Read Upper Grand Valley Dani 1Petrus 4 Bible Online

1Petrus 4 - Upper Grand Valley Dani bible

1Petrus 4

¹Akoni yi aik ndi aik kalok, inebe watlatluk, yabunggane weyak kagako dogusak dek eti paga, at Kristus yi aik ndi aik kilik kilik ebe watlagike eti kak, kit men, akoni sin yikogo inobabut kwalogo dogoligogi eti kak, at Kristus obabut waganogo, yi aik ndi aik kasi dogolik kinobatnerogo dogono o.

²Eti paga, kit nen akoni yi mende ndi mende warlok nen inendainggen nen niligogo eti mende togot diyalok, kurli yogondak kurli nen, agat oba yoma kiniluk dogolik Allah akla warlok ambaligogo mende eti arlek kagako dogono o.

³Kit alebat kinobabut it akoni Allah wene inonggodek mende nen inakla ambalok kagarigogi eti kak, kininggi dogalegat arat kagako dogolik, weyak kinenggarli degat kagakik, kinendainggen nen nasinem kumi yugunat paʼbiyigik, kumi ap nen pakinabuwagaluk kagakik, pesta kagako dogolik, enggen ambusu inendainggen kunu-gunu arigogo mende nalok, yugunat-yaganat kagakik, ambusu weyak mende eti kinoba labogo ninggik, ngganengge akla nggorlo asunogo yiluk, pogorasusak dek mende pogorakik, kagako lagagip o.

⁴Esigit diluk kagako lagagip mende, yogondak kit kinobabut it weyak warlokogo mondok yugunat-yaganat kagarik liligogi eti kak kinom kagakidek togot diligogi eti paga, kit kinabok weyak mbaligogi o.

⁵Mende, at Allah nen, akoni iniluk mende inom, watlaguka mende inom, inendema waganogo wene inoba ʼbigik, nggokik, kagasigiluk akla ambekesik werek. Esigit diluk wene inoba ʼbisinem, it nen, wene inoba nggorawogoluk, “Nit yigit diluk kagako lagagu, esigit diluk kagako lagagu,” yiluk yogokonem erlok dek asigin werek o.

⁶Eti paga, it akoni watlaguka mende eti, Allah nen nit akoni taʼbokogonat wene ninoba ʼbigik, nggokik, kagarigogo eti kak inoba ʼbisikemo, inebe watlaguka mendeat, at Allah akla ambasike paga inagurengge iluk werek eti kak iniluk dogowagaluk, at Kristus nen pano wene yogisa lagike o.

⁷Yi mende ndi mende taʼbokogonat ilugun oba kagat lasigin mende korogat asi waga yiluk, sembayan yisi doguwogoluk, kinendainggen sebekogo dogolik, kinobabut kwalogo dogono o.

⁸Wene nggok negen yi. Kit-kit naʼbuwa-kaʼbuwarogo kagako dogolik, omanggi nen omanggi weyagat digin mende sagalogo mondok deget dugun eti paga, kit-kit kinagarlagi kinirugi kinom naʼbuwa-kaʼbuwarogo mondok kagako dogono o.

⁹Kinagarlagi kinirugi kinom, kit amberek nen it amberek inaguma lagik, it nen kit kinaguma wagik, kagako dogolik, inebe woginatluk, kinakla nen, “Naʼit o,” yiluk ambigidek woginako dogono o.

¹⁰At Allah obabut pano nen, ninebe dombok ninobabut arlikendek dombok woknisasike ndak-ndagat, kinebe dombok nen eti mende pano inde dogolik, kit-kit yamak-yamak kagako dogono o.

¹¹Esigit diluk kagako dogolik, Yesus Kristus kinom kunik dogolik kagakonem, it akoni amberek nen Allah pogorako dogowagaluk, kit amberek nen wene yogisasi dogolik, Allah weneat yogisigik, kit amberek nen it amberek yamagiyasi dogolik, Allah obatne woknisiligogo eti pagaat yamagiyigik, kagako dogono o. Esigit diluk kagako dogolik, Yesus obatneyak ikok mondok werek etnogo pogorako mondok doguwok, yiluk, “Amin,” yigi o.

¹²Nagarlagi nirugi o. Kinebe kinaʼbuwa o. Kali aik kiligogi eti kak, Allah nen, kinaren mbaligiluk yi aik ndi aik kinoba agonem, kinakla nen, “Yi ninat kiligogo dek mende ninoba arigogo,” yiluk ambagup o.

¹³At Allah nen Kristus ebe selekmaat laʼbi wagonem, pogorasugun etinem, kinakla arlenggen kuwogoluk, kinakla nen, “At Kristus oba yi aik ndi aik kilik kilik watlagike kak, nit at ninom kunik dogolik esigit dilugat kiligogi,” yiluk kinakla arlenggen kasi dogono.

¹⁴Akoni amberek nen at Kristus pasik mbet kisasi kalok, kinakla nen, “Allah Agurengge pogorarigogo mende etnogo, ninoba duksek werek o,” yiluk kinakla arlenggen kasi dogono o.

¹⁵Mende, it amberek nen akoni inakik, ininggi abusak waganggik, weyak kagakik, it amberek inawene mende lambogengge yigik, kagakonem, yi aik ndi aik inoba arigogo eti kak, kit esigit diluk kagakonem kinoba asunogo.

¹⁶Mende, akoni amberek nen, “Kat Kristus agot, kebe Kristen mende,” yiluk yi aik ndi aik kagat kinako kalok, kinenggarli agup o. “An Kristus agot kalogat at endaga mende an nendaga salogo yoknirigogi eti panoat o,” yiluk Allah pogorako dogono o.

¹⁷Allah nen ninendema waganogo wene ninoba ʼbigik, nggokik, kagasigin eti, arat korogat asi waga. Esigit diluk kagako dogolik, nit Allah aʼburi mende ndak ninendema waganogo wene ninoba ʼbigik, nggokik, kagasigin kalok, yabunggane it akoni amberek Allah wene pano wene waganggidek mende ninggit diluk kagarinabigin ambegep?

¹⁸Akoni nen Allah wene paga men yisuka, “Akoni motogo kagarigogi mende, Allah nen ndil inabusak dek negen werekma, ndil inabigin eti paga, it Allah ebe inakla kai diluk weyak kagarigogi mende eti ninggit diluk kagarinabigin ambegep?” [10] yiluk kolal mbalogo ʼbisuka.

¹⁹Kit Allah akla ambasike pagaat kinoba yi aik ndi aik esigit diluk kiligogi kalok, kinakla nen, “At ninebe walniyasike mende etiat oba panggot diluk dogusak, pano,” yiluk kinendainggen at oba panggot diluk dogolik kinobabut pano kagako dogono o.