Read Upper Grand Valley Dani 1Petrus 5 Bible Online

1Petrus 5 - Upper Grand Valley Dani bible

1Petrus 5

¹Kit Allah aʼburi inanggorlem dogoligogi eti kak, an esigit dilugat inanggorlem dogoligogo mende nen kinasuk omanggi wasik. At Kristus oba yi aik ndi aik kilik kilik watlagike eti an nilenggen kasigi. Nen, yabunggane Allah nen ebe winamerogo laʼbi wisigin eti wagonem, akoni nen pogorasugun eti an ninom pogot ninabugunat o. An nane enagogo kinasuk wasik.

²Allah nen, “An naʼburi domba nomolek negen esigit diluk inanggorlem dogono,” yiluk kinayonggo ʼbisike kagat, inanggorlem dogono o. Inanggorlem dogolik, kinenggaerek kinaʼit werek nggorlegat, akoni amberek nen, inane obatnerogo yokisasinem inanggorlem welagik, nen, kinakla nen, “Onggo omanggi woknisuwak,” yiluk ambasi dogolik inanggorlem welagik, kagako dogogup o. At te, kinakla arlenggen togo inanggorlem dogono o.

³Allah aʼburi inanggorlem dogowagaluk sumbusogo wokisasike eti inanggorlem dogolik, kinebe nggok negen dogolik, mep dagik-dagokogo kagarinako dogogup. At te, Kit pano kagakonem inilenggen kiyalok kinobabut waganogo kagako dogowagaluk, pano kagako dogono o.

⁴Esigit diluk kagako werekma, Ninewe Nggok andomba indewerek etnogo witluk nen, “Pano mondok kagako lagapma,” yiluk ta ae aʼbusuk ta ae aʼbusuk lagonem, onggo nggare-nggare mendago yiʼbiyiligogi eti kak, onggo pogorako mondok dogogun mende wokisagin o.

⁵Nen eti kagat, kit ap elege nagoromi. It amberek nen Allah wene paga men yisuka, “Akoni inenggaerek nen pogorakasinem Allah nen aʼit iyaligogo. Mende, inenggaerek inendainggen sebekogo dogogun kalok inaʼbuwa kiligogo,” [11] yiluk kolal mbalogo ʼbisukama werek eti paga, kit nen inarluwendek inapma unggiluk inane kologo kagako dogono o. Esigit diluk kagako dogolik, kit taʼbokogonat nen, kinenggaerek nen pogorakigidek inapma dogolik, kit amberek nen it amberek inanduwanengge welagik, it nen kit kinanduwanengge welagik, kagako dogolik yamak-yamak kagako dogono o.

⁶Esigit diluk, Allah nen yabunggane mendinaguwagaluk, yogondak ya kinenggaerek nen pogorakigidek, at inggi obatne werek mende apma unggiluk kinendainggen sebekogo kagako dogono o.

⁷Allah kinebe kinaʼbuwa eti paga, kit yi mende ndi mende pasik kinakla wene munini uwan ʼbero eberigogi eti togot diyalok, kinendainggen at oba panggot diluk dogono o.

⁸At Iblis, kinasili mende etnogo nen, singa yengge kelo anini weyak mende yi mende ndi mende kambokogo nagaluk ane ngge agan kweyarik liligogo eti kak, “Ta kak weyagat digin,” yiluk kweyakinabik liligogo eti kinobabut kwalogo kinilenggen panorogo dogono o.

⁹Esigit diluk dogolik, kinakla nen, “Ninagarlagi ninirugi o yi ai ndi ai agat oba inebe taʼbokogonat yi aik ndi aik kiligogi kagat, kiligogi o,” yiluk, at Iblis wagonem, ane kolkidek togot diyalok kinendainggen Allah oba panggot diluk kinobatnerogo mendek dogono o.

¹⁰Werekma, at Allah ebe pogorako mondok dogogun eti kak, kit Kristus kinom kunik werekma kinomat pogot kinako dogowagaluk kinayonggo ʼbisikemo, yogondak ya ʼbugurlagat kinoba yi aik ndi aik kasi dogoluk, yabunggane, at obabut pano mondok etnogo nen, kinendainggen awan mende ʼbogokogo kagat kinakik, korlet kinakik, kinobatnet kinakik, kambugut kinakik, kagasigin o.

¹¹Yi mende ndi mende taʼbokogonat at arligat inde dogolik pago mondok dogowak, yiluk, “Amin,” yigi o.

¹²An nen wene ʼberoat eti kinasuk warogo kinoba laʼbi wisigiluk, kolal mbaluwagaluk an nagot Allah aʼbut Silas obabut kumbulik kigirik nen, ayonggo ʼbigima mbalkemo kinoba laʼbi wagi o. Allah obabut pano nen kagat ninabigogo mende ebe yiat yiluk, an nilu dogolik eberogonat yokisigi o. Eti paga, kinendainggen eti paga panggot diluk dogolik, kinobatnerogo mendek dogono o, yiluk wene kolal mbalogo kinoba laʼbi wagi o.

¹³Kinagarlagi kinirugi Allah aʼburi at nen mikinakike mende o Babilon yoma dogoligogi mende nen keyagi watkinakik, naʼbut Markus nen keyagi watkinakik, yega o.

¹⁴Nen, kit-kit, naʼbuwa-kaʼbuwarogo keyagi kinambe sarluk wat-wat yilik lani o. Allah nen kit Kristus kinom kunik mende kinebe taʼbokogonat kinendainggen kambukogo pakisek dogowak o.