlu paʼbiyausak dek o,” yiluk, Allah akla nen esigit diluk ambalok yoknisiligogo o. Esigit diluk yiligogo eti paga, alebagigat nit nen yisi dogolik, “It akoni kumi inil arurlu esigit diluk paʼbiyiligogi mende, ninewe Endaganggok nen wene inoba ʼbigin werek o,” yiluk, ninobatnerogo kinasuk warogo yokisasugu o.

⁷Allah nen, nit weyak kagako dogowagaluk ninayonggo ʼbisike dek o. At te, ninebe at enggaerek ake ʼbiyalok, nggaʼberek dogolik, motogo kagako dogowagaluk ninayonggo ʼbisike o.

⁸Wene eti kit amberek nen togot diligogi kalok, nit akoni ninane mende togot diyiligogi ʼbuk. Dek o. Allah nen Agurengge kit wokisiligogo mende etnogo ane mendeat togot diligogi o.

⁹Nen, kit-kit kinagarlagi kinirugi kinom naʼbuwa-kaʼbuwarogo dogobagik nen yiluk, Allah nen erlogat yanggul kisiligogo eti paga, yabunggane an nen ninggit diluk kalok, “Kit kinagarlagi kinirugi kinom naʼbuwa-kaʼbuwarogo kagako dogono o,” yiluk, kolal mbalogo kinoba laʼbi wisusak. Degat o.

¹⁰Kit kinagarlagi kinirugi o Makedonia etoma mende taʼbokogonat esigit diluk inaʼbuwa kasi lagap mende, nagarlagi nirugi o. Yabunggane nggokogonat inaʼbuwa kasi dogobagik nen yiluk, kinasuk warogo yokisigi o.

¹¹Nit nen alebagik yokisasugu kagat, kinendainggen kambukogo dogolik, akoni amberek inawene mende togot diyalok, kininggi nen kinenggaerek kinobaga mende dombok waganigogi mende etiat nggogot disi dogono o.

¹²Etiat nggogot diluk nen, it amberek nen waganekmangge nilik liligogi eti kak kagakidek dogolik, akoni sikmangge mende nen, “It pano,” yiluk yuwagaluk inil oba kinobabut motogo kagako dogono o.

¹³Nagarlagi nirugi o. It akoni amberek nen, “Pano kagat lasigin,” yiluk inakla nen didigidek dogolik, akoni watlagonem inakla weyak arigogi eti kak, kit esigit diluk kinakla weyak ago dogunogo yiluk, wene akoni watlarigogi mende eti pasik kinonggodek dogusak eti naʼit. Kinilu asubagik nen yiluk dikogo yokisak o.

¹⁴At Yesus ebe watlagikesik nen iluk agike eti eberogonat yiluk didiligogi o. Eti paga, akoni at inom kunik dogolik watlarigogi mende yabunggane Allah nen inilugurinabiluk, Yesus inom mondok iniluk dogowagaluk eberogonat woginabigin yiluk didisi doguwogat o.

¹⁵Wene ninewe Endaganggok nen yisike mende yi yokisak. At ebe wagonem, it watlaguka mende togot diyalok nit niniluk mende ndak alebagik oba dagagun dek o.

¹⁶Ninewe Endaganggok mbogot oba nen wusa wagonem, it malaikat mende inewe nggok mende ane nggokogo yigik, Allah abinggon aneget kasinem ane nggokogo yigik, yisinem, akoni Kristus inom kunik dogolik watlaguka mende ndak inilugurinabigin o.

¹⁷Yabunggane nit niniluk dogogun mende ninomat oisa akla kambokogo woknisek dagaluk nen, ninewe Endaganggok ninom ndurlem ombo etoma abuk asi dagaluk nen, at ninom mondogat dogogun o.

¹⁸Wene eti paga kit-kit kinakla panorogo, kinendainggen ago wat-wat yisi dogono o.