Read Upper Grand Valley Dani Yudas 1 Bible Online

Yudas 1 - Upper Grand Valley Dani bible

Yudas 1

¹An Yudas, Yakobus agot, Yesus Kristus anduwanengge etnogo nen, kit wene yi kolal mbalogo kinoba laʼbi wagi eti nagarlagi nirugi o. Allah nenat kinayonggo ʼbisikesik kinebe kinaʼbuwa dogolik, Yesus Kristus ake kinanggorlem werek o.

²At Allah nen kinebe kinaʼbuwa kigik, kinendainggen kambugut dinagagik, kit-kit naʼbuwa-kaʼbuwarogo dogobagik nen yiluk kagat kinakik, nggokogo kagat kinako dogowak o.

³Nagarlagi nirugi o. Kinebe kinaʼbuwa o. Wene Allah nen kit ninomat ndil ninakike etnogo pasik wene kolal mbalogo kinoba laʼbi wisigiluk nakla eberek mondok welagarik nen, yabunggane nendainggen sebelusak erlok dek agama, wene men pasik laʼbi wagi o. Eti, it akoni amberek Allah ebe inaʼit mende nit ninobake mbalek werek nggorlek ninakla unggi witluk nen, Allah obabut pano nen wokninabigogo mende eti it nen dagakogo wene ninat mende yokisasi dogolik, “Weyak mende yugunat kagako dogusak,” yiluk, ninewe Endaganggok Yesus Kristus obatneyak etnogo ebe togot diyalok, kagarigogi o. Esigit diluk kagarigogi eti paga, Allah nen, “Wene esigit diluk inoba ʼbigin,” yiluk yisikemo paganeat nen kolal mbalogo ʼbisukama werek. Wene Allah nen omanggi pasik nit aʼburi woknisasikemo ninendainggen oba panggot diluk werek eti mende, it eti nen deget duwogoluk kagakonem, kit nen irli waganogo kinobatnerogo pago dogobagik nen yiluk, kinakla nggagalogo laʼbi wagi o.

⁵Wene yokisagin yi, paganeat nen kinilu mendeat, yabunggane kinakla ebet dinagagin o. Ninewe Endaganggok nen aʼburi Israel mende o Mesir werekma ndil inakike mende, yabunggane it mende amberek inendainggen at oba panggot diluk welaguka dek mende inakike.

⁶Nen, at Allah nen it malaikat yonggo wusa ʼbiya wirigogo mende kagasusak mende sumbusogo wogisasike mendeat, it amberek nen, inagarlagi kagasusak mende inaka mbok lalok inenggaerek inaguma togot disukama, Allah nen kerle mondok dogogin mende paga ininggi kerle warogo o mondok amummo agat abel wemangge ʼbiyasikemo werek o. Esigit diluk mondok dogoluk nen, yabunggane akoni wene nggokogo inoba ʼbigin etinem, it inomat inoba ʼbigiluk nen, ininggi kerle piyal inabigin eti kinakla ebetni o.

⁷It kagakuka ndak-ndagat, it akoni o Sodom mende inom, Gomora mende inom, o unggul ineragalilungge mende inomat nen, kumi yogot paʼbiyigik, ap-ap, kumi-kumi kagasusak dek mende kagakik, kagako laguka eti paga, onggo kindu nasi mondok werekma mondok dogowagaluk, laʼbiyasikemo etoma werek, yiluk nit akoni taʼbokogonat didisi dogusak.

⁸Esigit dilugat, it akoni eti inaʼbi kiligogi salek inendainggen dek dogolik, inenggaerek inebe weyagat dakigik, ninombae Endaganggok inakla kai digik, mbogot oba pogorinabigogi mende eti inabok weyak yigik, kagarigogi o.

⁹At Mikael, malaikat Allah nen yonggo wusa ʼbiya wirigogo mende inewe nggok eti nen, it ap eti kagarigogi eti kak kagasu ayuk welagike. At nen, Musa ebe warek pasik, Iblis imbisak wene mbalko dogolik, wene mukogo mberitluk wene oba ʼbusak erlok mende, ayukogo, men yogokike, “Ninewe Endaganggok nen mbetkisuwak o,” [1] yiluk yogokike.

¹⁰Esigit diluk mende, it akoni eti yi wene ndi wene inonggodek dogoligat, abok weyak mbaligogi o. Esigit diluk mbalko dogolik, wam inendainggen dek mende nen kagarigogi eti kak, inabusak inilu atluk kagarigogi eti paga inobabut oba inebe weyagat dakaligogi o.

¹¹It eti Allah nen weyagarinabigin o! Alebat at Kain kagakike eti kak omborlik liligogi o. Eti at Bileam nggorlo kagakike eti kak, inenggaerek nen uang sabusogo korlawogoluk, esigit diluk kagarigogi. At Korah nen Allah ake, “Anat kagako dogogin,” yiluk it amberek wula ʼbiyagaluk kagakike eti kak kagarigogi eti paga, inebe nuk akaligogi o.

