Read Upper Grand Valley Dani Titus 2 Bible Online

Titus 2 - Upper Grand Valley Dani bible

Titus 2

¹It esigit diluk werek mende, kat nen, wene panot ninabigogo wene etiat yanggul isasi dogusak ndak-ndagat yanggul isasi dogono.

²Ap inarluwendek mende eti, weyak kagasuwagaluk inakla nggagalkonem inendainggen inenggaerek nen anggorlem welagik, inilaga yamuksek welagik, inendainggen nggagalek welagik, it inendainggen korlerogo Allah oba panggot diluk welagik, akoni inaʼbuwarogo welagik, yi mende ndi mende ake inoba aik kasi dogolik, inobakanini kambuk yiluk welagik, kagako dogowagaluk inasuk wako dogono.

³Eti kak, it kumi inarluwendek mende eti, akoni Allah apma dogolik, inobabut motogo kagarigogi kak, kagako dogolik, akoni amberek inabok weyak mbalkidegat, ineugi nggokndek inapma dogoligogi kak, i anggur enggen ambusu apma negen dogolik, inoba labogo niligogi esigit diluk ninggidegat dogolik, it nen it amberek panorogo kagako dogusak pasik, yanggul isasi dogowagaluk inasuk wako dogonoat o.

⁴Esigit diluk yanggul isasinem, it akoni amberek nen, wene Allah nen yoknisasike wene etnogo abok weyak yisi dogunogo yiluk, it nen, kumi ndugumndek eti nen inagoni inom, ineyagi inom, inaʼbuwarogo dogolik, inendainggen inenggaerek nen anggorlem welagik, inilaga iyokogo welagik, uma mende yi mende ndi mende panorogo nggarelogo kagakik, inagoni inane kologo welagik, kagako dogowagaluk, yanggul isasi dogowak nen, inasuk wako dogonoat o.

⁶Eti kak, it ap elege eti nen, yi mende ndi mende ake inendainggen inenggaerek nen anggorlem dogowagaluk inasuk wako dogonoat o.

⁷Inasuk esigit diluk wakonem, it nen, kat kobabut waganggo dogowak nen, yi mende ndi mende pasik kagako dogolik kobabut motogo kagako dogono. Esigit diluk kagako dogolik, “Wene yi nggogat,” yiluk motogo yanggul isasi dogono.

⁸Esigit diluk yanggul isasinem, it amberek wene eti inaʼit mende nen, “It weyak yega,” yiluk, wene nit ninoba ʼbukmoat yisinem, inenggarli asuwagaluk, ebe weneat, panot ninabigogo wene, weyak yusak dek mende etnogo, yanggul isasi dogono.

⁹It inanduwanengge mende eti, ineugi nggokndek nen yi mende ndi mende pasik yisinem, inakla panorogo inane onggo yigidek inane kologo kagako dogolik,

¹⁰inamende ininggi abusak waganggo dogusak dek. Inobabut enggagat didiyawagaluk, yi mende ndi mende ake motogo dombokogonat kagakonem, it akoni amberek nen Allah ndil ninabigogo mende etnogo abok yisi dogolik, “At ane yanggul nisaligogi eti pano,” yiluk, yisi dogowagaluk, inobabut esigit diluk kagako dogusak o.

¹¹It taʼbokogonat nen esigit diluk kagako dogusak eti, Allah obabut pano nen yi akoni ndi akoni taʼbokogonat ndil inabigiluk yiligogo mende eti obabut enggagat selekmat disikemo werek eti pagaat o.

¹²Nit ninobabut alep Allah ebe ninobakanini togot diyasi dogolik, ninakla nen yi mende ndi mende agat oba mende warlok arlek ambasi lagagu eti togot diyalok nen, yogondak ya ninobabut ninendainggen anggorlem dogolik Allah ake motogo kagako dogowagaluk, at obabut pano eti paga yanggul nisaligogo o.

¹³Nit yogondak, Yesus Kristus ebe Allah Endaganggok mendeat, ndil ninakike mende etnogo akoni nen pogorako nggorlek, selekma panot ninabi wisigin eti, ninakla arlenggen kasi dogolik ebe anggorlem werek.

¹⁴Nit alep Allah wene togot diyalok yi weyak ndi weyak kagako lagagu eti paga nininggi kerle warogo negen paknisek werekma, at Yesus Kristus nen, “It inebe an nenggaerek naʼburi atluk nen, inobabut pano mende anggilukogo kagako dogowak nen, inebe kerle piyalogo inonggo mbaligiluk, an nebe watlasigin,” yiluk yisike.

¹⁵Kat nen wene etiat yanggul isasinem, it amberek nen inakla kai dagunogo, kane obatnerogonat inakla nggagalogo inasuk wako dogono o.