¹²Kit kinagarlagi kinirugi inebe inaʼbuwa nen kimbiri kinom omanggimo nandorlogo iyago nasinem, it ap eti inenggarli degat kinoba unggi witluk nen, akoni amberek inanggorlem welagidek inenggaerek inake arlek oba ebeko dogolik kinom niligogi eti weyak o. Su pano morla werekma mirli mende oba dabularigogo eti kak, kinom weyak niligogi o. Inebe, oisa miyo nigin dek mende kwiyakne nen obatneyak wolok liligogo eti kak liligogi o. Nen, omanggi, o enggen yikidek, engga mondok dek atlukmo, omanggen inom kenggonem mondok mbuk arigogo eti kak werek o.

¹³Nen, omanggi, i laut nggok yenggelekma sarin pulalek-denggalekogo aninirogo mondok kagako dogolik, wosirlagap mbalogo liyabi wirigogo eti kak, it eti yugunat kagako dogolik, inenggarli dek weyak kagarigogi. Kusagal ʼbindok-ʼbandok liligogo kak, Allah nen it eti mondok o amum werekma dogowagaluk inobalikmo ʼbiyagin werek o.

¹⁴Alebat Adam nen endak larik wago lagukasik, kurli 7 kurli paga, at Henokh endak lagike mende nen, it akoni eti wene inoba ʼbiyagin mende pasik men yisike, “Lakani. Ninewe Endaganggok etnogo nen agoromi at enggaerek nen yonggo wusa ʼbiya wirigogo mende inebe mondok dogalegat wogisek wusa wisigin o.

¹⁵Wusa witluk akoni taʼbokogonat wene inoba ʼbigik, nggokik, kagako dogolik, it akoni Allah ebe inaʼit mende inebe taʼbokogonat wene inoba ʼbigin o. It Allah ebe inaʼit dogolik yi weyak ndi weyak kagarigogi mende dombok wene inoba ʼbigik, Allah inaʼit nen weyak kagako dogolik inane korleyak at abok weyak mbaligogi mende eti inebe dombok wene inoba ʼbigik, kagasigin o,” yiluk yisike.

¹⁶It eti akoni inabok weyak mbalkik, mberisigik, yisi mondogat werek mende. Yi mende ndi mende inendainggen nen nasinem, “Warlok a,” yiluk inakla ambasi dogolik, eti mendeat kagakik, inenggaerek nen pogorakasi dogolik, yi mende ndi mende sabusogo korlawogoluk, it akoni amberek inane panorogo pogorinakik, yiligogi mende.

¹⁷Mende, nagarlagi nirugi o. Kinebe kinaʼbuwa o. It ap ninewe Endaganggok Yesus Kristus nen inayonggo ʼbiluk laʼbiya wagike mende nen wene paganeat yokisasuka mende eti kinakla ebetno o!

¹⁸It nen, wene men yiluk yokisasuka o. “O ilugun kurli paga dogolik, it akoni amberek Allah ebe inaʼit dogolik inakla nen, yi mende ndi mende inendainggen nen nasinem, Warlok, yiluk eti mendeat weyak mondok kagako dogolik, inane aik dagok yokisa wisugun o,” yiluk yokisasuka o.

¹⁹It eti Allah Agurengge inakla dek dogolik, inobabut akoni inobabut inikogat dogolik, it amberek pano dambulik werekma, minggirlogo kurli agorogo ʼbiyiligogi mende etiat o.

²⁰Mende, nagarlagi nirugi o. Kinebe kinaʼbuwa o. Wene Allah enggaerek nen woknisasikemo kinendainggen Yesus Kristus oba panggot diluk, kinendainggen korlerogonat dogono o. Esigit diluk dogolik, Allah Agurengge nen kinakla nggagalko nggorlek, sembayan yisi dogono o.

²¹Esigit diluk yisi dogolik, kinakla nen, “Ninewe Endaganggok Yesus Kristus ninebe ninaʼbuwa nen, nit yabunggane naberlal-kaberlal kagat ninabigin,” yiluk, anggorlem dogolik, at Allah nen ninebe ninaʼbuwa eti paga kit nen at kinom kunigat dogono o.

²²Akoni inebe o kali inom nausak mende, ndilogo wula ʼbiyiligogi eti kak, it amberek inendainggen mbere mende, inaʼbuwarogo ndil inako dogono o. Nen, it akoni amberek yi mende ndi mende inendainggen nen nasinem weyak kagarigogi eti su morla pano werekma, mirli weyak mende oba dabulagonem elokonggen inaʼit werek eti kak, it inobabut weyak kagarigogi eti kinaʼit mondok nen kinayukogo dogolik, inebeat, inaʼbuwarogo dogono o.

²⁴Kit ninombae Allah obatne werek erlok pakisek dogusak mende oba lagonem, kiniyok aʼbit dikogo warigidek panorogo pakisek dogoluk nen, at ebe pogorarigogoma etoma, wene kinoba ʼbigidegat, kinakla arlenggen kasi nggorlek menogo erlok ʼbinagi ligin mende eti keyagi wako doguwok o.

²⁵Ninombae Allah arligat nen ninewe Endaganggok Yesus Kristus kagakike eti paga, ndil ninakike mende etnogo indewerek obatneyak o, yiluk, at pogorakik, nggogot digik, kagako doguwok nen, erlo paga yi mende ndi mende walkigidekma Allah arligat welagike eti paga, yogondak ya nen, yabunggane mondok dogolik nen, esigit diluk pogorako mondok doguwok o, yiluk, “Amin,” yigi o.